避市大法：見friends+行山

最近個市忽上忽落，美團可以一日暴跌7%，第二日升返4%。小米話造車，然後整架玩具車，跟住又畀美國制裁，又解除制裁，今日又話開子公司，專注造車。

我short put接咗唔少貨，亦short call咗兩隻要畀貨人。做咗short side,就唔想睇市，等到期日，要接就接，要畀人就畀人。唔理啦。

咁唔睇市，就見吓朋友仔。星星好好，知我畀上手租客鬧，教我點處理。我未諗到點做最好，再想想。

約咗讀碩士嘅朋友仔一齊行山。當日我最細，今日大家都退咗休，得我仲補習，但都冇返學校教lu. 佢哋好叻，Derek最勁，做lecturer，不過身體問題，退咗休；Mr Li 開模型舖+教二胡+補中文嘅；Ann退而不休，離開學校，由老師變身做學生，去ERB免費學插花、做包點。佢話學到好多嘢，搞到我都想去上吓堂，學吓嘢。Polly 老公開廠，生意都大嘅，佢自己又有幾層樓收租，聽佢講康怡花園、太古城嘅租客，都好準時交租，位位月租3萬幾。但她細心溫柔、善解人意😚，次次行山，都預先焗定好好味嘅腰果、核桃😋。昨天見我大肚，怕扭傷腰，還幫我孭Muimui. (班男生真係冇鬼用🙄）。

疫情關係，加上補習係one man band,已經冇乜見人。感恩有這些好朋友，出嚟見吓面，傾吓偈。唔係真係會自閉。😄

P.S. Muimui去完兩日露營，今日攰到闔埋眼行山。好彩我哋只係hea行畔塘徑，仲行1個鐘就回程去飲茶。唔係佢可能虛脫。