妹妹幫我影大肚相

好耐冇擺嘢上Facebook, IG少用。唔想畀相熟朋友、親戚指指點點。
最後決定擺喺blog.唔晒相啦。

昨天是幸運日。

妹妹又幫我拎咗架免費BB車。架車好靚好新，原物主超有禮貌，仲話已經洗乾淨晒。
而家大埔、葵涌，都有BB車用喇。😁

晚飯後，妹妹話："7個幾月喇喎，要影大肚相喇。"
我："我唔識擺姿勢喎。"

佢上網搵相，再教我擺poses. 22:00開始影，23:30才影完。
我走咗，佢仲執相執到凌晨1點。

有咁sweet嘅妹妹，我真係好幸福。
媽咪都嚟陪我玩。不過，我哋好少咁親密，妹妹叫我哋做嘅姿勢，例如互相錫面珠，搞到我哋笑晒。妹妹仲叫我哋，深情咁望對方，OMG! 笑死貓喇。

一哥都好配合。佢本來唔肯影㗎，我話: "我幫你慳返$1000喇，唔駛出去影喎，仲有妹妹幫我哋做攝影師，你唔係唔願意啩?"
佢即刻連聲話好好好。😂

呢2張，好難忍笑。
難得一哥跪喺面前，我只係不斷諗起，佢蝕大錢嘅Tesla long put. 
仲幻想到佢跪喺度，話自己輸晒d 錢，求我原諒。😂😂😂

笑到眼水都標埋，妹妹喝令我冷靜d. 
佢話企到好攰，要快d影好。😜

柏霖、珮琳，見我哋影得咁開心，又過埋嚟一齊影。

妹妹話我高低眉，藐咀藐舌就最好，塊面對稱d. 😝

佢問我: "陀B辛唔辛苦呀?
你有咩同濼言講呀?"
我整咗個咁嘅表情回應。😒

呢張傻更更，妹妹叫我學人擺嘅姿勢，個肚好大，好難想像係我身體嘅一部份。

晚飯超好味。一哥買餸，親自下廚。有湯飲，有超新鮮嘅海鮮餐，仲有又香又甜嘅金枕頭，做飯後甜品。😋😋😋