營商之道: 低成本的創業模式 -- 承包制 (7-11)

收到谷友傳來，7-11正進行Dreyers 雪糕特價，雪糕控的傻貓馬上留意住所附近的7-11店。

明明睇Google Map,屋企附近只有2間7-11.

然後，我發現單單在葵興港鐵站附近，已經有4間7-11. 
一間在港鐵站內A出口，一間在出口對面，葵涌中心商場地舖，一間在2分鐘路程內的新葵興廣場地舖，還有一間在光輝圍，佢對面馬路仲有一間OK便利店。

開便利店，真係咁好搵?🤔

🤨我的認知: 
生意好，經營者不會特許經營。
肥水不流別人田，獨家經營，賺到盡，應該係人性。

沒有生意，或者市場競爭大，太多同類產品/服務，才會容許特許經營。

可是，7-11的店舖的佈置，千篇一律，毫無個人特色，卻"梗有一間喺左近"。這現象頗有趣。

冇錯，創業成本真係好低，只須48萬 - 78萬，用作特許經營費及存貨按金，而且，租金由牛奶公司支付。但是，加盟者真的有錢賺嗎?再進一步，加盟者有機會擴展版圖，由一變二，甚至壟斷該區的便利店市場，或者將據點，分佈不同區域，做大個餅嗎?
投資，要睇成本、風險、回報。
如果賺埋只夠上繳牛奶公司，就完全不值得考慮。👎

懷著滿腦子問號，傻貓開始找答案。
首先，我上7-11的網頁，了解加盟的條件。然後，請教咗一位開7-11嘅朋友個老公，了解實際運作時，所面對的困難。

加盟的條件

一般特許經營合約年期：5年。
有意創業者，可以先參加特許經營講座，了解開業資料。
店主無須具備零售經驗，只要通過面試、評估測驗，但必須參加由牛奶公司提供的培訓課程，為期60-90天。
培訓期間，店主需要到店舖實習，並參與課堂培訓。實習期間，你同樣要做店員，執貨、洗厠所、做通宵更，不過零工資。

受訓完結後，你要等4-8個月，牛奶公司揀好舖，會通知你。通常係搵你接手，本身已經開咗，店主又唔想再做嘅7-11。 有時，也會是全新位置，但附近有幾多間7-11同你競爭？你自己要識計數。

雙方簽訂合約後，如果你打退堂鼓，你所交的特許經營權費（48-78萬），就泡湯了。

經營7-11的挑戰

表面睇，開7-11，創業資金少，好多嘢都由牛奶公司幫你預先安排，例如: 選址、裝修、物流管理、財務（報稅）、保安。
水電費，仲係牛奶公司、店主，一人一半。好公平喔。👍

咁店主要負責乜嘢開支?🤔

員工薪酬福利

店主可以自訂員工的月薪、時薪。
你想易少少請人，咪提高薪酬咯。不過，經濟好景時，請人真係唔容易。

設施維修保養費

呢筆錢可以相當大。放冷飲、雪糕嘅冰櫃，壞咗就要換。冷氣機壞仲麻煩。爆水渠、屎渠，就你自己唔好彩，維修費堅貴。牌照費冇得避，當定額罰款。

貨品損耗、雜費
夜晚被打刧，或者有人高買，你如果得1個員工，佢要睇舖，根本唔會追賊。安全最重要，你都唔想人哋阿媽個仔有咩閃失。而且報警要落口供，冇人睇舖，仲大鑊，唔駛諗續特許經營權。

其他注意事項

要守規矩

7-11不時有特價優惠，或者換公仔推廣計劃。
如果你唔跟公司規矩，擅自提早畀人換公仔，或者做特價，咁下次嘅優惠，就冇你份喇。

多次犯規，就冇得再續特許經營權。

要交遊廣闊、識請人

店主要確保有人睇舖。好多時，大家互相補位。A舖唔夠人，由B舖當日本來放假嘅兼職去幫手，但不時發生員工口頭搵人頂替，實際對方又冇答應，結果臨時冇人睇舖。店主就要自己返嚟。
通宵更勁難請人。過時過節，或者考試季節，又係難請人。好多後生仔，唔出聲就射波，間舖唔可以冇人睇，你要預自己24小時待命。

貨源、定價要跟足

就算你搵到超正嘅貨，價格仲超抵，唔好意思，你身為店主，都冇權喺舖內賣呢啲貨。貨源、物流，係牛奶公司負責，唔關你事。

附近開多咗間7-11,想減價迎戰？想賣廣告，谷銷路？

唔得喎，定價權喺牛奶公司度。做咩推廣、幾時做，都係佢話事。

投資回報

投資，最重要睇回報。咁回報係幾多？賺到幾錢？

牛奶公司講明：

“我們不會提供回報承諾。因為回報金額會視乎生意額、市場競爭、營運開支及特許經營商的管理能力等因素而有所變動。”

咁佢會點幫你提高競爭力？咪就係市場推廣咯，搞吓特價優惠、送吓公仔。

但佢幾時喺你舖頭附近，開多間7-11,唔會話你知。你知道，都冇得say no.

當然，如果你夠勁，大可以攞多幾間舖嘅經營權。7-11網頁，都有幾個成功個案。

成功個案分享
https://www.7-eleven.com.hk/zh/franchise/successful-franchisee

總結

做完資料蒐集，傻貓自問冇能力開間7-11。寧願做顧客，買雪糕，慢慢歎。

唔知大家又有冇興趣，自己做老闆，開間7-11呢？

營商之道：你適合創業嗎？

近日愈來愈多朋友，問：“你仲有冇返工？幾時放產假？”

傻貓莞爾：“我冇返工近2年喇，自己開舖，手停口停喔😂

不過做嘢時間長短，幾時休息，可以自己控制😁”

朋友嘅問題，出於關心，但也突顯自僱創業，與受僱打工嘅分別。

安全感

創業，只適合不安於現狀，敢創新、冒險，肯豁出去，又願意承擔風險的人。

當你放棄穩定工作，代表未來收入不穩定，甚至愈做愈蝕。你要識節流、計成本、開源、宣傳。

最重要：你要有輸晒嘅準備。計錯數，又唔肯認輸，仲有機會欠債。如果你同朋友夾份，可能friend都冇得做。家人借錢畀你做生意，你冇錢還，以後可能就要睇人面色、聽人單單打打，有排抬唔起頭。

親力親為

呢個世界，冇免費午餐。

想用最少嘅時間、精力、勞力，換取成功？如果你有好橋，歡迎分享。

即使你好識知人善任，請到好多得力助手，你每日仲係要親力親為，解決問題，才能有機會成功。

如果你連決策權都下放埋，你就會變得可有可無。

休假

打工仔渴望放假，好正常。但創業者，最好日日有生意。休假愈多，收入愈少。開網店都係，你覆遲咗，個客可能就幫襯咗第二間。

家人支持

屋企人嘅取態，都好緊要。

以前打工，你每月準時出糧、畀家用。創業呢？

好多生意，開始時都要捱，儲客、建立商譽，甚至低價搶客。你要預備“付出得不到回報”。

如果你本身係經濟支柱，咁你嘅壓力就會超級大。或者你早已儲咗筆錢，但做生意總有好多時候，“計劃追不上現實”，好多突發嘅額外開支。

當家人又突然急需用錢，你會點做？

資金鏈斷裂，係好多生意失敗嘅主要原因。

家人願意在緊急關頭，出手相助嗎？

佢哋有冇咁嘅能力？

大時大節，你間舖會休息蝕租？還是繼續營業？

重要場合，你缺席家族聚會，家人理解嗎？

市場定位

傻貓屬於專業創業，用返教學校嘅教學、訓輔、溝通技巧，製訂教材、出卷嘅經驗，仲有英文教育文憑、訓導專業文憑、教育碩士、註冊教師等資格，開補習社。

我習慣即場出筆記，冇存貨壓力。所以，守業成本好低。

附近商舖嘅葉Sir、星星，亦不時介紹學生給我。葉Sir唔收介紹費。星星、舊生、家長介紹學生，有$100介紹費，推廣成本好低。

分享咗我嘅創業經驗，你呢？你嘅市場定位係咩？你提供嘅係專業服務，還是用低價殺出血路？市場需求穩定嗎？

盤生意或產品，未必要好創新，但屬於一次性嘅消費，還是生活必須品？你本身有冇人脈？在紅海血拼，分分鐘粉身碎骨喔。

明確時限

創業前，會訂立時限嗎？例如：1個月內要回到本，3個月內收支平衡，7個月後有20%純利，3年後開分店。

訂立時間表，定時檢討進度，可以及時發現問題、提高成功機會。

員工相處

如果你盤生意，唔可以one man band, 請人都係好大學問。叻人，又有經驗，人工自然高，甚至唔係齋睇錢，而係要權力、自由度、彈性工作時間。但係點樣留得住好員工，就考驗你嘅觀察力、溝通技巧、同理心。

點先係好老闆、好上司？傻貓唔識。

不過，之前喺茶記做樓面，見一哥同唔同嘅下屬，用完全唔同嘅相處方式，比喺學校校長、科主任對老師嘅溝通方式，大為不同。

學校唔係做生意嘅地方，大家最多玩吓辦公室政治。但出糧嘅係教育局，教師冇乜大錯，校長要炒常額教師，都唔容易。

茶記唔同，周街都係食肆，有技術又肯做嘅廚房師傅，好搶手。少啲智慧、同理心，佢哋隨時劈炮，即日辭職。

（有興趣嘅，可以睇返舊文：

茶記小妹：廚房一哥）

法規

每個行業，都有既定法規。

開茶記，你要有商業登記、普通食肆牌照、符合消防條例。

補習社呢？

根據《教育條例》第3(1)條，任何組織於任何一天向20人或以上，或同時向8人或以上，提供幼兒、幼稚園、小學、中學或專上教育，或以任何方式提供任何其他教育課程，包括以專人或郵遞服務交付的函授方式，均屬「學校」，必須向教育局註冊（即俗稱「領牌」）。

點解傻貓要離開超吸客、交通方便南豐中心？咪就係其中一次查牌時，補習社同一時間，多過8個學生咯。

收到警告信時，我真係嚇到唔知點好。😱

好彩葉Sir當機立斷，1 星期內搵到地方搬。唔係再斷正，我就有機會被吊銷教師專業資格，罰款$5萬幾，仲有刑事責任。

申請補習社牌照，要經教育局､地政署､土地註冊處､城市規劃署､消防處､屋宇署及衛生署7個政府部門，葉Sir請咗公司協助申請，審批超過一年，都係失敗。因為每幢樓都有既定數量嘅“學校”牌照，南豐20幾層樓，超多大大小小的補習社。就算我哋符合晒要求，但根本冇牌可以增發。

無奈敗走。

記住：唔同行業，有自己嘅法規。唔想誤墮法網，面對法律責任，就要做足功課。

營商之道：補習社點先賺到錢?

傻貓開補習社，面對緊幾個問題。

搵referral

以前冇呢個問題，因為舖頭喺南豐中心 6 樓，多旅行社、僱傭中心，好多生客 walk in.

今年成績出爐，好多P.6 學生都band 1 中學，基本上全部學生成績都突飛猛進，感謝、謝謝之聲不絕，但係新學生 ５ 隻手指數得晒。
即係話，有成績、有口碑，但未能轉化做referral rate.

我冇營運資金的壓力，$5000, 已包管理費、電費、租金，寛頻月費＄228，有限數。
只係我想幫多d學生，希望佢哋唔會咁驚英文。
英文成績好咗，佢哋會更有自信。

好似今日，個學生交份卷嚟。我忍住鬧佢嘅衝動，問佢覺得自己考成點。
佢竟然話: ＂我覺得自己進步咗好多呀。上年冇補習，成績係個位數。今次有 30 幾分，媽咪都讚我好大進步。＂
講嘅時候，佢嘅笑容，散發出嚟嘅自信，令我將本來要鬧人嘅說話，變成欣賞嘅眼神、語氣：
＂咁咪好咯！其實你好叻呀，進步咗咁多。只要你唔放棄，下次就唔止 30 分，可能係 50, 60 分喇。＂

學做生意

我一向唔將補習，睇成一門生意。

因為唔識做生意，又想跟貼學生的進度，我不時即堂預備筆記畀佢哋。
所以，每堂師生比例，只能做到 1對2至5.
大部份時間，係1對3.
所以上課時間頗長，但收入不多。

從來唔會 sell 客，亦唔會特別去湊家長、學生。
從來只係針對佢哋嘅英文強弱項，度身訂造筆記、教材。
學生成績好，係正常、合理嘅。

因為每個學生，嚟到都好自然地會願意改進。
其他同學，個個都進步神速，佢哋亦會有壓力，迫自己進步。
而且，我嘅學生，絕大部份來自名校或荃灣區內，較高排名的學校:
協恩、喇沙、拔萃(直資)、英華、宣小、荃官、保祿六世、林護、善德、德望、陳兆民、可風、安柱、仁紀、仁立、民生、寶血思源。
佢哋校內嘅競爭好大，學如逆水行舟，不進則退。所以佢哋絕對唔敢鬆懈。
所以，佢哋進步，係意料中事。
只有極少數學生，係愈補愈差嘅。

Elvis 提議用逆向思維:
＂如果要每個月賺到10萬，按照你宜家既idea，每個月要做到幾多個客先至達成到?
做生意先計左有無足夠盈利空間先。
你覺得賺幾多先得？ 如果要留到時間俾自己既話＂

睇返過去 2 年至今的補習收入 （未扣營運開支）：

	2019-2020	2020-2021
September	46,500	28,000.00
October	50,410	33,870.00
November	57,420	36,060.00
December	46,710	36,360.00
January	46,010	39,800.00
February	16,080	36,920.00
March	29,130	32,885.00
April	31,180	50,060.00
May	36,470	54,885.00
June	42,910	37,700.00
July	30,350
August	8,820

月賺十萬，似乎是癡人說夢。
如果請家長介紹學生，每人介紹 1 個，人數就已經雙倍了。
不過，開口要求 referral, 又好像有點尷尬。
不是有麝自然香嗎? 
想到這裡，我又自己和自己打架了。

或者問問妹妹啦。佢係 top sales, 公司之前特別開個位畀佢，負責跑數。
佢叻過我好多。而且，佢講嘢圓滑，客人通常好願意同佢做朋友，因為感覺到，妹妹係真正關心佢哋，由佢哋角度出發，幫佢哋解決問題。

出租補習社

另一個傻貓面對嘅難題，係點樣善用空間、空餘時間。

以前在南豐，我經常出租補習社。
$120 - $150/ 小時，都好多人租。
有人租嚟面試，有人租嚟開課程，教繪畫、開功輔班。
我甚至請外藉導師，返嚟教 public speaking, debate, drama.
學生、家長都好鍾意呢類短期課程。
我又可以乘機偷師，學吓點教 language arts. 亦可以睇到學生愉快學習的一面。
家長見到學生上課玩遊戲的照片，又好開心。
學生有得玩，有得走嚟走去上堂，當然亦好鍾意呢種學習模式，冇咁驚講英文。

我想free多d自己時間，唔想日日代課、補習。
(雖然，我好鍾意代課，可以接觸到最新的教育資訊、了解外面學生的能力，仲有好多教材、試卷。代課日薪也不錯。)
以前冇所謂，教書、補習係我最大樂趣。但考慮到要預留多少少時間，畀濼言小朋友，只能減少授課時間，也要減少出去不同的中學、小學代課。

於是我諗:
"可唔可以，喺我唔補習嘅時候，畀其他朋友開班?
既能善用空間，朋友又唔駛特登租個地方上堂。雙嬴。"

問題係: 而家補習社，距離港鐵站較遠，而且都幾偏僻，平日全日都係小貓三幾隻。
貼咗 posters 喺門口，都冇人睇到。
我又唔識 sell courses, 原有學生都冇興趣報讀暑期美術課程、高達模型班、小組鋼琴、個人小提琴班。
花咗好多心思，邀請咗各方好友，又搵埋星星幫手，都係得個桔。
一個客都冇。灰。😔

不過，呢度咁偏僻，會有人肯租嗎?

或者，我又試吓上網搵搵資料，睇吓有冇人想喺荃灣開班?

$50/小時，$80/小時，$100/小時，都冇所謂。
反正試試吧了。

就呢堆問題，我厚面皮地請教谷友 Elvis. 
佢分享咗一個個案，畀我反思:
"以前有人開班教記憶法，當時賣得好好。 佢公司每個月淨係成本都超過100萬港幣。
點解家長會肯俾錢呢?
原來佢賣既唔係記憶法，佢係賣梗「記到野既希望」，呢個希望比起實際教學內容更令人願意俾錢。"

換句話說，家長報讀課程，只係結果。
倒果為因，了解佢哋報讀嘅初心，就可以擴闊客源。
即係好似妹妹講，要搵到個 hot button, 知道個客真正想要乜嘢，咁先可以令佢有購買意慾。

請人教班

老實講，請人開班，自己要做老闆，我未有信心。
強積金之類，我又唔識搞。可能仲要幫員工買勞保?

Elvis 教路:

"用現有既能力去賺錢，叫職業。 為左賺錢去提升能力既，叫生意。
今天你補習已經好叻，而你想用到其他人既時間去幫你賺錢，唔好俾個行業限制左你。
你計一計數，不斷做假設，睇下咩模式先做到你既目標，然後先再反過黎去睇果個模式係咪可行"

"計數還計數，計數時唔好諗可唔可以，計左先。
列哂出黎，先再諗有邊啲位唔可行，咁樣快好多"

"諗野唔好用個腦，用隻手同計數機。 寫出黎，列哂出黎先，計數"

"唔好一路brainstorm一路計野，抹殺左好多可能性。
要冷冰冰地計數先，個答案原來白痴既、唔可行既，都好丫，你知道呢個模式係唔值搏"

呢層我未諗通。千頭萬緒，暫時仲係一舊雲。
計數，我唔識。係單位數都經常加錯那一類。
或者先調整心態，才最重要。
我總是欠缺那點積極性。似乎這才是關鍵。
最大的敵人，仍然是自己。

營商之道: 開設暑期課程遇挑戰

我認我突然太進取。

搬嚟呢個蚊型舖後，好多舊生嫌遠，唔夠南豐中心就腳，冇跟過嚟。
加上社會運動，好多好多band 1 學生移民。我少咗好多聰明聽教、成績進步顯著嘅學生。
疫情係最大打擊。最慘澹時，我月入只有8千幾蚊。

近日復課，我的學生人數突然颷升。
之前消失的舊生，因為種種原因，突然又蒲頭。
補習社收入急增。

開設多元化暑期班的初心

本來一切都順順利利。但傻貓的冒險基因又啓動，開始又有好多諗頭。
今次，我見之前疫情，學生在家上Zoom,有啲家長有2個小孩，要趕帶1個返學，另一個在家Zoom,疲於奔命。 想趁暑假，畀返家長me time.

我幻想嘅畫面: 家長可以放低小朋友，一個早上/下午，安心去做自己喜歡嘅事，見吓朋友，做吓facial，錫吓自己。

同時，學生又可以唔駛困在家，可以同年齡相近的小朋友，一齊上堂，學吓中、英、數、普通話。上完學術班，又可以上興趣趣班，砌模型、３人鋼琴合奏、小提琴、畫吓畫　（art jamming），整吓紙黏土、整少少簡單嘢食。

碰巧今年好多中大型補習社、學校，因疫情未竭，不敢帶學生，走出課室。 佢哋做開２０幾人一班，咁我呢度只係小班２—５人一班，應該有得諗。

困難

所以我聯絡咗唔同嘅朋友，睇吓大家可以教咩班。

我目的唔係賺咩錢，亦唔知呢類興趣班，有冇人報名，有幾人報名。 都係試吓睇吓，自己能力內，可以為家長、學生、朋友，做到d乜嘢。

不過，一齊brainstorming的朋友，建議開辦半日營。 佢想學生係同一日嘅３小時，完成晒學術＋興趣課程。 咁就頭大喇。

我一向冇乜規矩。英文班上課時間，一向彈性。同學可以一日前通知，任調日子、時間。 大前提係: 我有位就得。而學生／家長，又唔介意唔係同級／同能力。

暑期班，我只規定: 一次過交8堂學費，而且8月底前，要上完。（不過去年疫情，暑期班上到１０月，才上完。）

佢哋鍾意8月尾，1次過上晒8堂，都可以。

也有學生7月中至7月尾上晒，然後去玩。

有時學生會連續2堂咁上堂，我冇規定佢哋點樣安排時間。

一直以來，我這種冇所謂嘅性格，都冇遇到咩大問題。

但今次，要夾其他導師上課，由於空間有限，學額亦有限，加上每位導師不時改動課程收費、可以上課的日子、時間，我的數學又差，日子和時間，都是數字，於是，我頭大到不行了。

仲有，我本來暑期班，已經有９折優惠。如果學生同時報讀兩個或以上的課程，會再有９折。咁９折再９折，我收少咗好多學費。

同時，我冇預計收取導師任何租金。 因為葉Sir 一直補貼我的租金，提供晒所有傢俬、影印機、A4紙，又冇收我電費、管理費，所有嘢都係佢提供嘅。我只需要專心教學，其他冇嘢要理。

咁我將心比心，別人這樣幫你，你也應該這樣幫人喔。 可以在自己能力範圍內，略盡綿力，做到共贏，就好了。

令人頭痛的導師朋友 可是，問題開始接踵而來。 現時，已經有導師朋友，不時改動上課時間。有時我放假，他突然約了學生上課，我要特地花４５分鐘回來開門，再花同樣時間回家。其實身心都很累。 有時，我實在未能趕回來開門，只好麻煩葉Sir上來開門。 這位導師，以前是中學教師，現時退休，卻堅持單對單補習。 我原本和他商量時，他同意小組教學。我每星期，只需要提供一節時間，給他教授中文。 結果，他現在不時不定期出現。 我的課程很多時很full, 根本沒有位置給他上課。於是，要調動我的學生上課時間。但這樣其實對我、對我的學生，都不公平。為了他那一位學生，我要改動4-5位學生的時間，還要通知家長。這樣改來改去，好頭痛，也很麻煩。長遠下去，相信家長、學生都會很反感。 這位導師，這個月突然交$100，作為影印費。我轉手就交給葉Sir了。 葉Sir也沒說甚麼。他只是不願意介紹學生給這位導師。我也不好說甚麼。

總結

可能我實在不太懂得做聯絡人，以及處理協調、宣傳的工作。 現在只感到頭痛。 希望自己盡快能夠理清思緒，好好安排今年的暑期課程。

營商之道：如何得體回應投訴信 （正反事例）

前日傻貓就茶記嘅員工態度、衛生環境，寫咗封投訴信。當日員工已經即時取消一哥的早餐費用，因此，傻貓費神寫信，主要係想管理層正視問題，而非要求賠償。

面對投訴，茶記翌日，出動董事親自回應。

作為消費者，我很欣賞該茶記集團的回應。
首先，發信人語氣誠懇，措辭得體。
他先表達感謝，再致歉。收到董事親自迅速回覆，我完全感受到對方的誠意。
他直截了當，正面表示會作出內部檢討及跟進。姑勿論他是否真的會跟進，但最少沒有砌詞掩飾。
文章結尾，他再次表達謝意，並作出祈使。
用辭簡潔，態度認真，令人滿意。

收信後，我簡單回覆。

想不到對方差不多秒回。
值得稱讚。

後話:

這次寫投訴信，單純為反映意見，對方回應得體，希望假以時日，情況可以慢慢改善。
其實食肆衛生問題，很多時只是食客看得見、看不見的分別。
反而員工態度問題、該店水吧大佬的做事方式、員工的工作態度，更值得該集團檢討。

走筆至此，傻貓突然想起之前過年，有很多人於某店訂了盆菜，但貨不對辦，甚至收不到貨。該店於面書出帖回應，冗長無序，而且予人推諉塞責之感。不少人閱畢，不但沒有消氣，反而火上加油。

單看post, 店家當日交通運輸安排混亂，因街車"坐地起價"，導致無法準時送達盆菜。
如果我是消費者，就無法接受這樣的藉口。
朋友Mr Li開設模型店，他也不時表示: 日本的分銷商，往往先供貨給大型模型店，他們在首發日，有時入不夠貨。為了準時交貨給預早訂購的客人，他們寧願蝕錢，都要清晨到大型模型店高價入貨，再根據自身的訂價，賣給客人。

從帖文可見，盆菜的材料，原來和宣傳亦有出入。而將貨就價，是店家出於利益的考慮，有違顧客利益，大可不表。如果我是顧客，閱後只會永不錄用。

帖文一直強調有提供貴價材料。可是，店家有責任根據宣傳時的材料備貨、送貨。它自行改變材料配搭，妄顧客人感受，損害他們利益。

還有，盆菜竟然有咖喱卷。傻貓孤陋寡聞，還是首次聽聞。

店家表示六成顧客滿意份量。換個角度，就是四成人已明確反映不滿。

這不是單純的數字遊戲，而是店家必須嚴肅正視的情況。

開門營業，就算只有幾位買家反映不滿，店家都絕不能輕視。星星之火，足以燎原。店舖最重要的資產，就是商譽。消費者對你失去信心，頭也不回，自然不可能帶來“返頭客”。

相反，如果商譽良好，建立忠誠的客戶群，他們會自動成為你的centre of influence,用口碑替你找來更多顧客。這樣，生意才能愈來愈成功。

事件發生時，正值過年。顧客無法如期收貨，加上食肆實施限聚令，自然大失預算。在佳節與家人共聚天倫、和親朋好友在家高談闊論的渺小願望，頓成泡影。此時，店家僅承諾退款給完全沒有收到盆菜的顧客。其他延誤送貨，為客戶造成的不便、損失，卻隻字不提。彷彿負責人自己都擔任步兵送貨，已經仁至義盡。

其實，準時送貨是店家責任。任何理由，都只是藉口。

但看面書留言，竟然也有人聲援: 該店是黃店，大家手足應該體諒，藉以鞏固黃色經濟圈。

傻貓無意就政治取向置評。只想指出: 店家有責任準時提供產品；消費者有權索償。

另外，該店竟然連哪些客人已付款訂購，卻沒有收到盆菜，都找不到記錄。
這實在匪夷所思。
按理店家應該有清晰記錄，列明客人的電話號碼、送貨地址、所訂盆菜數量、份量。

保留清晰、有系統的訂單記錄，亦有助店家，跟進售後服務，並方便日後進行推廣活動。


大家也可以借此機會，對比一下，兩間食店面對投訴時，不同的回應。
你是消費者，以後會怎樣看待這兩間食店?

營商之道：創立手工咖啡品牌的城城

 

年三十晚，妹夫怕我夜歸，派了同事擔任柴可夫。車程不短，傻貓開始跟這位只有數面之緣的年輕人，閒聊起來。

「有時都會攰㗎。始終返咗成日工，放工、放假，所有時間，都用嚟整咖啡。」20幾歲的城城，是一個平凡的打工仔。日間，他與我的妹夫共事。可是，他對手工咖啡的熱情，促使他全情投入，利用工餘時間，創辦自己的咖啡品牌。

創業，從來不容易。作為一個名不經傳的初創品牌，城城明白自己的侷限。咖啡迷可以不假思索，在大型咖啡連鎖店，購買咖啡豆。可是，極少消費者會透過網購，單憑品牌名稱、產品介紹，就下單購買陌生名牌的新產品。因此，城城決定擺攤，增加自家產品的曝光機會，並提供免費試飲，成功吸引了一批忠實客戶。

可惜，受疫情影響，遊客區人流銳減。周末市集、跳蚤市場，在限聚令下，不是關閉，就是延期。此路不通，反而刺激城城和他的戰友，開拓更多銷售渠道。他們開始進駐商場，短租幾天，提供試飲及銷售。而且，他們游說到2間便利店，讓他們的樽裝冷萃咖啡上架。由於訂價比市價略低，產品具備相當競爭力。

冷萃咖啡不能存放於室溫太久，否則味道會大為失色，甚至變酸。為了趕及將製成品，及時送到銷售點，城城和戰友，經常與時間競賽，犧牲休息時間，已是等閒。

可是，他們很快迎來第二次重擊。

有一天，他們如常擺攤，突然一堆食環署職員，來勢洶洶，勒令他們馬上停業。原來，根據香港的營養資料標籤制度，所有一般預先包裝的食物，都必須貼上營養標籤。

他們銷售的產品，主要是浸泡式咖啡包、咖啡豆，樽裝咖啡只佔少量。缺乏銷售經驗的城城，一直以為咖啡只是由咖啡豆、水所組成，無須貼上標籤。這下子，大家突然陣腳大亂。

冷靜下來，城城和戰友積極研究解決方法。終於，他們發現：由全人手新鮮釀製的咖啡，並無添加防腐劑及其他物質，無須貼上營養標籤。不過，他們需要提交不少文件，向政府申請豁免。

食環署職員表示：收到投訴，才會動員處理。城城他們曾經懷疑是前度拍檔搞鬼。這位前任，資金充裕，具備營商經驗，但是合作期間，多次跟眾人意見不合。就在他們派專人到老撾，親身視察、揀豆、入貨後，這位拍檔突然退出。後來，他另起爐灶，但仍然看他們不順眼。當然，這些只是懷疑。後來細想，前任搞鬼的機會不大。商場如戰場。縱使不是這位前任拍檔，要在競爭激烈的咖啡市場，爭一席之地，成功生存下來，也絕不簡單。

聽著城城平實地道出創業所面對的難題，娓娓娓道出拆彈的經過，傻貓著實得到不少啓發。還有，他言辭間，不時提到：女朋友、女友哥哥、自己家人，對他的無比信任、全力支持。這些就是他堅持下去的理由。他還不忘感謝的我的妹夫，願意深夜借車給他收攤載貨。這樣懂得感恩、珍惜身邊人的年輕人，令人欣賞。

祝願城城的MateCoffee,有朝一日，能夠做到街知巷聞，成為香港另一個特有的本土品牌。喜愛咖啡的香港人，亦有多一個好選擇。

有意嘗試新事物的咖啡迷，如果想支持一下這位初次創業的年輕人，可以在IG，知道他們最新的動向。

連結：https://instagram.com/matecoffeehk?igshid=skdv92s7uqnl

營商之道：面對走數家長，應該點做？

 昨天有位新同學，報讀中文班。

由於是第一堂，他又沒有帶備任何試卷、練習，我不清楚同學的語文能力，只能給他一份其他學校的閱讀理解、寫作試題，讓他試試。期間，他不時發呆，需要多次提點。不過，進度不錯。

想不到，今天突然收到家長訊息，說孩子回家，因為老師太兇，怕得哭了。

 

我非常肯定，昨天完全沒有責備他。再說，也實在沒有責罵新生的理由。他們本來就是一張白紙。如果甚麼都懂，就不用來補習了。

因此，為免誤會，我向家長描述昨天的上課情況，也提醒她留意小朋友的行為，背後可能有其他原因。但無論如何，小朋友說謊，很多時候，只是偏差行為的起點。如果事件重複發生，而家長仍然不知就裡，小朋友長大，就有機會衍生更多行為問題。

怎料，家長竟然說，我對其他學生的態度差劣。看到這個，我真的呆了好一陣子。然後，我找來昨天上課的學生名單，仔細研究。昨天中文課前，那堂英文班，上課的孩子都是尖子，全部都乖巧、勤力、有禮。我昨天可是完全沒有責罵學生。相反，因為農曆新年假期在即，上課氣氛頗輕鬆。

我習慣下課後，才聯絡家長，告知學生的上課情況。這位家長卻以為老師一定要出來當面講解。對我來說，這只是小誤會。因為大部分家長，都是舊生家長轉介而來，知道堂與堂之間，無縫交接。有問題，晚上whatsapp我就可以了。

可是，認真細讀，才發現家長原來想賴帳！老實說，我真的非常憤怒。

昨天，學生不是來試堂，而是正式上課，家長亦清楚繳付月費的安排。可是，上課前，家長才表示帶不夠現金。我不想他們白行一趟，就讓孩子先上課，她答應之後補交學費。

就算你去餐廳用膳，侍應態度不佳，你還是要為你吃得一乾二淨的午餐，結帳。怎麼可以下課後，才投訴老師態度差，而拒絕繳付學費？更別說我從來沒有罵他了。至於“上堂態度好惡”，家長不在場，如何得出如此有力結論？

如果補習可以令一個小朋友，恐懼到大哭，這位小朋友的心靈，相信極度脆弱。但上課期間，為甚麼完全沒有表露？他下課前，只是在討價還價，不想做功課。最後，還遺下我給他的功課，一溜煙跑掉了。

我考慮過交給律師，循小額錢債角度去追討，也想過寫信給該學生就讀的學校，讓校長、班主任，留意他的行為，以免他有錯覺：說謊沒有後果。

可是，面對西客，我還是頭一遭。請教完朋友後，我明白自己要改變想法：

我開門營業，家長要抹黑我這蚊型補習社，太容易了。相反，我要為自己澄清，並不容易，甚至有機會，愈描愈黑。

既然兒子說謊，甚至哭泣，目的只是不想補習，就不要勉強。 家長盲目信任兒子，最後結果都是她自己承受。

堂費才$200,算了吧。不作回應、冷處理，就是最佳處理方法。言多必失，我回應愈多，她可以愈鑽牛角尖，到時被她刪減了自己不對的部分，再斷章取義地cap screen,放上社交平台、討論區，就麻煩了。

放任學生不管，只是定期收取學費，我做不到。所謂“嚴師出高徒”，罵人也要花氣力。但嚴而有愛，多關心、聆聽學生的感受、想法，我一直持之以恆。這次事件，就看作對自己的一個提醒。而且，這次經驗後，以後試堂前，必定會先收取學費。同時，我也打算安裝閉路電視，以免家長或學生，信口雌黃、指鹿為馬。

題外話：

今日其實都算幸運日。我一向不好意思，追收學費。趁著農曆新年，我鼓起勇氣，請家長結帳。昨天，有家長一口氣，補交了10月至2月的學費。😁 拖欠屋租的租客，又答應今日交租。真好。😊

營商之道: 開設功課輔導班

之前做全職中學教師，在補習社兼職，月薪$27075 + 兼職$57420 (左右), 加埋投資回報，平均一年就畀到一層細價樓的首期。

今個學年，冇做全職，補習費收入最低只有$8820.
由於堅持小班教學，每堂1: 3-4, 現時每個月，每日2-3堂，每堂1小時15分鐘，補習收入大概$27000-$33000.

近日開始有些家長，家境好轉，主動補交拖欠多月的學費。財政基本面穩定向好。

考慮過回校任教，加按物業1，再買非住宅物業4.
而且，學校工作太困身，行政工作多，以時間、智力換取金錢，工作壓力超大，走回頭路絕非上策。

補習社月租$5000, 已經包齊所有電費、影印機服務、管理費。雖然位置不佳，但始終離港鐵站甚近，應可用市場學補救。腦海中已有幾個構思，會逐步付諸實行。

開設新課程: 功課輔導班

眼見附近幾間專注做功輔班的補習社，相繼結業，我這時候加入這戰場，不知是否明智。不過既然學生人數，隨著移民潮而下降，疫情又令學生提早下午可以補習，我又試試看。

以往專科班經常滿額，根本沒有空間開辦新課程。現時，疫情關係，學生往往只需上午視像上課，下午做功課，唔識又冇人問。家長work from home, 有時間都想休息，或者同仔女玩啦。唔想煩小朋友功課同溫習，好正常。

所以，我決定聽從谷友建議: 開設功課輔導班，我開ZOOM，小朋友對住個鏡頭做功課，然後影低d功課，用Zoom 分享，或者用whatsapp去send俾我核對。我會用電腦批改，並詳細講解，務求令同學真正明白課堂。暫時未知d家長反應，不過佢地唔需要煩功課，多咗親子時間，家裡氣氛冇咁繃緊，關係一定好d。

昨天行晒荃灣南豐中心+附近幾個商場，發現功輔班的師資，非常參差。
上課時間: 有些一星期一堂，有些一星期五堂，逢星期一至五。
上課模式: 有些強調學生必定會完成當日功課，有些側重有區內試卷、補充練習。
師資: 我發現自己應該是學歷最好、教學資歷較多的老師。
學生來源: 我的學生主要來自名校，他們不少住得頗遠，往往長途跋涉，由東涌、堅尼地城、九龍塘、何文田、柴灣，前來荃灣上課。有些家長是律師、醫生，通常駕車接送。他們大多數是由家長互相介紹，很多學生是兄弟姐妹，或者親戚。
因此我的客源，一直有異於附近的補習社。
學費: 大部份以月費計算，不設請假、補堂。某些以上課日數計算，每堂$80 - $310 不等。
這價單，和我現時的專科班，收費差天共地。
我不打算減價招客，反正有時間，可以行山、閱讀投資書籍、溫習德文、踩單車、練琴。
有學生報讀，我當然會盡心教導; 沒有，也樂得清閒。投資方面，好多基本概念，我仲要學習，好多書排緊隊，等住睇。時間成本，都要考慮。

學生人數: 大部份師生比例: 1: 6，有些1:12, 少數1:30 (但這些大班，似乎以操卷為主)

仔細考慮後，為免影響本身的中、英文專科班的教學，不打算混合功輔班，同時上課。
因此，可供選擇的時段，大為減少，而且要犠牲星期二、五的全日休息時間。

拿了很多功輔班傳單，也參考了很多海報，最後，我決定繼續以少文字、大圖片為主，並以我最喜歡的露思兔子為主軸，設計海報。至於傳單，就省略了。

花了6小時，邊參考100 多間提供功輔班的補習社網頁，以及手上的大量傳單後，我終於為課程定價，並計劃好上課的具體細節，然後製作好自己的功輔班海報。未知成效如何，不過試試無妨。

“操控人心的詐騙心理學”讀後感 -- 不可不知的4大必勝推銷神技

看了止凡的 “換樓見聞”，傻貓想起最近看過這本書，在這裡分享一下。

傻貓由中學教師，轉行開補習社。近日為增加客源，開始研究銷售技巧。這本書所講嘅推銷技巧，可能資深銷售員會嗤之以鼻。可是，對我來說，獲益良多。

1.對比效應

止凡認為好的經紀，會了解客人的需要，安排合適的樓盤。而且，他能夠站在客人立場，與客人討論、分析，甚至坦言一些樓盤的訂價不合理，建議客人別考慮。

現實是：很多經紀都會在客人的預算外，提供價錢較高、質素較遜的單位。住宅物業價格浮動，昔日的成交價、銀行的估價，只可以作為參考。因此，想成功促成交易，就要借助對比效應。

如果客人先參觀價格較高、質素較差的樓盤，然後參觀其他無論價格、景觀、面積、間隔，都更勝一籌的單位，就會覺得錢花得更划算，好像賺到了。

當然，如果你像止凡兄一樣，對目標屋苑瞭如指掌，單憑樓層、座向、照片等資料，都可以估價，而且清楚自己的實際需要，就能減低對比效應的影響，避免以高價，買入不太喜歡的單位。

至於我，睇樓前，通常會直接在網上搜尋該屋苑/單㡚樓的歷史成交價、現時業主的買入價，上銀行網頁做估價。對目標物業的價格，有大概概念後，才聯絡經紀。

睇樓時，我往往無視第一個，甚至頭幾個樓盤。影音、電器公司也經常運用這種銷售手法，引導客人購買昂貴的產品。

放諸補習社，現時我提供的課程，只以年級為分野。初小$180/堂，高小$200/堂，高中$220/堂。不過，雖然我主打全方位課程，卻同時提供寫作班、文法班。

有些家長開始時，只想集中改善小朋友的寫作或閱讀理解的能力，但了解課程內容、價錢後，通常都會選擇包含聽、講、讀、寫的全方位課程，一次過學習文法、閱讀技巧、句子結構。

2.兩面提示

止凡兄的目標屋苑中，某座的前方，已經被政府規劃好，即將興建公屋，開揚景觀於數年後可能受阻。好經紀主動提供相關資料，更打開手機下載發展圖則來跟他研究。

這位經紀運用的心理技巧，名為：兩面提示。大部份客人都不喜歡經紀太hard sell, 聰明的經紀通常在提出產品的優點後，就刻意強調缺點。這些經紀同時提出產品的優缺點，更容易獲得客人的信任，增加促成交易的機會。

在補習社，我都有運用這個技巧。大部份家長都是舊生/學生家長，轉介而來。不過，他們往往知道補習社搬遷後，就興趣索然。現在，我通常先了解學生的學習情況，然後具體提出如何幫助同學，改善語文能力。跟著，再簡介自己的學歷、教學經驗。最後，才不好意思地指出：補習社已搬遷。暫時接觸的家長，都說不要緊，照舊報名。

3.負面框架

疫情關係，很多放盤都說明不能安排睇樓，只能看照片。同時，較為貼價、低水的樓盤，稍縱即逝。如果準買家急切上車/換樓，fear of missing out 的不安感驅使下，有機會因恐懼，倉促造出錯誤決定。

如果經紀這時候，不但強調樓盤的優點，如何適合你和家人。而且，現時買入，能夠避免日後樓價可能反彈、銀行加息，你要面對的損失。最後，令你相信交易決定明智，例如：原本業主開價高昂，遠超你的財政預算。可是，現時減價至你可承擔的範圍。你就會增加購買意欲。

補習社也可以運用這個技巧。

很多時候，家長都只是從舊生/其他家長手上，得到我的電話號碼。他們往往只是想查詢一下，就像逛街不一定要購物一樣。

得知搶手時段，課堂經常滿額後，家長通常會請我提供仍有餘額的時段，也不再堅持同級/同校上課了。

4.錯誤的前提暗示

睇樓時，經紀不時問：“你喜歡盤A還是盤B？”甚至直言：“我哋都睇咗咁多樓盤，你點都有個鍾意啩？”

好像你只能夠從他建議的樓盤，作出選擇。而其實，你是可以有無數選擇：不購入任何樓盤/靜候適當時機購買/向其他經紀或業主購買/尋找其他盤源。

補習社呢？

家長報名時，以前我問：“你想現在報名嗎？”

現在我會問：“你想報1星期1堂，還是2堂？” “報讀全方位課程，還是寫作班/文法班？”

本來家長可能還在猶豫是否為子女報讀，面對突然提出的2選1，卻會陷入思考，無意識地2選1。而且，他們都覺得是自己的自主決定。

同時，我成功收生的目的，也順利完成。

這本漫畫書有趣好看，2018年初版，2019年再版，非常受歡迎。書中還有很多實用的銷售技巧，大家有興趣，可以自行去圖書館借閱。

營商有道： 茶記老闆4宗罪

 

一哥寡言，實事求事。他不只要求把工作做完，還要做得好。

近日茶記老闆，做事方式令他非常不舒服：

1. 冇規冇矩

8號波，一哥當日休息，老闆自己瞓得晏，冇要求大家返工。但亦冇叫大家放假。

水吧大姐開門返工，搬貨入舖，才發現冇人返工。打畀老闆，老闆先突然吹雞，要大家返工。但又唔係個個要返。

上次打風，周圍幾間茶記休息，只有佢哋開門。當日比平時忙N倍。老闆應該吸取經驗，預視到8號波開門，門庭若市。但佢冇。一哥休息，廚房少咗個主力；水吧，老闆放咗1個假。當日倒瀉籮蟹。

而且，根據勞工法例，員工返7放1。老闆根據翠華舊規矩，只提供1個月4日勞工假。一哥多次爭取不果。每年，就蝕幾日假畀公司。諗起，心裡就唔舒服。

2.一時衝動，罵走員工

打風當日，開門嘅水吧大姐，見冇人返工，得自己返，唔開心。

工作時，難免有怨言。老闆見超多客，單多到做唔切，財神送上門，都要調頭走，心情也不好。見水吧大姐做錯嘢，一時火起，鬧走咗人。

一哥對此非常不解。佢認為: 一個員工，做錯事，應該暗角傾。何況那是水吧大姐，短期冇人替代。最近飲食業開始復甦，水吧、廚房都難請到有經驗、又肯做肯捱、有能力嘅員工。老闆喺冇plan B嘅情況吓，鬧走咗人。現時，單多就冧檔。一哥覺得老闆做事毫無章法，長遠對公司營運，冇好處。

3.唔聽意見

茶記細細，最近半個月，每晚多成萬蚊生意。大家做到踢晒腳。

一哥返9:30, 但佢責任心強，通常9:00開工。之前，佢做到3點幾，可以陸續安排下屬，食福食，再拼搏。現在，全日都咁多單，佢自己下午5:30蒸好個飯，6:30先可以一路煮晚飯畀客、一路自己食遲嚟嘅晏晝。沖杯凍啡，1點沖好，7點先有時間飲啖。

歸根究底，因為公司嘅茶餐，係全日餐。試諗吓: 下午茶$33, 你晚市食，仲要外賣，有8折。茶餐仲要唔係公仔麵、多士，而係廚房炒飯炒麵蒸餸。做客嘅，你會揀$48嘅晚餐，還是茶餐? 

另外，一哥留意到: 公司周圍嘅茶記，外賣已經要加返$1. 折扣亦減至85折、9折。但佢哋仍然做緊8折。單係多嘅，但堂食、外賣，差價拉闊。對廚房嚟講，工夫一樣咁多。但佢嘅佣金收入就少咗。

為咗處理一大堆外賣單，老闆請多咗個樓面，負責包外賣。但廚房工作負荷已經超標，一哥提議仿效附近茶記，減外賣折扣。雖然預計短期內，生意會略減，但現時外賣需求強勁，長遠只要食物質素保持水準，客人自然會回頭。老闆反而提出寧願所有單價加$2, 不過最後乜都冇做。

廚房繼續做到冇停手，一哥話: 無論點樣加快速度、增加效率，都做唔切加單嘅速度。眼見有下屬為咗快，用滾水煮飯、溝稀醬汁、唔夠時間醃好食物，就攞去煮，一哥非常非常唔高興。

4.應做唔做

之前廚房假天花，有吱吱聲。一哥已經即時通知老闆，放捕鼠器、用聲頻趕鼠、請滅蟲公司。老闆一直無動於衷。

近日米奇長大了，開始開枝散葉。食物儲存室，開始瀰漫中人欲嘔嘅氣味。老闆只係喺淘寶，淘咗塊膠板、幾十蚊人仔嘅超聲波驅鼠機。成效不彰。有時米奇仲出嚟行街街。

一哥非常擔心食物嘅衛生問題，好擔心食壞人。但老闆唔肯花錢處理，一哥亦無可奈何。

傻貓知道，佣金少咗，佢可以忍受。牽涉到食物安全、質素，一哥就火都嚟。佢之前講過，鍾意煮嘢食，見到客人鍾意佢煮嘅嘢，會好滿足。

我要努力，做大個餅，畀一哥可以有自己嘅工作天地，就算唔係自己話晒事，最少有話事權，做到佢真正想做嘅事。同時，日後自己有機會做老闆，都要切記唔好犯同樣嘅錯誤。

"管人36計"讀後感: 由屋苑保安員，講到選才、留才

 

屋苑嘅保安員，經常車馬燈咁轉。貓成日都好疑惑：人工低，冇理由咁容易請人；待遇好，員工冇理由成日走。

妹妹雖然會考0分，但管理幾十人，由追營業額，到培訓導師、招聘員工，瓣瓣掂。傻貓一直覺得妹妹好叻，就請教吓佢點做管理。

 

我：「保安員有最低工資，坐定定喺前枱，同住客打吓招呼，傾吓偈就一日。點解仲成日走佬？」
妹斜睨：「梗係唔係咁啦。」
貓乖乖聽書。

妹：「做保安，又悶、工時又長、有d公司仲要輪班。而且，做屋苑，日日要對咁多客。人多，問題就多。有賊入屋、外牆或者樓上滲水、同鄰居嗌交，乜都關佢事。」

我：「咁畀多d人工，請個有經驗嘅，咪得咯。」

妹：「唔係咁簡單嘅～」

 

我：「即係點？有錢都請唔到人？」

妹：「公司一定有本身嘅薪酬制度，唔係你話加人工就加。仲要參考同區、同類型、相近規模嘅屋苑，人哋畀幾錢人工？

經驗呢？講真，好多新入職嘅保安，乜都唔識嘅。保安人員許可證(SPP)、保安人員訓練証書(QAS證書)，乜都冇。替假就冇所謂，請常規保安員，就要再培訓啦～」

 

我：「咁請個冇乜經驗，但又肯學肯做嘅，咪得咯～我有個朋友，美國雙學士㗎~佢之前做IT, 最近失業太耐，都打算去做保安。」

妹：「屋苑保安，學歷、經驗唔重要，最緊要係性格、溝通能力。因為呢份係對人嘅工作。」

 

我：「但教識佢，佢都係會走呀～」

妹：「錢係重要，但唔係最重要。除咗底薪，可以諗諗員工福利丫。好多管理公司，會畀7-8日年假、醫療褔利、年終獎金、免費洗熨制服。仲有，唔係個個都想做死一世保安。佢哋可能都想升職加人工。

我請人時，如果見佢有鬥心，通常會畀佢知道，上一級係咩位置、做d咩、有咩權力。如果佢哋有鬥心嘅，有個目標，知道自己有位上，就會留低好好表現，博升職。」

 

我：「咁如果佢哋只係想做過客，騎牛搵馬呢？」

妹：「咁就要面試時，先問求職者：點解想做呢份工？如果佢有明顯嘅經濟壓力，或者對份工好有抱負，就冇咁易走。百貨應百客，睇吓佢想要嘅嘢，我哋畀唔畀到佢。

仲有，返工時間往往仲長過對住屋企人。如果佢做得開心，趕都唔走啦。

公司可以定期舉辦一d活動，例如生日會、聖誕聯歡會。公司成個大家庭咁，拗撬少d，做嘢都開心d啦。」

原來做管理，唔只睇工作表現，仲要關顧員工感受。

 

「好多時，員工要走，唔係因為人工或者份工本身，而係人事出問題。有時員工覺得自己單打獨鬥，或者分工唔勻，就會唔滿意。」

咁又係，人事真係可以好煩。

 

「如果上司細心少少，留意到佢哋嘅問題，幫到手，有問題時，佢哋唔會收埋收埋。咁就好處理。

平時，盡量避免出手，幫佢哋解決問題。培養佢哋解決困難嘅能力，比直接幫佢哋，更加重要。否則，做上司嘅會好唔得閒。」

簡單講，做大嘅，要識放權。

 

「佢哋要識孭飛，每人有自己嘅崗位。做事時，冇咁多制肘，又覺得公司信任自己，自然會上心，做好件事。

遇到有員工，想升職，我會提議佢哋上course, 幫佢哋調動工作時間，安心上堂。佢哋學到嘢，會更加鍾意自己份工，又覺得公司重用佢，唔會咁易跳槽。」

 

聽妹妹講管理，好得意。

 

妹妹借咗幾本講管理嘅書畀我。啱啱睇完1本。

但佢自己未睇完。冇得free書。😅