大廚出貓：烚西蘭花

一哥好有心機教我切西蘭花。

我睇極都唔識，亦唔敢切。

佢嘅製成品係咁嘅：

佢留咗少少畀我試。

今日自己煮，洗時係青綠嘅，煮完又係死咗，好難食。

煮嘢好難。

明知杯麵冇益，但我唔想再半夜起身，坐定定等餓嘅感覺走，先有得瞓。

之前等10分鐘，瞓返。而家愈等愈耐，有時等個半鐘左右，睡魔才打敗餓鬼。

一哥知我煮嘢真係無藥可救，終於願意放下成見，買咗1大堆即食嘢，確保我唔會再半夜眼光光，日頭呆呆笨。

（除咗洗頭水，其他都係買畀我食嘅😁

有乳酪、益力多、日清甜品、出前一丁麵、八寶粥、罐頭湯、蕃茄豆、西梅、椰子水）

大廚出貓：地獄廚神重出江湖

 一哥開門返嚟，發現坐在廚房的傻貓。

佢：「做咩事呀？又坐地下？因住凍呀~」

我抬頭。

佢：「做咩喊呀？咩事？講畀我知？」

我無奈回應：「我整得啲嘢好難食呀~上網睇啲人話好易整㗎~但係真係好難食，我一路食，一路想嘔~」

佢鬆一口氣。

「唔好食，就唔好要啦~你想食咩，我整得喇~唔好咁易整到自己唔開心啦」

我：「我唔會嘥咗啲嘢食㗎~但真係好難食~妹妹話，我要學煮嘢食喇~自己唔食，BB都要食。BB會唔會知道，出世後會冇啖好食，所以唔嚟㗎？」

講到呢度，唔知做乜，眼淚又好似收唔到掣。

佢：「唔好咁啦~你咁樣，我會好內疚㗎~我做廚房，但冇整到你想食嘅嘢~你又完全唔識煮嘢食~你要開開心心，BB先會健康成長㗎~」

咁我唔喊咯~但我真係好唔開心。

其實我煮嘢食，已經叻咗少少啦。

以前我煮嘅嘢，仲難食。

今次煮嘅，係放到落口嘅，但魚蛋好腥，豆腐、蛋花好鞋，個湯冇味道，似腥嘅洗碗水。

介紹返，我今次煮嘅，叫紫菜豆腐蛋花魚蛋湯。網上話幾分鐘食得嘅，我驚唔熟，煮咗15分鐘。

唔知點解，舀落碗後，魚蛋縮咗水。不過仍然非常難食。

妹妹自從辭咗職，做full-time mother後，努力鑽研烹飪技巧。佢鍾意post成果上Facebook,成日好多人like.

我呢？諗起煮嘢食，就頭痛、想走佬。

而家成日好早瞓，但2點幾又餓醒。我都想畀一哥瞓吓，自己試吓整少少嘢食，但學煮食，難比上青天。

一哥話盡量抽時間，教我煮簡單嘢。咁我又根據吸引力法則，開多個標籤，睇吓有咩進展。