產前抑鬱 again?

最近又係成日喊喊喊，喊到我自己好煩好憫憎。

一哥本來份工，做到8月尾。
而家有舊同事，搵佢過檔。人哋已經係茶記連鎖店老闆，任一哥開條件，肯過檔就ok.
一哥卻將家庭放在首位，不肯做大佬，寧願做散仔。仲要返早收早。
最後，人哋offer 底薪 $31000. 冇bonus, 乜都冇。收入比現在少好幾千蚊。

我諗起7月開始，每個月工人姐姐的固定支出，仲有佢要又供樓，又交租。
仲有大B嘅教育開支，醫療開支。
細B又係一項大支出。單單買尿片，都買窮。
我好頭痛，好辛苦，抖唔到氣。

今日喺醫院，醫生簡單問: "有冇喺出面照超聲波呀?"
我答: "邊有錢..."然後無端端就開始喊。
F.6 考完DSE, 每月收入減少 HKD $7000左右。
我又唔敢開始暑期班招生，唔知細B會唔會提早出世。
同時，濼言好多playgroups, 都好貴。
我唔想濼言讀書太大壓力，但international schools、直資私小，學費絕對不菲。
就算供到濼言，咁浠妤/浠珆呢?

最近幾間學校搵我去代課，但冇人湊到濼言返playgroups. 所以推咗冇接。
其實一日有$1720, 都可以幫補到好多。
只係一哥話唔准、唔好、唔得。
我可以點做?

好像全部都是死胡同，沒有出路。

今次第二胎，比較好的是: 濼言是開心果，喜歡甜笑，愛kiss mummy, 又鍾意拍手手、跳舞。
所以見到他，我會忍唔住笑。
我會好用心機，教佢認字卡、伴讀圖書、睇DVD, 一齊唱歌，練習baby sign language, 趁佢瞓naps, 就佈置屋企，同佢玩messy play/ sensory play. 
佢學嘢好快，而家已經識用叉、用匙羮、筷子，飲嘢成杯拎起，放低亦唔會倒瀉，唔駛我哋操心。
Baby sign language, 佢識得好多字。
同佢講嘢，佢識點頭、搖頭，表達喜惡。
同媽咪一樣，鍾意拎筆寫字，雖然寫得唔靚，但已經唔係畫不規則線條。
教佢認顏色、形狀，佢都好快識。
大肌肉掌握得好好，係小肌肉未得，穿線仍然太難。
音樂感係有，但我未有時間教佢，佢成日想彈琴，但我都只能畀個xylophone 佢玩住先。不過佢敲出嚟，唔係齋噪音，係有節奏、音感嘅。平時最鍾意自己攞書睇，播The Animals Orchestra plays Beethoven. 一邊播音樂，一邊自己拎handbell, 跟節奏搖，仲會自轉、踏腿，好搞笑。

現在只希望自己學習放鬆，一切慢慢會好起來。

妊娠糖尿

懷孕第9周，已經被安排去威院飲糖水。即日下午，已知妊娠糖尿。

開始時，我又整天偷偷地哭。
明明陀濼言時，一切正常。點解呢胎會咁?

然後，開始隔日拮手指，驗血糖。每2星期，返威院，見醫生、營養師，聽講座。

近日，開始調整心態。
食返清d, 用羅漢果糖，整蛋糕，一樣好味道呀。
食少d白飯，粥，改食米線、紅米飯，多食生菜、煙三文魚沙律、麥皮，唔飲熱朱古力、凍橙汁，改飲熱檸水 (1片檸檬)、無糖豆漿、無糖豆奶，其實仲健康喔。
甜品，而家唔敢一星期食幾日心太軟，最多2星期去食1次桑寄生蓮子蛋茶。一樣可以同家人，一齊去family time 嘅。

驗出妊娠糖尿後，老公為我預備的早餐、茶點、午餐、下午茶

做運動，都可以減血糖。
現在每日盡量抽時間，踩最少30分鐘exercise bike. 
或者帶濼言去playhouse, 公園，遊樂場放電。
我輕咗，行路快咗，又可以親子，都唔錯。

仲有，我飲返多咗水，以前一日才飲半杯水，現在盡量每日飲5-8杯水。
好像皮膚也好了一些。

雖然Abby係不請自來的BB, 不過，她的出現，為媽咪帶嚟好嘅轉變，都係好事嚟。
希望佢繼續健康成長，將來出世，好好錫哥哥，同哥哥相親相愛，一齊開開心心成長。

面試陪月問題

 新手爸媽可能都想孕婦產後，可以好好休息，所以打算請陪月，幫手照顧一下寶寶，又可讓新手媽咪偷偷師。

可是，原來預產期 9 月的話，很多陪月都早已 fully booked, 冇期喇。
而且，陪月月薪也由於各種原因，這兩年水漲船高。有些熱門陪月，已被搶至$38000/月。大部份都 $26000左右起跳。

如果真的物色了陪月員，親身面試是必須的，看看證書，面對面溝通，了解陪月員的性格、言行，是否能夠和孕婦合得來。

以下是傻貓總結上次聘用陪月的經驗，提議的面試問題，讓打算聘請陪月員的準爸媽，參考一下。

1. 可以講講你的陪月經驗嗎？有沒有特別難忘的事? 有特別有挑戰性的個案，可以分享嗎?

2. 有沒有與陪月工作相關的證書？（如催乳技巧等）有過往的僱主，提供的推薦信嗎? (要留意是否有可聯絡的方式)

3. 開刀或順產，你會預備甚麼食物，給產婦食用? 如何安排膳食餐單？
(孕婦如有食物愛好、烹調方式，需要陪月配合，亦可此時提出)

4. 藥材、買餸，係你買，憑單claim錢？還是僱主需要預先買好? 
你會當日早上預先買好食材，才來工作嗎? 工時怎樣計算? 買餸，會不會計入工作時段？
超時工作，怎樣計薪？
「買餸錢」是每天「實報實銷」還是「月結」？

5. 公眾假期、打風、紅雨黑雨，如何安排？後補工作日數？還是照支薪？可否扣減？

6. 願意手洗BB衣服嗎？

7. 懂得煲炒米茶、薑皮水？材料需要產婦自備，還是由陪月代買?

8. 期望薪金是多少？當中包括哪些工作性質？（如烹調孕婦3餐、準備補品、協助手洗BB衫等，會幫忙做一些簡單家務嗎?）

9. 除了工資，需要額外費用嗎？（如「利是」或「車馬費」）

10. 如需要取消預約，需要補償嗎？

如需要幫助「煲薑醋」、「煮雞酒」等，需要多少時間前通知及額外費用嗎？

11. 可以陪帶初生嬰兒，去健康院？並預備產婦、嬰兒，外出的用品?

12. 如果有工人/長老，他們的性格特點... 你會怎樣和他們相處？可以幫忙訓練工人，照顧初生嬰兒嗎? 有信心可以和長老保持良好關係，有效溝通？

寶寶有濕疹? 唔駛怕

剛滿五個月，小濼言已經因為濕疹，入院留醫兩天，出入私家診所兩次。
看著他眼腫面腫，不時用手抓癢癢的皮膚，弄得皮破血流，甚至出水，做父母的，心裡苦，但又無可奈可。

終於，一哥決定大破慳囊 (診金連藥 $1800)，遠道去銅鑼灣，拜訪皮膚專科張醫生。

https://www.edr.hk/doctor/info/cheung-soon-cheong-sloan

https://www.seedoctor.com.hk/dr_detail-1.asp?dr_doctor=3329

張醫生唔係皮膚科，但出名醫濕疹，睇1次斷尾☺️

離開診所時，我們都覺得前所未有的輕鬆。之前的無力感，一掃而空。
服藥、塗潤膚膏，至今剛一星期，濼言的濕疹已經退得七七八八。

特意記下當日對話，以供同樣受寶寶濕疹困擾的父母參考，也可讓自己日後重溫。

脂溢性皮膚炎

寶寶的頭頂，一片一片，魚鱗似的，是甚麼? 這是脂溢性皮膚炎，也可稱為油脂性皮膚炎。

寶寶在媽咪體內時，皮膚非常幼嫩光滑。但是，離開母體後，空氣中有幾樣不同的寄生物。這些寄生物，有機會造成癬類、細菌。

在我們身邊，有很多良性的細菌，無所不在。它非常喜歡在油膩的皮膚上滋生，特別是頭、臉部，例如: 青少年的暗瘡。可是，嬰幼兒的手腳、身軀都是油膩的。因此，寶寶小時候，全身都容易有濕疹。長大後就會逐減退。
森林變沙漠，這些細菌無處容身，只好撤退。

當然，有些人對某類食物敏感，例如: 龍蝦，吃後皮膚就會有反應。就像有人對貓狗、毛公仔，氣管敏感一樣。

治療方法:
藥用洗頭水

這類細菌，滋生的方法和癬類一樣。幸好，60年代時，我們已經有殺癬的藥水，可以保護嬰幼兒。

藥用洗頭水可以大大降低細菌的數量，減低寶寶對寄生物的敏感度。我們會溝淡藥水，讓寶寶洗頭。只要狀況有改善，就可以減少，甚至暫停使用。

異位性皮膚炎

寶寶面上紅通通的，源於遺傳性異位性皮膚炎。

他有異位性體質，較易敏感，導致眼紅、眼腫，長大後也較容易患上鼻敏感、哮喘。現時年紀小，就有濕疹。日後，也有可能患上蕁麻疹。

大部份病人，在25歲前，就已經發病。9成病人，在25歲後，免疫系統穩定，不再發病。

皮膚發炎，沒有細菌、病毒，沒有癬疥，只是過敏發炎，皮膚會又熱又燙。失去水份的皮膚，會粗糙又乾燥，同時變得更敏感，造成惡性循環。愈敏感，就愈易乾燥。因此，我們要幫寶寶注意保濕。

眼、鼻、氣管、皮膚都可以發病，年紀愈小發病，愈快康復。
孩子在10歲時，貎似康復，但進入青春期後，有機會因為荷爾蒙變化，爛面。可是，這只是短期現象，不用擔心。

10年後，可試生物製劑。現時索價過萬元一針，每兩至三星期要注射一次。如果情況嚴重，才需要考慮試用。

治療方法:
塗潤膚膏、類固醇藥膏、服藥

當寶寶皮膚乾燥時，才需要塗潤膚膏。情況改善，就可停用。
寶寶服用的藥水，已稀釋，不含抗生素、類固醇、維甲酸。藥水可以止痕，有昏睡作用。寶寶服後，連夜奶都能戒掉。主要用途: 熟睡時，寶寶不會用手抓面，令傷勢惡化。

類固醇藥膏也是可行選擇。它不是仙膏，適用於手手腳腳、身體。切勿用於臉部、私人部位。使用後，效果立竿見影。可是，必須慎用。

大部份藥房出售的濕疹藥膏，都不適合3歲以下小童使用。如果大家要用，就要自行留意風險。

其他選項: 橄欖油、益生菌

如果家長覺得需要使用橄欖油，幫孩子洗頭，也是可以的。

另外，醫生也支持家長，給寶寶餵食，適合嬰幼兒服用的益生菌，增加足夠的維他命、礦物質，提升免疫力。它未必對改善皮膚質素，有明顯幫助，但不會產生副作用，有益無害。

飲食

寶寶較其他人容易敏感，所以飲食需要節制。家長可以幫孩子抽血檢驗，對哪裡食物敏感。
如果對牛敏感，就吃羊，或者豬。切忌過份擔憂，導致營養不良。

做運動

不少人認為做運動，會產生胺多酚，但要留意身體過熱，可能令皮膚炎惡化。
可以考慮去室內泳池，適量運動，對孩子的健康會有好處。

家居清潔

留意清除塵蟎。家長可以考慮使用大量清水、少量滴露，清潔家品。不必動用漂白水。

念珠菌
寶寶下體，特別是胱門，不時會有念珠菌滋生。在前面小便位置，生殖器會很痕癢、發炎。但在胱門，就沒事。

如果情況惡化，才需要覆診。

後記：

皮膚問題（非發燒引起）

請參考 

媽媽們的各種建議：

https://www.facebook.com/groups/631630187911937/permalink/640345600373729/

著幾多衫指引：

https://www.facebook.com/groups/631630187911937/permalink/655114092230213/

太熱 👶🏻著太多都會出濕疹 ：

https://www.facebook.com/groups/631630187911937/permalink/823391728735781/

如果痕 無論係蚊定皮膚問題

都可以參考入面方法：

https://www.facebook.com/groups/631630187911937/permalink/669462694128686/

濕疹或皮膚問題Checklist：

試先找出原因。試咗唔得，就睇醫生

https://www.facebook.com/groups/631630187911937/permalink/678972709844351/

有媽媽推介呢支，可參考用途先：

https://www.laroche-posay.hk/cicaplast/cicaplast-baume-b5-plus

美女時裝店老板 變身細心紮肚師

早上九時正，Joanne 準時出現，為傻貓紮肚。生產完孩子後，很多媽咪都面對身材走樣、腹直肌分離的問題。紮肚正是快、靚、正的解決辦法。

開時裝店的日子

傻貓面前的紮肚師Joanne,30 出頭，但少女味十足，美女一名。 原來，她之前一直是時裝店老板，專售韓國女裝。

做老板賣時裝
＂我當時儲落好多熟客㗎。不過，佢哋只認住我買嘢。我請過幾個售貨員，但客人見我唔喺度，就唔入嚟。好困身。＂

為甚麼轉行?
＂社會運動嘛，生意好差呀。有幾個月，做唔到生意，冇錢賺，仲要交租。咁啱租約期滿，就執咗佢囉。＂
之後，她轉去做網購。直播帶貨非常成功。她一日的營業額，高達 $3000. 
為甚麼不繼續這條成功方程式？
"我年紀開始大喇，3字頭，客人通常係剛出嚟做嘢嘅OL. 我 carry 唔到 d 衫嘅少女味。而且，做一場直播，要一口氣換十幾套衫，仲要不斷講嘢，介紹衫嘅特色。其實都幾攰。＂

轉行做紮肚師

獨立自主的Joanne, 不習慣做打工仔。結束時裝店的生意後，得到開辦紮肚學校的表姐Sabina的邀請，她轉行做紮肚師。

“紮肚真係幫到好多媽媽，瘦身之餘，仲改善到水腫等問題。但唔少媽媽都有宮寒，因為生完BB,子宮受損。順產媽媽生完，盆骨闊咗，身型冇咁靚，仲會漏尿。所以我又再進修，學識點樣養宮、暖宮、盆骨修復，希望幫到更多媽媽”

持續進修

她非常喜歡這個職業: "我鍾意對人嘅工作，特別係對住女性。始終自己係女人，明白大家嘅諗法。我又鍾意小朋友喎。做紮肚師，經常見到好多初生BB, 好可愛。而且，呢行好多嘢學，好有挑戰性。

學完紮肚，我又去學咗盆骨修復、按摩通淋巴、用消脂機、磁叉，催乳。每學完一樣嘢，我就可以幫媽媽扮得再靚d. 好有成功感"
"我仲有不斷上網，搵相關嘅資訊，不斷update自己，希望畀到客人多d信心。"

培訓新人

Joanne積極進修之餘，也是trainer, 培訓新人，成為紮肚師。難道不怕被別人搶飯碗嗎? "唔會呀。呢行其實仲係新興行業，我哋每日做得3-4個客人，根本接唔切job. 教多d新人，可以幫到更多有需要嘅媽咪，咁樣好好呀" 

但這行業門檻不高，要吸引客人，除了靠口碑，原來Joanne另一個身份: 保險經紀，也為她帶來一些生意。

保險、紮肚，相輔相成
"通常係媽咪做完紮肚，覺得做得好，就會介紹畀其他親戚朋友。我嘅同事，自己生完，都會搵我紮肚。同事講解保單之餘，有時都會推介我畀生完BB嘅客人。""我好多時推介小朋友嘅成長基金，幫媽咪儲吓錢，小朋友將來讀書，都有錢用。媽咪有需要用，都可以。"

考慮過放棄

"我諗過放棄㗎! 因為拎住d儀器，上門紮肚時，好重、好辛苦。"
 "仲有，媽咪住嘅地方，有時好偏僻。初時搵地址，不斷拉住架車仔，迷路又迷路。好攰。我隻手都試過因為咁拉傷咗。"
"有d媽咪又要好夜先得閒，幫媽咪紮完肚，都好夜喇。試過11點幾，先離開個客屋企，飯都未食。"

後記: 紮肚成效

紮咗10日，成效開始出嚟。雖然一直知道自己生完，肥咗好多，但睇相那刻，還是有點崩潰。點都好，都叫有進展啦。女人瘦身，係終身事業嘛，我唔會放棄嘅。而且，紮肚主要係修復腹直肌，呢方面，我覺得效果唔錯。

✅肚仔和胃仔平復咗好多好多，成個人薄身咗😍

✅肚仔2側腰線由小O修到小S形啦👏🏻

✅肚皮也更緊緻

✅排咗好多毒素，即係屁屁、💩。排清毒素身體好😆，瘦咗7寸👏👏👏🥰

✅腹直肌由上1/中2/下1指👉🏻上0.5/中1/下0指⭐

當然， 🥰仲有進步空間：

💪🏻會繼續用束腹帶4星期，每天最少8小時😚✨

💪🏻要keep住做運動

💪🏻keep住飲食均衡

獨家優惠

傻貓乜人都唔識，所以畀成$8800去紮肚。好肉痛。不過，既然有成效，咁冇所謂啦。
Joanne話，如果有朋友想紮肚，可以聯絡佢，優惠價 $6800, 療程需時最少10日。咁有興趣嘅讀者，就喺留言寫低email, 你哋自己聯絡啦。

濼言濕疹留院

小濼言塊面不停出水，整晚大哭。哭累了就睡，秒速驚醒，然後抓面。口水肩都染血了，他還在抓。

他濕疹遲遲未好，昨晚因濕疹，左眼腫到邊成粒瓜子。左耳比右耳大一個碼。妹妹說，BB這樣應該很辛苦，要入院。去到急症室，好快上病房。他在家已經哭了差不多整晚。入院做檢查時又哭。累壞了。我哋都係，瞓咗3個鐘左右。

我一直埋身餵人奶，唔敢打疫苗。現在BB住院，我未打2劑疫苗，未過疫苗後14天，不能留院陪BB.

之前已睇私家醫生，用過類固醇藥膏、飲咗藥水。冇好轉。急症室醫生話，類固醇都控制唔到病情，要留院，慢慢試藥。因為類固醇都有好幾種藥，要睇邊隻對濼言有效。有濕疹、皮膚敏感的BB,將來有較大機會食物敏感。

昨晚一哥抱濼言入病房後，我一直坐在走廊。一哥工作時間長，很多東西都不清楚。醫生不時出來問我濼言的生活、飲食習慣。後來我聽到濼言在裡面大哭。一哥發whatsapp給我，說他在做檢查。隔一段時間，他抱濼言給我餵奶。濼言吃飽後，抱去門口給護士。

又隔個幾小時，22:20到達醫院，一哥突然抱濼言出來，已是凌晨2時多。濼言餓得大哭，醫生酌情讓他給我餵奶。留院期間，嬰兒的尿片、奶粉等等，由家人提供。反正坐在走廊，我除了哭，都沒甚麼可以做。於是去了殘厠擠奶。可能整晚沒喝水，我只能擠40 ml.

一哥已打2針疫苗，過了14日，在醫院正門買了快速檢測器，上到去交給護士。然後得知照顧者於病人留院期間，不能換人，也不能外出，要留在病格。他馬上表示要上班，不會留下。我急得哭哭哭。

打給媽咪，她和妹妹都說可以來照顧濼言。但妹妹還要照顧柏霖珮琳，最後決定由媽咪過來。妹妹駕車送媽咪來，還預備了2袋濼言和媽咪的食物、日用品，包括杯麵、餅乾、尿片、紗巾、濕紙巾、替換衣服、杯、毛巾、牙刷。

回家已是3點半。一哥默默晾好我出門前才開機洗的衣服。因為我一直只懂哭，他說: "妳的情緒明明已經好咗好多，唔好因為呢件事而差咗。"
"與其我哋不斷試唔同藥膏，等醫生去試去安排，咪仲好?"
"濼言都唔舒服咗幾個月喇，等醫生幫佢，醫返好，可能係一件好事呢?"

媽咪話，醫生開咗4種不同的藥膏，塗不同部位。現時已經沒有再出水。可能可以好快出院。

慢慢嚟，重建生活節奏

樣樣想做到最好，結果只會迫死自己。

做唔到全人奶，補習時，用晒人奶，妹妹會沖奶粉。

濼言好少扭計，喊親都係肚餓，或者要換片。佢自己嘗試戒夜奶，我開始瞓到覺。

最近小試牛刀，long 咗幾次期權，暫時回報幾好。今個月至今，期權收入有9萬蚊。

搬屋後，間屋好亂。這幾天開始清理。今日free 咗寵物胸前袋、2022年年曆。今晚試踩新單車，上門free產後物資，包括網褲、BB車掛袋、筆袋畀得主。明天再將魚缸、大型犬寵物袋背包、產婦衛生巾，逐一拍照、度尺寸、放上網free出。

大家都很喜歡濼言，BB車竟然收到7架。明天逐一試用，然後free出或平讓。

之後再free書，有好多投資、懷孕的書籍，希望找到有緣人接收。

新居700呎，有2間房基本上空置。還有樓梯旁的儲物室，都未收拾。

打算將free回來及朋友送的嬰兒玩具，放入其中一間房間，做遊戲室。現時有跑車學行車、音樂搖搖椅、high chair,韆鞦、遊戲墊、圍欄，還有很多布書、玩具。要再收拾一下，才能放星星送咗的網床，連睡眠籃、換片墊。

另一間做衣帽間，只要買多1個衣櫃，以後衣物就不用換季，方便些。明明我哋2年冇買過新衫，但還是回收了3袋舊衣出去。而衣櫃仲係滿到關唔到門。濼言出生後，一哥只買了一件外套給他，我完全冇買。大家送了很多包被、衣服、鞋襪給濼言。可能要為這個10磅不到的小BB,購置衣櫃。

成功埋身餵人奶

之前一直泵奶／擠奶，瓶餵。感覺自己就是乳牛。寶寶咀唇碰到乳頭，就皺眉、大哭，還手腳並用，以僅有的微小力量，拉開我和他的距離。

本來用Pigeon奶樽，出奶好快。改用Avent,減慢出奶速度。

每次餵奶樽後，佢冇咁餓同心急，就埋身餵。

慢慢減少奶樽嘅奶，增加埋身時間。

這2星期，已經可以全埋身。

現在調轉他抗拒奶樽，不過星期六，我全日補習，他只能習慣、適應。反正瓶餵、親餵，都是母乳。有時他吃得多，存貨不夠，妹妹就用配方奶，他也不挑咀。有思敏兒最好，冇就食其他samples.牛奶、羊奶，他都肯食。

感覺我的孩子，挺粗生。😆

其他媽咪還在問，幾時可以帶寶寶外出吃飯。我已經帶濼言去過茶樓飲茶、茶記、快餐店，還去了一趟梧桐寨行山。

濼言身軀細小，頭卻不合比例的大。哭起來很溫柔，這點和爸爸很相像。爸爸說話也是輕輕柔柔的。濼言即使在低泣，只要爸爸和他說廣東話，他就會瞬間靜下來，眼碌碌，凝視爸爸，像要努力聽懂他的話。反而媽咪比較急躁，濼言聽到媽咪的聲音，有時還會皺眉。希望不是天生不愛英文吧～

這樣小小的濼言，正在急速成長。相信很快就有自己的想法，有能力表達喜惡。

我會時刻提醒自己，做個好榜樣給寶寶。另外，不要施加太多壓力給寶寶。他是獨立個體，有他的天賦才能，我不可以要求他跟著我的步伐或路線圖。他有自己的人生。說到底，他18歲成年時，媽咪我已經60歲了。以後的路，我和爸爸可以陪伴孩子的時間，大概不多。

現在，我先處理好搬屋的事情，上網物色傢俱。然後報名學電單車，希望縮短車程，由3.5小時，壓縮成1小時。跟著就是重新檢視投資組合。股市的陷阱股，我全都踩齊。金沙、富途、騰訊、碧貴園、維他奶、建行，股價要多殘有多殘。

唯一乖巧的Tesla, 比亞廸，又被我short call了。要不是有少少long call, 投資表現肯定更糟糕。

濼言出世時太輕，永明已拒絕他的投保。他們說，孩子太輕，容易多病痛。未來要更小心照顧，希望他健康成長。

我沒甚麼可以留給濼言，還有我最愛的家人。只是如果有啥意外，希望不會給他們遺下任何負擔。如果死後，還能照顧他們的生活，讓他們繼續追求夢想，好好生活，就更好了。

為了達到這個目標，我會重新振作，好好學習。

我可愛的小寶寶，日後你長大了，還認得這個細小而精緻的自己嗎？

自討苦吃

 唔聽人講，後果自己承受。

未生，好多人已經提醒要坐好月，好好改善身體機能。
我一意孤行，休息了2星期，就恢復上課。

上課時，特別是星期六，朝9晚5,無間斷，我總是感冒。
連飲水都冇時間，去洗手間要速去速回，根本冇時間擠人奶。
逢星期六下課後，都塞奶，頭痛、發燒。

投資方面，Kano老師提醒過，騰訊、阿里風險大，不應大手做short put.
我高估自己能力，而家成手蟹貨。
Short call 咗Tesla @730, 攞錢接碧貴園、騰訊、金沙。全部都賺權金，但蝕價蝕到high high.
濼言出世當日，我冇再睇股票app.

現時槓桿0.93

禍不單行。

所有清醒時間，都用來擠奶、餵奶、掃風、換片、同BＢ傾偈，當然佔最多时間，係交通。
我每日搭入大埔村屋用最少１小時４５分鐘，再搭返荃灣補習。下課再回大埔拎返濼言，然後返葵涌屋企。
真心攰。

這情況，一哥一早預視咗，因此才極力提議請外傭。
可是，聘請外傭等於大門中開，讓一個陌生人入屋。
這心理關口，我過唔到。
而且，現時外傭短缺，竹篙灣一位難求，萬一請咗，工人跳工，或者確診covid-19,那醫療費用事少，打亂計劃仲煩。

而家妹妹湊得好好，情緒支援亦足夠。我寧願太早或太夜，的士出入，換取睡眠。
只係半夜一晚起幾次身擠奶、餵奶，不時占寒占凍，面青青，手凍凍，又咳又流鼻水，坐好月已經冇可能，只能夠睇吓，點樣唔好惡化。

呻完喇。

其實濼言係好乖、好得意、好精緻、好可愛嘅。當佢對住你笑嘅時候，一切都唔重要喇。

仲有，生咗BB，先知道有咁多商場，提供育嬰室，仲有恆溫濕紙巾、冷熱水飲水機、換片墊、暖奶器、梳化、洗手盤、面紙。港鐵站又有育嬰室、哺乳室。帶BB出街，冇想像中咁麻煩。

瑪喜烈前日打電話嚟，呢次已第3次。雖然上緊堂，我都聽聽。
原來係產科來電跟進孕婦身體、精神情況。問得好仔細，由誰人主力照顧BB, 惡露及會陰聯針傷口的復原情況、情緒及休息，BB的退黃疸情況，餵母乳遇到乜嘢困難，都仔細查問。
感覺很貼心。

有些谷友生BB要7萬起跳，10幾萬落樓。我才千幾蚊，住3日，有專人教餵哺母乳、換片，又有精神科醫生跟進，真係感恩。

怒炒陪月

陪月Amy經常掛在口邊: ＂鳩東巧緊要"
偏偏，每次向她反映意見，她都會回應: ＂但係我覺得......"，或者＂咁樣唔得喎，我解釋你聽點解唔得......"。

我從未試過做僱主，雖然曾經為學校聘用兼職教師、代課教師，但是沒試過辭退員工。因此，我以為聘用了這位難以溝通的陪月員，只能認命。而且，聘用期僅僅個半月，我就當作上天為我開的小玩笑吧。

妹妹就不同了。她曾經擔任管理層，處事技巧圓滑，溝通能力更是好得沒話說。連她都按捺不住，要向一哥抱怨。一哥知道Amy的工作方式，親嘗過她的廚藝，給我兩個選擇: 
1. 另聘高明
2. 不用陪月

我不清楚解約安排，聯繫了介紹人菲姨。她來電時，我恐怕自己不懂應對，由一哥代答。他愈說愈激動，將對陪月的不滿，一五一十數說出來。原來，他對我和妹妹說的話，都放在心上。不滿已經氾濫成災。雖然整段對話，他都禮貌周周，句句屬實，只是愈說，聲量愈大。他毫無轉圜餘地的表達方式、熾熱的怒火，實在＂難聽過粗口"。濼言嚇得整個人不斷彈起，我也心跳得極快。他發怒時，實在是生人勿近。

翌日，Amy即將下班時，我請她坐下談談。她似乎有心理準備：＂有咩指教呀？餸菜唔啱口味，可以講喎＂。
我淡然回應:＂妳有冇留意，今日的午餐，我幾乎冇食過?"
佢:"係呀，妳係咪唔肚餓呀?"
我:"呢碟係你之前提過嘅黃酒煮雞?"
佢:"係呀。"
我:"咁d雞你點煮? 有有汆水? 紅棗你有冇浸過?木耳你自己有冇留意塊塊都大過我隻手掌?"
佢:"我有洗乾淨，先放落水烚。紅棗唔駛浸㗎，佢本身就係熟嘅。木耳一向都唔駛整得太細塊。黃酒我落咗好少，煮嘅時候揮發咗，所以冇黃酒味"

我: "如果我跟陪月員嘅工作清單，你絕對係傑出員工。你守時、盡責、幫BB清潔衣物、預備燉湯、代茶、用心預備膳食，而且為人老實，買返嚟嘅餸菜，唔啱我哋口味，你會畀返錢，自己攞返屋企。
呢d都係你嘅優點，我好欣賞。

不過，作為僱主，我希望員工，可以幫我解決問題，唔係製造問題。
你經常強調要溝通丫。咁你有冇留意，無論我哋同你講乜，你都只會回應:"但係"。

你話要買按摩油，我哋買咗。但你冇用過。妹妹提醒你，BB有肚風，最近嘔奶多咗，你話唔需要按摩。
我哋講咗希望盡快幫我補身，因為我趕住返工，之後冇時間進補。你話要由你返工第二日起計，第一星期只能吃豬肉，第二星期只能吃雞。而唔係跟產婦嘅產後調理進程。

你問我哋，你煮嘅粟米粒薯仔雞柳飯好唔好食。問心，將所有食材，一口氣放入去電飯煲煮熟，可以有幾好食?"

Amy: "我自己一向覺得自己煮嘅嘢好好食㗎，呢個飯，我成日煮畀屋企人食，我老公、我個仔都好鍾意食。"

我:"我知道你好認真煮嘢食，但你有冇諗過，客人想唔想食? 
你花3個鐘頭，煮一碗紅豆沙畀我食。用咗好多石油氣，你亦用咗好多精神，但你煮之前，有冇問過我想唔想食? 3 個鐘整1碗紅豆沙，你覺得符唔符合成本效益?

買嚟嘅餸菜，我哋唔啱食，你拎走。可唔可以做多一步，喺買餸前，問吓我哋想食乜嘢? 或者先了解清楚，客人的生活方式、飲食習慣、對陪月員，即係你，嘅要求?"

聽到呢度，Amy開始哽咽: "我明白喇。你唔鍾意我煮嘅嘢食。咁我日日煮，你又唔鍾意食，會唔開心。咁啦，合約係死嘅，人係生嘅。我可以做埋今日就走，唔駛7日通知期。你唔駛賠錢畀我，但你都唔好要我賠錢，好唔好?"

我:"冇所謂，你自己覺得舒服就可以。如果你做晒嘢，可以提早走，唔駛等到6點。"

Amy收拾時，我隨手寫了封推薦信，讓她帶走。她有點訝異，表示沒想過事件會有這麼好的結局。
老實說，這封信，我避重就輕，只寫她的優點，省略了她的缺點。凡事留一線，日後好相見。即使日後未必再遇，我也希望她經一事，長一智。她願意盡心工作，只是處事方式，與我們期待的相差太遠。如果能夠有更多工作機會，或者她就能夠不斷進步，成為一個專業的陪月員。

想不到我乖乖地請了陪月員，卻只工作了11天。沒有陪月員的日子，大概不會差太遠。
可是，星期六起，就要恢復補習。現時近乎全母乳的濼言，到時怎樣?要轉配方奶嗎?
星期四晚，一哥、我、濼言，會搬回葵涌。到時我處理得了嗎? 一哥上班後，只有我獨自在家。我有能力照顧濼言嗎?

陪月篇：雞同鴨講

唔經唔覺，陪月姐姐Amy做咗一個禮拜喇。
佢口音唔正，要明佢講乜，都唔容易。
同佢溝通，需要好有耐性。
因為，佢講嘢冇乜邏輯，而且答完你"明白"，又會再問。

話說Amy每日都會問: "明天幾人食飯"
妹妹、媽咪比較多飯局。所以妹妹通常好清楚講明：邊日，有幾多人食飯。

Amy: "我想同妳商量吓呀，後日要煮幾多個人嘅飯餸呀？＂
妹妹："我咪喺WhatsApp 寫咗咯。你煮飯就可以，唔駛預我哋餸。"
Amy: "我知道呀。但係冇理由，食飯唔食餸丫嘛，所以咪問你咯。"
妹妹:＂我寫咗原因呀。你有冇睇？＂
Amy: "有呀。你話要清雪櫃嘛。咁冇理由煮飯唔煮餸嘛。＂

類似嘅九唔搭八對話，一再出現。

今朝佢問我，＂太太，妳鍾意食咩蛋糕呀？＂
我丈八金剛，完全唔明佢想點。
＂做咩無端端要食蛋糕?＂
佢：＂濼言滿月，我想買個蛋糕，送畀濼言呀＂
我：＂而家都未滿月，到時再諗啦"
佢：＂出面嘅蛋糕，好似得一種味，全部都係栗子。＂
我：＂吓？有咁嘅事? 到時再睇啦"
她在我身旁踱步。然後問: ＂咁你鍾唔鍾意食藍莓蛋糕呀？＂
我：＂到時再諗啦"
佢："我想買個蛋糕，送畀濼言滿月呀"
法官大人，我冇嘢想講。

早兩日，妹夫搲水吹。
妹夫:＂Amy，我個肚成日好脹咁，食咩會好d呢?＂
佢：＂哦，可能食得太快呀，掃吓風就好㗎喇＂
妹夫：＂我喎＂
佢：＂哦，你呀，唔係BB呀＂
妹夫：＂係呀，係我呀＂
佢：＂哦，咁飲奶嘅時候，唔好飲咁快咯，用奶樽，有時會咁。＂

妹夫黑人問號。😦
我和妹妹在睡房聽到，忍唔住，一齊爆笑。

媽咪見Amy唔明我哋笑乜，解釋畀佢聽:
"佢係講佢自己呀，唔係BB肚脹呀:
Amy:"我知呀。所以叫佢飲奶時，唔好用奶樽呀"

OMG!

湊初生嬰的日與夜

濼言比想像中，靚仔、易湊。
一隻手拎得起嘅BB, 出街個個話得意。
佢出街都唔會喊，只係瞓覺，或者望吓嘢，聽吓嘢。
今日塊面去晒黃喇。早幾日都仲有，紅紅哋，黃黃哋。

佢成個樣，都係迷你版嘅一哥。好得意。
睇到佢每個細微表情，都會入迷。
聽到佢發聲，就會9秒9，衝埋去。
為免有網球肘，我好努力控制自己抱佢嘅衝動，佢食完奶，掃完風，玩一陣，就放返落high chair瞓。

佢Sept 14出世得2.46 kg, Sept 21 縮水變2.34 kg.
醫生提醒: 每2個鐘要餵一次奶。Sept 23重返少少: 2.43 kg.
呢幾日明顯重手咗，掃風快咗。

不過，始終未聽過佢餓到喊醒。
好多時都係拍醒佢，餵佢食奶。
佢又唔喊嘅。只係張開小咀，皺吓眉，扮喊。
有時仲會扁咀𠻹。

不過佢唔肯埋身飲人奶，媽咪又想佢全人奶。|
搞到成日要泵奶。

每次泵完奶，整醒佢，餵完，掃風，換片
都好耐。然後休息10-25分鐘，又下1 round.

在妹妹家，她幫我凌晨接更。一哥做2點，我23:00-03:30, 就可以瞓吓。

陪月成日問: "有咩要幫手?"
其實我覺得好煩。
你自己有眼睇，知道咩時間，要做乜嘢。
唔駛吓吓要出聲問。

佢嘅溝通能力實在搞笑。
每日見到我，第一句: "太太你嘅情緒點呀?"
XYZ... 想點呀?
一哥話我有產前抑鬱，冇話我產後抑鬱呀。

找天再寫寫。而家趁陪月在，泵吓奶，瞓吓晏覺先。

黃疸指數過高again

 昨天18:00左右出院。今早11:30打去母嬰健康院，即日安排14:45覆診。
去到幫BB磅重，然後去示範室。因為產檢不是這間健康院，護士問問題，問得非常仔細。
她留意到我出院後，要去精神科覆診，問了幾句。
我只是答: "今日不是來幫BB檢查嗎? 我是陪診者。"

她沒多說，提醒我要幫濼言洗臍帶，然後我出去大堂，繼續等看醫生。

醫生問問問，問到天昏地暗。
她說濼言黃疸指數還是超標。
明早9點要再去覆診。如果仍然超標，就要入院照燈瞓箱。

心很累。
濼言有我這個甚麼都不懂的媽咪，好可憐。

醫生說: "新生嬰兒每日要換大概10條尿片。"
但濼言今早到現在晚上7點幾，只換了3條。
都只有大便，沒有小便。

醫生說: "便便顏色應該是黃的。"
濼言仍在排胎糞，綠綠的。

醫生說: "出院時餵70 ml/ 次，每日大概加10 ml."
濼言今日，每餐分別飲: 15, 30, 40 ml.
埋身餵可能食唔到，因為我哺乳姿勢唔啱。

醫生: "你餵完泵出嘅人奶，BB有冇食剩?"
我: "冇呀。畀幾多，咪食幾多。"
佢: "咁佢即係唔夠飽。如果你畀多d, 佢可以食多d.
大小二便多，才能去黃疸。"
哦~

醫生: "你一日通常餵幾多次?隔幾耐餵一次?"
我: "佢喊，我就餵咯。"
看看手寫記錄。
"今日餵咗3次。隔4-6小時，餵1次。"
佢: "醫院出院時，話佢幾耐食一次?"
我: "昨晚才出院。隔2-3小時。
不過佢成日瞓覺。所以冇叫醒佢食奶。"
佢: "所以黃疸咪高咯。"

我以為BB喊，才是肚餓/眼瞓/要換尿片。
唔知道要叫醒佢食奶。

唉~

明天黃疸一定超標啦。
又要入院啦。
濼言有個乜都唔識嘅阿媽，真係可憐。

BB出院回家

 前日中空寶，醫院中午打電話嚟，話濼言可以出院。
我超開心、勁興奮，即時打電話畀一哥。佢高速回來。
點知，半個鐘後，醫院又打嚟，高級醫生覺得濼言出生第二天，已經有黃疸，擔心星期五出院，黃疸指數升高，母嬰健康院休息，濼言會有危險。
於是，他決定濼言留院觀察，不用照燈。

狂喜完的失落，令我哭了很久。一哥回家，我還在哭。
醫院再打電話來，擔心我的情緒狀況，並向一哥詳細解釋濼言的情況，以及短時間改變決定的原因，並且致歉。

昨天，下午3點半，一哥打嚟話放早。
我即時問: "濼言係咪可以出院喇?"
佢先講話係。
唔想又中空寶，令我傷心、失望。
諗住接咗濼言出院，才告訴我。

點都好，濼言總算19:40左右回家了。
好可愛的嬰兒。
放在high chair, 他身軀細小得像一個洋娃娃。

柏霖珮琳回家，馬上高速跑到洗手間洗乾淨雙手，出來看濼言。
Muimui本來對濼言不感興趣，但也過去湊熱鬧，好像發現新玩具。

大家都趕走Muimui, 怕她傷害濼言。
我今早讓Muimui跳上梳化，近距離嗅濼言，認識這名新成員。
Muimui之後就冇特別追住濼言，都冇不斷吠佢了。

睡到22:20，他才醒來喝奶。
留院多天，他不習慣埋身食人奶，也不太懂吸吮。
我只好用手擠奶+泵奶，裝了70 ml給他，用奶樽吃。

現在胸部每隔3小時左右，就硬得像石頭。
泵完奶，埋身餵完，又好一點兒。

出院回家

 終於回家。

濼言留院瞓箱。

妹妹啱。換個角度，這是好機會，給我、一哥，最後蜜月期，好好休息。日後可能想一覺瞓到大天光，都未必得。

出院時，一哥要求我穿得像一隻糭，漁夫帽、披肩、外套、厚長褲、襪、波鞋。30幾度天氣，我熱死了。

回家，我急不及待脫衣服。他叫我即時沖涼洗頭。一入洗手間，嚇死貓。有一大桶薑皮水。他讓我坐在摺椅上，幫我沖涼洗頭。沖完更熱了。

然後，他拿出一大碗自己炒的炒米茶，說要當水喝。又帶我入廚房，提我喝他煲好的通草黃豆豬手湯。

我宮縮、會陰仍然很痛，只想睡。練了一會兒鋼琴，就入房睡。一哥怕我塞奶，叫我試用泵奶器。我未用過，不肯用，堅持用小針筒吸奶。他有點情緒失控。

“老婆，我已經好努力喇。你陀咗咁多個月，咁辛苦，我又幫唔到手。而家我想做返d嘢，等你同濼言舒服d.唔好成日話我錯，好似我乜都唔啱咁。其實我同你都係新手，你唔好再話我啦，我頂唔順喇。”

嗯。之前擔心濼言會影響夫妻關係。原來我才是問題的根源。這段時間，一哥承受的壓力，也很大。我靜下，給他一個擁抱，乖乖試用泵奶器。

他成功安裝，還放在自己身上體驗，好搞笑。

我臨睡泵了2 ml. 半夜只泵了一次奶，共有5 ml. 進步了。

泵奶時可以看書，不錯。9月24開始上網課10月9才恢復補習。這段時間，好好休息，慢慢習慣做媽媽。

Happy mom, happy baby, happy family.

出院後要見精神科醫生

Sept 15

今早，有個護士來訪，問我常哭的原因。我簡述了。下午，另一位資深精神科護士來跟我傾談。她游說我產後1個月，回醫院見醫生，可能服用血清素。我表明不會服藥。

問題根源是自己的思想。我肯學習慢慢放鬆，加上照顧濼言較忙，又打算加開時段，給學生追課程，預備測驗。我相信問題會解決。

護士出去找走廊的一哥，他在電話說：見見醫生無妨。我同意見醫生。

今天中午，護士通知我，濼言有黃疸，要照燈瞓箱。每天住院母親只能10:30-12:30, 爸爸或媽媽16:30-18:30,每節1個人探BB. 就算我只探3分鐘，該節名額用完，一哥不可能探濼言。

我知道濼言不可能跟我，同日出院。加上我沒有注射疫苗，檢測報告又要每隔2天做一次，未來幾天都見不到濼言，又哭。

今晚，有個護士長，突然來病床，教我擠奶。不消15秒，就出奶。原來我一直脹奶，但自己不知道。濼言也沒吃到初乳。

子宮收縮好痛，會陰在做刮宮手術時，被剪開，再縫起。線頭好大，小便好痛，腫脹。腳水腫。完全不想大便。

每隔2-3小時，我嘗試手擠奶。護士說：這樣才容易上奶。好累。睡了。

濼言出世了

 濼言出世了

0914

08:30,到瑪嘉烈報到。然後上產前室。一哥不得入內，我很怕，眼淚一串一串地掉下。抵達病床，護士安慰：“沒那麼快，可能明天才催生。”我止哭。

另一位護士經過，見我擺放面紙、水杯在櫃面，指出我可能馬上要落產房，不要拿出任何物品。我好驚，又喊過。

實習醫生出現，他叫我蝴蝶形張腿。然後，一隻手插入，說我宮頸已經很軟，要馬上落產房。我嚇得默默掉淚。

10:15. G醫生到。實習醫生用英文𢑥報：“這孕婦胎兒心跳正常，懷疑有產前抑鬱。” 我努力深呼吸，冷靜自己。我唔想BB因為媽咪情緒不穩，唔想嚟呢個世界。

10:45. 產房已有11人，爆滿。

旁邊的孕婦，需要在這裡做前期工序：人手穿羊水、吊藥。

好幾個孕婦，都已塞藥，軟化宮頸，即將落產房。我以為要排隊，鬆一口氣。

11:18. 突然被通知要收拾物品，即時落產房。

產房內，護士要我關機。我開始吊鹽水、催生藥。

突然有醫生拿著報告：“你有B鏈，知道嗎？”

我傻眼。檢驗後，2次覆診，都沒提過。我又開始害怕。

醫生說每4小時，要打1次抗生素。

我看電視減痛。陣痛由每隔半小時，痛1次，慢慢縮短至1分鐘1次。醫生關掉電視，改播輕音樂，讓我放鬆心情。

儀器開始鳴叫。很多護士衝進來。然後出去大叫："3號房standby. "

我已經痛到唔識驚。

他們叫我打電話畀丈夫。一哥好快就進來，握著我的手。我卻寧願拿笑氣。宮頸開得好快。每次陣痛，我都感覺到它爆裂。

突然，好多人圍著我。

醫生叫我吸氣生BB.我不夠力。試了幾次，濼言出生。

護士很好，用一哥手機，幫我們拍了好多張全家福，還有濼言的獨照。

不過，我不知道生完BB，原來仲要生個胎盤。但我已經冇力😔，結果3 cm X 3 cm 胎盤殘留在子宮內，我要上手術室，刮子宮。在背部腰椎打無痛針後，我開始失去下半身知覺。

聽到護士講，醫生好多手術要做，可能好遲先嚟到。

我睡著了。

醒來，手術進行中。我面上覆蓋了一張紙，看不見，但聽到醫生和護士對話。

手術完成，我被推進復甦房。麻醉藥令雙手、上身，不斷劇震。

我用呼吸法，放鬆，入睡。

推回產房，沒想到一哥仍在外等候。嬸嬸幫我拿齊行裝，上產後室。

上去已過晚飯時間。我腳未有力行。嬸嬸說我全晚都不可以落床。她給我尿盆。我只是肚餓。

一哥買了粟米肉粒飯給我。我吃完就睡。

然後，每隔2小時，嬸嬸就推濼言給我餵奶。我根本未上奶。

可是，看到濼言，我就滿足。他很乖巧，周圍的BB大哭，他只是靜靜看著我。打針抽血前，他哭幾聲，抽完血就不哭。他比我勇敢。

又喊。煩。

 今早好頭痛，好唔舒服。
7點幾，落街同一哥食完早餐，就返屋企瞓。
12點幾起身，收到家長的訊息，問產假安排。
又問有冇代課。
我諗吓諗吓，又喊到傻咗。

我唔知下星期二，催生前，濼言會唔會提早出世。
又唔知催生要幾耐，醫生話短就2小時，長就3日
唔知駛唔駛開刀，傷口會唔會發炎；唔知開刀後，幾時去到厠所。聽講開唔到大，就唔畀出院。
唔知濼言有冇黃疸，駛唔駛日日返去醫院睇佢。
唔知上唔上到奶。見到其他媽媽，話有石頭胸，谷奶、塞奶，乳腺發炎，好痛，仲發燒。
我愈諗愈驚，個頭愈痛。又爆喊。

濼言未出世，我已經覺得自己頂唔住。
昨天是唯一一日，幾個月嚟冇喊。
估唔到今日又唔得。好挫敗。

下午1點幾喇，今日仲係乜都冇做過。一事無成。
好失敗。

仲有10個鐘先瞓。一哥今日收早。
一陣唔可以再情緒失控，唔好令佢擔心。要做好d自己。
好好安排今日餘下的時間，做返情緒嘅主人。加油。

嘗試煞停負面情緒

昨晚，晚飯後，和一哥手牽手，慢步踱回家途中，他突然哭了。

老實說，日日以淚洗面，令我很討厭自己。
明明是我的問題，一哥卻以為是他的問題，認為自己做得不夠好。
我的不快樂，令周遭的人，為我擔心、難過。我真的是自私鬼。

他很內疚，之前不知道我的情緒問題。他不知道可以怎樣幫助我。他想我去看心理輔導，但不知道哪裡找這些輔導員。而且，他知道我不喜歡看醫生，也不喜歡找心理輔導員。

回想當日東尼偷拍，推諉說自己思覺失調、幻聽，我陪他見過很多心理輔導員、精神科醫生。每次見面，就要將自己的問題，重頭細訴。其實，如果當事人，不肯放下心結，任憑你將故事多說千遍，還是無補於事。至於行為治療，藥物輔助，這些我都懂得。懷孕不會選擇服食藥物，對抗抑鬱。行為治療，最重要還是對抗心魔。我會由這方面入手。

自己做過撒瑪利亞防止自殺會的心理輔導員。當日，很多際遇非常淒慘的人，經過電話輔導後，都願意打消自殺念頭，選擇來面談，一起找出路。
我修讀教育文憑時，已經跟隨林孟平教授，學習了基本輔導技巧。之後，也讀過中大的輔導專業文憑課程，還上過一學堂的coaching訓練。教育碩士的其中一科，我選擇了輔導。作為教師，我經常運用輔導技巧，讓同學釐清他們的問題，協助他們找到當下，他們覺得最適合自己的選擇。
為甚麼現在我能醫不自醫?

濼言下星期二，就要催生了。我很害怕自己會患上產後抑鬱，是時候要作出改變。我不希望因為自己的不稱職，而影響到孩子。

明明應該開開心心，期待濼言出世。明明一直想組織一個家庭，現在42歲的傻貓，身體長期虛弱，竟然有機會遇上自己深愛的人，還擁有我們的愛情結晶，這應該是很開心、很幸福的事。

妹妹說: 你想哭時，就打給我吧。或者，找些事情做，忙起來，就不會哭了。

也對。

明明要做的事情那麼多，要看的書未看，要練習的琴譜，還未熟習。多少次，鋼琴班開始上課時，我還在家哭哭哭，臨時取消課堂。年尾考三級鋼琴的目標，一定達不到了。

德文暫停溫習很久了。本來打算寫的讀後感，打算在濼言出生前，送出的大量投資書籍，還未開始看。有些只是速讀了一遍，但未真正明白書中的智慧，寫不出讀後感。

面對前夫和朋友的背叛、十年婚姻關係破裂，我都可以重新站起來。
到了今天，為甚麼本來應該為神的美妙安排，歡天喜地的我，卻在以淚洗面? 這樣合理嗎?

Never Trouble Trouble, Till Trouble Troubles You.
我不時對學生說的話，現在應該用來自我提醒。

身邊的人，不斷鼓勵，我收到了。
也知道自己並不孤單。
謝謝大家，願意做我的樹洞。

解鈴還需繫鈴人。
自己努力，作出改變，才能走出困局。


我沒有多餘時間，繼續胡思亂想。
我一直擔心的事情，會不會發生，還是未知數。
事情可能會朝正面方向發展喔。
根據吸引力法則，正能量才能令好事陸續發生。

以後，每次負面情緒來襲，我要告訴自己:

網友留言: 不要為明天而憂慮。
這讓我想起之前東尼帶來的黑暗日子。情緒病嚴重得令我躲在家一整年。
最後，我靠著行山、踩單車、返教會、上門補習、聽聖詩、種菜，走出陰霾。
這首"十架的冠冕"，曾經對我很有幫助。希望今次也一樣。

給一哥的悄悄話

昨晚你說:

不要經常對你說謝謝，這樣令覺得很見外。
兩夫婦，不應該這樣斤斤計較。

可是，我不是這樣想的。

世界上，沒有人有責任，永遠對另一個人好。
久病往往無孝子，即使是有血緣關係的至親，也不例外。
何況，伴侶是自己後天揀選的。
感情、愛情，隨著時間，必然逐步丟淡。
伴侶如果長期抑鬱，對另一半，必然是很重的心理負擔。
道理我都明白，但是我做不到。我好想開開心心，和你迎接濼言出生。可是，我總是很多擔心。

這些憂慮，在你眼中，大概很無謂。偏偏我就不斷為這些不知道會不會發生的事情而苦惱愁煩掉眼淚。
猜想你也很累吧?
工作了一整天，上班時還要掛心太太不知道又會否胡思亂想，下班又怕太太情緒還在低谷。
我設身處地為你想，也覺得你很辛苦。
謝謝你的關心、安慰。
其實，這真的是我的問題。你活好你的人生，就足夠。
我的問題，是一定要由我自己解決的。

能夠遇上一個自己深愛的人，不容易。
你說: 你第一任妻子，是先上床，後相愛。
愛情，可以是後天培養的。
你因為她有孕，就結婚了。

這個想法，對我其實很頗大的震憾。
我一直以為: 你們深愛對方，因為她是你上司的女朋友，才未能走在一起。

你甚至沒有打算去驗基因，認為她的孩子，是否真是你的，都沒所謂。
如果喜歡一個人，就要接受她的過去，以及她的孩子。

可是，後來孩子證實是葡萄胎，走了。
她留下，但偷食。你讓她選擇。她決定離開。

大概傻貓一直在教育界工作，這麼複雜的感情關係，我覺得很可怕。
她給你綠帽，你卻讓她作出最後選擇，讓我覺得很不可思議。

上一段婚姻，東尼偷拍我的家人、朋友洗澡、小便，已經令我作嘔。
我努力過，陪他見過很多心理輔導員、精神科醫生。
可是，我一直未能夠原諒他。
這也是他最後出軌，與願意無條件接納他的Carol一起，共同建立另一個家庭的主因。

聽完你的故事，我很內疚。
是我當初對東尼太殘忍? 人誰無過，為甚麼我就一直放不下?
這對我、對他，都是折磨。

另外，我很害怕。
你和我，日後會因為濼言，才勉強在一起嗎?
如果你不開心，在這段關係，再找不到幸福，可能放手、離開，會更開心。
我愛你，希望你得到真正的幸福、快樂。
孩子，不應該用來勉強大家，留在一段不愉快的關係。

雖然，想到這裡，我的心很痛，也開始掉眼淚。

同時，我很感恩，遇上你，是我的幸運。
你很細心，人很隨和，也給我很大的自由度。
我不懂煮食，你早餐、晚餐，都和我在外吃。
午餐，也往往在早上出門前，安排妥當，放好讓我帶回補習社。
你不喜歡行山，但肯陪我行山。
你煙癮大，但願意轉用電子煙，讓我不用再被家長，投以疑惑的目光。
你放假，願意陪我回大埔，煮飯給我的家人。他們喜歡吃海鮮，你總是不吝嗇金錢，買最好最新鮮的海鮮，親自下廚，而且分文不收。

我有孕，你怕我受傷，不用我再做家務。
掃地、抹地、洗衣服，全都是你一人包辦。
我不舒服，你總是在旁陪伴。
我吐糟，你耐心聆聽，並給予適時又簡潔的提醒。
我塞藥後，大便失禁，弄髒床單，你毫無怨言，在我補完習回家時，已經清潔完畢，還換上乾淨的床單。

你為我做的，已經非常多。
我對你的道謝，是真心的。
沒有你陪我風雨不改去看中醫，我既高齡，又子宮寒，而且容易放棄，根本不可能懷上濼言。
沒有你為我打點一切，我不可能心無旁騖，專注補習社的教學，更不可能得到補習帶來的滿足感。

這段時間，我經常情緒低落。可是，不想影響你，一直努力在你面前，展露笑顏。
你發現我情緒有異，十分擔心。這是我一直想避免的情況。
你的工作已經很忙，我不希望自己成為你的負擔。
我的問題，讓我自己慢慢解決就好。

謝謝你為我做的一切。
新手爸爸不易做。你要照顧濼言，還要分心再照顧新手媽媽的情緒，太辛苦了。
其實你真的做得很好，只是我自己不夠好。
除了謝謝你，我不知道可以說甚麼。

如果連謝謝都不能說，我大概就更加安靜。因為已經想不到可以說甚麼了。

我也想看著濼言成長，但我又怕自己做不到。
我開了很多short call. 如果有甚麼事情，股票戶口的現金，應該夠你和濼言，生活一段時間。供樓的費用，都應該可以支撐好幾年。

寫著寫著又哭了。但這次時間短暫很多。
我只是很愧疚，也很感謝你。就這樣了。