偽單親

上次佢突然發脾氣，掟爛屋企啲嘢、拎櫈暴打佢自己個頭，仲作勢掟落我度。

之後我哋不睬不啋半個月。

平時工人和我，一齊湊小朋友。工人放假，我自己帶晒2個。

今日一哥收早，18:15返到嚟，我哋午睡緊。佢話唔知我哋喺屋企，冇買餸。佢大聲講嘢，嘈醒咗阿女。阿女哭鬧著要去沙灘玩。我話，叫得醒哥哥，就去啦。

一哥黑面，逕自去浴室沖涼，入房瞓覺。

阿女嗲佢：“爸爸我哋一齊去沙灘啦！我換好衫喇，哥哥都著咗泳衣，差你未著喎。我哋等埋你囉。”

阿仔：“爸爸，我哋一家四口，一齊去游水啦。”

一哥不發一言，連眼神接觸都冇，拎住手機睇。

我同阿仔講：“你唔駛叫爸爸喇，每個人都有自己選擇嘅生活方式。爸爸呢刻選擇咗唔去。你唔駛嘥時間”

其實類似的對話，經常出現。

早幾日，去游水；上星期，去踩單車，都係咁。

昨天帶阿仔學單車，有位家長問我：“你老公今日冇嚟？飲醉咗？”

我淡笑：“佢陪阿女學平衡車嘛，不過平日都係幾鍾意飲酒嘅”

李生：“係咯，佢份工成日要飲酒？次次上堂，都好大陣酒味。上次星期六朝早9點堂，佢都成陣酒除”

傻貓真係唔識回應。

這樣的爸爸，同小朋友冇交流，又煙又酒。小朋友學咩，佢都話唔好學。小朋友功課，佢唔會跟。

佢最大作用，係出糧畀工人，帶小朋友落街去茶記食飯。

老公又網上交友

代課工作，暫告一段落。

本來開開心心，預備大掃除、食團年飯，迎接新年。

然後睇到老公手機嘅對話。

我好惆悵：“其實自己一個，會否更開心？”、“分開，阿仔跟我，阿女跟佢”、‘“物業3，蝕讓，攞返首期， 好過渣都冇？” 

佢成日話工作忙，但放工回家，機不離手。

上網識女仔，flirt人，係佢嘅習慣。

我請佢每日講1個故事，畀阿仔學吓廣東話。Eddy 2.5歲喇，佢講咗有冇10個故事？

我給他看藝員河國榮自殺的新聞，探他口風。他還說會陪我走未來的路。另一邊卻在flirt人。

我係咪應該出返嚟做全職？有固定收入，才能證明自己有經濟能力，照顧BB.

呢一刻，佢哋未見面。但唔係呢個，都會有下一個。我好累了。

孩子還小。一個2歲4個月，1個5個月。

我不年青。這2年移民潮，教師空缺多，我還可找到全職，照顧BB. 日後就難說了。

一哥的新工作環境

 一哥: "個廚房大佬，新升上去，叫貨唔齊，冇腐乳，但午餐餐牌，出腐乳蒸雞😂。然後話班細嘅，點解唔提佢，又唔寫貨。不過，係佢自己負責寫貨㗎喎"

佢: "廚房行10個人，不過大佬成日叫人去休息、食飯、食煙，長期得2-3個人，做緊嘢"

"佢要大家跟配方煮嘢食，但西餐乜都落雞粉。好多西餐嘅材料，都係中餐嘢。
到我整羅宋湯時，佢又叫我唔駛跟配方，我自己做開點就點。
咁我唔理啦，佢話咩就咩啦~"

"嘩，班靚仔好嘥嘢呀。碟碟飯都夠2個人食。
d醬汁好核突，杰撻撻咁。仲落好多味精。
個雪櫃，唔凍嘅"

"同事問我: "咦，點解你個個位都企到，咩都識嘅?
聽講你以前係老細嘅同事?

我答:"哦，一齊做過吓嘢咁啦。"

我唔會話畀人知，自己以前做總廚，睇5間分店，個個位都識做
做嘢啫，唔係識朋友，唔駛認叻。
總之，做到咪做咯。

大佬叫做咩，咪跟咯。
總之，我要返早收早。
老細畀到我，就得㗎喇。

人工，以前底薪$37000, 仲有花紅。而家老底$30000. 
不過，對生活冇影響。
老婆，你唔駛擔心呀~
可以放工同你哋食飯，我好開心㗎喇"

-----------------------------------

由同細佬拍住上，行3個人嘅廚房，一下子，跳返去10個人嘅廚房。
由電爐，變返明火。廚房成日都好熱。我見一哥返嚟，d衫好臭好大汗味。對腳都係，好似全日畀水浸泡住，一除鞋，就臭氣薰天。

佢好多嘢都睇唔慣。話唔會做得長，不過會留低最少半年。學吓嘢，識吓人。將來有機會，開返間細舖仔。

其實，傻貓好怕不斷轉變的工作、居住環境。
不過，一哥的工作，由他自己去想去計劃。我管好自己就夠。

暫時，一哥仲喺度適應緊新嘅工作環境。由廚房大佬，變返散仔。落差好大。
不過佢冇怨天尤人，冇數不完嘅投訴，每次都輕描淡寫咁，講佢返工嘅所見所聞。有時聽落都幾有趣。
最唔慣反而係: 佢每日都打幾次電話嚟，傾閒偈。
以前返工，就全日唔見人。而家佢成日都break. 每次break 都30分鐘左右。
我唔慣講電話，都冇咁多嘢傾。有時間，睇吓書，聽吓止凡Patreon, 整教具畀濼言玩，仲好。
但我又唔可以咁樣講。

家務應誰做

谷友:＂小病痛，點處理（落街買嘢食/定煮嘢俾你食）都睇得出係咪路

可能我大男人啲，從來冇要求另一半揾錢，但要煮家常飯好重要＂

呢幾句，好熟面口。
諗諗吓，係我同前度，一模一樣的對白。
只係，當時月入近10萬嘅我係講: ＂我唔駛你賺好多錢。錢，我去賺就夠。但我放工返嚟，你要煮好餸，預備埋我聽日嘅lunch box.＂

前度係圍村人，屋企有田有地，一向生活無憂。佢鍾意煮嘢食，我又鍾意食佢煮嘅嘢。
一向佢煮佢洗，大家一齊十年。

之後，我遇到嘅另一半，煮嘢食都好叻。
阿泰對烹飪很有研究，仲有潔癖，家務通通自己做晒。反正我掃個地，佢都覺得唔夠乾淨，要自己再掃過。我將最後一啖飯放入口時，佢已經攞走我隻碟去洗。而且，佢一樣唔鍾意返工。有一年時間，佢喺屋企打機，靠買賣股票賺生活費。我鍾意返工，日間教中學，放學去補習社，完咗再上門補習。

一哥更厲害，煮飯洗碗、洗衫晾衫都高速完成。佢叫我放心做自己鍾意做嘅嘢，家務佢做得快，又做得好，所以佢負責。我只需要安排好時間，準時補習、記得食飯飲水，盡量抽時間見朋友，好好照顧BB, 自己唔好病就可以。

谷友:"洗衫拎出街清潔請人做啦 🤣

如果兩條友年薪百萬但餐餐外賣真係好悲"

一哥自己做茶記，平日佢鍾意周圍試唔同餐廳，食佢公司比較少出嘅食物。放假，佢會嚟大埔煲燉湯、煮飯。佢見到我哋趁熱食晒，就好開心。
洗衫晾衫，佢都鍾意自己做。我試過攞落街洗，佢話唔好。就算凌晨2點晾衫，佢都叫我由得佢。

我覺得每個人的生活方式都不一樣，每對夫婦相處方式也不同。
今時今日，除了家庭主婦，也有愈來愈多的家庭主夫。
如果女朋友或太太，不喜歡或不擅長做家務，就要換畫，外傭應該都好容易找另一半。
換個角度，如果男朋友或丈夫，不願分擔家務，又有多少女性，覺得有需要換畫或離婚?

媽媽谷有谷友大吐苦水，表示丈夫下班回家，只會和BB玩，不會半夜起床餵奶，更不會換片、分擔家務。媽咪本身雙職，產假都要在家工作，還要面對不時上門突擊的老爺奶奶、親戚，身心俱疲。

我覺得做女人，好難。做母乳媽媽，不時受到別人質疑，唯恐我們餓壞寶寶。我們經常谷奶、滴奶，外出又要到處找育嬰室，備受壓力。我們好多都有工作，但孩子是我們自己決定生下來的，無論下班多累，都會渴望回家見孩子。無論他爆片場面多震撼，半夜哭喊多吵耳，我們都會將孩子捧在手心，好好愛護。可是，家是大家一起建立的，彼此應好好分工。家務應誰做，似乎就是誰肯做、誰有時間做，就誰做吧。做家務，是服侍家人，讓大家生活得更舒適。出於對家人的愛，用心服侍，大家都舒服。別再說甚麼"男主外、女主內"，不合時宜了。

給一哥的悄悄話

昨晚你說:

不要經常對你說謝謝，這樣令覺得很見外。
兩夫婦，不應該這樣斤斤計較。

可是，我不是這樣想的。

世界上，沒有人有責任，永遠對另一個人好。
久病往往無孝子，即使是有血緣關係的至親，也不例外。
何況，伴侶是自己後天揀選的。
感情、愛情，隨著時間，必然逐步丟淡。
伴侶如果長期抑鬱，對另一半，必然是很重的心理負擔。
道理我都明白，但是我做不到。我好想開開心心，和你迎接濼言出生。可是，我總是很多擔心。

這些憂慮，在你眼中，大概很無謂。偏偏我就不斷為這些不知道會不會發生的事情而苦惱愁煩掉眼淚。
猜想你也很累吧?
工作了一整天，上班時還要掛心太太不知道又會否胡思亂想，下班又怕太太情緒還在低谷。
我設身處地為你想，也覺得你很辛苦。
謝謝你的關心、安慰。
其實，這真的是我的問題。你活好你的人生，就足夠。
我的問題，是一定要由我自己解決的。

能夠遇上一個自己深愛的人，不容易。
你說: 你第一任妻子，是先上床，後相愛。
愛情，可以是後天培養的。
你因為她有孕，就結婚了。

這個想法，對我其實很頗大的震憾。
我一直以為: 你們深愛對方，因為她是你上司的女朋友，才未能走在一起。

你甚至沒有打算去驗基因，認為她的孩子，是否真是你的，都沒所謂。
如果喜歡一個人，就要接受她的過去，以及她的孩子。

可是，後來孩子證實是葡萄胎，走了。
她留下，但偷食。你讓她選擇。她決定離開。

大概傻貓一直在教育界工作，這麼複雜的感情關係，我覺得很可怕。
她給你綠帽，你卻讓她作出最後選擇，讓我覺得很不可思議。

上一段婚姻，東尼偷拍我的家人、朋友洗澡、小便，已經令我作嘔。
我努力過，陪他見過很多心理輔導員、精神科醫生。
可是，我一直未能夠原諒他。
這也是他最後出軌，與願意無條件接納他的Carol一起，共同建立另一個家庭的主因。

聽完你的故事，我很內疚。
是我當初對東尼太殘忍? 人誰無過，為甚麼我就一直放不下?
這對我、對他，都是折磨。

另外，我很害怕。
你和我，日後會因為濼言，才勉強在一起嗎?
如果你不開心，在這段關係，再找不到幸福，可能放手、離開，會更開心。
我愛你，希望你得到真正的幸福、快樂。
孩子，不應該用來勉強大家，留在一段不愉快的關係。

雖然，想到這裡，我的心很痛，也開始掉眼淚。

同時，我很感恩，遇上你，是我的幸運。
你很細心，人很隨和，也給我很大的自由度。
我不懂煮食，你早餐、晚餐，都和我在外吃。
午餐，也往往在早上出門前，安排妥當，放好讓我帶回補習社。
你不喜歡行山，但肯陪我行山。
你煙癮大，但願意轉用電子煙，讓我不用再被家長，投以疑惑的目光。
你放假，願意陪我回大埔，煮飯給我的家人。他們喜歡吃海鮮，你總是不吝嗇金錢，買最好最新鮮的海鮮，親自下廚，而且分文不收。

我有孕，你怕我受傷，不用我再做家務。
掃地、抹地、洗衣服，全都是你一人包辦。
我不舒服，你總是在旁陪伴。
我吐糟，你耐心聆聽，並給予適時又簡潔的提醒。
我塞藥後，大便失禁，弄髒床單，你毫無怨言，在我補完習回家時，已經清潔完畢，還換上乾淨的床單。

你為我做的，已經非常多。
我對你的道謝，是真心的。
沒有你陪我風雨不改去看中醫，我既高齡，又子宮寒，而且容易放棄，根本不可能懷上濼言。
沒有你為我打點一切，我不可能心無旁騖，專注補習社的教學，更不可能得到補習帶來的滿足感。

這段時間，我經常情緒低落。可是，不想影響你，一直努力在你面前，展露笑顏。
你發現我情緒有異，十分擔心。這是我一直想避免的情況。
你的工作已經很忙，我不希望自己成為你的負擔。
我的問題，讓我自己慢慢解決就好。

謝謝你為我做的一切。
新手爸爸不易做。你要照顧濼言，還要分心再照顧新手媽媽的情緒，太辛苦了。
其實你真的做得很好，只是我自己不夠好。
除了謝謝你，我不知道可以說甚麼。

如果連謝謝都不能說，我大概就更加安靜。因為已經想不到可以說甚麼了。

我也想看著濼言成長，但我又怕自己做不到。
我開了很多short call. 如果有甚麼事情，股票戶口的現金，應該夠你和濼言，生活一段時間。供樓的費用，都應該可以支撐好幾年。

寫著寫著又哭了。但這次時間短暫很多。
我只是很愧疚，也很感謝你。就這樣了。

火山爆發遇上滅火筒

 

Source of picture: Nothing Serious

臨出門口，電話響。來電得6位數字：128 100

一哥見號碼陌生，拒接。十秒後，電話再響。

我記起今日約咗寬頻，上門檢查。

我：“聽啦，有用㗎。”

佢：“唔識嘅，唔聽。”

我拿出自己手機，開hkbn app, 取消預約。

佢：“出門口喇，仲用手機？”

我唔啋佢。

佢：“又話肚餓，又唔出門口。”

我繼續靜靜用手機，取消預約。

搞掂，佢仲未停：“我唔想次次食嘢，都趕頭趕命呀~下次有咩要整，都出咗門口先啦”

我爆炸喇！

貓連珠炮：“我叫你聽電話，你又唔聽。今日預約咗14:30,上門維修寬頻modem. 而家上到網，咪要取消預約咯！我哋個plan, 1年包1次免費上門維修咋。取消要2小時前通知。咁你唔取消，咪我取消咯！”

一哥呆咗。

關門時，佢自言自語：“我就嚟激死㗎嘞~點知道約咗今日上門維修呢？又點知嗰個係寬頻公司電話呢？點知老婆原來嬲我呢？

唔識嘅電話，我通常唔聽㗎嘛。咁又畀人鬧喇。”

😂 唔爭氣地，即時笑咗。

係喎，原來一直係我自己知、自己嬲，然後突然火山爆發。

陀B對我呢個高齡產婦，壓力愈來愈大。濕疹、痔瘡並存。總之瞓到、行到，唔影響生活就算了。但最近又開始谷胸、水腫，而且體溫愈來愈高，坐定定唔郁，額頭都出紅豆咁大滴汗。食個早餐，背脊成條溪咁，汗流浹背。

不時4點幾餓醒、抽筋醒，或者肚痛醒，肚瀉。我知自己脾胃虛弱、濕疹，唔應該食太多生果、生冷嘢、凍飲。濕熱，唔應該食榴槤、芒果、菠蘿、龍眼、荔枝。已經盡量戒口，早餐食牛奶麥皮，午餐熱到爆，就飲鮮奶、食乳酪加香蕉或蘋果、牛油果、梨。

（冇錯，我仍然唔鍾意，亦唔想煮嘢食。只喜歡食生果餐。）

還有，近日安排暑期班，好多前期工作，要商量、考慮、執行。

最慘係投資方面，不斷犯錯。自己都質疑自己的能力，又苦無對策。連串投資失利，對傻貓打擊最大。看著贏到手的錢，轉眼就見財化水。明明買中了，止蝕咗才不斷破新高。那種不甘心，筆墨難以形容。

今次發脾氣，雖然導火線係小事一樁，但自知積累了不少壞情緒，而且開始自己不斷鑽牛角尖。以後要多加留意。

伴侶肯聆聽、體諒，並非必然。沒有人有責任做你的情緒收集站。再亂發脾氣，小心愛情戶口，會變負數喔。

和事佬：古靈精怪的妹妹

妹妹真係好叻。之前工作固然成功，現在做full-time mother也游刃有餘，聽到我好多嘢唔知點好，佢就出招喇。

佢首先分享咗自己嘅故事，叫我試吓講別人故事，暗示畀一哥知道，我如果遇上某些特定情況，會點處理。同時，亦可打聽佢嘅諗法。

跟住，妹妹就喺Facebook tag咗一哥同佢自己老公，提醒佢哋要識欣賞、包容、疼錫另一半。

一哥睇完，即時有正面回應。

然後，佢返嚟同我講起，問點解妹妹會tag佢。我就順勢講妹妹嘅故事。

咁一哥都唔笨嘛，即時問點解妹妹會事隔多年，突然舊事重提。

然後問我係咪懷疑佢。

晚飯後，我再試佢口風。不過，明顯佢同東尼，好唔同。佢做慣管理層，擅長管理員工、捉人心理，說話語氣和方式，就像我妹妹。

佢先清楚表明，自己冇做任何對唔住我嘅事，只係搲水吹。佢話：“一齊咗2年，如果擔心我出軌，唔應該買樓。如果你決定唔要BB,就講我知。你鍾意就得。到時層樓轉返名畀你，或者賣咗佢，畀返錢你。”

咁一齊時間長短，真係唔代表咩喎。出軌，只係一念之差。

為表清白，佢喺我面前，開WhatsApp,畀對話畀我睇，然後即時delete晒。佢講：“如果我有嘢要瞞你，就會set密碼，亦會delete晒d 訊息。我冇咁做，因為佢哋真係冇乜特別，我覺得冇問題。”

咁我再睇落去，都發現係微信女之類，講投資、股票多，佢哋唔係做銀行，就係畀number.

佢話自己好忙，份工又冇落場時間。放假，一定24小時陪我，唔係返我媽咪屋企，就係陪我行山，或者同佢爸爸、阿姨食飯，再唔係就係同佢班死黨食飯。佢根本冇時間出去識女仔。結論係：我諗多咗🤷🏻‍♀️。

跟住，佢話我講畀成村人知，妹妹都知，係佢唔知，覺得好唔開心。

今朝，佢叫我開聯名戶口，佢同我每個月，每人入幾千蚊，做BB嘅醫療、教育基金。仲提議在June姐提嘅虛擬銀行，開戶口，利息多d.

嗯。事件暫時告一段落。如果以後要講數，我要認清楚對手，搵足證據，再諗埋對家會出咩招，佢重視嘅係咩、痛點係咩。當然，仲要搵妹妹，練習吓點傾，先會令自己冇畀人食住嘅感覺。

明明以前，東尼話我，有我講，冇人講。我講咩都啱。佢從不還口，只會不斷say sorry.而家我冇做訓導，連要求一哥，唔好網上識人，都唔係好成功。因為佢斬釘截鐵話冇，我就冇嘢可以講。

話說回頭，其實兩夫妻相處，輸贏又唔係咁重要。適量嘅坦誠、信任，加上你哄吓我，我就吓你。呃呃氹氹，都可以自我感覺幸福，白頭到老。

希望我哋真係可以行到最後。因為一哥煮嘅嘢食，真係好好食。如果可以，我想食一世㗎。

同時，我要努力為自己增值，搞好補習社、學好投資，盡量唔好畀麻煩佢。唔好將家庭、愛情，變成生命的唯一。仲有，試試融入佢嘅家人、朋友圈子。千祈唔好令我對佢嘅關心，變成負擔。

呢個就係一哥昨晚煮嘅金菇牛肉卷，原來好易整，我好鍾意食。希望搵日識得自己整，唔會整散晒，又唔熟。

發現丈夫網上交友、調情、約會

今日係4月14日。我哋3月2號結婚。結咗個半月，算新婚吧？

昨天，他還陪我去醫院，做第一次產前檢查。檢查結果顯示：BB一切正常。患唐氏綜合症機會，屬低風險。BB大小正常，我的血壓、血糖，都正常。

近日，補習社的新生報讀情況，好理想。投資，可能係運氣，成績唔錯。

家人關係密切，妹妹、媽咪很疼我。

我一直覺得，自己好幸福。

直至我發現他的手機，在他熟睡後，仍不斷傳來新訊息。

他平日會離線，關掉不用的apps.今晚，他喝醉了。

這些訊息的共通點:對方都不在通訊錄，顯示的只是手機號碼。而且，一哥有不時刪除通話記錄的習慣。對話沒頭沒尾，但語氣態度親䁥。

它們看來只是普通的flirting. 有些明顯是新相識。較親密的對話，隱含太多私人資料，暫且不表。

可是，對婚姻關係卻是一大警號。

一哥和我，在網上交友平台Tinder結識。我已經是他的第三任妻子。

他細心、外表溫文。習慣獨立的我，在他面前，一直小鳥依人，也從來不曾為他帶來麻煩。

現實證明，做好自己，還是不夠。

看到這些對話，我第一個感覺是微慍，然後是熟悉的被背叛的錐心之痛，還有委屈。

陀B導致的身體變化、不適，我默默承受了。

而他，卻在另覓新歡，找新刺激。

冷靜下來，我想到自己的人生。以後的路，該如何走? 

今日，他似乎未真正出軌。可是，這大概只是時間問題。

孩子出生後，我還是有機會，獨自撫養他，或者回復單身。

這刻，我可以扮作若無其事，心裡這根刺，卻不會消失。

我不知道，有幾多女人，可以一口氣畀晒首期、律師費、經紀佣金、裝修費，然後層樓可以大方得只寫伴侶名字，他一人上會，做業主。

我只知道: 以後，我要學習好好保護自己。

一哥話想開茶記，佢自己揸fit,做老闆。佢預計如果找到合夥人，自己只需要出資40萬。為了幫他達成夢想，我努力學習期權，得到幸運之神眷顧，短短幾個月，已經賺了29萬。計及股票盈利10萬，開業的資金，已經為他準備就緒。

期權盈利:

Nov	$711
Dec	$32,394.00
Jan	$24,549.02
Feb	$62,321.17
Mar	$86,678.47
Apr	$52,961.73
May	$38,895.24
Total:	$298,511.02

股票:

股票現值:		$1,463,531.31
帳面賺蝕:		$104,914.83

我們亦計劃好三年後，換樓，讓孩子有個更舒適的生活環境。當然，我也做好理財規劃，預備BB將來的教育經費。

我身體差、高齡。這孩子，得來不易。可是，如果情況持續惡化，我未必會讓BB,來到這個世界。

當然，那時也要看BB長多大。如果中止懷孕，會為我自己帶來生命危險，就再重長計議。

而我到時，肯定不會就此，和一哥商量。

他決定背叛我、背棄這段婚姻、離開這個家，並沒有考慮我的感受、處境。

既然如此，我亦不必傷神，去顧慮他的想法。

從來，我們能夠掌控的，只有自己的想法、行為。誰妄想意圖改變別人，都註定失敗。

別人不會因為你曾經受傷，而特別憐惜你。你要懂得為自己增值，令自己在對方眼中，重要得無可取代。

同時，自己也要明白，世界上，誰都可以沒有誰。單身並不可怕。

至於以後的夫妻相處，表面好，就可以。華麗表象背後，少不免千瘡百孔。既然選擇留下，就別找碴。當真相徹底翻開，結局未必人人可以面對。

真的無法接受時，就要下定決心，灑脫轉身離開。做決定後，就別再回頭。

好好生活! 假如天要塌下來，你無法改變，但仍可調整心態，樂觀、正面去面對死亡。

P.S. 一哥不時會看我的blog. 我並不介意讓他知道我知道。

至於他以後會怎樣做，我管不著。

後記：

明明我覺得係一哥唔啱，唔知點解變咗好似我唔啱。

算了。擺返出嚟做record.反正都𤓓咗。🤷

我係咪太縱你?

傻貓最近好忙。

朝早起身，睇YouTube的各大投資訪問、了解個股動向。

食早餐時，睇財經新聞，了解昨夜美股走勢、預測港股走勢。

回家，開始閱讀投資書籍、上投資視像課程。

下午2點，補習。

下課，批改練習、備課。

晚上8點幾回家，練琴、溫習德文、繼續閱讀、上課。

9點半，一哥買飯回家。一齊食。
我繼續邊上課，邊做筆記。
好多時邊食，邊寫，邊翻睇，再寫筆記。

昨晚，佢開始唔高興。

佢: "可以專心食嘢嗎? 食完再睇，得唔得?"
貓望實螢光幕。

食飽飽，貓窩在沙發邊，看書看得入神。

佢: "你可唔可以望吓我?"

抬頭一看，佢竟然赤裸上身。
貓關切慰問: "小心凍親呀。快d沖個熱水涼啦。"

佢:"你幾耐冇望過我?"

貓低頭繼續: "本書雲地推介㗎。我睇咗一半，就嚟睇完喇。乖啦，去沖涼啦~"
一哥死死地氣，走去沖涼。

上次貓學煲中藥，煲燶咗，加水翻煲。結果，又痾又嘔咗一日半。

而家，一哥放工返嚟，就幫手煲藥。

佢挨住浴室門邊: "貓貓，你以前堆ex, 有冇咁好服侍?

飯又買埋，藥又煲埋，碗又洗埋。"

我不假思索: "不嬲都係咁呀。通常試完，啱飲，唔太熱，先餵我食。同甘共苦嘛~"

"洗碗，一向都係d ex洗喔。我之前用開粉筆，皮膚敏感喔。"

"公司出trip, d ex會預先整好晒幾日嘅早、午、晚餐，放喺雪櫃，貼好晒日期，提我幾時食邊盒。
仲會買定雲吞水餃、小丸子，喺雪格。一定唔會餓死貓~"

一哥苦笑。

佢: "我仲以為係我太縱你。原來係佢哋一個二個，縱壞咗你，搞到你唔識照顧自己。"

我睇緊書，費事理佢。

等佢沖完涼，9秒9飛身攬實佢。

我: "我又縱你丫。主人，你有咩吩咐? 女僕一定盡心服侍，保證滿意。"

佢反白眼: "你肯熄電話、iPad, 乖乖哋瞓覺，已經好好。"

我: "係"(貓恭敬地雙手奉上手機)

佢喜出望外😃: "咁乖?"

我: "我唔睇Telegram, 唔睇Whatsapp, 唔覆家長，唔睇美股。

一晚咯。
今日係星期六，美股唔開市，聽日星期日，港股都唔開市喔~"

佢反眼反到上太空: "唉，都係我太縱你。嘢又唔食，覺又唔瞓。"
貓: "瞓瞓瞓，即刻瞓。報告主人: 我已經放低咗手上武器喇~"

😂

感情煩惱: 盛女如何脫單

中學同學 G 相約聚舊。

雖然相隔多年，但尚未與G見面，我已經對她近年的經歷、想法、價值觀，有初步概念。因為她事無大小，都放上Facebook. 她不時在Facebook更新狀態，問人知唔知自己係處女、高調反對婚前性行為、疑惑點解自己一直冇拖拍。貓已經估計: 她大概想講講感情煩惱。

甫見面，G已經迫不及待，問傻貓點樣識到咁多男仔。又問我呢個男朋友，有冇以前東尼對我咁好。

貓覺得：呢個問題本身，都好有問題喔。一對情侶/夫妻，行到分手呢步，通常都有啲嘢，夾唔到，咪散咯。既然分咗手，ex只係路人甲。點解仲要將ex，同現任做比較？永遠記住前度嘅好，恐怕現任都好快會變做前度。

當佢知道，一哥係傻貓喺交友app Tinder 識嘅，馬上好認真咁提醒:"網上面好多壞人架! 你小心佢會呃你!"

傻貓明白佢一片好心。不過，現實世界嘅壞人，難度會比網上世界少? 帶眼識人，是常識吧?

G話唔明白，點解佢咁靚，又多才多藝，都冇男人識欣賞。

傻貓隨口回應: "男人都係視覺行先啩?不如試吓化少少淡妝？" 

G非常反感。佢認為男人唔應該只著眼外表。因為人會老，只有內在美才能持久。如果男人只因為你靚，先同你一齊，你老咗，佢就會離開你。如果任何男人，讚佢靚，佢只會覺得對方膚淺。而且，佢相信: 神會在適當時候，為她預備丈夫。(留意: 是"丈夫"，不是"男朋友")

不過，我認為: 就算你好有內在美，男人都要先畀你外在美吸引，才會去了解你嘅內在美呀。而且，呢個世界，唔係你認為係咁，就會咁。因為，你唔係世界嘅中心。

平日，她花大量時間傳福音、返教會、寫詩歌、寫廣播劇。可能太專心歌頌神，G忘記了好好照顧自己。她的身型、衣著，比之前變了很多: 鬆身衫、裙褲、駝背。傻貓提議她一齊踩單車，或者行山。她拒絕: "呢d活動，唔可以識到願意同我一齊，事奉神嘅丈夫。"

聽完，貓微笑，點點頭，開新話題。既然無論講咩都會被否定，講多無謂。我只係諗: 如果佢一直嘅做法冇問題，咁點解到而家都仲係不情願地單身？調轉諗: 如果呢個方法唔奏效，係咪要試試其他方法？

我認為: 想搵男朋友，先要擴闊社交圈子。你想識點樣嘅人，就應該去返呢d人經常出沒嘅地方，認識佢哋。如果好似傻貓咁，生活圈子超細，交友app其實係好好嘅選擇。點解佢會覺得，只要時機一到，就會有個Mr. Right, 拖住佢隻手，行入教堂，講 "我願意"？

臨走，佢送咗本書畀我。原來，佢將自己嘅日記，印成好多本書，送畀朋友。入面，有佢嘅家庭問題、單戀暗戀的心路歷程、信仰路上的疑問。然後，她力邀我上她的家，聽她唱自己寫的詩歌。

G是一個非常真誠的人。傻貓都好希望，佢可以找到愛她寵她，真正欣賞她伴侶。可是，如果她的想法、行為，依然故我，成功脫單的機會，又有多少？

最後，貓完全不理解G的價值觀。她認為公屋是我們每一位市民的福利，所以她為了得到入住公屋的資格，大學畢業後，一直都不肯做全職工作。直至派到公屋，上樓了，她才開始做全職領隊。可是，分到一間和另外2位長者共住的公屋，真的值得慶賀？如果她將時間，投資在自己的資歷、事業上，會不會又是另一番景象？

當然，每個人有權選擇自己的人生。只希望她能堅持自己的信念，不要他日後悔。有時候，最不肯放過自己的，只是自己。能夠我行我素、堅守信念，也是一種幸福。

活在當下: My perfect timing

昨晚walk Muimui時，我哋傾閒偈。

貓: "我前日喊呀～"

一哥:"對唔住呀～你唔開心時，我唔喺你身邊~"

貓:"唔係呀～我自己喺腦入面打交，抖唔到氣咋。"

一哥:"佢哋點樣打交㗎?講畀我聽吓?"

貓諗咗一陣。

"我好想搞好補習社，網友、新朋友都畀咗好多好有用嘅意見。但我唔知邊度開始好，太多嘢要做。

之前我唔知自己做得咁差，好震撼。一直自我感覺良好，只係冇新生walk in.

原來呢個情況，係自己一手造成。"

佢:"人哋嘅意見，你未必全部啱用。啱用嘅，就分開嚟，逐日逐d, 慢慢做咯～"

貓點點頭。

"我前日同朋友行大東山呀，佢哋大我少少咋。

阿昌個仔，19歲喇，讀year 2喇。Rebecca個仔都F.2啦。

我都4字頭啦，都冇小朋友。我係咪冇得生㗎喇?

生咗，都唔知有冇精神體力去湊，又可能有代溝。"

佢:"佢哋都好早婚喎。咁你20歲時，又做緊咩呢？"

貓:"我讀書呀📚～讀緊year 3,就嚟大學畢業👩‍🎓。跟住，讀教育文憑、訓導文憑、翻譯碩士、通識教育碩士、輔導課程，教育局仲要我哋老師，每年完成50小時進修時數。我教英文、通識、歷史，年年都讀150小時以上呀～

我仲幫東尼，做咗好多份mechanical engineering 嘅功課，佢成功讀完大學嘅bachelor、master degrees.仲有同佢溫書，考保險嗰幾份卷，仲有CFA~"

貓中英夾雜，一哥應該唔明我講乜。😅

佢:"係咯，每個人嘅生活方式都唔同丫嘛~你都冇渾渾噩噩咁，嘥咗時間呀。"

貓好奇:"咁你20歲時，又做緊咩？"

佢:"我幫大佬、二佬，打工還債咯～"

貓:"吓?咁慘😟"

佢:"嗰時打2份工呀。一份日頭，朝8晚6. 另一份做酒吧，晚7朝5. "

貓:"好辛苦呀～都冇時間休息。"

佢:"所以我幫佢哋還清嗰幾筆債，就好少同佢哋聯絡喇。

賭仔，你幫唔到好多次。未還完，又有新嘅債。"

貓:"嗯，都係嘅。"

人事會過 情事會過 讓我撿起碎片
不受傷那算活過 最終一切也是我

我哋都被親人傷害過。受傷了，都要學懂保持距離，好好保護自己。

幾多的關心統統都不會插手

我都要諗嘢正面d, 唔可以搵人做情緒垃圾桶。

人哋就算想幫，提出的意見再好，落實執行嘅係自己。

就算幫到今次，都幫唔到好多次，始終要自己安排、處理。

貓已經好幸運，遇上咁好嘅網友、新朋友，無私咁分享成功之道。

仲有一哥不時聽我講嘢，畀到情緒嘅支援，仲會幫我分析可行性、提議緩急先後的順序。

剩下的，就是自己的判斷力、執行力。

如果堅守變強求又如何
還是要傾出所有

每個人有自己嘅perfect timing.

與其羨慕別人，不如欣賞自己當下擁有嘅嘢，珍惜眼前人。

現在的半退休生活，壓力比做全職教師，少好多。收入雖然不穩定，但這個月，已經回復3萬幾蚊。

在學校做合約老師，工時長、多會開，面對各式各樣的同事、上司、家長、學生，壓力很大。

現在，多咗時間帶狗狗行山、學琴、練琴、玩德文、學投資、陪家人，也結識了不少山友、網友。這些新朋友，擴闊了我的視野，讓我察覺自己的不足，也激發我作出改變。

這種生活，以前我完全冇諗過。

人生，原來可以不一樣。

感情方面，層樓落一哥名，我又幫佢籌措緊資金，開茶記。

將一切押注在他身上，確實是一場賭博。

我可以做嘅，係繼續堅信自己的選擇，同時為自己留逃生門。

所以，我hold起咗打算借畀佢嘅資金，嘗試整大個餅，再借畀佢。

亦透過我嘅人際網絡，搵銀行傾，睇吓邊個貸款offer最靚仔。

暫時問過，一哥層樓只係開始供款不久，銀行主要係提出無抵押嘅私人貸款，息率大概2厘，可借50-80萬。

曾經爭取過 曾經也灰心過

但我繼續前行 無堅不摧的走過

無論係創業，還是感情，都要真正努力過，才有資格論得失。

擁抱與聆聽

 

晚飯後，傻貓呆坐一旁。

「貓貓？你唔練琴？你可以睇吓書、玩吓德文。廚房嘅嘢，我執得喇。唔好咁擔心啦～」
一哥今日放早，返嚟就開始搞衛生，冇停過。

「 唔係呀～我好似好嬲，好唔知點咁～
好似好多情緒喺入面，但係獨立去睇每件事，又唔應該咁～
好多畫面喺度不斷彈出嚟～我同自己溝通緊～」

一哥放下掃帚，瞄我一下：「咁好啦，你有嘢，可以慢慢同我講。」

幾分鐘後，傻貓整理好：「你知道竹內結子嗎？」
一哥搖頭。

「佢自殺了。」

一哥停下手上的工作，眼定定望住我。

「佢係日本嘅藝員。我冇乜睇日劇，唔識佢。

不過，今日好多媒體都講呢件事。

佢可能產後抑鬱，４０歲就喺屋企衣帽間，上吊自殺。

佢老公凌晨２點幾，返屋企先發現。」

一哥走過來，攬住我，靜靜地聽。

「佢嘅情緒，唔會係突然咁起變化。

但係佢老公真係冇發現？

40歲先有BB, 佢應該好重視呢個小朋友。

但係，佢寧願丟低自己嘅初生BB, 選擇呢一步， 一定好痛苦。

最近裝修，你成日都講 "你覺得 ok 咪 ok 咯"~ 

但其實我唔係你，唔知你覺得乜嘢地方唔ok. 

我估你想點，估到好攰。

如果真係有小朋友，你又覺得佢做得唔好，又講 "你覺得 ok 咪 ok 咯"，咁我會覺得好無助~

彈出嚟嘅畫面，係竹內結子喺衣帽間上吊嘅情境~

唔知點解，我睇真d, 會見到個樣，係我自己~

我好驚~好唔開心~又好嬲~好無助~

我唔知點解會咁~我又唔識佢~

而且，我哋連小朋友都未有喎~呢d係自尋煩惱~

仲有，最近睇中醫，每次食完藥，就不斷肚痛、肚瀉~

我體質一向虛寒，虛不受補~

我哋會唔會以後都冇小朋友？」

傻貓一口氣講完，抬頭凝望佢。

一哥攬實我：「裝修嘅嘢，其實都七七八八啦～

有時，我知道嗰刻講嘢，會表達得冇咁好～

不過之後，可以慢慢傾返～唔會收埋收埋，唔同你講～

小朋友嘅嘢，有冇都唔緊要喔~

我哋而家冇小朋友，都生活得好好，係咪？」

貓點點頭。

「你最近好多嘢諗咁～係咪好多嘢做？」一哥關切地問。

傻貓開始扁著嘴細數：「係呀～我覺得我好蠢呀～

明明唔駛返全職，每日都係做幾個鐘頭嘢，一星期仲要放兩日假～

但係好多好多嘢未做～多到唔知做邊樣先～」

一哥輕揉傻貓嘅頭髮：「不如試吓逐樣寫低？

睇吓邊樣緊要嘅、需要盡快處埋嘅，做咗先？

重要又唔急嘅，就過兩日，放假先做？

千祈唔好將所有嘢，堆埋一齊～

咁樣你會好辛苦」

「知道喇～」
望住手上清單，傻貓知道雖然有好多好多嘢未做。

不過，可以逐樣做，無力感、壓力，紓緩咗少少。

一哥讀書冇我咁多，但佢嘅情緒智商、逆境智商、待人接物，都比我好。

從佢身上，我學到好多書本上冇嘅嘢。

發脾氣，值一萬? (從棄單事件，思考兩性相處之道)

買樓裝修，對唔少人嚟講，都係人生大事。

一諗到間屋係自己嘅，裝修完，靚唔靚都要對足三五七年，大家就不期然會好肉緊。

呢單case,傻貓睇到眼都凸。不過，就令我反思兩性關係嘅相處之道。

 

話說樓主訂咗5道門。

佢一開口，就話人哋係黑店：店家未收錢，就乜都得。收咗錢，態度就開始差。

佢仲埋怨:    店家唔覆佢訊息、遲交貨但冇講交貨日期。

(男仔追你，當然你話乜就乜。

追到了，時間長咗，熱情減退。

佢都有自己嘅工作、朋友、嗜好，你唔可能係佢生命嘅全部。

你仲埋怨: "你點解要瞓覺、點解要做嘢、點解要見朋友、點解要打機。你幾時同我去街？"

表達意願，可以。不過，要睇時機、環境。自己的表達方式、語氣、表情、身體語言，都好重要。)

為咗證明佢冇作大，仲擷取咗WhatsApp對話貼圖。

買門，通常度尺嘅師傅，要負責埋安裝。

度錯尺寸，度門就裝唔到。

店家一早講咗，樓主唔好預計店家負責安裝。

不過樓主就因為咁，嬲嬲豬。

樓主覺得好受氣、好嬲。

咁正常嘅。做客嘅，當然希望得到最好嘅產品、服務。$18000 買5道門，唔係細數目。

但老實講，就算店家態度差，要等客人追問，先肯講交貨日期。咁又點呢?  

 $1萬蚊訂金，已經畀咗。人哋話遲3日送貨。如果係我，我會安靜地等。

(男朋友超冷淡，要等你催婚，佢先肯勉強應承。你已經同佢一齊好多年，青春已經冇乜剩。人哋畀個具體註冊日期你，你唔通唔等?)

單睇對話，真心唔覺店家串咀。

反而樓主一時意氣撻訂，又要再等，唔見得係最好選擇。

其他網友嘅留言，亦非常一面倒，建議樓主等多2日，即係店家承諾的送貨日期，收貨。

樓主卻堅持己見，認為已經因為呢5隻門，拖慢成個裝修進度，決定棄單。

(蝕$5萬訂金事小，但搵過另一間，重頭經歷挑選店舖及產品、度尺、製作、物流、安裝嘅過程，真係好咩?

同樣，一齊咗咁耐，搵過另一個男朋友，重新認識、了解，真係會好過繼續經營呢段關係?)

有心水清嘅網友，提出呢個觀點:

店家話要等一個月左右，才送貨。而家真係等咗一個月，咁點算遲？

樓主嘅答案幾有趣。

不過樓主就係唔等喎。佢認為對方要佢哋唸咒語 (要脅棄單)，先肯畀個送貨日期。好冇誠意。又唔相信店家會如期送貨，決定棄單，委託另一間店舖。

(你三番四次，用分手迫婚。對方真係應承你，畀埋婚期你。你又嫌人哋要你迫先肯結婚。又唔信人哋真係會出現喺教堂，決定悔婚，搵另一個男仔去date. )

同時，有網友指出樓主太串，搞到冇彎轉。

傻貓係現實主義者，所以堅睇唔明樓主嘅邏輯。首先，佢自認唔止一次話要棄單，甚至認為呢句咒語好有效，可以成功得到店家嘅回應。

(有d人，send完訊息，鍾意望實部機，等心上人回應。見到得單剔，死等。雙剔，已讀不回，好傷心。於是，不惜一切咁講講講，期望對方回應。不過，成功等到對方應機，係咪代表你哋關係好咗?

你想對方應機，還是想得到對方嘅關心？)

估唔到呢個post, 成功引到店家，特意申請入谷，正面回應: 

睇到店家嘅回應，冇人再話店家係黑店。 

原來樓主自己落單後，發覺畀錯尺寸，改過單。後來又加大門門線。

到公審店家當日，樓主都仲想改尺寸。

(感情穩定之後，發覺對方唔夠高、富、帥，又冇乜上進心，淨係識礙模型、打機，又諗住一齊之後，可以慢慢用愛去改變對方。

到周街唱衰對方當日，仲想改變對方。

🤣題外話:

我阿媽真係問我:

"點解由得一哥染金毛、食煙、賭錢?

應該要佢改呀～ 佢錫你，真係鍾意你，就會為你改變。"

貓回應:

"媽咪，我愛妳，好愛好愛妳呀～

但我唔鍾意你染黑d頭髮，唔夠自然喔～

你睇粵劇又好嘈，不如陪我學德文啦～"

佢一句車埋嚟:

"我鍾意呀～"

貓答: "係咯～妳鍾意咪得咯，一哥鍾意咪又得咯～得咗")

傻貓睇到店家嘅回應，都明白樓主點解咁嬲。店家實在太坦白了。

對待客人，最重要係完成交易，貨銀兩訖。

面對躁底客人，安撫情緒，澄清事實，一樣重要。

不過，真係只講事實就夠了。

佢係客人，唔係你個仔。你教佢做人道理，佢唔會多謝你喔。

因為，你做多咗。

（面對躁底嘅另一半，你講道理？冇用！　

畀佢冷靜吓，先反映佢嘅情緒，畀佢知道，你明白佢嘅感受。

然後，就事實，重點講建議，或者決定。

解決到件事，就可以喇。）

幸運的是: 樓主嘅老公，好支持太太。一直以來，係老公直接聯絡店家。後來，太太發脾氣，踩上舖頭嘈。傾唔掂數，太太就公審店家。

樓主老公，同樓主一樣，認為店家答 "應該可以"如期送貨，唔夠肯定。所以支持樓主棄單。

（你問幾時結婚，會唔會愛你一世？

唔好玩啦！都話愛咯。

會唔會鍾意第二個？唔會呀。

你唔鍾意呢個答案？覺得唔夠肯定？

咁分手啦。）

過份坦白，結果係: 觀感唔好。其他網友，唔支持樓主。但都覺得店家態度唔好。

最後，店家雖然多次回應樓主的問題，樓主仍然堅持棄單、找另一間公司。

最後，佢成功以一萬蚊嘅代價，棄單。

既然已經決定委託另一間公司，就當一切重新開始啦。

呢單case, 雙輸。

（你要我改，我應承咗你改呀。

你打畀我，我有應機呀。

你係都要走。咁你走啦。你嘅青春時間感情，付出嘅種種，一筆鈎銷。

走咗，就唔好怨，唔好難過。

向前走，唔好望返轉頭。）

被偷拍：說話的藝術

先旨聲明：唔係AV. 🤣

📸「咔嚓咔嚓」
今早，一個滿頭白髮嘅太太，突然衝埋嚟影我相。
傻貓反應一向遲鈍，呆呆望返佢。

老太太繪聲繪色：「呢個女人，喺商場放狗呀！仲畀佢周圍痾屎痾尿呀。」
哦~

半分鐘前，Muimui剛在屋苑附近，去完厠所。
我哋哄咗佢入狗袋，預備去食早餐。
老太太睇到嘅，應該係我幫Muimui抹手腳、pat pat.

明白對方誤會咗，傻貓嘗試解釋：
「我隻狗冇周圍痾呀。」
老太太聲如洪鐘：「大家認住佢呀。佢帶狗入嚟商場放狗呀。周圍都係屎屎尿尿呀。報警呀。搵職員嚟呀。」

傻貓冇喺商場放狗，更加冇畀Muimui周圍痾。無端端被拍照/拍片，好委屈。
好，你影我，我影返你。

咦？😂
「太太，你點解影我相呀？冇問過人，隨便影人相。好冇禮貌喔。」
「太太，我戴咗口罩喎，你影得清唔清楚㗎？」
「你唔戴口罩，走去影人相，好蝕底㗎。我影咗你相喇。唔該晒。」

老太太本來在謾罵：「自私精、白痴婆~我擺上網，公審你。」
聽到呢句，停低，靜咗，即時攞條抹汗巾，遮住口鼻。😅望落有少少似海盜。

「我隻狗真係冇周圍痾㗎，你諗住點樣講就點樣講啦。走先喇，拜拜。」

食早餐時，情緒還是未能完全平靜。Muimui畀人屈周圍痾，我哋又無端端被影相。點解男朋友唔講嘢？
佢默默食完，微笑望住我。

傻貓問：「我係咪處理得唔好？點樣可以做得好d?」
佢笑笑口：「我畀人屈，情緒都會激動，都會唔開心。」
嗯~ 我承認自己激動咗。

「不過Muimui行入咗商場幾步，先入袋。商場唔准狗入，我哋係有唔啱。」
係嘅，我哋都有唔啱，仲係我哋唔啱在先。否則，就冇之後嘅事。

佢停一停，再講：「佢睇到狗狗入袋，聯想到狗狗周圍痾，係誤會咗。不過佢擅自影相，都唔啱。」
佢再淺笑：「兩件唔啱嘅事，演變落去，唔會變返啱。」

傻貓追問：「咁畀人影相喎，唔知佢會點樣處理喎，又唔知會post喺邊喎。唔理佢咩？」
佢答：「我自己習慣，講嘢之前，諗一諗先。
講d咩，先可以做到個效果？
你同佢講完，點樣？」
嗯~ 冇效果。照片仍在她手機。

「如果講完，對件事冇幫助，甚至更糟，係咪唔講仲好？
如果要講，點樣講，人哋先會聽得舒服d?」

嗯。明白了。
即係講嘢前，諗清諗楚：講d乜？係咪要即時講？點樣講？講咗有咩後果？

佢繼續：「如果喺街見到個傻佬，佢追住你鬧，你會唔會鬧返佢？」
嗯~講到尾，說話對象都好重要。

謝謝偷拍者，傻貓今日上咗一課<說話的藝術>，仲欣賞到男朋友沉穩內省嘅優點。