茶記小妹：豬扒不似預期

 

豬扒通上枱。

靚女臉色遽變：「呢d黑色一點點係咩嚟㗎？」

城哥隨口答：「哦~黑椒嚟嘅，唔係污糟，唔駛擔心。」 

佢塊面黑晒：「我唔食黑椒㗎~我唔食得黑椒㗎~我食黑椒會敏感㗎~我喺出面食豬扒通，係冇黑椒㗎~」

可能心情太激動，靚女隨手拎起杯凍檸茶，飲咗幾啖，平復心情。

佢：「你幫我取消咗佢。我唔會畀錢嘅。」

形勢險峻，訓導出場。

訓導：「小姐，我可以幫你整走d黑椒~」

佢拒絕。

訓導：「咁我取消個豬扒通，淨係收你杯凍檸茶嘅錢啦。」

佢對眼碌到好大：「我而家咩心情都冇啦~你取消咗成個餐佢啦！」

茶記唔係冒險樂園，只提供食物、飲品，不保證送贈歡樂。

訓導講事實：「但係檸茶妳飲咗喇喎。」

佢：「而家係你哋令我冇晒食慾喔～我一分鐘都唔想留喺度咯~」

訓導：「咁我畀個外賣杯，你攞走啦。」

佢收拾行裝：「我實投訴你哋㗎。」 你唔出聲，邊個知你要走黑椒？邊個知你對黑椒敏感？每間餐廳的烹調手法，都不一樣。

好多人開口就我我我。全世界得你一套價值觀？個個圍住你轉？  

後記：

今日有位谷友受訪上鏡，原來真人好young.

突然諗起呢篇冇出過街嘅舊作，share吓先。

有時，我哋會自己set好多框框，有時自以為是。

我要不時提醒吓自己，世界有無限可能😃。

茶記小妹：廚房大佬

「其實大家都係打一份工。我覺得，冇必要擺款或者指點人哋做事。一齊夾手夾腳，做好件事，仲開心。」曾任五間茶記的總廚，一哥的管理技巧，簡而言之：齊上齊落。

之前飲食業鬧人才荒。可是，即使外面的食肆，甚至公司本身在觀塘的分店，高薪挖角，一哥的所有同事，都無動於衷。有同事無懼舟車勞頓，每天來回屯門和太子，因為好上司，確實難求。

一哥外表纖瘦，略金的短髮搭配愛笑的眼睛和溫柔的語調，絲毫不像傻貓印象中的「廚房佬」。

「讀完書，要幫家人還債，出來做廚房，一做就好幾年了。」從容自若的一哥，談起當初入行，由新人開始，逐步學習，慢慢累積經驗。

「以前我講嘢好細聲，畀大佬話。做窗口位，要同樓面、廚房同事溝通。慢慢練習，講嘢慢慢大聲咗。」平日親切的他，突然靦腆，挺像小孩子。

一哥習慣提早近一小時上班，即使十號風球卸下的第二天，交通混亂，他都準時上班。下屬臨時請假，他總是義不容辭頂更。他能夠獨自負責兩三個崗位，有條不紊地完成工作。每樣食材所需的烹調時間，他都瞭如指掌。

樓面寫錯訂單，甚至寫漏單，他每次只會以事論事：「而家客人要咩？我哋整咗先。」茶記的喧囂、訓導的急躁，剛好反襯出一哥的沉穩。

入職多年，一哥最難忘在寶琳工作的經歷。那年他三十出頭，公司指派他去做一哥。茶記的師傅，年少氣盛，動輒拳頭相見。一哥憑著他的親和力、無限關懷，終於收服了他們。假以時日，廚房各人都能暢順工作，不需他提點。提起這件往事，一哥滿足地微笑。

一哥和同事的相處方式，著重對等和尊重，往往站在同事角度思考，極少發脾氣大吵大罵。新同事到任，調亂了食材位置，一哥撥亂反正後，沒有責備他，只是提醒他不可以要求全部同事，遷就他一個人的辦事方式。

茶記工作時間長。一哥會留意人流，人客稀疏時，安排同事先吃飯，不用捱肚餓。訂單不多時，同事可以打機可以上網；工作繁忙時，大家又會乖乖的專心工作。而無論工作多繁忙，他彷彿後腦多長了一雙眼睛，總是能夠適時提點下屬：「做完張單，先打機啦。」

謝謝廚房一哥，帶給傻貓嶄新的工作經驗。

茶記小妹：普通話不普通

臨收市，兩位客人入座。

面對外藉人士，貓貓毫不猶豫上前招待😃："Good evening, Sir. What can I get for you ?"
外國人：“Guten Abend. Ich will......” （你好，我想要……）

竟然係德文😅。
傻貓只懂簡單德語：“ Entschuldigung, ich spreche kein Deutsch, sprechen Sie Englisch?” （不好意思，我不懂說德語，你可以說英語嗎？）
外國人：「我們想隨便吃一些東西。有甚麼推介嗎？」
他流利的普通話，嚇死貓。

貓循例介紹晚餐。糟糕！焗薯菜的普通話是啥？
貓的三腳貓普通話，普通到外國人莞爾。最後他用簡單英語點菜。

貓鬆一口氣，轉向他對面的朋友微笑。 「小姐，我只想吃麵包。我要……」
又普通話？😔貓聽不懂。
幸好餐單上，每款食物、飲品都有編號。

服務業，兩文三語，原來是必須的。普通話，絕不普通。 

茶記小妹：佢呃我

初次見面嘅網友食飯。

男：「你真係喺茶記做？」
貓：「著埋制服，你覺得呢？」

男人長嗟短嘆：「唉～呢一年我真係好慘~爸爸走咗，架車撞爛晒，電話都壞埋~仲畀人呃咗百幾萬~」
貓愕然：「百幾萬？」稍頓：「倫敦金定仙股毫股呀？唔係比特幣啩？」

男：「妳點知㗎？」跟手拎手機開WeChat: 一大堆成交記錄嘅cap圖，仲有銀行及證券行嘅日結單、月結單。
貓略微看一眼：「你知道共享同綠領係咩公司？」
男：「唔知㗎~佢哋話賺緊嘅~今日買，聽日賣，就賺到幾萬蚊。」

貓：「佢哋？」
男：「係咯~我對人咁好，成日去深水埗、大角咀派飯，冬天派粥同腸粉。估唔到仲成日畀人呃。」
貓：「成日？」
男：「係呀～之前有2個大陸女仔，叫我買細價股，開頭贏幾千蚊㗎，點知之後幾隻，一入就跌。有個話畀返錢我㗎，但到而家，都未入返畀我。」

貓冇佢咁好氣：「你覺得佢真係會入錢畀你？佢收佣㗎。」
男：「我都估到啦。大陸人信唔過。唉～點知香港男人都呃我。」

貓：「係？點呃㗎？」
男再攞WeChat通話畀貓睇：「佢叫我開戶口買黃金咯。我開頭真係賺㗎。每次賺200, 300美金。點知最近，一蝕就萬六蚊，美金喎。已經蝕咗10萬港銀喇。唯有等賺返，先算啦。」

貓：「買股票，你唔知公司做咩業務，都攞140萬買共享，75萬買綠領？買之前，你有冇做基本分析？佢哋嘅RSI, 近幾年嘅損益表，你有冇睇過？」
「買黃金，你唔知道Donald Trump而家玩保護主義，行強美元政策？黃金冇運行㗎，小心輸死你。」
男執迷不悟：「我唔貪心㗎，只要賺返我蝕咗嘅百幾萬，我就唔會再買。」

貓：「你呢d係賭仔性格。你輸得百幾萬，即係仲有最少百幾二百萬資金。你再追，好大機會蝕埋。自己諗啦。」

貓繼續：「你阿爸走咗，你仲有個80幾歲嘅阿媽。你住公屋，租金唔多。但錢係一分一毫，好辛苦咁賺返嚟㗎。唔好對自己咁殘忍啦。」

男：「你點知我咁多嘢㗎？我哋第一次見咋喎，我都冇講。」
貓失笑：「唔駛人講㗎~你嘅證券日結單，有地址。通話記錄，你叫個北妹唔好呃你，因為你有個80幾歲嘅阿媽要照顧，蝕唔起。」
男：「半秒就睇咗咁多？」
貓：「我唔打算呃你：我讀過速讀法。希望你唔好再畀人呃喇。我做嘢喇。」

今晚貓可能講多咗，但真心希望他醒醒。

-----------------------------------------------------------------------------
後記
真係一個奇怪的人
佢開頭想炫富，話架7人車，落地幾日😅，份工又4萬幾人工🤔
同時，佢好享受做受害者，不斷分享被騙經歷。

我好乖咁聽咗佢好多被騙經歷。呢度只寫咗2個：細價股和黃金。
叫佢正經上股票班，搞清楚投資概念，學睇年報、基本分析。
佢話：我信呢個世界，唔係個個壞人，總有人畀真貼士我。
——————————————————————————
ＰＳ
傻貓仲有本＜＜快速記憶法＞＞，華龍寶編著嘅。
唔介意睇二手書嘅，可約荃灣站取。免費。
(書已送出)

茶記小妹：求你返屋企

有對男女坐咗好耐。

男：「求吓妳啦！返屋企啦！」
女：「第二次喇。可以信你幾多次？」
男啜泣：「我應承妳：冇下次！」
偷食斷正？

女：「嗰d係我嘅朋友、我屋企人嚟㗎~你偷拍佢哋沖涼之前，冇諗過後果？」
男：「我delete晒d 片㗎喇~我應承妳：我以後唔會再偷拍~再偷拍，我斬咗自己隻手落嚟！」
好血腥咁。

女似乎心軟：「如果一齊返，之後呢？」
男：「我可以辭咗份工，喺屋企煮飯做家務湊仔。」
女沉默。

男補飛：「妳唔鍾意做家務，我會做晒佢，妳以後都唔駛做家務。」
女低頭篤檸檬：「你想我養你。」
男據理力爭：「妳份糧夠養成頭家啦。如果要生細路，都要有人照顧㗎。」

女拎起張單：「我請埋你呢餐啦。Bye bye.」
男攞串鎖匙出嚟：「妳收返抽鎖匙啦～妳隨時返嚟都得㗎~」
女推開男隻手，起身離開。

茶記小妹：衝呀衝呀

「衝呀！衝呀！去呀去呀！3號！3號！好！掂咗！」

平日君子遠庖廚，今日廚房人頭湧湧，原來跑夜馬。

下一分鐘，洗碗姐姐慘叫：「哎呀！我劃錯咗2號呀！2號跑第二咋！」
一場歡喜一場空，佢謝咗。

唔緊要，有賭未為輸。1晚有8場，大把機會收復失地。

「你買咗咩呀？下一場，有咩心水呀？」
「搭單呀，幫我買埋丫~」水吧小花平日粗口橫飛，今日甜笑和洗碗姐姐攬頭攬頸。

「跑到第幾場呀？」「你買咗幾多？」泰哥和康師傅，都係馬迷。

宵夜時間，干炒牛河香味撩人。入口。救命喔！超級鹹！
貓和小玉對望苦笑。輔導笑笑口：「冇計啦～師傅梗係輸咗馬。」

大廳內，好幾次畀客人追問餐飲幾時到，亦有幾位客人投訴：奶茶冇茶味，凍央冇咖啡味。

一場夜馬，牽引著茶記上下的心情，茶記亦展現出不一樣的風貌。

茶記小妹：你啱你啱

訓導拎住碟黑椒牛扒飯：「貓，12A張枱係咪你落單？」
錯就要認，打就企定。
貓悄悄認吓12A嘅客人：「係喔。」

「妳又落錯單喇。牛同豬妳唔識分㗎咩？最慘客人話唔食牛，我想叫佢要咗碟牛扒都唔得。」
貓：「哦~」
牛扒？心念電轉，回到落單時。

老公：「我要黑椒牛扒飯丫。」
老婆：「我唔食牛㗎，食豬扒啦。」
老公：「我想食牛喎。妳另外叫嘢食啦。」
佢哋再點咗個厚切豬鞍。

訓導：「有時唔怪得廚房發脾氣鬧人㗎，佢哋咁畀心機，煮咗出嚟，冇人食，又嘥晒d食材。」
「落錯單，仲浪費客人嘅時間同影響心情。妳唔識，就搵人幫妳入單啦。」
貓：「對唔住，我以後會小心㗎喇。」

懷著疑問，貓翻查手寫單。果然，貓冇錯喎。不過，算啦。

點知誠哥捉住貓：「妳做咩唔鬧返佢啫？」
貓一頭霧水。
誠哥：「我聽住妳覆單㗎。個男人又熱奶茶，又凍奶茶，再改凍鴦。妳覆單都係講牛扒㗎。」

😅「顧客永遠是對的。」貓傻笑回答。

茶記小妹：你聽我講埋先

「次次都係我做晒。偶然幫吓手唔緊要呀～都唔係吓吓搵我做㗎？！擺明搵我笨啫~」
「 係咯係咯！」
老婆由坐低就開始呻，面前碟意粉冇乜食過。老公食飽飽，用緊手機。

傻貓在老公身後入單，瞥見他Whatsapp, WeChat 兩邊走，超繁忙。
"Miss you😘" "Miss you  too"
「食緊飯」「call u later😘」

老婆繼續呻：「點解佢哋個個都蝦我？」
老公雙眼離不開手機：「係咯係咯！」
Whatsapp的某個她，傳來幾張自拍照：低胸、金魚咀、好enjoy咁食緊晚飯~

「你係咪聽緊㗎？」老婆忍唔住問。
老公機不離手：「聽緊喔～佢哋真係衰呀，咁都有嘅？」
「你都話係？佢哋呀～」老婆煞唔到掣咁訴苦。

太太，蝦得妳最徹底嘅，未必係同事和老細喔！

茶記小妹：佢想點？

兩個朋友相對而坐。

曲髮美女輕托香腮，一臉愁容：「佢其實想點？」

對面四眼師奶柔聲說：「有冇諗過，佢想要d乜？」

美女：「我已經好獨立，唔駛佢陪，唔駛佢哄~佢仲想點？」

師奶：「係喔~妳又靚女，又叻~喺好多人眼中已經100分。
但佢係咪要呢d? 
妳為佢做咁多嘢，佢enjoy嗎？」
美女陷入沉思。

好多人都鍾意講：
我為咗你，犧牲咗乜乜乜。
I do it for your own good! 

家長係咁，老師係咁，另一半係咁，政府係咁，個個都係咁。好偉大。

下次give前，不如先諗清楚：對方想唔想take?

茶記小妹：激死我喇

「小姐，妳做咗成日嘢，仲咁好笑容嘅？」

靚太鼓埋泡腮，好似雞泡魚，好可愛。

貓笑笑口:「我傻㗎，唔駛用腦，咪成日笑咯~」
其實剛教完3堂，趕嚟茶記，啱啱開工咋。

佢老公指住佢：「啱喇，妳畀d開心佢啦～佢發咗成日脾氣喇～」

貓瞪大眼睛：「有咁嘅事？太太妳笑得好靚，皮膚又好，唔似唔開心喎。D人成日發脾氣呢，好醜樣㗎~」

靚太開始訴苦：「激死我喇~搵咗成條金魚街，都搵唔到玻璃水樽。我隻龍貓，又咬爛咗個膠樽，而家冇樽用喇~」

貓：「嘩，行咗成日，咪好攰咯~

一陣食返d好味嘅嘢，補充返d energy.」
靚太：「食完嘢，我要笑返，好似妳咁開心。」
傻貓：「一定會啦！有個好老公，陪妳逐間舖睇，一齊搵玻璃樽，超幸福喔～我都戥妳開心喔～」

靚太望吓老公仔，咭一聲笑返。
佢開心，佢老公笑得更開心。

茶記小妹：清潔達人

貓思前想後😔，實在太厭惡搞衛生，毅然辭職。

但輔導話唔夠人~康師傅年紀大，唔想佢咁辛苦~最後，佢叫貓頂多1個月。

反正孤身一貓，晚上冇地方去、冇簿改、冇細路，唔駛睇功課，做多陣啦。

咁既然要做，貓就調整心態，同掃帚地拖互相認識吓～

一輪對望，都唔知點操作，只好厚著面皮，請教同事。

識期超nice, 教貓點拎、點掃，城哥睇到，忍俊不禁，傳授心法。

昨晚，每個卡位，貓都蹲下，逐寸地方、逐個角落打掃。原來唔駛咁樣。地拖，好濕超濕，拖抹好easy. 地面濕咗，就代表抹咗。

掃地抹地，比想像中容易。或者多試幾次，貓都可以成為清潔達人喇😤。

P.S.
收銀的雯雯靜靜告訴我，今日last day；新樓面笑姐，做咗1日就消失咗；今日原本有新人報到，結果no show. 她們說，這裡人工比外面低，又經常畀人鬧，唔好做。

茶記小妹：掃地貓

輕輕鬆鬆鄧梓峯，眨眼23:00,傻貓和同事，合力預備好明日用的餐具和碗碟、更換辣椒油的碟、清空落單紙、抹乾淨所有桌面和椅子，預備收工。

之前3日，客人稀疏，訓導總是21:50左右，臨時叫我提早22:00收工。

今日正常23:00放工，即係有免費麵包攞😋，明天早午餐有著落喇😊。

冷不防訓導發號司令：「貓貓，妳同識期今晚開始，掃地拖地。」 貓走到後巷，找到發臭的地拖和掃帚。🤢嗰種酸臭味，勁想嘔。🤮

😳拎起掃帚，努力在油膩的地上，清掃地上的菠蘿包碎、攝落磚隙縫的牙籤時，城哥閒話一句：「貓貓，妳唔識掃地㗎？掃帚🧹都唔識拎。」
傻貓的玻璃心開始碎裂。💔

我認我唔識掃地抹地。細細個，爸爸認為我嘅強項係讀書📚，分派畀我嘅責任係：帶屋企人衝出公屋。家頭細務，全部由爸媽和妹妹，合力完成。

未畢業，爸爸已退休。一年後，買咗樓。為供樓，傻貓日日早出晚歸，學校放學，就上門補習。後來，屋企請咗工人。傻貓至今掃地次數，5隻手指數完。出租嗰間屋，裝修完，都係請人清潔。
貓貓幾時掃過地？

然後，客人教囡囡要有禮貌：「同清潔姐姐講拜拜啦。」

囡囡好乖跟住講：「清潔姐姐，我哋走喇。拜拜。」

嗰刻傻貓笑住講拜拜，仲讚小朋友乖、有禮貌。心裡堅想喊😢。 如果爸爸知道，我由Miss Lee,變咗清潔姐姐，會吐血😖吧？我幾乎想像到佢嬲到面都紅埋，指住我語無倫次咁狂鬧🤬。

$45時薪，我搭一次的士，由補習社趕返茶記，已經係半晚薪水。我做嚟為乜？
看著濕轆轆的地面，貓已分不清，那是水，還是淚😭。

茶記小妹：你睇我唔到

識期疾衝過來 ：「貓貓，救我呀！ 」

張目四望，冇咸蟲、冇鬼佬。貓一臉問號。

識期 ：「我老師嚟咗喔～唔可以畀佢知我兼職㗎！我死梗㗎！ 」
高妹瑟縮在矮佢成個頭嘅傻貓身後，場面超搞笑。

貓：「佢坐邊張枱？」
識期偷偷示意 ：「嗰張。 」
貓：「我哋對調，妳睇呢邊。 」

巡查後，貓狐疑：「佢真係教師？衣著、舉止、語氣、用字，唔似。」
識期超緊張 ：「佢係TA （教學助理），好八卦㗎，同我班主任好熟。班主任話唔准人兼職，要畀心機考DSE~」

曾幾何時，我都咁講過。做老師，薪高糧準、年年跳point加人工，總是以為學生兼職，係賺錢拍拖、買靚衫和波鞋。

識期哭喪著臉 ：「補習費好貴㗎，我唔想屋企人咁辛苦。我1星期返4日茶記，3日補習。 」

年紀輕輕，就有經濟壓力，好恐怖。

識期扁晒咀 ：「之前有個兼職，屋企人咁啱嚟食嘢。佢匿咗喺厠所，整整1個鐘，唔敢出嚟。 」

究竟係唔想畀人知做兼職，還是唔想畀人知喺茶記兼職？做樓面，又唔係打刧，時薪$40, 賺嘅都係辛苦錢。而家咁多食肆結業，有工開已經好唔錯。

TA食飽打完機，抹抹咀站起，準備離開。
康師傅慌忙報信：「期期，2位，埋單。」
識期9秒9，躲進平日閒人免進的辦事處。

TA和女友手拖手離開，茶記回復平靜。

茶記小妹：冇眼睇你

朋友嚟探班。

貓 ：「嘩！好開心呀！你係第一個嚟探我班嘅朋友喔！ 」

友：「嚟睇吓妳丫嘛。」

有客人招手，貓忙開了。

10分鐘後，朋友已食飽飽。

貓 ：「食得咁快嘅？趕時間？」

友 ：「妳咁忙，費事阻住妳啦。見妳咁忙，我食嘢都唔安樂。妳快d搵工，教返書啦。 」

貓 ：「我呢度做得好開心呀～ 」

友 ：「妳讀咁多書，做茶記？唉～我冇眼睇妳喔～ 」

😢做咩喎？份兼職，包早餐、晚餐，有咩唔好？招待客人，好失禮？

我喜歡教學，幫學生改善英文、增強自信，好有成功感。教學不必局限於課室。上門私補、補習社小班教學，成效更顯著。

我也喜歡做茶記小妹。客人要求簡單，嚟到有位坐，肚餓有嘢食，就心滿意足。我最愛站在出菜位，睇廚房擺盤。每碟菜式，都像藝術品，精雕細琢。每晚9點，等食宵夜，返工就開工，放工就收工，冇嘢要帶返屋企做。金精火眼改作文、半夜三更出試卷、寫建議書攞funding, 老作evaluation budget report, 都過去了。

媽咪一直怪責傻貓：「懶清高，放棄永久教席，視錢財如糞土。」她始終不能理解：科主任突然委以重任：老作冇做過嘅教學活動、擅自篡改兼職導師的合約及薪酬、老作學生的課程後回應，這些都是詐騙。

記得當傻貓和盤托出後，老細曉以大義、動之以情：「你肯寫，大家來年就有機會繼續拎funding. 你唔寫，我哋用完呢3年嘅錢，就有幾位英文科同事及教學助理，要執包袱。你自己決定，想點做啦。」

老師唔係成日教學生：「誠實係美德」咩？身教重於言教。不能以身作則的老師，不配做老師。

毀人衣食，猶如殺人父母。貓唔想同事失業。報告，貓寫咗。寫好，交埋。辭職信，一齊交埋。

朋友，你心疼我工作辛苦，我明白。但我冇殺人放火，只是隨心而行。我唔知仲會做幾耐，不過唔做茶記，亦唔代表我要返學校教書。爸爸不在，我再不需任何人認同。

你明白最好，不理解也罷。

茶記小妹：係咪你玩嘢？

茶記有兩個經理，風格迴異。簡單來說，一個做訓導，另一個係輔導。兩人好少同場。

今日返工，火藥味濃。不問而知，訓導揸fit.

訓導大鬧：「係咪玩嘢呀？個牛脷飯邊個賣㗎 ？賣咗去邊？阿仔，係咪你 ？」

盛少搖頭。

訓導怒睥：「小玉，係咪你玩嘢？」

玉姐低聲囁嚅幾句。

訓導玉手一指：「貓貓，係咪你 ？」

貓：「我啱啱打卡咋。」

訓導鍥而不捨，逐個追問，並不斷重覆 ：「你哋唔識賣嘢，唔好賣。唔錯得㗎~等我嚟~」

康師傅火了：「 賣錯咪叫廚房再做咯。你信唔過人，自己做晒佢。」

訓導 ：「我都係想知邊個做錯，教返佢，以後唔好再錯。我有錯咩？」

作為經理，訓導冇做錯，動機亦良好。但出嚟嘅結果，理想嗎？

睇返結果：

今晚所有外賣單，無人敢碰。試過同時4張單，10幾盒外賣連飲品，堆喺吧台。訓導自己又忙，客人不斷催促。

賣錯單，不時都有。大家都唔想出錯，更加冇人想全世界知自己笨咗。要鬧要話，暗角唔該。

做管理，得人心，得天下。

茶記小妹： 好同事

傻貓今日未開工，已仆街。

開工前，換衫。

手機話太熱要沖涼，飛插落水窪。

我仆住去救，拗柴跣低，仲傷及舊患。
(之前做訓導，小息巡樓時，天雨路滑，踩咗落光面的地磚，足足成個月，行唔到路。
做完物理治療，再返工，學校已變天。)

彎腰會痛，行路會痛，坐低會痛。

但就係咁，我發覺茶記同事，真係超好人。

行得遠嘅枱，佢哋爭住傳菜。

廚房濕滑，餐具又重，佢哋盡量唔駛我入去。

人多好辦事。 (Many hands make light work.)

可惜，今日嚴重缺人。

但經理都畀我第1個食宵夜，坐低休息。

仲畀我第1個換衫放工。

部機跌爛咗，爆芒兼勁閃。

其實Eric送時，已經爛咗。

現在正好換機。 過去的事就讓它過去吧。
(Let bygones be bygones.)

茶記小妹： 餐飲業英語

茶記原來都唔少鬼佬幫襯，傻貓嘗試去招呼。

貓: Good evening, Sir. How many are in your party? (先生，幾多位?)

客: Two

貓: Right this way.(呢邊丫)

客人坐好。
貓: Let me tell you our specials today. We have German Pork Knuckle which comes with rice, spaghetti or baked potato. Are you interested? (我哋今晚晚餐係德國咸豬手，可跟飯，意粉或薯菜。)

客: Sounds nice. But let me have a look first.

貓: Certainly. I'll return in a moment to take your order. (稍後幫你落單)

3分鐘後。

客: Excuse me.

貓: What can I get for you? (先生想食咩？)

客: Curry chicken...... Pineapple bun......

貓: Curry chicken...... with rice or spaghetti? （跟飯定意粉？）

客: With rice.

貓: Would you care for something to drink?(要嘢飲嗎？)

客: Black coffee would be good enough.

貓: Thanks. I'll be right back with your drinks. （多謝。我一陣攞嘢飲畀你。）

圖文不符🤣
介紹返：
芝士流心西多，日日熱賣
夠邪惡，正😋😋😋

茶記小妹：土地不足之速食男女

(強烈警告：兒童不宜)

一對20幾歲的青年男女入嚟坐低。

我隨手放好餐具，習慣性退開。
行咗幾步，覺得座位出奇寬敞，禁不住停步，回頭。

😱嘩！嘩😱😱！嘩嘩嘩 ！😱😱😱

兩人坐一邊，冇問題。糖黐豆做連體嬰，都可以。
不過，女方左胸，多咗隻手嘅？

唔想多事，但22:20, 客人再唔落單，我就要遲收工喇。

若無其事踱至附近：「先生，想食咩？幫你寫丫？ 」

男士的手仍在登峯 ：「我哋唔肚餓，嚟坐吓㗎咋。 」
我哋呢度係茶記，要坐要錫要摸，門口嗰邊。

我：「唔好意思，我哋就嚟截單喇。如果冇嘢要嘅，我哋清枱喇。」

男士勉為其難點菜。

咦～呃人嘅～又話唔肚餓……語音剛落，男士已急不及待開餐。

介紹返女主角：
長髮，20出頭，穿薄 tee, 短褲。

男士的手，好勤力咁在女士的大腿，腰，背，胸......游走。

端上食物時，我清楚看到，他的食指和中指，超濕。
女士仍然面不改容。

放下食物，我退開，巡枱。
不時仍隱約聽見：「唔好啦～唔好咁大力喔～痛喔～我濕晒喇～ 」

半小時後，男士攞單畀錢。
女士企好，拉返好件衫，同埋條褲，離開。

佢哋係肚餓嘅，不過枱上食物，係裝飾。😪
太過份喇😭。附近有時鐘酒店㗎，做咩要浪費食物喎～

茶記小妹：學字貓

🤔以下茶記術語，你識幾多？🤨
嗱嗱嗱～～唔准出貓㗎！😒

飲品篇：
T
冬T
OT
冬OT
田
少田
力
朱
冬央少田
斗

😋食品篇 ：
反
以
sh

圓圈加1點
圓圈中間"又"
G多

估中晒？😍
醒目👏👏👏👏😁

估唔到?

你留言，傻貓開估😉

文盲貓

客：「小姐，寫嘢。 」

貓 ：「我轉頭搵同事幫你寫丫。 」

環顧四周，弊家伙！😓

全場除咗3個新移民，只有傻貓。冇人識寫單。😢

客 😠：「妳唔識字㗎？係咪嫌我樣衰，唔幫我寫呀？ 」

嗯~~👉👈我唔識睇相。閣下尊容，自己應該最清楚。😅

入得嚟嘅，都係貴客。💗👸🤴

貓從來唔會對客人評頭品足。

傻貓陪笑鞠躬😀：「Sorry喔~~我新嚟㗎，未識寫單。我盡快搵同事幫你寫丫。 」

客😒 ：「妳做樓面，就要識寫單㗎啦。寫個字有幾難呀？妳有冇讀過書㗎 ？ 」

嗯~~寫字本身唔難，翻譯就睇吓譯咩啦。

不過，唔代表我識寫單。

寫茶記廚房睇得明嘅單，傻貓真係唔識。😖

至於讀書🕮~~有，我有。我真係有讀書。📚

港大榮譽學士翻譯系畢業、中大兩個碩士畢業、英文基準試合格、政府公務員試終身合格，仲有好多唔知有咩用嘅證書和專業文憑。

傻貓再鞠躬🙇 ：「好對唔住喔～我盡快搵同事幫你丫，請等等。 」

客 😞：「快d啦，咁唔專業㗎。 」

😀閣下一定係專業人士。

貓會努力諗吓🤔，自己有咩專業，同有咩用。

補習寒冰期，有時全日都冇1個學生。

傻貓都要交租、要開飯喔～

做個專業嘅茶記小妹，有冇得諗？🙍