茶記小妹：豬扒不似預期

 

豬扒通上枱。

靚女臉色遽變：「呢d黑色一點點係咩嚟㗎？」

城哥隨口答：「哦~黑椒嚟嘅，唔係污糟，唔駛擔心。」 

佢塊面黑晒：「我唔食黑椒㗎~我唔食得黑椒㗎~我食黑椒會敏感㗎~我喺出面食豬扒通，係冇黑椒㗎~」

可能心情太激動，靚女隨手拎起杯凍檸茶，飲咗幾啖，平復心情。

佢：「你幫我取消咗佢。我唔會畀錢嘅。」

形勢險峻，訓導出場。

訓導：「小姐，我可以幫你整走d黑椒~」

佢拒絕。

訓導：「咁我取消個豬扒通，淨係收你杯凍檸茶嘅錢啦。」

佢對眼碌到好大：「我而家咩心情都冇啦~你取消咗成個餐佢啦！」

茶記唔係冒險樂園，只提供食物、飲品，不保證送贈歡樂。

訓導講事實：「但係檸茶妳飲咗喇喎。」

佢：「而家係你哋令我冇晒食慾喔～我一分鐘都唔想留喺度咯~」

訓導：「咁我畀個外賣杯，你攞走啦。」

佢收拾行裝：「我實投訴你哋㗎。」 你唔出聲，邊個知你要走黑椒？邊個知你對黑椒敏感？每間餐廳的烹調手法，都不一樣。

好多人開口就我我我。全世界得你一套價值觀？個個圍住你轉？  

後記：

今日有位谷友受訪上鏡，原來真人好young.

突然諗起呢篇冇出過街嘅舊作，share吓先。

有時，我哋會自己set好多框框，有時自以為是。

我要不時提醒吓自己，世界有無限可能😃。