Monday, December 28, 2020

投資成功的關鍵: 賠率、勝率、交易頻率


早幾日,傻貓寫咗篇千字文罪己 (Trial & Error: 動物篇 (牛熊證)),檢討蝕60萬,仲以為自己賺咗嘅低能想法。當時,真係覺得自己冇理由輸嘅。要面對錯誤,真係好難。發現錯得咁緊要,而自己完全不知不覺,簡直不可思議。

米兄好有心,唔止睇文,仲剖析牛熊證設計,點樣吸引散戶入場,再慢慢劏。

睇完佢寫的蠢人自救(79)–勝率、賠率,傻貓才發現: 散戶好多時,只著眼賠率或勝率,加上交易頻率高,出錯機會大,所以蝕多過賺。


投資成敗的關鍵: 勝率、賠率、交易頻率


投資鬼才巴努克講過: 成功嘅交易員,10次贏3次,表現已經好出色。

傻貓嘅勝率,高達66%. (買賣左135次,有90次係正數)

換句話說,我嘅問題,不在勝率(贏嘅次數),而係賠率(即係每次贏時,贏到幾多)、交易頻率。


我犯咗三大錯誤:

1. 止賺唔止蝕

之前傻貓太勇,尤其正股,有錢就一炮過買貨,有幾多錢,就買幾多貨,唔會分注入。經常諗住賺咪take profit, 輸咪坐吓先。結果: 成手蟹貨。

買牛熊證都一樣。睇記錄,我通常賺少少就走,蝕就坐定定待宰,極少止蝕。

止賺思維,侷限咗賺嘅金額上限。唔止蝕,虧損不斷擴大,蠶食組合嘅本金。

咁以後點做? 很簡單,贏多輸縮啦。

股價下跌,跌到止蝕位,就鐵面無私走人啦。

股價上升,就調高止賺位,甚至可以採用零成本投資法,讓股價放風箏。


2. 愈賭愈大

之前傻貓經常妄想: 以小博大,刀仔鋸大樹。

可是,谷友都對牛熊證嗤之以鼻。他們往往以大博小,篩選出被市場低估的好股後,分段大手買入。

牛熊證係高勝率、高風險嘅賭博工具。即使勝率高達99.99%, 贏 1 次,賺 100%, 但輸嗰 0.01%, 可以令我一舖清袋,輸光本金。

當我賣咗那層(一炮過用現金買入嘅)自住樓,豪擲 26萬去賭時,錯1次,就萬刧不復。



3. 頻繁交易

我交易次數太多,只要做錯幾次決定,就賠突。


事後檢討

贏嘅把握高,才落大注。落注時,要分注。細注試水溫,股價升,判斷正確,才慢慢加注。

道理很簡單: 勝率高、賠率高,交易次數一定少。

龔老師雖然不斷教人月供股票,但堂上他親口說: 每年入市機會,只有幾次。他通常保留現金,等大跌市,股價遠低於股值,才入場。

鍾Sir 在 8 月時,低買領展、煤氣、恒生銀行。他表示: " 現在是考驗價值投資者耐性的時候。我有耐性等待具實力的舊經濟股回歸應有的價值,這是業餘投資者的優勢。"

雲地集中持股,他的投資,賠率高,今年美市低位開始建倉,勝率亦高。可是,一旦看錯,轉身太慢,止蝕太遲,就會慘敗。因此,他出手次數也不多,主要分段入貨,亦會在高位減持,降低成本。

由此可見,真正的投資高手,贏多輸少,出手次數也少。

如果想賺得多(高賠率)、賺多過蝕(勝率高),應該選擇中長期的價值投資操作。



每次買賣正股,其實都在賭眼光。

你贏,代表有人輸。

你手上的股票,就是從看淡的人手上,流給你。

你高價沽出,代表有人睇錯市,摸頂追入。

就算是騰訊、阿里爸爸、TSLA, AMZN, DIS這些超級大股,一樣有起伏。因此,谷友經常強調要保留現金,預備市況突然轉差,才走入超市,分段低撈。


傻貓現時已戒掉大升追入,大跌又唔會捨得割肉低價沽出。問題是: 最近學用期權,可能又出事了。當騰訊$630時,我做咗 2 張$520 的 short put. 今日騰訊收市價: $519. Short put Feb 28到期,如果變得極價內,可能要提早接貨。但我早幾天,買咗 1448 福壽園、697首程。現時戶口冇足夠港元接貨。接貨,就要兌換美金做港元,或者動用槓桿。當然,也可以從另一個銀行戶口,調動資金;或者沽走一些前景不明的蝕本貨,接咗貨先。

學Tommy兄講,買指數ETF,可能更好。
定額月供,低位供多些,高位供少些,平均成本法,用在美股,手續費低,挺好的。

16 comments:

  1. 同意愈賭愈大是不少投資者的常犯錯誤~控制注碼丶預留資金是必需做的防禦措施👌

    ReplyDelete
  2. 買牛熊,本身個遊戲規則就存在不公平,就算睇中遲早都會輸,因為始終長賭必輸,正股都話可以磨下。

    我以前都有買過牛熊及窩輪,轉後來買option,開頭option都係輸多,之後慢慢都減少次數,經常開就好似慢性吸毒咁,就算做short side賺時間,市況唔好做short side都可以輸得大,寧願等岩時機,大機率先去做。

    ReplyDelete
  3. 我過去只認為趁低吸納及買最強股票便最穩陣,但世事無絕對,其實真是要不對路就止蝕離場,無止境向下溝貨,只會令太多資金放在同一隻股度,風險變得愈來愈大。在未完全懂得炒股票前,我還是繼續少少地參與下便算了!

    ReplyDelete
    Replies
    1. 你嘅少少地,回報都好唔錯啦
      我繼續睇表演+拍手掌^_^

      Delete
  4. 其實買牛熊我有心得呀~買得預輸先
    同埋買未日牛熊最爽~
    用少少錢去博~同埋因為用少錢去博~
    輸左都唔心痛~

    ReplyDelete
  5. 同意 ~ 自己交易次數比多年前少了, 但回報卻高了, 時機和心態比'努力交易'更重要呢XD

    ReplyDelete
    Replies
    1. 證明你的投資技巧有進步,提高咗回報
      恭喜

      Delete
  6. 師姐,有條財路介紹妳,唔知点唔点,不妨提供給妳參考下,早排看 youtube一個節目留言者,叫 Speaking cantonese
    with miss Winnie 個女主持人,用英語教中文,雖然唔係好多人睇,但佢都教得好用心,我就想師姐德文亦都好掂,依樣葫蘆,可以搞個傻貓教德文YouTube, 相信都幾好玩.又多一個被動收入,零風險,兼可以做埋日後補習教材,一舉數得,諗諗佢!:)

    ReplyDelete
    Replies
    1. 我睇吓先
      謝謝你

      你的留言,經常令我覺得好貼心、好溫暖,好似識咗我好耐咁
      其實我係咪識你?
      因為唔見你有寫blog......

      Delete
  7. 哈哈,應該不認識,但可以透露我有親戚,也寫理財 blog, 而且跟雲地兄寫得很同樣出色,所以我才很多年前已經喜歡掹車邊,睇理財投資 blog。。這樣算不算我都有份參與寫blog, 近幾年湧現很多女博主寫理財 blog, 妳算是寫得非常出色的一位,希望2021年繼續加油。:)

    ReplyDelete
    Replies
    1. 還有blogger跟雲地寫得一樣咁好?跪求介紹🙏
      我還在學習、摸索階段,希望日後會寫得愈來愈好
      最重要的,是和讀者一起,逐步改善投資回報

      Delete
  8. 不要這樣說,他叫Ricky :九十後投資記,跟雲地很老友!

    ReplyDelete
    Replies
    1. 因為佢哋都係TSLA的鐵粉😄
      我又多d去坐吓先
      謝謝介紹

      Delete