你幸福嗎?

(圖片來源: 我不清楚，伊面Boss share出嚟嘅)

昨天有谷友話: "但睇見個班十年黎都無物慾既朋友，我一講親城中有咩餐廳好食，佢地都淨係會答無聽過/無興趣，又會為佢感到有d可惜…"，我諗: 我就係呢類人 -- 呢類無端端被人覺得好可惜嘅人。

物慾，曾經有過。成千呎嘅2層複式，超大嘅廳，全屋訂造嘅特大傢俬，我曾經擁有。一餐飯，$3000 落樓，我試過。東歐自由行，自己搵資料，逐個國家去，玩足大半個月，試過。買衫，我以前係同saleslady講: "門口個model 著嘅嘢，唔該你執一set啱我size嘅畀我"。千幾蚊一條頸巾，幾千蚊一件大褸，千幾蚊一個bra, 一對boots. 個個月都交好多卡數。

但係，當我發覺，人生無常，呢個世界冇任何一個人、一樣嘢，係屬於我嘅時候。當爸爸可以突然在半個月內，由行得走得，變成離開我哋；當穩定工作，因為另一半精神問題，我辭職陪佢睇醫生，冇晒收入；當同衾共枕的另一半，突然講你知: 佢精神病好返，不過同你好朋友搞埋，仲有咗BB，10年婚姻劃上休止符……

食餐好嘅，係咪真係咁重要? 住大屋，用最新型號手機，係咪最重要?

我寧願花時間，行吓山，做吓運動，學吓嘢，睇吓書，同屋企人相處。唔止因為我冇安全感: 錢用咗，唔知幾時賺得返。最重要嘅係: 我唔錫自己，仲邊度會有人錫我? 我唔好好照顧自己嘅身體，病咗，只會係別人嘅負累。保險嘅醫保，只可以在經濟上幫輕吓家人。屋企有病人，對家人係一個心理包袱。

我已經冇爸爸，唔想連媽咪都冇埋。當日，冇錢喺仁安即時做手術，錯過咗救佢嘅最後機會。我點慳都要儲錢，媽咪有病痛時，我可以即時攞錢出嚟醫佢。

每個人的人生際遇，都不一樣。有人天生購物狂、有人喜愛斷捨離。懂得活在當下，珍惜身邊人、滿足擁有的東西，就可以感到幸福。因為，你的幸福，和我的幸福，沒有必要一樣。幸福，只是一種感覺，一種非常主觀的感覺。

這一刻，有愛我的人、我愛的人，我的家人、男朋友、我的狗狗，都生活得開心，我已經很滿足。

未來個多月，停課+聖誕假期，加上好多學校取消了考試，補習社肯定會再次進入寒冬期。這幾日，已經好多家長，要求暫停補習。還是多讀書、好好練琴、多做運動、玩德文、冬眠吧。就當提早適應財自生活，也好。

泰剛才又嚟請我食晏。Muimui好似唔認得佢喇。只係泰唔知點解，仲係維持最少一個月，要見一次面。剛才佢仲要即場打視像電話，畀遠在加拿大的大姐。有愛冇性嘅佢，係咪當咗我係親人? 我就嚟生日，佢話想正日當日，親自下廚，邀請埋Muimui 豬。

一哥早幾日話要娶我，但誰會愛一個大負累？沒有現金流，每日食風，可以維持生活嗎？結婚，還是等有小朋友再說吧。以我的體質，恐怕是天方夜譚。

這星期，看了好多本書。冇乜觸動，睇完就算咁。

今晚7:30繼續上鍾記的視像課程<看年報推算公司價值>。上次那堂，其實我仲係好多嘢唔明。今日要學計算估值，好多會計的名詞，PB, PEG, EBITA, DCF, DDM, SOTP. 這些我在鍾記的<<選股與估值>>看過。頭好痛。完全唔明。一陣補完習，會再睇多幾個鍾記的videos, 對照今堂嘅PowerPoint, 預習咗先。

今日又學琴。總係唔明星期一老師Lawrence講乜，我根本跟唔切，返屋企又唔識彈。學費唔貴($290/共4堂/2級/30分鐘)，又在補習社隔幾個舖位，加上佢低價賣琴畀我，又係朋友的哥哥。唔知點開口話唔再跟佢學。

只好跟多一個星期三老師，在補習社對面，2步之遙。學費好貴($360/每堂/45分鐘)。不過，真係明白，回家自己都練習到。Lawrence每堂都教2-4首新歌，Ms Yuen會跟住教，但我學習能力差，佢每堂只跟到1-2首，剩返嘅，我返屋企再睇YouTube 自學。學得好吃力，不過我真係開始彈到一些幾好聽嘅歌仔。希望將勤補拙，學到上3級。如果彈到"夢中的婚禮"，就好喇。