Saturday, January 30, 2021

點解一定要我學煮嘢食?



好苦惱。

由細到大,自己都成日手凍腳凍。
開始工作,每年11, 12月,例牌失聲、感冒、發燒。

冇返學校,多咗時間做運動。
但ex係asexual, 連kiss, 拖手都冇,點會有B?

下決心換畫,一哥都想有B.
我哋有試過一齊睇中醫。
中醫都話,佢睇唔睇都得。佢健康冇問題。
(係咯,佢食煙,之前成日飲酒,健康都冇問題。)

我次次都轉藥,但仍然食親就瀉。
藥已經好溫和。唔好話調經,而家只係簡單調理緊身體。

其實想、做,係兩回事。
我哋成日都好攰,根本計埋日子,都未必會XOXO.
咁點生?

我的脾胃太差,成個人都好乾,連"進入"都有困難,就算千辛萬苦,成功進駐,精子要著床,都唔容易。
醫師話,我子宮好寒。成個人,身體好弱。脾胃好差。
明明我有做運動,個個禮拜都行1-3次山。究竟邊度出錯?

前日同Polly傾偈,佢話我知艾炙可以改善身體,一哥搵咗同事,幫手淘寶。
但Polly話,食療好緊要。

而家朝朝落街食早餐,食麥皮/米線/通粉,午餐食早餐食剩嘅餐包,晚餐食肥牛米線 / 唐記鵪鶉蛋燒賣,原來做得唔啱?
好多人都係咁食喔。

佢講嘅磨薑汁、燉呢樣嗰樣、煲咩湯,其實我一點頭緒都沒有。
妹妹講得啱: "呢個係我家姐,佢讀書好叻架,不過,除咗讀書,乜都唔識架"

Polly話,麥皮係北方人食物,麵包係小麥造,我要多食飯。
咁我又真係好少食飯。
廚房,我只係用電熱水煲。

有邊次入廚房煮嘢,我冇煲燶煲,冇成屋黑煙?
滾瀉晒,周圍污糟晒;薰黑咗成塊牆壁;煲燶煲爆煲……
而家用電陶爐,最少不會火燭。

之前感冒,煲粥煲爛煲,ex影咗相畀我媽咪,一齊笑吓😆



雖然好欣賞妹妹,辭咗份7萬幾蚊月薪嘅工,返屋企做full time mother, 炒咗工人,由頭開始學煮嘢食、做家務。
佢日日起身煮早餐,然後瞓返,再起身煮早餐畀小朋友,佢哋上Zoom, 佢就做家務。
妹夫說: "而家每日都好期待返屋企,食老婆煮嘅飯"
但要我而家開始學煮嘢食,只係諗: 要學煮嘢食,已經好大壓力、好頭痛,好驚。

我好記得: ex將我整嘅晚飯,倒晒落垃圾桶。
佢話: let's eat out. This is not for eating. I'll make the dinner when I feel like it.
情人節,我整曲奇,佢話: Yuck! So disgusting! Just throw it away. I'll buy you some if you like.

所有ex, 仲有現任,都苦口婆心,叫我唔好煮嘢食。
一哥話: "你做你嘅強項啦。煮嘢食,交畀我得喇"
我話想煮晚飯,佢話: "我會買返嚟,唔好煮~你睇書啦、練琴啦,做你鍾意嘅嘢,就得喇"
有時,佢會直接講: "我唔想死住,我仲想見到你" "唔好煮,千祈唔好煮"

你要我好似妹妹咁,放棄高薪厚職,在家做賢妻良母,我會想死。
如果老公得2萬幾蚊,我冇可能同意,佢一個人做嘢,養成頭家。
我會好冇安全感。
每月個人收入,低過5萬,我已經會瘋狂搵freelance.
每日工作20小時,我可以。但可唔可以唔學煮飯,可唔可以唔做家務??

有咩辦法,唔駛自己煮,但改善到食療?
明明周街都係食肆,點解一定要自己學煮???
諗起,肚痛、胃痛、頭痛。好痛。

在家計會網頁,預約咗安排身體檢查。
唔知幾時先覆我? 幾時有得檢查?
檢查咗,會唔會話我知,我子宮已經凍到死咗,唔會有機會生B?

我成日都咁攰,真係適合做媽咪嗎?
係咪神都覺得,我冇資格做媽咪?
好多問號。

Friday, January 29, 2021

一哥短線投機: KOSS YOLO

一哥應該好有賭運。

前晚,一哥好開心: "我買咗嘢喔~唔知乜嚟,但升咗1倍呀!!"
貓: "咩嚟架? 代號係乜?"
佢: "唔知呀~升咗呀"

半响,佢攞部手機,碌呀碌: "KOSS呀"
貓: "你點解揀佢? 做咩生意架?"
一哥: "唔知呀~佢10大上升股嘛,升咁多,咪買少少,跟吓咯"

傻貓心諗:
當一個散戶,連自己買咗乜都唔知,代號講唔出,公司業務唔知,咁樣買股,都升成倍,一晚升到熔斷幾次,呢個世界,真係冇乜嘢,係冇可能。

過咗一陣,一哥神色凝重: "點解賣唔到股票? 係咪我set錯嘢?"
我攞我部手機望望,個個都話富途down 咗,報價冇問題,係落唔到盤,又cut唔到單。
股價一直升,但佢一直賣唔出。


佢見KOSS升到$34,想賣,但唔知賣唔賣到。好煎熬。
終於,佢笑笑口: "賣咗喇"
我: "賺咗? 咁咪好咯~"
佢: "係呀,賺咗好多倍"
我: "倍升股? 幾倍?"
佢: "賣咗喇~ $10.5買,$30.75賣咗一半,今朝又賣咗d."

傻貓叫佢攞記錄睇睇。嘩!!!!
成本價: USD $1050
買入價$10.5
賣出 1) 50股@$30.75, 2) 40股@$120
賺咗USD $6232.5

現在還有10股,佢話學勁人谷的零成本投資法,等佢放風箏。

咁套現咗嘅錢,佢點用?


沽咗貨嘅錢,佢買咗5股TSLA@$822, 10股BEKE @$61.2
佢話第一次買美股,已經升咗幾倍。
不過呢隻KOSS冇乜價值,所以要換大隻d、有未來嘅股票。


平時我唔會過問,佢投資嘅嘢
估唔到已經換咗馬,仲係TSLA + BEKE
原來平日我哋傾偈,佢有上心,記得講過邊d係增長股。

谷友都擔心,一哥下次唔知有冇咁好彩……
大家都怕佢學壞。
如果心雄、太自信,好易出事
一哥回應: "哦,我唔會"


睇返佢個新倉,真係好靚仔。
只要佢唔亂買賣牛熊證,應該投資成績,會好過我。

谷友分享的: 分段沽出、零成本投資法,仲有投資有前景的股票,佢都有用心記著。
短線投機,用短線思維操作。

這些,我望塵莫及。
自問不敢也不會,買入不懂的股票,能力圈又細,範圍外的又不想逐隻費神了解、做功課。
長遠來說,劃地自限,肯定會侷限我的投資表現。
不過,能力圈外的股票,太多太雜,我沒有能力、膽量去買入這些股票。
所以,佢賺,我為佢開心。就夠了。😄😄😄

(但係,佢有錢賺喎!發達喇!!

趁機要求佢補送聖誕禮物: 人仔$57.9艾炙盒+54條10年艾草。
聽Polly說,燒艾對暖宮、補脾虛、腎虛、肺弱,好有幫助。
Wing之前流產,特意辭咗小學教席,去修讀中醫課程,自己在家燒艾,成功再次懷孕,今日小晴晴滿月了。

反正沖劑食完,每次隔大半個鐘,就瀉到十彩。
煲藥,又唔識煲,煲燶煲,仲又疴又嘔。一哥煲完,我飲咗又係勁瀉。
唉~明明成日做運動,點解身體都咁差??
唔知燒艾有冇效,試試啦

42歲,唔試,應該永遠唔會有B
試,仲有少少機會
YOLO: You Only Live Once
買股如是,生活如是
肯嘗試,才有機會成功)

Thursday, January 28, 2021

跌市,止賺維他奶 + hea行城門水塘

呢兩日大跌市。
我道行唔夠,早幾日升市,我怕死,賣咗唔少貨。但昨日已經忍唔住,衝咗入市買嘢,然後一如所料地,又尋底,又做蟹。
反正,戶口只餘少量現金,我帶咗Muimui去行山。

反思: 如果我喺大升市,識遠離股市;等大跌市,哀鴻遍野,才分段入市,才能改善投資回報。

原本想行3  或 4星路線。但始終第一次跟Polly行,唔知佢步速、體能、腳程,最後揀超簡單的城門水塘畔塘徑。

但我就係連城水都可以玩到由1星變3星,帶咗佢哋去爬防空洞、穿林、綑石灘。
Muimui身經百戰,見我涉水而行,怕水嘅佢都即時搵淺水位跟上。



諗返,去年疫情,行山隊唔公開招人,我又冇心思上網開團,2020年,完全冇行澗。連橫涌石澗呢類BB澗,都冇行。難怪Muimui落水都冇扭擰。


Hea行4個鐘後,回到現實世界。
我又忍唔住沽貨。
今日沽嘅係維他奶。唔係基本面有問題,而係佢實在係急升得太無厘頭。大行講一句,佢酣睡多月,突然就彈起咗。一日升15%. 我$27.15入,盈利達32%.






反而美股,我唔會跟咁貼。
富途升到$131.71, 明顯超買。但我還是按兵不動。而家又跌返,冇得做紅底股。
股數唔多,一動,不如一靜。

一向好少兌換外幣,唔少美金都係short put賺返嚟。
有錢,我通常等到期日後,就拎去買正股。
又因為唔知買乜好,人又懶,唔想做太多功課,有錢就買TSLA, TSM, ARKK, ARKW.
暫時仍未成功接到呢幾隻嘅貨。
但唔經唔覺,收到權金,就增持正股。正股股數愈儲愈多。
呢一刻,TSLA已增至倉位16.5%, ARKK 4.2%, ARKW 2.6%.

暫時看,這投資模式還可以。2月,應該會再加1-2隻美股/ETF,同時繼續減持港股。
做咗少少功課,稍後再share.

Tuesday, January 26, 2021

港股期權實驗 3 : Long call 港交所, 中信證券, 比亞廸

做了幾次實驗,有贏有輸啦。😅

基礎期權班的老師,冇教long side.但谷友分享咗d期權知識,傻貓覺得幾有趣,就細細注,試吓先。

首先: 
買long side 期權,要有輸晒的心理準備。
但同時,如果你叻叻豬,睇啱咗,回報真係超級理想😀!!!

先分享我嘅撞板經驗😅:
話說我睇好港交所,就用$2萬蚊,long call 即月到期的388, 行駛價@$540






買咗一個鐘,就聽谷友建議,賣咗lu. 
不過呢個唔係重點。

登登登登🎉🎉🎉

各位觀眾:


傻貓賣咗之後,以為自己蝕錢😂。諗咗好耐,明明賣出價,高過買入價,點解會蝕錢呢?
原來係佣金太高喔👀
即時私訊谷友,分享我嘅低能大發現。一齊笑吓😆😆😆
點知,佢話我知,我比自己想像中,更低能😂😂😂
我原來唔記得乘返合約值。結果,由我以為的蝕$127, 變成有錢賺。好符碌喔😅
又原來,IB喺賣出時,會幫手計埋,我在呢次買賣的實際盈利/虧損。
原來我竟然賺咗$11276. 😆

咁講完賺,又講吓蝕嘅教訓。
第二天,
我嘅輸錢經驗嚟喇😥

股不斷升升升,資金都係南下資金帶動。咁內地炒股風氣,應該都唔差啩......

買咗少少中信證券的long call, 等佢瞓醒先。
結果? 買完就不斷跌。跌到止蝕位,走佬。蝕咗$9597.4




同日,我仲買咗比亞廸long call. 
然後,我發現IB喺期權版面的右下角,有計數機,會幫我計晒數。
成本、佣金、合約張數,一清二楚。


今次動用$28275, 買咗5張long call 1211, 2月尾到期,行駛價@$270.



另一個低能位出現:
我止蝕中信證券隻long call時,無端端順手止賺埋比亞廸long call. 賺咗$10934







提早止賺,我起初冇乜感覺,因為都賺咗嘛。有錢落袋,都開心喔!😛

後來在勁人谷講起,谷友畀咗好有用嘅提議:
1. 記錄當初買入、賣出原因,日後檢討整個買賣操作
2. 假如該買入的決定,是長線投資,請用長線思維,去作賣出的決定
3. 假
如該買入的決定,是短線投資,請用短線思維,去作賣出的決定

睇到佢嘅建議,我先清醒返少少::
做實驗? 喂喂喂,錢嚟架!! 做錯決定,同買牛熊證一樣,血本無歸喔!! 


谷友再補充: 

1.買入前,最少要有3個令你/其他人信服的原因

2.在未入市前,請想清楚

假如作長線投資,買入的股票股價假如未來會跌3成,你會如何應對? 假如你會再買, 現時便可以買入。

傻貓至此,深刻反省:

谷友都為咗改善投資操作、學習提升財商、選股、估值,努力奮鬥,亦一直無私地分享知識、寶貴經驗,希望一齊進步。傻貓竟然胡亂將錢攞去做實驗,太過份喇!!😡

經過今次,我學習到:
長倉,應該在股票出現短期爆升,或暴跌機會時,才入場
因為,時間值的損耗,每天都在蠶食你的本金。
如果不懂閱讀圖表,你根本不可能賺到豐厚的期權金。
到期日時,股價在long call 之下,或long put之上,你的期權合約,價值歸零。血本無歸。

唔想輸爆廠? 咁就控制注碼,或者,唔好買long side 啦!!

Monday, January 25, 2021

短倉股票期權: SC, SP 的壞處

上基礎期權班時,靚太不肯教long side. 

她教我們新手,只做short side, 因為時間值是我們的朋友。
Long side? 提都唔准提。

老實講,個谷係佢開嘅,同學仔都係上佢堂,先入谷。咁尊重主人,好應該。
但個谷,死氣沉沉。
有人問嘢,冇乜人答嘢。
有人問: "應該點揀證券行?"
佢例牌sell 自己公司: "搵Benny啦,我哋電話落單,你一定唔會落錯單。"
喂,交易成本,都係成本呀。

仲有,個谷乜都唔畀講,傻貓頂唔順那種壓迫感,好似講乜都錯的感覺,走咗佬。
而且,我並不同意靚太的說法。我認為short side, 唔一定適合新手。
當同學問: "期權到咗行駛價,但未到到期日,係咪一定唔駛接貨?"
咁你應該知道,大家真係乜都唔知嘅。
仲有,有人問: "究竟點分long, short?  個掣係點按?"
靚太答: "最好搵我哋Benny幫手啦,電話落單,不另收費。"
咁我就開始懷疑: 究竟連落單都唔識的同學,有些仲係連股票都冇買過的同學,點樣分辨張 option, 係咪
合理價? 

冇錯,股價在短期,波幅很多時較細。走勢算係較易預測。
可是,如果想賺多點權金,我們只能做到期日較遠的合約。
問題是: 長期喎,乜都可以發生喎,你眼見市況同你預測的背馳,股票走勢逆轉,你卻動彈不得。
因為,short side是完全被動的。
想close position? 時間值的優勢,就消失了。

佢話: "你有機會睇錯市。Long call, 就像買牛證。輸有限、贏無限。"
傻貓覺得:   Short side, long side, 其實都係估市,如果做埋 strangle,   就係估正股股價只在某個range 內浮動。這樣,或者可以減低損失,但同時亦會局限盈利。

仲有,你開好多張short options, 一旦市況逆轉,分分鐘輸突 
(所以靚太不斷提大家,唔好開太多張options)

係呀,Short put, 係睇好隻正股未來走勢。但股票有周期,即使長期向好,短期都有機會下跌。如果你睇錯市,但正股係增長股,或者係最近熱炒股,佢都仲可以好快浮上水面。你低位接貨後,就可以食升浪。

而且,short put, 你等緊正股下跌時,已經收緊權金了。即使真係接貨,你係用折扣價買貨。如果你真係鍾意隻股票,咁係咪好抵先?

但如果你非常看好呢隻股票,咁買long call, 一定最好

Short side, 就算勝率好高,贏好多次,但只要一、兩次,你睇錯咗,要動用好多資金接貨,仲要做蟹,咁你就損失咗投資市場上其他優質股的機會成本。

仲有,除咗好似騰訊、TSLA, QS呢類波幅驚人的股票外,short side的賠率,通常唔高。

賺雞碎咁多的權金,但要冒咁大風險,動用大筆資金去接貨。而且,分分鐘,short put到行駛價,但因為未到到期日,接唔到貨。你明知賣家可以隨時提早行駛嘛,敢唔敢貿貿然喺市場直接買貨先? 賣家提早畀貨你,你到時有冇錢接貨呀?

調轉,short call 呢?
我有一手騰訊,$626買,short call @ $640, 1月尾到期。近排正股急升,可能要畀貨人啦。
但你真係估佢唔到喎,短短一個月,佢由$519, 強力彈上$767.5喎。
我又賺少咗$640-$767.5呢浸。(嚟緊升升跌跌就唔知啦~~~)
畀貨人,會唔會心痛? 咁又唔會。係可惜咯。

騰訊呢一刻,帳面升咗22%, 但我正股只係賺到2%. 

自我安慰mode: 
錢,係賺唔晒嘅。
唔係你財,唔入你袋。
本來都冇打算持有騰訊,想持股轉晒去美股。
而家佢升,又有人要貨,咁我咪收錢咯。

既然,我對騰訊信心不足,不如月供佢,掌握佢嘅波幅,低位儲多d, 高位儲少d, 可能長遠都係增長股??

好。大概了解咗short side的不足之處,稍後傻貓再分享,近日的期權實驗: long side.

Sunday, January 24, 2021

我係咪太縱你?



傻貓最近好忙。
朝早起身,睇YouTube的各大投資訪問、了解個股動向。
食早餐時,睇財經新聞,了解昨夜美股走勢、預測港股走勢。
回家,開始閱讀投資書籍、上投資視像課程。
下午2點,補習。
下課,批改練習、備課。
晚上8點幾回家,練琴、溫習德文、繼續閱讀、上課。

9點半,一哥買飯回家。一齊食。
我繼續邊上課,邊做筆記。
好多時邊食,邊寫,邊翻睇,再寫筆記。

昨晚,佢開始唔高興。
佢: "可以專心食嘢嗎? 食完再睇,得唔得?"
貓望實螢光幕。

食飽飽,貓窩在沙發邊,看書看得入神。
佢: "你可唔可以望吓我?"
抬頭一看,佢竟然赤裸上身。
貓關切慰問: "小心凍親呀。快d沖個熱水涼啦。"
佢:"你幾耐冇望過我?"
貓低頭繼續: "本書雲地推介㗎。我睇咗一半,就嚟睇完喇。乖啦,去沖涼啦~"
一哥死死地氣,走去沖涼。

上次貓學煲中藥,煲燶咗,加水翻煲。結果,又痾又嘔咗一日半。
而家,一哥放工返嚟,就幫手煲藥。
佢挨住浴室門邊: "貓貓,你以前堆ex, 有冇咁好服侍?
飯又買埋,藥又煲埋,碗又洗埋。"
我不假思索: "不嬲都係咁呀。通常試完,啱飲,唔太熱,先餵我食。同甘共苦嘛~"
"洗碗,一向都係d ex洗喔。我之前用開粉筆,皮膚敏感喔。"
"公司出trip, d ex會預先整好晒幾日嘅早、午、晚餐,放喺雪櫃,貼好晒日期,提我幾時食邊盒。
仲會買定雲吞水餃、小丸子,喺雪格。一定唔會餓死貓~"

一哥苦笑。
佢: "我仲以為係我太縱你。原來係佢哋一個二個,縱壞咗你,搞到你唔識照顧自己。"
我睇緊書,費事理佢。

等佢沖完涼,9秒9飛身攬實佢。
我: "我又縱你丫。主人,你有咩吩咐? 女僕一定盡心服侍,保證滿意。"
佢反白眼: "你肯熄電話、iPad, 乖乖哋瞓覺,已經好好。"
我: "係"(貓恭敬地雙手奉上手機)

佢喜出望外😃: "咁乖?"
我: "我唔睇Telegram, 唔睇Whatsapp, 唔覆家長,唔睇美股。
一晚咯。
今日係星期六,美股唔開市,聽日星期日,港股都唔開市喔~"
佢反眼反到上太空: "唉,都係我太縱你。嘢又唔食,覺又唔瞓。"
貓: "瞓瞓瞓,即刻瞓。報告主人: 我已經放低咗手上武器喇~"

😂

Saturday, January 23, 2021

零成本投資法 Q&A


前言

有沒有想過,可以零成本持有股票,隨著時間過去,等它成長,變成倍升股?

看到谷友出神入化的投資操作,親眼目睹一隻又一隻零成本股票的誕生,傻貓佩服得五體投地。
這篇文章,我們一齊來了解零成本投資法,究竟是甚麼。

問答環節
Q: 甚麼是零成本投資法?
A: 主要分兩種: 
1. 用股息,減成本。
2. 用實現盈利,減成本。就是沽出本金那部份持股,並繼續持有其餘股數。

Q: 買股票,一定有買入成本。怎可能零成本?是不是騙人的?
A: 零成本,只是一個概念。你可以說,這個只是一個心理戶口

Q: 既然對投資結果,沒有實際影響,為甚麼要學習零成本投資法? 有甚麼好處?
A: 因為這個方法,才可以令你安心持有股價波動極大的股票,不會太早被人震走。

Q: 每次買入,就會有成本價。沽出,就是實現利潤。
每次買入、沽出,都應該忘記之前自己的買入、沽出價,視為單獨的買賣決定。這樣才不會被自己過去的神聖價位,影響判斷。
以此推論,我們是否不應該有零成本投資法概念?
A: 每次買入、賣出時,的確不應該考慮成本價。但做資產配置時,我就會考慮成本價。

Q: 換句話說,零成本的是某隻持股,但考慮時,卻應該從整個股票組合去看,就像足球陣容選股法?
A: 對呀! 前峰股,信心不足,就要用零成本去持有,等股價慢慢升。
而中場、後防股,則要分長短倉,不會用零成本方法,強行套用在這類大型股上執行,效果並不理想。

Q: 可以舉例講得具體些嗎?
A: 靠氣氛和看前景,而又難以估值的股票,才較適合應用零成本投資法。例如: SE, 有贊、北控環衛、首程、五菱。

Q: 甚麼股票,絕對不適合用這個方法?
A: 長期持有的股票,就不太適合零成本。好股,必須靠時間、耐性,像儲蓄一樣,不斷累積優質資產,才能締造最大利潤。好像TSM, ARKK 這些ETF.
而且,股價回調時,難得股票大平賣,我們價值投資者,見到好股大特價,當然要入市掃貨。
大前提是: 自己要懂得估值,準確判斷股價是否真正低於合理價。同時,自己對股票的基本面,一定要有深入認識。

Q: 所以前提是「低價」買入「成長股」?
A: 全中。我們要在低位買入「成長股」。當越來越多投資者留意這企業的價值,待股價升至「合理價」時,我們就可以分段減持,留下部份「低成本持股」來享受將來的「成長」及「非預期」的升幅。
換句話說,我們是用股息、多年時間,來達至零成本的。


Q: 用零成本投資法,是不是可以將股票,放入咖啡罐,不聞不問,等股價放風箏?

A: 這要看情況。我自己眼中:「零成本」不是個股零成本,而是整體零成本,因為閒錢也是成本(主動收入也會加大自己的閒錢)。當我在市場上,找不到其他更好的投資機會,而股價仍然處於上升軌,零成本投資法,就大派用場。
舉例: 如果股票是股價波幅極大的增長股,例如: 騰訊、比亞廸、Tesla,你用零成本方法持有,回報可以非常可觀。否則,你可能早就被震走了。
所以,選股非常重要。

Q: 所以就算用零成本投資法,都不可以置諸不理?
A: 當然不可以! 我們不可以忽略機會成本、時間成本。
如果股票的基本面改變,或者市場上有其他更好的投資機會,你就會因為沒有賣出持股,而損失投資在其他更好的股票,可能得到的機會成本。
還有,如果股票長年虧損,不派息,甚至賺息蝕價時,你持有時間愈長,時間成本損耗就愈多。

Q: 零成本投資法,有公式嗎?
A: (總買入價 - 總賣出價 ) ÷ 現在持股數

Q: 零成本投資法,是一個可以安心坐貨的方式。比較少人講,因為做到的人不多。 有沒有具體方法,可以較容易理解? A: 簡單講,想零成本擁有6股的好股票,毫無心理壓力,去長線持有(放風箏),就需要一開始先買入20股。

你想零成本持有1手的股票,最少要在極低成本下,儲夠4-5手。
在股價上升的過程中,分段沽出,直至零成本為止。
這個過程可能相當漫長,但由於這類增長股,股價極為波動,有時也可以在短期內,快速達成目標。


正常建倉後,我的目標,通常是保留3成股數,作為零成本持股。 舉例: 建倉20股,每股$10, 成本$200 升30%時($13),放1/4(5股),即$65, 餘下成本$135 升50%時($15),放1/4(5股),即$75, 餘下成本$60, 每股成本$6
升70%時($17),放4股,即$68, 成本-$8(成功零成本), 現持有6股,現價$102 (賺$110, 約一半)

Q: 看來零成本投資法,是財務自由的關鍵。我會好好學習。最後,有甚麼建議,可以分享給我們這些投資新手嗎? A: 千萬不要本末倒置,太過著重 「零」成本,其實,減至50% 的低成本已經可以很安心。 我自己就有一個錯誤示範。 其實我原本不打算,將有贊減至零成本。只是,股價短期升勢太急,所以才大幅減持,預計它會回調,但我判斷錯誤了。減持後,它的升勢並未減弱,我的回報就減少了。:joy:

總結
零成本投資法,真的很有吸引力。想到可以毫無心理壓力,從容地偶爾看看股價升升跌跌,而不影響本金,已經好興奮。
期望透過練習,改善投資操作、財商,大家都可以擁有更多零成本的增長股。

Friday, January 22, 2021

流行曲故事:夢飛翔 (一年投資回顧)


全情做 做到底 要飛出天際

無名字 但有心 怕輸很無謂

小小的角色 獨有的一種美麗

有熱血 會大過一切

眨眼寫了一年網誌。
開始寫網誌,是一個偶然。
當初,傻貓只是想簡單寫下自己的投資記錄,背後考慮的因素,希望學習理性投資,不被市場氣氛、情緒影響。
寫呀寫的,開始留意其他理財blogs, 原來除了港股,還有美股。除了股票,還有期權、債券、CEF、黃金、外匯。
買賣股票除了用銀行,原來可以用證券行: IB, 耀才、富途,佣金大幅減少。

憑著一股傻勁,一開始動筆,就沒有停下來。

 

從平地 或最低 躍飛一千米

曾逃避 沒信心 全靠你鼓勵

悉心的種花 就算有日會枯萎

無懼怕 待曙光 任雨洗

自從結識到來自五湖四海的網友,入了伊面谷、勁人谷後,傻貓眼界大開。
期間的心路歷程,很有趣。
開始時,傻貓看各位高手,真人示範選股、估值,分享各種投資心法、理念、策略,目瞪口呆。
自己本來啥也不懂,突然好像開竅了。
認識這些勁人,覺得自己都升呢了。


然後,我嘗試"先複製,後改良"。既然高手已經做好前期工作,自己做塘邊鶴,永遠只能原地踏步。
反正,只要控制注碼,做錯了,止蝕就好。
抱著"未諗贏,先諗輸"的想法,我開始小注參與。
不明白時,就請教谷友。

過程中,不時犯錯,例如沽早咗8083有贊、TSM台積電、FUTU富途,買遲咗697首程、TSLA Tesla,冇上車: 308五菱、241阿里健康。甚至,自己分析錯晒,逆市操作,妄想撈底。例如: AMZN Amazon, FB Facebook.

谷友總是不厭其煩,分享經驗、好書,還列出書單、video list, 叮囑傻貓好好學習。
他們大部份已經財務自由,又或身居要職,根本不需要花精神、時間去教導一個陌生人。
可是,他們選擇了,透過寫網誌、錄片,分享價值投資的理念、左右側思維的應用、零成本投資法、選股策略、估值技巧。

有這樣強大的谷友陣容,我的膽子慢慢大起來了。
我知道: 就算我try and error, 我都會知道自己錯在哪裡、怎樣改正。


誰曾是拒絕在成長 腦海太多思想

前途像漂亮大櫥窗 有沒有你在場

為競爭 為理想 亂撞無定向

曾技癢 為理想 亂撞無定向

尋覓自由自我 希望你欣賞


高手真是高手,他們計算的入市位、止蝕、止賺位,都恰到好處。
傻貓嘗試用他們分享的方法,練習自己選股,但失敗多於成功。

我真的好想像他們一樣,可以憑自己的努力,找到優質股。
為了加快進步的速度,我開始同時閱讀不同的投資書籍、報讀不同的投資課程。
完全是"亂撞無定向"。

愈想得到谷友的認同、肯定,自己愈迷失方向。
可能他們都發現了: 我愈來愈急,毫無章法。
問號愈來愈多,人也愈來愈沒有自信。
當你像我一樣,買乜都跌,而個市明明在大升,你大概明白我的感受。


迷途上突然就成長 我找到了方向

近日開始,靜下來反思。
選股、估值、期權、投資心法、期指、技術趨勢圖、外匯、基金、虛擬貨幣......
最近我涉獵的範疇,真多!
股票方面,科網股、醫藥股、電商股、後疫情股票: 房託、內房、內銀、零售、物管股。每個行業,我找最頂尖的2-3間,來做功課,練習估值。
筆記寫了很多,但數學白痴的我,其實不知道自己做得對不對。
所以,練習完,少注買賣。仍然買入即跌。最後,還是抄功課,反而信心十足。
同學仔都係勁人,就算偶然抄功課,仲抄d唔抄d, 傻貓仍然次次都攞A. (看看倍升股FUTU, 爆升的ARKK,突破下跌趨勢線,急升的697首程、3718北控,愈升愈有的6690海爾、電商+手遊股SE)

可是,這樣橫衝直撞,我看不到終點。
只有目標正確,走的道路正確,才能到達目的地。
簡單講: 如果同學仔轉校、畢業、絕交,自己就會變返零。
你總不能夠,以為自己可以抄一輩子功課吧?

谷友好心指路: 先打好基礎,由價值投資開始,再慢慢練習左右側思維。


沒喝采 沒拍掌 仍然全力唱

無受眾 沒有獎 仍然全力唱

寫網誌的過程中,我不斷釐清自己的投資迷思,慢慢建立自己的投資框架,找到適合又舒服的方法,儲備優質資產,也成功改善了投資回報。

最明顯的改變,就是投資成績。
去年2月1日,回顧20200201 理財重讀生開倉概況,滿江紅。
今年1月,20210108 理財重讀生倉儲,回報率上升36%.
當然,近日港股牛氣沖天,這回報能否保持,還是未知之數。
可是,我覺得: 就算結果不是100分滿分都不要緊,只要竭盡全力,就可以。
所以,就算這個網誌,沒有讀者,自己在"輸出倒逼輸入"的過程中,改善了自己的財商、投資技巧,還遇上一班好戰友,已經是最大的得著。

期望未來,我也能像谷友一樣,有能力分享正確的投資知識、心法。
好讓大家少走歪路,避免像傻貓一樣,白交學費。


來携著夢飛翔

去將感動延長 歌唱


辭去學校的全職工作,開始自己的補習事業,是冒險。

將自己的收息股,例如: 房託股、公用股,換成相當比重的增長股,是冒險。
投入美股市場,是冒險。用證券商,不用銀行的證券服務,也是冒險。
在網絡世界,公開自己的持倉,毫無掩飾地表達自己的喜怒哀樂,更是冒險。
付出3成樓宇首期,讓男朋友上會做業主,對42歲的熟女來說,絕對是世紀大冒險。
之前已經為前夫拆舊屋、建新屋,婚姻失敗,淨身出戶。
如果歷史重演,日後要捲土重來,難度比天高。

不過,這些都是2020年,傻貓的新嘗試。
我至少嘗試過做自己想做嘅事,而且盡了全力,至今亦覺得無悔。

你呢? 你有夢嗎? 會去追夢嗎?


***備註***

本文列出的股票代號,只為記錄學習過程。

部分已清貨,請大家切勿故亂抄功課。

投資必須自己負責,傻貓投資唔叻,你搭沉船,唔好搵我。

Thursday, January 21, 2021

肥師奶月供 (第12期)+年結



2021方向:
1. 停止月供中電
2. 繼續月供港交所
3. 加入一隻ETF/股票
暫時考慮: MCHI, ARKK, SPY, TSM

媽咪呢個account, 一向冇乜資金加入。一直只有我每月投放的HKD$1500. 
本金少,我根本冇心機理佢。
而且,媽咪冇新資金投入,代表佢用行動話我知: 佢根本唔信我嘅投資能力。
佢經常講: 跌咗,唔好賣,等佢升返。(所以大快活點都好,冇賣。)
(另一角度想: 少少錢,都蝕成咁。點信得過你呀?買得大,輸得大呀。)


妹妹話,12月開始,每月加HKD$500入嚟,做媽咪的醫療基金。
講真,分別不大。
而且,金額咁細,每月夾埋得HKD$2000, 咁最好都係集中月供美股好了。最少手續費夠低,每次只係USD$1.
不過,港交所2021年,有咁多中概股回流,應該都唔錯啩?
繼續供吓先?中銀手續費,要$50喎。


總數量平均買入價股價月供金額股值股息
中電 (2)72HK$76.67$72.70HK$5,820HK$5,234.40HK$60.06
港交所 (388)29HK$333.73507.00HK$9,329HK$14,703.00

回顧:
媽咪揀的388, 短短一年,股價由270.8,火速爆升,衝上$525.
回報非常厲害。
很多嘲笑龔老師,教人月供股票,阻人發達的人,真的要好好反思一下。
還有,很多經常話自己冇乜錢,唔駛學投資的人,見到我媽咪呢個case, 每月只需要儲少少錢,就有唔錯嘅回報。大家又會點睇?



 

2020 肥師奶 (月供$500 中電、$1000 港交所)
中電港交所
數量股價月供金額數量股價月供金額
Feb6HK$82.00HK$542.00Feb3HK$270.80HK$812.40
Mar6HK$81.75HK$540.50Mar3HK$249.00HK$747.00
Apr6HK$82.15HK$542.90Apr3HK$250.00HK$750.00
May6HK$80.00HK$530.00May3HK$250.40HK$751.20
Jun6HK$78.35HK$520.10Jun3HK$299.20HK$897.60
Jul6HK$73.95HK$443.70Jul2HK$364.20HK$728.40
Aug6HK$75.25HK$451.50Aug2HK$376.20HK$752.40
Sep6HK$74.90HK$449.40Sep2HK$366.80HK$733.60
Oct6HK$74.25HK$445.50Oct2HK$370.00HK$740.00
Nov6HK$73.50HK$441.00Nov2HK$370.60HK$741.20
Dec6HK$71.45HK$478.70Dec2HK$386.00HK$772.00
Jan6HK$72.50HK$435.00Jan2HK$451.60HK$903.20
總計72HK$77HK$5,820總計29HK$334HK$9,329


肥師奶倉儲
DateSoldSymbolStockBoughtSoldLastVolumeValueGain/lose
12/10/20190012恒基地產$38.15$32.70110$3,597.00-$607.09
18/12/20196823香港電訊-SS$11.14$9.96150$1,494.00-$180.46
20/01/20200066港鐵公司$47.55$44.65140$6,251.00-$418.04
12/02/20200388香港交易所$333.73$519.5029$15,065.50$5,384.73
12/02/20200002中電控股$76.67$73.1572$5,266.80-$194.69
29/12/2020ARKKARK Innovation ETF$123.75$124.3230$28,904.77$128.30
03/09/201916/01/20200939建設銀行$5.77$6.74800$5,392.00$756.35
23/07/201916/12/20200052大快活集團$25.85$18.041500$27,060.00-$9,651.57
Available cash:
$1,448.97
Stock Value:
$60,579.07
Gain/ Lose:
-$4,782.46


變動:

12月,終於斬咗隻大快活,換入ARKK. 

年結
個倉今年因為港交所表現神勇,為組合挽回不少升幅。
不過,疫情關係,飲食業受限聚令、6點禁堂食的影響,全年一蹶不振。大快活本來係唔錯的藍籌股,業務單一,派息慷慨,高達4.592%, 比中電4.211%更高。
今年爆升的股票,集中在增長股,特別是科網股、能源股、醫藥股。
呢隻快餐股,完全冇運行。
只怪我太少理呢個portfolio, 而且大快活只用咗HKD$38775. 我根本唔介意佢蝕。

獨立嚟睇,無為而治,跌咗由佢,就搞到個組合在去年3月至今的長期牛市中,嚴重落後大市。睇到個負回報率,我真係唔知講咩好。
2021年,應該點改動媽咪呢個投資組合,才能有穩定回報?
真的費煞思量。