夾錢抽新股？

 

Fatfat搵過我幾次。

1次係搵我夾份買深圳樓，買完齋擺，唔出租。等樓價升到某水位，就放售。
業主，會落佢個名。
我冇應承。

第2次，佢知我轉行做補習，提議由佢介紹客人給我。佢提議的抽佣方式，我完全唔明白。又介紹費，又租金，又每堂再抽佣。
葉Sir叫我唔好理佢。因為，Fatfat根本唔熟荃灣區，所有學生，都係葉Sir介紹、我的學生/家長介紹、自己walk in.
咁我又冇理。

今次，佢提議夾錢抽新股。
我都係睇到一頭霧水。
只係粗略見到: 投資本金似乎好大; 自己冇權決定，抽邊隻、唔抽邊隻; 46分帳，賺蝕都係兩份。

我一向唔抽新股。有咁多不確定性的情況下，我更加唔會諗。而且，佢哋夾份嘅金額都唔細。

谷友計過，最近12隻新股上市，暗盤有10隻都嬴。
但暗盤唔走，到首日上市，有1/3，跌破招股價。
未來還有不少中概股回歸，例如快手、微醫、B站、百度。

亦有谷友估計: Fatfat係想個pool大d, 入飛變大戶，可分到多d股。
不過，因為新股有回撥機制，以入飛人頭計，當超額認購15倍以上，會trigger回撥機制，導致散戶同大戶，分到嘅比例差不多，最終每個入飛的帳戶，都中一手，大戶未必有著數。
而且，抽中的股數太少，談不上投資，最多當賺少少零用錢。
不過，新股上市，水份多，這錢，也不是必賺。

Fatfat 話係佢嘅朋友話事。以我對佢嘅認識，應該係佢自己揸莊。
佢在名校已位居高位，有好多間劏房收租，亦有舖位、車位、工廈、正常住宅物業收租。之前，單對單，補習時薪$800. 後來轉租商廈補習，每堂10個學生左右。因為租金問題，同partner嘈。佢冇做小組補習好耐。

Fatfat的外父，有過千萬資金，大量物業另計。
他們一家一直和外父、外母同住，靚樓，複式單位。唔駛交租，唔駛做家務。
佢哋有強大後盾，係人生勝利組。
渺小的我，沒有金鎖匙，只有努力工作，好好預備教材、設計模擬試卷，還要學習營商技巧、和家長溝通技巧，並且繼續認真學習投資。

傻貓相信：財不入急門，一定要做好資產配置。小心行好每一步，只要方向正確，一定去到目的地。