Thursday, November 25, 2021

慢慢嚟,重建生活節奏

樣樣想做到最好,結果只會迫死自己。

做唔到全人奶,補習時,用晒人奶,妹妹會沖奶粉。

濼言好少扭計,喊親都係肚餓,或者要換片。佢自己嘗試戒夜奶,我開始瞓到覺。

最近小試牛刀,long 咗幾次期權,暫時回報幾好。今個月至今,期權收入有9萬蚊。

搬屋後,間屋好亂。這幾天開始清理。今日free 咗寵物胸前袋、2022年年曆。今晚試踩新單車,上門free產後物資,包括網褲、BB車掛袋、筆袋畀得主。明天再將魚缸、大型犬寵物袋背包、產婦衛生巾,逐一拍照、度尺寸、放上網free出。

大家都很喜歡濼言,BB車竟然收到7架。明天逐一試用,然後free出或平讓。

之後再free書,有好多投資、懷孕的書籍,希望找到有緣人接收。

新居700呎,有2間房基本上空置。還有樓梯旁的儲物室,都未收拾。

打算將free回來及朋友送的嬰兒玩具,放入其中一間房間,做遊戲室。現時有跑車學行車、音樂搖搖椅、high chair,韆鞦、遊戲墊、圍欄,還有很多布書、玩具。要再收拾一下,才能放星星送咗的網床,連睡眠籃、換片墊。

另一間做衣帽間,只要買多1個衣櫃,以後衣物就不用換季,方便些。明明我哋2年冇買過新衫,但還是回收了3袋舊衣出去。而衣櫃仲係滿到關唔到門。濼言出生後,一哥只買了一件外套給他,我完全冇買。大家送了很多包被、衣服、鞋襪給濼言。可能要為這個10磅不到的小BB,購置衣櫃。

Wednesday, November 17, 2021

混亂中,乜事產後抑鬱

昨天帶濼言去母嬰健康院打針。職員畀咗份問卷我填。

因為唔想嘥時間覆診、見精神科醫生、見社工,我好小心咁填問卷,同時自己記住,原來我已經有咁多癥狀,要小心處理。我唔想再為大家帶嚟麻煩,都唔想佢再擔心我。

點知濼言磅重度高後,我被叫去見護士。佢問起照顧BB的情況。我開始時還能小心謹慎作答,但她愈問愈深入,我的眼淚又不斷流下,情緒再次波動。一哥在房外,見勢色不對,馬上走過來。本來他說去樓下食煙、去洗手間,我不知道他在房外,結果又被他發現我哭,真麻煩。我一直做得好好,每次大家在,我都能夠好硬淨咁,處理事情。大家都好疼愛濼言,有媽咪、妹妹、一哥一齊照顧Bb,我已經比很多人幸運。無論獨處時幾唔開心,補習都可以如常,其實我覺得自己好叻㗎喇。

可是,濼言始終體重超輕,別人的寶寶都胖得像米芝蓮,濼言只是比上一個月,重了1磅。聽到護士講,濼言成個月,只重咗1磅,我就想哭。多少次,我辛苦擠了半樽人奶,卻手忙腳亂倒瀉了。而且,近日人奶明顯又稀又淡,水一樣。我好擔心濼言不夠營養,但又想他繼續喝人奶,減少過敏機會,將來不會像我經常皮膚敏感,或者像爸爸鼻敏感。

一哥自從我懷孕後,就很少和我親熱。他以前說怕傷害到寶寶,產後說怕我傷口未癒,總是說要等等等。我的身材又嚴重走樣,胸部因為餵母乳,下垂得很誇張。肚腩一直未縮細,也不知道子宮收縮情況如何。

明明想減肥,但總感到肚餓。體重一直冇加冇減。肌肉卻都消失了。

每日早上6點幾起床,餵奶、掃風、換片,然後弄一點吃的,又再餵奶。不斷重覆,開始懷疑這樣的日子,還要過多久。濼言半夜還是不時餓醒,不知道幾時可戒夜奶。半夜醒了,我通常都睡不著。有時12點幾睡,1點幾餵奶,然後眼光光到6點幾,上床扮睡覺。一哥6點半醒,我哋傾幾句。佢返工,我瞓返。佢出門,聽到關門聲,我就醒。趁濼言未醒,我執屋。但濼言一哭,我就滴奶,只好埋身餵。執屋進度好慢。人總是累。




搬家後,地方雖然寬敞多了,還有個儲存室,但3個衣櫃變1個,怎樣都安置不好衣物。無論幾點起床,濼言都是在我出門前,才哭醒要吃奶。我仍然經常乘的士返補習社。而林村一向不多市區的士。我每天出門都超緊張。

Muimui最近不時流血,身體多處有隆起的包包,我擔心是血瘤。她17歲了,我有孕後,少帶她行山,她愈睡愈多,而且不時賴尿。

我投資成績愈來愈差,long call了Tesla後,Elon Musk大手減持。我沒看新聞,昨晚看到,才想起自己有long call.既蝕時間值,股價又下滑,蝕得好甘。

物業1的滲水問題未解決,物業2出租了,我還沒打釐印。補習社上月及本月,寬頻費未付、電費未付。AIA vitality會費逾期。

寫到這裡,我仍未能發現自己有乜好喊,點解成日好攰,成日唔開心,做乜都提唔起勁,總之就係乜都做得唔好。

一哥叫我搞寬頻搬遷,我就畀上手租客,轉讓咗張約畀我。結果一哥張約就白交錢。2張約都係香港寬頻,但我哋原本有1000 MB, $245. 現時接手嘅租約,$259 / 200 MB. 一哥知道後,表情很失望。新居有22條鎖匙,大家一直找不到信箱鎖匙。最後,妹妹在我的梳妝台櫃桶搵到。而我始終記不起,為甚麼我就單獨拿走了信箱鎖匙。

算了,再寫都係嘥時間。盡量填滿每分鐘,唔好畀時間自己唔開心。諗冇用,做啦。希望12月見完醫生,唔駛再覆診。


Monday, November 15, 2021

漸漸,我們話題減少

漸漸,無法溝通


以前東尼話:“我做咩都唔啱” “同你一齊,好大壓力”

今日一哥都係。

佢衝入房,放低濼言,自己趴在地上,爆喊。

今日,太子間房出租咗,我簽咗約,收埋2按1上,畀咗經紀佣金。

今日,葵涌單位出租咗,一哥可鬆一口氣。

我聯絡咗個網友,嚟攞晒20個紙箱。


本來一切都好順利,但一哥總是愁容滿面。

我不懂怎樣和他溝通。


他選擇瞓梳化、瞓客廳地面,總之唔返房,佢話要冷靜。

我想爆粗。最近餵夜奶,我已經冇嘈醒一哥,畀佢瞓多d. 昨晚我只睡了不足3小時。今晚又咁樣。

你話自己點做都唔啱,我咪又一樣。

這樣大家都累。我想躲起來。


妹妹話我變咗,唔再乖巧聽話。我好似以前同東尼時一樣,我話咁就咁。未生前,乜都3唔理。生咗濼言,就意見多多。


Thursday, November 11, 2021

家務應誰做

谷友:"小病痛,點處理(落街買嘢食/定煮嘢俾你食)都睇得出係咪路
可能我大男人啲,從來冇要求另一半揾錢,但要煮家常飯好重要"

呢幾句,好熟面口。
諗諗吓,係我同前度,一模一樣的對白。
只係,當時月入近10萬嘅我係講: "我唔駛你賺好多錢。錢,我去賺就夠。但我放工返嚟,你要煮好餸,預備埋我聽日嘅lunch box."

前度係圍村人,屋企有田有地,一向生活無憂。佢鍾意煮嘢食,我又鍾意食佢煮嘅嘢。
一向佢煮佢洗,大家一齊十年。

之後,我遇到嘅另一半,煮嘢食都好叻。
阿泰對烹飪很有研究,仲有潔癖,家務通通自己做晒。反正我掃個地,佢都覺得唔夠乾淨,要自己再掃過。我將最後一啖飯放入口時,佢已經攞走我隻碟去洗。而且,佢一樣唔鍾意返工。有一年時間,佢喺屋企打機,靠買賣股票賺生活費。我鍾意返工,日間教中學,放學去補習社,完咗再上門補習。
一哥更厲害,煮飯洗碗、洗衫晾衫都高速完成。佢叫我放心做自己鍾意做嘅嘢,家務佢做得快,又做得好,所以佢負責。我只需要安排好時間,準時補習、記得食飯飲水,盡量抽時間見朋友,好好照顧BB, 自己唔好病就可以。

谷友:"洗衫拎出街清潔請人做啦 🤣
如果兩條友年薪百萬但餐餐外賣真係好悲"

一哥自己做茶記,平日佢鍾意周圍試唔同餐廳,食佢公司比較少出嘅食物。放假,佢會嚟大埔煲燉湯、煮飯。佢見到我哋趁熱食晒,就好開心。
洗衫晾衫,佢都鍾意自己做。我試過攞落街洗,佢話唔好。就算凌晨2點晾衫,佢都叫我由得佢。

我覺得每個人的生活方式都不一樣,每對夫婦相處方式也不同。
今時今日,除了家庭主婦,也有愈來愈多的家庭主夫。
如果女朋友或太太,不喜歡或不擅長做家務,就要換畫,外傭應該都好容易找另一半。
換個角度,如果男朋友或丈夫,不願分擔家務,又有多少女性,覺得有需要換畫或離婚?

媽媽谷有谷友大吐苦水,表示丈夫下班回家,只會和BB玩,不會半夜起床餵奶,更不會換片、分擔家務。媽咪本身雙職,產假都要在家工作,還要面對不時上門突擊的老爺奶奶、親戚,身心俱疲。

我覺得做女人,好難。做母乳媽媽,不時受到別人質疑,唯恐我們餓壞寶寶。我們經常谷奶、滴奶,外出又要到處找育嬰室,備受壓力。我們好多都有工作,但孩子是我們自己決定生下來的,無論下班多累,都會渴望回家見孩子。無論他爆片場面多震撼,半夜哭喊多吵耳,我們都會將孩子捧在手心,好好愛護。可是,家是大家一起建立的,彼此應好好分工。家務應誰做,似乎就是誰肯做、誰有時間做,就誰做吧。做家務,是服侍家人,讓大家生活得更舒適。出於對家人的愛,用心服侍,大家都舒服。別再說甚麼"男主外、女主內",不合時宜了。

Thursday, November 4, 2021

成功埋身餵人奶

之前一直泵奶/擠奶,瓶餵。感覺自己就是乳牛。寶寶咀唇碰到乳頭,就皺眉、大哭,還手腳並用,以僅有的微小力量,拉開我和他的距離。

本來用Pigeon奶樽,出奶好快。改用Avent,減慢出奶速度。

每次餵奶樽後,佢冇咁餓同心急,就埋身餵。

慢慢減少奶樽嘅奶,增加埋身時間。

這2星期,已經可以全埋身。

現在調轉他抗拒奶樽,不過星期六,我全日補習,他只能習慣、適應。反正瓶餵、親餵,都是母乳。有時他吃得多,存貨不夠,妹妹就用配方奶,他也不挑咀。有思敏兒最好,冇就食其他samples.牛奶、羊奶,他都肯食。

感覺我的孩子,挺粗生。😆

其他媽咪還在問,幾時可以帶寶寶外出吃飯。我已經帶濼言去過茶樓飲茶、茶記、快餐店,還去了一趟梧桐寨行山。

濼言身軀細小,頭卻不合比例的大。哭起來很溫柔,這點和爸爸很相像。爸爸說話也是輕輕柔柔的。濼言即使在低泣,只要爸爸和他說廣東話,他就會瞬間靜下來,眼碌碌,凝視爸爸,像要努力聽懂他的話。反而媽咪比較急躁,濼言聽到媽咪的聲音,有時還會皺眉。希望不是天生不愛英文吧~

這樣小小的濼言,正在急速成長。相信很快就有自己的想法,有能力表達喜惡。

我會時刻提醒自己,做個好榜樣給寶寶。另外,不要施加太多壓力給寶寶。他是獨立個體,有他的天賦才能,我不可以要求他跟著我的步伐或路線圖。他有自己的人生。說到底,他18歲成年時,媽咪我已經60歲了。以後的路,我和爸爸可以陪伴孩子的時間,大概不多。

現在,我先處理好搬屋的事情,上網物色傢俱。然後報名學電單車,希望縮短車程,由3.5小時,壓縮成1小時。跟著就是重新檢視投資組合。股市的陷阱股,我全都踩齊。金沙、富途、騰訊、碧貴園、維他奶、建行,股價要多殘有多殘。

唯一乖巧的Tesla, 比亞廸,又被我short call了。要不是有少少long call, 投資表現肯定更糟糕。

濼言出世時太輕,永明已拒絕他的投保。他們說,孩子太輕,容易多病痛。未來要更小心照顧,希望他健康成長。

我沒甚麼可以留給濼言,還有我最愛的家人。只是如果有啥意外,希望不會給他們遺下任何負擔。如果死後,還能照顧他們的生活,讓他們繼續追求夢想,好好生活,就更好了。

為了達到這個目標,我會重新振作,好好學習。

我可愛的小寶寶,日後你長大了,還認得這個細小而精緻的自己嗎?






Saturday, October 30, 2021

頭疼的出租樓維修

 最近物業1, 2都令我很頭疼。

物業1,樓下投訴,天花滲水。
我未知情況,暫時無從判斷嚴重程度、維修金額。

物業2,消防費用未交清,欠$8000. 
租客搬出,清走傢俬,才發現牆壁嚴重滲水,油漆剝落。
這是大維修的副作用。
江師傅會幫忙處理。

物業3,原本自住,現時要搬返大埔,打算清走傢俱後,簡單翻新,再安排出租。

租盤,安排簽署租約,但業主代理人好像很忙,我們始終未落實到時間簽約。
代理人好想我哋租中層1/F,所以不斷抹黑G/F.
其實很好笑。
有花園係好事,而且只比中層貴$1000, 但有寛頻、固網電話,搬傢俬都不用加錢。搬鋼琴也不用吊上去由露台入屋。
不過,樓下租樓,附送4歲放養貓1隻。
代理人不喜歡牠。我和一哥沒所謂。到時再算。


Thursday, October 28, 2021

《生存 死活 生活》

生容易,活容易,生活卻不容易。

生命中,會有不斷的高低起伏。死要活,生也要活,才是生活。

跌跌撞撞的經歷很重要,即使跌得重,但只要沒跌死,便可再存、再活。

你願從新出發,生活便會等著你,一定可以再玩過。

只要還未跌死。

Tuesday, October 26, 2021

落實搬入大埔

處理緊3個單位。有2個OK. 1個進行中。

太子劏房

太子間房,租客話轉咗工,已租元朗,給我1個月通知。但前日突然衝上嚟補習社,要放低鎖匙,叫我拿拿臨退按金。佢提早17日還匙,即係唔駛畀嗰17日租。

這提議和我的理解不同。提早退按金,可以。但1個月通知,係必須。

租客好大反應,話我想食佢嘅按金。

最後,我搵返agent Mark,佢再搵朋友幫我跟進。今日已取匙。

租大埔村屋

另外,昨天網上睇咗幾個大埔租盤,今日實地視察完,已落實。新居距離妹妹家,2分鐘路程。

業主盤,免佣。有G/F, 1/F選擇。G/F 市價$13500左右,1/F 索價$10800

1/F冇電話、冇wifi.呢度手機收唔到,冇訊號,電話唔通、上唔到網。即係租呢度,會與世隔絕。

我揀G/F,有齊花園、樓梯旁的儲物室,已接駁寬頻$288、固網電話$30。討價還價結果:$11800。成交。


11月中可入住,settle down後,再將葵涌間屋出租。

Monday, October 25, 2021

雙租族again?

 又一個星期六,又一次感冒、塞奶、發燒。

一哥提議關閉荃灣補習社,在大埔覓地再重新營運。

但我認為儲客唔易,補習社又剛續租,葉Sir只收$5000,已包裝修、維修、租金、水電、影印、管理差餉、文具,連商業登記都做埋。不考慮搬舖。

我提議搬屋。

物業3只供1年幾,出售要交多d稅,但唔賣,我今年投資成績唔好,手上股票只值200萬左右,連現金30萬,冇可能1 take 過買另一間。我冇正職,銀行唔會再批按揭畀我。一哥有樓(物業3)喺身,銀行亦唔會再受佢玩。妹妹有full paid 樓,但冇工作,做唔到擔保人。媽咪係物業2業主,退休人士,又係上唔到會。仲未計雙辣招嘅勁甘印花稅。

出租葵涌物業3,再承租大埔單位,似乎係較佳選擇。

大埔市中心,交通方便,有73X直達荃灣。

坪朗寨乪新塘,村屋700呎單位,其實和市中心269呎單位,租金相近。

我可踩單車拎濼言畀妹妹,再出去補習,但交通超級不便。試過06:50-07:45,完全冇車,架架滿座。返工遲到成個鐘。遇上天氣壞,又長假,林錦公路有塌樹,我被困村內3日才通車。往元朗又塌樹,往太和又周街樹幹橫卧路中心。

齋想無謂,晏d食完早餐,入去實地睇樓,再決定。

Saturday, October 23, 2021

自討苦吃

 唔聽人講,後果自己承受。

未生,好多人已經提醒要坐好月,好好改善身體機能。
我一意孤行,休息了2星期,就恢復上課。

上課時,特別是星期六,朝9晚5,無間斷,我總是感冒。
連飲水都冇時間,去洗手間要速去速回,根本冇時間擠人奶。
逢星期六下課後,都塞奶,頭痛、發燒。

投資方面,Kano老師提醒過,騰訊、阿里風險大,不應大手做short put.
我高估自己能力,而家成手蟹貨。
Short call 咗Tesla @730, 攞錢接碧貴園、騰訊、金沙。全部都賺權金,但蝕價蝕到high high.
濼言出世當日,我冇再睇股票app.

現時槓桿0.93

禍不單行。


所有清醒時間,都用來擠奶、餵奶、掃風、換片、同BB傾偈,當然佔最多时間,係交通。
我每日搭入大埔村屋用最少1小時45分鐘,再搭返荃灣補習。下課再回大埔拎返濼言,然後返葵涌屋企。
真心攰。

這情況,一哥一早預視咗,因此才極力提議請外傭。
可是,聘請外傭等於大門中開,讓一個陌生人入屋。
這心理關口,我過唔到。
而且,現時外傭短缺,竹篙灣一位難求,萬一請咗,工人跳工,或者確診covid-19,那醫療費用事少,打亂計劃仲煩。

而家妹妹湊得好好,情緒支援亦足夠。我寧願太早或太夜,的士出入,換取睡眠。
只係半夜一晚起幾次身擠奶、餵奶,不時占寒占凍,面青青,手凍凍,又咳又流鼻水,坐好月已經冇可能,只能夠睇吓,點樣唔好惡化。

呻完喇。

其實濼言係好乖、好得意、好精緻、好可愛嘅。當佢對住你笑嘅時候,一切都唔重要喇。

仲有,生咗BB,先知道有咁多商場,提供育嬰室,仲有恆溫濕紙巾、冷熱水飲水機、換片墊、暖奶器、梳化、洗手盤、面紙。港鐵站又有育嬰室、哺乳室。帶BB出街,冇想像中咁麻煩。

瑪喜烈前日打電話嚟,呢次已第3次。雖然上緊堂,我都聽聽。
原來係產科來電跟進孕婦身體、精神情況。問得好仔細,由誰人主力照顧BB, 惡露及會陰聯針傷口的復原情況、情緒及休息,BB的退黃疸情況,餵母乳遇到乜嘢困難,都仔細查問。
感覺很貼心。

有些谷友生BB要7萬起跳,10幾萬落樓。我才千幾蚊,住3日,有專人教餵哺母乳、換片,又有精神科醫生跟進,真係感恩。

Friday, October 8, 2021

黑色暴雨復工

今早一哥話唔准用生水洗碗,唔准返補習社。
不過在家閒著沒事,明天全日補習,我還是放心不下,就帶著濼言返嚟。

剛落樓,已見傾盤大雨。等巴士時,雖然撐著傘,還是變落湯雞。濼言都成面雨水。
好彩有的士,即時上車。

返到補習社,我和濼言都不約而同打噴嚏。我開始頭痛。
糟糕。

臨時上咗一堂,Thomas, Toby 2兄弟都好乖。濼言偶然有哭,但大部份時間都很安靜。這堂無驚無險,順利完成。
家長畀咗一封利是濼言。嘩! 竟然有$100!

她很關心濼言,由知道我有baby開始,就不時關心我的情況。
到知道我有產前抑鬱,又主動分享經歷,以及提醒我要注意的地方。

今日黑雨,紅雨,我竟然挑了這樣的天氣復工,真搞笑。

Tuesday, October 5, 2021

怒炒陪月

陪月Amy經常掛在口邊: "鳩東巧緊要"
偏偏,每次向她反映意見,她
都會回應: "但係我覺得......",或者"咁樣唔得喎,我解釋你聽點解唔得......"。

我從未試過做僱主,雖然曾經為學校聘用兼職教師、代課教師,但是沒試過辭退員工。因此,我以為聘用了這位難以溝通的陪月員,只能認命。而且,聘用期僅僅個半月,我就當作上天為我開的小玩笑吧。

妹妹就不同了。她曾經擔任管理層,處事技巧圓滑,溝通能力更是好得沒話說。連她都按捺不住,要向一哥抱怨。一哥知道Amy的工作方式,親嘗過她的廚藝,給我兩個選擇: 
1. 另聘高明
2. 不用陪月

我不清楚解約安排,聯繫了介紹人菲姨。她來電時,我恐怕自己不懂應對,由一哥代答。他愈說愈激動,將對陪月的不滿,一五一十數說出來。原來,他對我和妹妹說的話,都放在心上。不滿已經氾濫成災。雖然整段對話,他都禮貌周周,句句屬實,只是愈說,聲量愈大。他毫無轉圜餘地的表達方式、熾熱的怒火,實在"難聽過粗口"。濼言嚇得整個人不斷彈起,我也心跳得極快。他發怒時,實在是生人勿近。

翌日,Amy即將下班時,我請她坐下談談。她似乎有心理準備:"有咩指教呀?餸菜唔啱口味,可以講喎"。
我淡然回應:"妳有冇留意,今日的午餐,我幾乎冇食過?"
佢:"係呀,妳係咪唔肚餓呀?"
我:"呢碟係你之前提過嘅黃酒煮雞?"
佢:"係呀。"
我:"咁d雞你點煮? 有有汆水? 紅棗你有冇浸過?木耳你自己有冇留意塊塊都大過我隻手掌?"
佢:"我有洗乾淨,先放落水烚。紅棗唔駛浸㗎,佢本身就係熟嘅。木耳一向都唔駛整得太細塊。黃酒我落咗好少,煮嘅時候揮發咗,所以冇黃酒味"

我: "如果我跟陪月員嘅工作清單,你絕對係傑出員工。你守時、盡責、幫BB清潔衣物、預備燉湯、代茶、用心預備膳食,而且為人老實,買返嚟嘅餸菜,唔啱我哋口味,你會畀返錢,自己攞返屋企。
呢d都係你嘅優點,我好欣賞。

不過,作為僱主,我希望員工,可以幫我解決問題,唔係製造問題。
你經常強調要溝通丫。咁你有冇留意,無論我哋同你講乜,你都只會回應:"但係"。

你話要買按摩油,我哋買咗。但你冇用過。妹妹提醒你,BB有肚風,最近嘔奶多咗,你話唔需要按摩。
我哋講咗希望盡快幫我補身,因為我趕住返工,之後冇時間進補。你話要由你返工第二日起計,第一星期只能吃豬肉,第二星期只能吃雞。而唔係跟產婦嘅產後調理進程。

你問我哋,你煮嘅粟米粒薯仔雞柳飯好唔好食。問心,將所有食材,一口氣放入去電飯煲煮熟,可以有幾好食?"

Amy: "我自己一向覺得自己煮嘅嘢好好食㗎,呢個飯,我成日煮畀屋企人食,我老公、我個仔都好鍾意食。"

我:"我知道你好認真煮嘢食,但你有冇諗過,客人想唔想食? 
你花3個鐘頭,煮一碗紅豆沙畀我食。用咗好多石油氣,你亦用咗好多精神,但你煮之前,有冇問過我想唔想食? 3 個鐘整1碗紅豆沙,你覺得符唔符合成本效益?

買嚟嘅餸菜,我哋唔啱食,你拎走。可唔可以做多一步,喺買餸前,問吓我哋想食乜嘢? 或者先了解清楚,客人的生活方式、飲食習慣、對陪月員,即係你,嘅要求?"

聽到呢度,Amy開始哽咽: "我明白喇。你唔鍾意我煮嘅嘢食。咁我日日煮,你又唔鍾意食,會唔開心。咁啦,合約係死嘅,人係生嘅。我可以做埋今日就走,唔駛7日通知期。你唔駛賠錢畀我,但你都唔好要我賠錢,好唔好?"

我:"冇所謂,你自己覺得舒服就可以。如果你做晒嘢,可以提早走,唔駛等到6點。"

Amy收拾時,我隨手寫了封推薦信,讓她帶走。她有點訝異,表示沒想過事件會有這麼好的結局。
老實說,這封信,我避重就輕,只寫她的優點,省略了她的缺點。凡事留一線,日後好相見。即使日後未必再遇,我也希望她經一事,長一智。她願意盡心工作,只是處事方式,與我們期待的相差太遠。如果能夠有更多工作機會,或者她就能夠不斷進步,成為一個專業的陪月員。

想不到我乖乖地請了陪月員,卻只工作了11天。沒有陪月員的日子,大概不會差太遠。
可是,星期六起,就要恢復補習。現時近乎全母乳的濼言,到時怎樣?要轉配方奶嗎?
星期四晚,一哥、我、濼言,會搬回葵涌。到時我處理得了嗎? 一哥上班後,只有我獨自在家。我有能力照顧濼言嗎?

Monday, September 27, 2021

陪月篇:雞同鴨講



唔經唔覺,陪月姐姐Amy做咗一個禮拜喇。
佢口音唔正,要明佢講乜,都唔容易。
同佢溝通,需要好有耐性。
因為,佢講嘢冇乜邏輯,而且答完你"明白",又會再問。

話說Amy每日都會問: "明天幾人食飯"
妹妹、媽咪比較多飯局。所以妹妹通常好清楚講明:邊日,有幾多人食飯。

Amy: "我想同妳商量吓呀,後日要煮幾多個人嘅飯餸呀?"
妹妹:"我咪喺WhatsApp 寫咗咯。你煮飯就可以,唔駛預我哋餸。"
Amy: "我知道呀。但係冇理由,食飯唔食餸丫嘛,所以咪問你咯。"
妹妹:"我寫咗原因呀。你有冇睇?"
Amy: "有呀。你話要清雪櫃嘛。咁冇理由煮飯唔煮餸嘛。"

類似嘅九唔搭八對話,一再出現。

今朝佢問我,"太太,妳鍾意食咩蛋糕呀?"
我丈八金剛,完全唔明佢想點。
"做咩無端端要食蛋糕?"
佢:"濼言滿月,我想買個蛋糕,送畀濼言呀"
我:"而家都未滿月,到時再諗啦"
佢:"出面嘅蛋糕,好似得一種味,全部都係栗子。"
我:"吓?有咁嘅事? 到時再睇啦"
她在我身旁踱步。然後問: "咁你鍾唔鍾意食藍莓蛋糕呀?"
我:"到時再諗啦"
佢:"我想買個蛋糕,送畀濼言滿月呀"
法官大人,我冇嘢想講。

早兩日,妹夫搲水吹。
妹夫:"Amy,我個肚成日好脹咁,食咩會好d呢?"
佢:"哦,可能食得太快呀,掃吓風就好㗎喇"
妹夫:"我喎"
佢:"哦,你呀,唔係BB呀"
妹夫:"係呀,係我呀"
佢:"哦,咁飲奶嘅時候,唔好飲咁快咯,用奶樽,有時會咁。"

妹夫黑人問號。😦
我和妹妹在睡房聽到,忍唔住,一齊爆笑。

媽咪見Amy唔明我哋笑乜,解釋畀佢聽:
"佢係講佢自己呀,唔係BB肚脹呀:
Amy:"我知呀。所以叫佢飲奶時,唔好用奶樽呀"

OMG!

Sunday, September 26, 2021

湊初生嬰的日與夜

濼言比想像中,靚仔、易湊。
一隻手拎得起嘅BB, 出街個個話得意。
佢出街都唔會喊,只係瞓覺,或者望吓嘢,聽吓嘢。
今日塊面去晒黃喇。早幾日都仲有,紅紅哋,黃黃哋。





佢成個樣,都係迷你版嘅一哥。好得意。
睇到佢每個細微表情,都會入迷。
聽到佢發聲,就會9秒9,衝埋去。
為免有網球肘,我好努力控制自己抱佢嘅衝動,佢食完奶,掃完風,玩一陣,就放返落high chair瞓。

佢Sept 14出世得2.46 kg, Sept 21 縮水變2.34 kg.
醫生提醒: 每2個鐘要餵一次奶。Sept 23重返少少: 2.43 kg.
呢幾日明顯重手咗,掃風快咗。

不過,始終未聽過佢餓到喊醒。
好多時都係拍醒佢,餵佢食奶。
佢又唔喊嘅。只係張開小咀,皺吓眉,扮喊。
有時仲會扁咀𠻹。

不過佢唔肯埋身飲人奶,媽咪又想佢全人奶。|
搞到成日要泵奶。

每次泵完奶,整醒佢,餵完,掃風,換片
都好耐。然後休息10-25分鐘,又下1 round.

在妹妹家,她幫我凌晨接更。一哥做2點,我23:00-03:30, 就可以瞓吓。

陪月成日問: "有咩要幫手?"
其實我覺得好煩。
你自己有眼睇,知道咩時間,要做乜嘢。
唔駛吓吓要出聲問。

佢嘅溝通能力實在搞笑。
每日見到我,第一句: "太太你嘅情緒點呀?"
XYZ... 想點呀?
一哥話我有產前抑鬱,冇話我產後抑鬱呀。

找天再寫寫。而家趁陪月在,泵吓奶,瞓吓晏覺先。

Monday, September 20, 2021

黃疸指數過高again

 昨天18:00左右出院。今早11:30打去母嬰健康院,即日安排14:45覆診。
去到幫BB磅重,然後去示範室。因為產檢不是這間健康院,護士問問題,問得非常仔細。
她留意到我出院後,要去精神科覆診,問了幾句。
我只是答: "今日不是來幫BB檢查嗎? 我是陪診者。"

她沒多說,提醒我要幫濼言洗臍帶,然後我出去大堂,繼續等看醫生。

醫生問問問,問到天昏地暗。
她說濼言黃疸指數還是超標。
明早9點要再去覆診。如果仍然超標,就要入院照燈瞓箱。

心很累。
濼言有我這個甚麼都不懂的媽咪,好可憐。

醫生說: "新生嬰兒每日要換大概10條尿片。"
但濼言今早到現在晚上7點幾,只換了3條。
都只有大便,沒有小便。

醫生說: "便便顏色應該是黃的。"
濼言仍在排胎糞,綠綠的。

醫生說: "出院時餵70 ml/ 次,每日大概加10 ml."
濼言今日,每餐分別飲: 15, 30, 40 ml.
埋身餵可能食唔到,因為我哺乳姿勢唔啱。

醫生: "你餵完泵出嘅人奶,BB有冇食剩?"
我: "冇呀。畀幾多,咪食幾多。"
佢: "咁佢即係唔夠飽。如果你畀多d, 佢可以食多d.
大小二便多,才能去黃疸。"
哦~

醫生: "你一日通常餵幾多次?隔幾耐餵一次?"
我: "佢喊,我就餵咯。"
看看手寫記錄。
"今日餵咗3次。隔4-6小時,餵1次。"
佢: "醫院出院時,話佢幾耐食一次?"
我: "昨晚才出院。隔2-3小時。
不過佢成日瞓覺。所以冇叫醒佢食奶。"
佢: "所以黃疸咪高咯。"

我以為BB喊,才是肚餓/眼瞓/要換尿片。
唔知道要叫醒佢食奶。

唉~

明天黃疸一定超標啦。
又要入院啦。
濼言有個乜都唔識嘅阿媽,真係可憐。

BB出院回家

 前日中空寶,醫院中午打電話嚟,話濼言可以出院。
我超開心、勁興奮,即時打電話畀一哥。佢高速回來。
點知,半個鐘後,醫院又打嚟,高級醫生覺得濼言出生第二天,已經有黃疸,擔心星期五出院,黃疸指數升高,母嬰健康院休息,濼言會有危險。
於是,他決定濼言留院觀察,不用照燈。

狂喜完的失落,令我哭了很久。一哥回家,我還在哭。
醫院再打電話來,擔心我的情緒狀況,並向一哥詳細解釋濼言的情況,以及短時間改變決定的原因,並且致歉。

昨天,下午3點半,一哥打嚟話放早。
我即時問: "濼言係咪可以出院喇?"
佢先講話係。
唔想又中空寶,令我傷心、失望。
諗住接咗濼言出院,才告訴我。

點都好,濼言總算19:40左右回家了。
好可愛的嬰兒。
放在high chair, 他身軀細小得像一個洋娃娃。


柏霖珮琳回家,馬上高速跑到洗手間洗乾淨雙手,出來看濼言。
Muimui本來對濼言不感興趣,但也過去湊熱鬧,好像發現新玩具。



大家都趕走Muimui, 怕她傷害濼言。
我今早讓Muimui跳上梳化,近距離嗅濼言,認識這名新成員。
Muimui之後就冇特別追住濼言,都冇不斷吠佢了。

睡到22:20,他才醒來喝奶。
留院多天,他不習慣埋身食人奶,也不太懂吸吮。
我只好用手擠奶+泵奶,裝了70 ml給他,用奶樽吃。

現在胸部每隔3小時左右,就硬得像石頭。
泵完奶,埋身餵完,又好一點兒。


Friday, September 17, 2021

出院回家

 終於回家。

濼言留院瞓箱。

妹妹啱。換個角度,這是好機會,給我、一哥,最後蜜月期,好好休息。日後可能想一覺瞓到大天光,都未必得。


出院時,一哥要求我穿得像一隻糭,漁夫帽、披肩、外套、厚長褲、襪、波鞋。30幾度天氣,我熱死了。

回家,我急不及待脫衣服。他叫我即時沖涼洗頭。一入洗手間,嚇死貓。有一大桶薑皮水。他讓我坐在摺椅上,幫我沖涼洗頭。沖完更熱了。

然後,他拿出一大碗自己炒的炒米茶,說要當水喝。又帶我入廚房,提我喝他煲好的通草黃豆豬手湯。

我宮縮、會陰仍然很痛,只想睡。練了一會兒鋼琴,就入房睡。一哥怕我塞奶,叫我試用泵奶器。我未用過,不肯用,堅持用小針筒吸奶。他有點情緒失控。

“老婆,我已經好努力喇。你陀咗咁多個月,咁辛苦,我又幫唔到手。而家我想做返d嘢,等你同濼言舒服d.唔好成日話我錯,好似我乜都唔啱咁。其實我同你都係新手,你唔好再話我啦,我頂唔順喇。”

嗯。之前擔心濼言會影響夫妻關係。原來我才是問題的根源。這段時間,一哥承受的壓力,也很大。我靜下,給他一個擁抱,乖乖試用泵奶器。

他成功安裝,還放在自己身上體驗,好搞笑。

我臨睡泵了2 ml. 半夜只泵了一次奶,共有5 ml. 進步了。

泵奶時可以看書,不錯。9月24開始上網課10月9才恢復補習。這段時間,好好休息,慢慢習慣做媽媽。

Happy mom, happy baby, happy family.

出院後要見精神科醫生

Sept 15

今早,有個護士來訪,問我常哭的原因。我簡述了。下午,另一位資深精神科護士來跟我傾談。她游說我產後1個月,回醫院見醫生,可能服用血清素。我表明不會服藥。

問題根源是自己的思想。我肯學習慢慢放鬆,加上照顧濼言較忙,又打算加開時段,給學生追課程,預備測驗。我相信問題會解決。


護士出去找走廊的一哥,他在電話說:見見醫生無妨。我同意見醫生。


今天中午,護士通知我,濼言有黃疸,要照燈瞓箱。每天住院母親只能10:30-12:30, 爸爸或媽媽16:30-18:30,每節1個人探BB. 就算我只探3分鐘,該節名額用完,一哥不可能探濼言。

我知道濼言不可能跟我,同日出院。加上我沒有注射疫苗,檢測報告又要每隔2天做一次,未來幾天都見不到濼言,又哭。


今晚,有個護士長,突然來病床,教我擠奶。不消15秒,就出奶。原來我一直脹奶,但自己不知道。濼言也沒吃到初乳。

子宮收縮好痛,會陰在做刮宮手術時,被剪開,再縫起。線頭好大,小便好痛,腫脹。腳水腫。完全不想大便。

每隔2-3小時,我嘗試手擠奶。護士說:這樣才容易上奶。好累。睡了。

Thursday, September 16, 2021

濼言出世了

 濼言出世了

0914

08:30,到瑪嘉烈報到。然後上產前室。一哥不得入內,我很怕,眼淚一串一串地掉下。抵達病床,護士安慰:“沒那麼快,可能明天才催生。”我止哭。

另一位護士經過,見我擺放面紙、水杯在櫃面,指出我可能馬上要落產房,不要拿出任何物品。

實習醫生出現,他叫我蝴蝶形張腿。然後,一隻手插入,說我宮頸已經很軟,要馬上落產房。我嚇得默默掉淚。

10:15. G醫生到。實習醫生𢑥報:“這孕婦胎兒心跳正常,懷疑有產前抑鬱。”


10:45. 產房已有11人,爆滿。

旁邊的孕婦,需要在這裡做前期工序:人手穿羊水、吊藥。

好幾個孕婦,都已塞藥,軟化宮頸,即將落產房。我以為要排隊,鬆一口氣。


11:18. 突然被通知要收拾物品,即時落產房。

產房內,護士要我關機。我開始吊鹽水、催生藥。

突然有醫生拿著報告:“你有B鏈,知道嗎?”

我傻眼。檢驗後,2次覆診,都沒提過。我又開始害怕。

醫生說每4小時,要打1次抗生素。


我看電視減痛。陣痛由每隔半小時,痛1次,慢慢縮短至1分鐘1次。醫生關掉電視,改播輕音樂,讓我放鬆心情。

儀器開始鳴叫。很多護士衝進來。然後出去大叫:"3號房standby. "

我已經痛到唔識驚。

他們叫我打電話畀丈夫。一哥好快就進來,握著我的手。我卻寧願拿笑氣。宮頸開得好快。每次陣痛,我都感覺到它爆裂。

突然,好多人圍著我。

醫生叫我吸氣生BB.我不夠力。試了幾次,濼言出生。


護士很好,用一哥手機,幫我們拍了好多張全家福,還有濼言的獨照。



不過,我不知道生完BB,原來仲要生個胎盤。但我已經冇力😔,結果3 cm X 3 cm 胎盤殘留在子宮內,我要上手術室,刮子宮。在背部腰椎打無痛針後,我開始失去下半身知覺。

聽到護士講,醫生好多手術要做,可能好遲先嚟到。

我睡著了。


醒來,手術進行中。我面上覆蓋了一張紙,看不見,但聽到醫生和護士對話。

手術完成,我被推進復甦房。麻醉藥令雙手、上身,不斷劇震。

我用呼吸法,放鬆,入睡。


推回產房,沒想到一哥仍在外等候。嬸嬸幫我拿齊行裝,上產後室。

上去已過晚飯時間。我腳未有力行。嬸嬸說我全晚都不可以落床。她給我尿盆。我只是肚餓。

一哥買了粟米肉粒飯給我。我吃完就睡。


然後,每隔2小時,嬸嬸就推濼言給我餵奶。我根本未上奶。

可是,看到濼言,我就滿足。他很乖巧,周圍的BB大哭,他只是靜靜看著我。打針抽血前,他哭幾聲,抽完血就不哭。他比我勇敢。



Sunday, September 12, 2021

一哥月供 (第17期) -- 沽JD, 月供SPY, QQQ

 JD升返去買入價,勁人谷嘅谷友仲有貨,但係一哥話沽咗先。
所以平手離場。

之前諗住合併一哥月供倉、濼言教育基金。
後來覺得太混亂,唯有獨立處理。
濼言基金,改為家庭基金,以備不時之需,用途亦可更靈活。

一哥個倉,仍然佢月供$2000, 我資助$1000, 共$3000.

倉位:

總數量平均買入價股價月供金額市值
SPY7$418.73$445.44USD $2,931.12USD $3,118.08
QQQ8$338.92$376.59USD $2,711.38USD $3,012.72
JEPI1$59.53$61.59USD $59.53USD $61.59

SPYQQQ
數量買入價金額數量買入價金額
Dec1$365.12USD $365.12Mar1$313.05USD $313.05
Jun2$419.00USD $837.99May4$326.73USD $1,306.92
July3$425.76USD $1,277.27Jun1$342.63USD $342.63
Aug0Aug1$368.37USD $368.37
Sept1$450.74USD $450.74Sept1$380.42USD $380.42
總計7$418.73USD $2,931.12總計8$338.92USD $2,711.38
JEPI
數量買入價金額
Jun1$59.53USD $59.53
總計1$59.53USD $59.53

月供記錄:

一哥倉儲
DateSoldSymbolStockBoughtSoldLastVolumeValueGain/lose
18/12/20196823香港電訊-SS$11.14$10.70250$2,675.00$419.0915.00%
10/12/2020SPYSPDR S&P 500 ETF Trust$418.73$445.447$24,282.36$1,562.096.83%
19/03/2021QQQInvesco QQQ Trust$338.92$376.598$23,461.86$2,415.0011.47%
18/06/2021JEPIJPMorgan Equity Premium Income ETF$59.53$61.591$479.64$16.753.62%
19/06/201929/01/20201928金沙$37.55$39.10100$3,910$1403.72%
13/09/201930/01/20206055中煙香港$22.95$15.60100$1,560-$750-32.47%
29/01/202009/07/20201083港華燃氣$5.06$3.92800$3,136-$1,073-25.49%
22/08/201914/01/20212800盈富基金$26.00$28.48680$19,366$2,01711.34%
12/02/202008/02/20211299友邦保險$79.00$102.10221$22,564$5,17629.64%
20/01/202025/02/20210066港鐵公司$47.55$47.00110$5,170-$70-1.34%
17/02/202020/03/2021TSLATesla$782.24$655.355$25,395-$4,918-16.12%
12/10/201903/06/20210012恒基地產$38.15$36.00230$8,280-$510-5.81%
29/12/202007/09/2021JD京東$81.21$81.4510$6,312.46$15.970.25%
Available cash:
$7,968
Stock Value:
$50,898.86
Gain/ Loss:
$4,440.75