Friday, October 30, 2020

執倉大挑戰:避開投資陷阱


今次執倉,傻貓要止蝕、重新配置股票組合。我唔知咁做啱唔啱,結果係成功/失敗,不過,避過投資陷阱,應該可以增加成功機會。參考咗豐盛基金經理黃國英先生的文章迷戀往昔易中伏,避開被顛覆對象,加埋前晚上完鍾Sir嘅第一堂投資班,我歸納出以下幾點:

1.死守/溝淡昔日強勢股

佢哋轉弱,主因係基本面已大改,盈利能力倒退。置富係其中一隻。疫情令work from home變成常規。商廈丟空率高,短期仍受壓。銀行股,以前幾好景。現在低息環境、各國長期QE大量印銀紙、環球經濟低迷,暫時都係避之則吉。

公司管治能力,亦要考慮。中電係傳統收息股,但近年盈利能力轉弱。(見肥師奶月供 (第9期))

國泰更因管理層之前賭輸期油,連續幾年,股價低迷。

2.高追科技股

大家都奉Catherine Wood做女神、契媽。跟佢入貨,好似等派錢。不過Amazon, Zoom, Netflix, Google, Microsoft, CRM, LVGO,全部都超買。股價超前反映,長遠會回歸企業基本面,回落至合理價格,有回調壓力。

德國監管機構,對Amazon, Apple展開反壟斷調查,亦對股價構成壓力。Amazon現時以保護知識產權為理由,只容許Apple分銷商、Amazon自己,在Amazon平台,銷售iPhone. 同時,禁止第3方賣家,銷售產品。

法國研究緊數碼稅,有機會對美國大型tech股,造成壓力。意大利又話要告Google壟斷市場,指佢濫用支配者地位,利用所收集的數據,限制對手在搜尋引擎,出現的廣告位置,壟斷意大利網上廣告市場。我暫時會避開Google.

3.被顛覆的對象

不少行業,例如汽車、生意上未被顛覆,可是市場預期將會受到挑戰,估值及股價已經明顯回調。如果只睇表面數據,以為價殘抵買,就會做蟹。而且股價走勢通常陰乾慢跌,不經不覺就會輸到嘔。

4.持股行業分散

現時持倉,十足十燒衣個衣包,包羅萬有。認真睇個倉,好辛苦。齋坐唔理,佢死佢事,又唔係辦法。會盡量縮窄範圍,跟鍾Sir講,分散4-5個行業,將持股降至5-10隻。每隻股票,不超過25%.

Thursday, October 29, 2020

傻貓百萬倉:慘不忍睹、亂七八糟嘅持倉

昨天上咗第一堂鍾Sir嘅價值投資課程。感覺上係重覆佢寫嘅第一本書,入面嘅內容。
佢舉嘅例子,好似瑞房,都係書入面講過。

未完全結合到昨天的課堂筆記、書內的內容。
睇咗再寫讀後感。

仲有兩日月尾。通常每個月最後一星期,星期四、五,股市表現都差。

但抄功課抄得幾好。
697首程表現好勇猛,跌到落$2.47,即時拗腰彈上,仲升穿52周高位。
8083有贊都唔差。我高位入,但回報暫時有10%.
另一些佢哋重點講嘅股票,我未入。都冇港銀入。錢都換咗做美金。一動不如一靜了。


同谷友講起: 我個倉實在太亂,持股分散,根本已經搞唔清有咩球員。
更加講唔上邊個係後衛、中場、前鋒。
谷友提議我保留多些流動現金。
呢個係我心結。總係覺得有錢就唔舒服,儲儲吓就攞嚟買牛熊證。
Anyway, 嚟緊再執一執倉,希望改善吓回報。

撇除已完成嘅交易,唔計已經袋袋平安嘅錢,未實現虧損高達10萬蚊。
蝕得甘嘅唔想,亦唔敢睇。賺到嘅,又拿拿聲止賺。
恐怕最後都係:嬴粒糖,輸間廠。
鐵塔、港鐵、恒地、必瘦站,仲係跌到一仆一碌。

美股又跌緊,可能仲有得跌? 
前晚賣咗Disney, 但仲hold住Visa. 因為賣出時,Disney有賺,但Visa就蝕緊HKD $180. 
今朝一睇,Visa跌多咗,帳面現虧損 8.79%. 即HKD -$4,080.04
有諗過換馬去SQ, PYPL. 最後入咗FVRR, BEKE.
我幾鍾意貝殼嘅網上售房概念,佢仲做埋裝修、按揭服務。新上市3個月,現價比上市升咗1個double. 擺吓先。
至於FVRR, 以色列公司,主力為freelancers搵客,做graphic designs, programming, etc.呢隻純粹炒波幅。 

我做補習,最難就係搵學生。
網上嘅平台,都係上門私補嘅中介多。幫現成的補習社,增加曝光率,冇。派傳單,效用係0. 靠家長、學生的口碑,介紹嘅學生,黏性大好多。但係好慢。

網上搵客,幫人寫論文、改作文,相對容易。通常係客人主動搵上門,我再揀jobs/ 揀客。
不過,一哥唔鍾意。我自己都覺得時間用得不化算。再諗諗點開源啦。

傻貓百萬倉
DateSymbolStockBoughtLastVolumeTrading feeDividendValueGain/lose% Gain
22/08/20192800盈富基金$25.62$25.381269$69.78$443.97$32,207.22$73.340.23%
12/10/20190012恒基地產$36.53$27.804660$404.61$129,548.00-$41,085.61-24.08%
13/10/20196823香港電訊-SS$11.06$10.028600$264.45$2,825.90$86,172.00-$6,402.20-6.71%
20/01/20200066港鐵公司$47.18$38.803750$359.19$145,500.00-$31,771.69-17.92%
09/03/20200778置富產業信託$7.82$6.575000$98.02$32,850.00-$6,348.02-16.19%
04/05/20200788中國鐵塔$1.68$1.228000$45.08$9,760.00-$3,725.08-27.62%
10/06/20201299友邦$72.950$75.602000$267.66$151,200.00$5,032.343.44%
19/06/20200939建設銀行$6.150$5.4910000$113.86$54,900.00-$6,713.86-10.90%
24/06/2020VVisa Inc$198.385$180.8730$7.75$42,052.82-$4,080.04-8.79%
02/07/20201830必瘦站$3.240$2.7728000$166.03$77,560.00-$13,326.03-14.66%
14/07/2020ARKWARK Next Generation Internet ETF$99.840$114.6130$7.75$26,647.17$3,426.3214.66%
26/08/20200345維他奶國際$27.150$31.702000$64.19$63,400.00$9,035.8116.62%
28/08/2020FBFacebook$293.690$267.6730$7.75$62,234.08-$6,057.48-8.81%
03/09/20208083中國有贊$1.730$1.9120000$42.66$38,200.00$3,557.3410.27%
15/09/2020TSMTaiwan Semiconductor Manufacturing Co Ltd$84.865$83.8530$7.75$19,495.38-$243.74-1.23%
15/10/20200697首程控股$2.730$2.806000$73.26$16,800.00$346.742.11%
17/10/2020AMZNAmazon$3,346.36$3,162.781$7.75$24,511.86-$1,430.51-5.48%
24/10/2020TSLATesla$412.560$406.0210$7.75$31,466.96-$514.61-1.60%
29/10/2020FVRRFiverr International Ltd$158.870$160.0810$7.75$12,406.36$86.030.69%
29/10/2020BEKEKe Holdings Inc.$72.370$73.0550$7.75$28,307.24$255.750.91%

Sunday, October 25, 2020

營商有道: 茶記老闆4宗罪

 


一哥寡言,實事求事。他不只要求把工作做完,還要做得好。

近日茶記老闆,做事方式令他非常不舒服:

1. 冇規冇矩

8號波,一哥當日休息,老闆自己瞓得晏,冇要求大家返工。但亦冇叫大家放假。

水吧大姐開門返工,搬貨入舖,才發現冇人返工。打畀老闆,老闆先突然吹雞,要大家返工。但又唔係個個要返。

上次打風,周圍幾間茶記休息,只有佢哋開門。當日比平時忙N倍。老闆應該吸取經驗,預視到8號波開門,門庭若市。但佢冇。一哥休息,廚房少咗個主力;水吧,老闆放咗1個假。當日倒瀉籮蟹。

而且,根據勞工法例,員工返7放1。老闆根據翠華舊規矩,只提供1個月4日勞工假。一哥多次爭取不果。每年,就蝕幾日假畀公司。諗起,心裡就唔舒服。

2.一時衝動,罵走員工

打風當日,開門嘅水吧大姐,見冇人返工,得自己返,唔開心。

工作時,難免有怨言。老闆見超多客,單多到做唔切,財神送上門,都要調頭走,心情也不好。見水吧大姐做錯嘢,一時火起,鬧走咗人。

一哥對此非常不解。佢認為: 一個員工,做錯事,應該暗角傾。何況那是水吧大姐,短期冇人替代。最近飲食業開始復甦,水吧、廚房都難請到有經驗、又肯做肯捱、有能力嘅員工。老闆喺冇plan B嘅情況吓,鬧走咗人。現時,單多就冧檔。一哥覺得老闆做事毫無章法,長遠對公司營運,冇好處。

3.唔聽意見

茶記細細,最近半個月,每晚多成萬蚊生意。大家做到踢晒腳。

一哥返9:30, 但佢責任心強,通常9:00開工。之前,佢做到3點幾,可以陸續安排下屬,食福食,再拼搏。現在,全日都咁多單,佢自己下午5:30蒸好個飯,6:30先可以一路煮晚飯畀客、一路自己食遲嚟嘅晏晝。沖杯凍啡,1點沖好,7點先有時間飲啖。

歸根究底,因為公司嘅茶餐,係全日餐。試諗吓: 下午茶$33, 你晚市食,仲要外賣,有8折。茶餐仲要唔係公仔麵、多士,而係廚房炒飯炒麵蒸餸。做客嘅,你會揀$48嘅晚餐,還是茶餐? 

另外,一哥留意到: 公司周圍嘅茶記,外賣已經要加返$1. 折扣亦減至85折、9折。但佢哋仍然做緊8折。單係多嘅,但堂食、外賣,差價拉闊。對廚房嚟講,工夫一樣咁多。但佢嘅佣金收入就少咗。

為咗處理一大堆外賣單,老闆請多咗個樓面,負責包外賣。但廚房工作負荷已經超標,一哥提議仿效附近茶記,減外賣折扣。雖然預計短期內,生意會略減,但現時外賣需求強勁,長遠只要食物質素保持水準,客人自然會回頭。老闆反而提出寧願所有單價加$2, 不過最後乜都冇做。

廚房繼續做到冇停手,一哥話: 無論點樣加快速度、增加效率,都做唔切加單嘅速度。眼見有下屬為咗快,用滾水煮飯、溝稀醬汁、唔夠時間醃好食物,就攞去煮,一哥非常非常唔高興。

4.應做唔做

之前廚房假天花,有吱吱聲。一哥已經即時通知老闆,放捕鼠器、用聲頻趕鼠、請滅蟲公司。老闆一直無動於衷。

近日米奇長大了,開始開枝散葉。食物儲存室,開始瀰漫中人欲嘔嘅氣味。老闆只係喺淘寶,淘咗塊膠板、幾十蚊人仔嘅超聲波驅鼠機。成效不彰。有時米奇仲出嚟行街街。

一哥非常擔心食物嘅衛生問題,好擔心食壞人。但老闆唔肯花錢處理,一哥亦無可奈何。


傻貓知道,佣金少咗,佢可以忍受。牽涉到食物安全、質素,一哥就火都嚟。佢之前講過,鍾意煮嘢食,見到客人鍾意佢煮嘅嘢,會好滿足。

我要努力,做大個餅,畀一哥可以有自己嘅工作天地,就算唔係自己話晒事,最少有話事權,做到佢真正想做嘅事。同時,日後自己有機會做老闆,都要切記唔好犯同樣嘅錯誤。

Saturday, October 24, 2020

初試槓桿,買TSLA

 


聽講用IB,可買比本金多6倍嘅股票,而且息率極低。

傻貓深知自己賭性強,一直冇試過借錢買貨。而且,唔知幾時先適合借錢槓桿。

Oct 23有消息,Tesla因懸架問題,要召回2013-2017年,在中國售出嘅50000輛電動車,免費更換配件。

存安全隱患 Tesla召回五萬輛在華電動車

不過估計長遠影響唔大。而且,TSLA新出嘅自動駕駛系統,堅勁!



輕輕試咗用槓桿,入咗10股TSLA.

知道有人借唔同外幣,低息貸款,再買入高息股、優先股、ETD, 房託、債券。如果我搞清楚槓桿點做,就有多一個創造現金流嘅機會。但外匯匯率浮動,我係數字白痴,可能愈搞愈混亂。

剛才用IB app, 喺account見到好多數字。唔識點睇,自己借咗幾多倍leverage.

唔知人哋成日講 1.2倍,3倍,係邊度睇。唔知幾多倍,先安全。

 MTD interest.應該係我要還畀IB嘅每日利息。現時欠 HKD$8.
喺margins 見到 initial margin和 current maintenance margin, 唔識有咩分別。估計後者係維持唔畀人斬倉嘅金額。如果 net liquidation value, 大過 current maintenance margin, 應該就ok.

唔知unrealized和realized有咩分別,realized係賣咗/被斬倉嘅實際結欠?

呢版完全唔明。

Settled cash,係我要還畀IB嘅錢? 
Stock,持倉市值100萬。

另一個考慮:耀才買賣手續費,比IB低。近月買賣港股,都喺耀才。



如果做槓桿,IB應該便宜些。我就算唔射倉去IB,都唔會加倉落耀才。咁IB先槓到多d.

咁諗啱唔啱?