Saturday, October 19, 2019

蒲公英的微笑



<<蒲公英的微笑>>
蔡志忠著
摸索生活脈搏中。
不再朝8晚4教書,無須通頂出卷改文,是解脫也是放任。 補習每天才三數小時,收租冇嘢要跟進。 每天自然醒係好,但晚上就眼光光。
走入圖書館,隨心搵書睇。
呢本呼喚我: 「一切本源,只在一心。」 煩惱皆自尋。 人生中往往會遭遇困難、煩惱,其中最大的困擾往往來自自己。
想買多一層樓收租,計嚟計去都差幾十萬,樓價又好似未跌完。忟憎到做乜都冇心機。 本書又教我:「人都自認為是鳥籠,在捕捉生命中的鳥。其實人就是鳥,在尋找關自己的鳥籠。」


教書時,每日忙忙忙,唔知忙乜。 而家做瑜伽,接觸到流瑜伽、排毒瑜伽、拉筋瑜伽、空中瑜伽。 淨係做瑜伽,眨眼就過咗個幾鐘。 有時玩cardio workout,踩吓單車、開Nike個app去跑吓步,出一身汗,都幾爽。
諗過試做YouTuber,輕輕鬆鬆教吓英文。 冇試過就放棄咗。 呢本書又講:「讓美夢成真的唯一方法:從夢中醒來,用實際行動,將夢想化為真實。」 「成功的關鍵:不是先努力,而是先有自己的想法。」
最近社會分黃藍二營,不時意見分歧。之前我unfriended唔少Facebook嘅朋友,因為怕自己忍唔住拗,又唔想有衝突。 本書講:「虛心才能容納新東西。」 「你就像茶杯一樣,裡面裝滿了自己的看法、想法。有成見,就聽不見別人的真言。你不先把自己的杯子空掉,怎會聽到別人的聲音?」
有時睇到學生,學極都唔識,會好嬲,覺得佢哋好懶,唔專心。 不過本書話:「成功不只來自努力,而是要有抵達目標的方法。」 作為老師,我有責任探索嘗試唔同嘅教學法,設計唔同深淺程度嘅練習同遊戲,唔係一味話同鬧。
有時忍唔住攞同學比較:你小五喇,人哋學咗乜乜乜,點解你乜都唔識? 書話:「我們一生下來就已經是自己了,不是別人的複製品。」 的確,每個人都有自己嘅強弱項,學習進程、理解同吸收能力都唔同。 「教育的目的在於啓發學生獨立思考能力,引導學生找到自己的天賦,而不是抑制發展。」 終身學習中。