K1 的 外補開支全面睇

好搞笑😂

好多人覺得個幾月，駛成8萬落個 讀緊K1的3歲人仔，外補，匪夷所思。

其實好多都係年繳。Eddy只係剛好報咗幾個courses.

喺手機搵到呢堆invoice.

1. Phonics Plus：拼音班 (group class)

呢個學費已經打咗折，因為有referral.

（有意報讀嘅，可留言問我攞referral. 真係便宜好多。）

本身course fee chart:

10 lessons: $550@

20 lessons: $530@

30 lessons : $510@

2. 梓峰教育：小司儀班

梓峰教育，都係計package收費。

3. 節奏生活：打鼓

佢本身有好多package plans:

4. 大埔越野車：平衡車

5. Max Academy: 田徑

6. Rainbow bell 

阿仔試完堂，話鍾意玩rainbow bell，又學埋。

7. 繪畫

呢個喺學校學

8. 游水 @Stanford

我哋係插班生。

另外星期日，私人游水教練，group class, 1:2-3, $1320/ 8堂。

冇計到：

其他恒常班： Joyful playgroup, Jelic class

Christmas workshops 烘焙蛋糕，烤乳豬，整蘿蔔糕，etc

自己教Eddy: GAPSK, Talking Trinity, 認字班, Cambridge Pre-starter, 鋼琴，慳返少少。

不過最大支出，原來係舊同事賣畀我嘅Disney World English. 因為仲有會藉，所以用咗2萬幾蚊。有咩壞呀爛呀，可以免費去換。

3歲K1要外補嗎？

Whatsapp group有唔少家長，最近收K1 offer,掙扎 happy sch + 外補，還是直接揀學術型，放學可親子。

傻貓當日都係，九龍塘券校，勁多功課 VS 大埔 happy 券校。唔想3歲人仔，舟車勞頓，又怕工人搞唔掂，唔見我個仔/女。最後揀happy 券校。

簡單計數，上個月，阿仔駛咗我近9萬蚊。

Eddy而家嘅時間表：

Mon: 打鼓+sch + Talking Trinity

Tue: Phonics+sch+平衡車 (pump ride)

Wed:show & tell + sch + GAPSK (普通話）

Thu: sch + 專注力訓練/Jelic class （數感）

Fri: playgroup + sch/親子水活動 + 田徑

Sat: 游水+繪畫班

Sun: 教會 + 行山/rainbow bell (考LCM)

每日：

中英繪本最少各一

認字（字卡/四五快讀/基礎500）

Pre-starter (sight words, DWE）

DVD （DWE， 巧虎，Numberblocks)

整補習社FB page, IG page

 妹妹終於回家了。由竹篙灣回來，她清減了很多。她說飯餸都很難吃，而且往往送到時已經冷卻，只好不斷喝水、做運動，每日吃一點點自己帶去的朱古力、薯片。

她回來，我的生活總算回復正軌。
今日，我花了1.5小時，開咗個Facebook page, IG page.
因為唔知寫咩好，所以推出1個暑期優惠，給家長一天時間考慮，8月1 日開始暑期課程。

有咗呢2個pages ,嚟緊可以有多d嘢玩。而且，有facebook, IG, 仲有網頁，家長介紹我這家蚊型補習社給朋友時，都容易一些。不過，其實一開咗個page, 我已經唔記得咗密碼。而家只靠用電腦自動save嘅密碼。手機就登入唔到。真係笨貓。😂

Facebook: https://www.facebook.com/TsuenWanEnglish

IG: https://www.instagram.com/o_sky_edu/

妹妹可以回來，實在太好太好太好了!!!!!😁😁😁😁😁

前日，一哥和我，帶濼言去那打素見營養師。原來他鐵質不夠，有點貧血。而且瘦得像隻小猴子。之前那位營養師，說要幫容易食物敏感的濼言，嚴格戒口。前日那位又說不用了，甚麼都可以吃。雖然有點無所適從，但是看見骨瘦如柴的小濼言，我寧願讓他甚麼都吃個夠。
濼言很喜歡吃東西，但每次吃幾口，就推開。以後要再給多點耐性，好好哄哄他，多吃一點，長胖一點。

小飢民

設計補習社網頁

試整網頁

傻貓入咗一些媽媽興趣班、補習社的WhatsApp groups, 大家問起鋼琴、數學、英文課程，我發覺自己介紹人哋學琴、補數，好順口。但係就唔敢sell 自己。😳

終於鼓起勇氣，介紹吓自己間補習社，但家長一問起，有冇網頁、IG, Facebook, 唔好意思，冇。😅

咁我就明點解，自己一直都係得家長referral喇。

剛才用咗4個鐘頭，整咗一個網頁。呢個係我嘅新嘗試，以前從來唔敢整，怕整得唔好。而家就的起心肝試試。
我用嘅係 wixsite, 免費嘅，又有晒template. 係諗內容花咗少少時間。
簡簡單單，寫咗一些家長常見嘅問題，又有課程內容簡介、導師簡介、地址電話報名表。

咁如果將來有家長問起，荃灣邊度補英文好呀，我都可以畀個網頁人哋望吓。

過幾日再整靚少少個website, 同埋開返個 IG page先。 😁

雖然好想大家畀吓意見，但係網頁有好多個人資料，都係算喇。

濼言IG

另外，最近仲係日日挖空心思，諗嘢畀濼言玩。佢而家瞓好短晏覺，全日得半個鐘左右。要抓緊時間，睇書睇片，學整遊戲，畀佢練motor skills, 手眼協調，仲有認字、認人，分辨顏色形狀。佢又成日爬調爬低，扶住嘢就行嚟行去，然後跌嚟跌去，要睇得好實。

雖然10個月大嘅濼言，仲係著緊細碼片，其他人著緊大碼，不過佢出世至今，都健康開心活潑，我已經唔敢再要求其他。下星期又要返醫院，見營養師。唔知會講乜，話唔擔心係假嘅，但佢食咁多牛油果，連雞皮都食埋，都冇肥肉。暫時見唔到一秒變肥嘅可能，只好隨遇而安。

小薯，Duncan,止凡出新書

飛鳥推介4本書：

Duncan兄處女作《科技戰國．尋找科技價值投資的故事》

小薯兄新作《價值解密》

止凡兄新作《新世紀投資要點》

止凡《跟著價值走的12課》

冇錯，傻貓超爛賭，成日手痕亂買嘢。所以，更加要睇返呢類理性嘅投資書籍，提醒自己將絕大部分資金，放喺價值投資。呢幾本書，值得真正有意學習投資嘅人，好好學習內功心法。佢哋嚟緊23號會去書展，同讀者見面。大家有心交流，就唔好錯過喇。

黑色暴雨復工

今早一哥話唔准用生水洗碗，唔准返補習社。
不過在家閒著沒事，明天全日補習，我還是放心不下，就帶著濼言返嚟。

剛落樓，已見傾盤大雨。等巴士時，雖然撐著傘，還是變落湯雞。濼言都成面雨水。
好彩有的士，即時上車。

返到補習社，我和濼言都不約而同打噴嚏。我開始頭痛。
糟糕。

臨時上咗一堂，Thomas, Toby 2兄弟都好乖。濼言偶然有哭，但大部份時間都很安靜。這堂無驚無險，順利完成。
家長畀咗一封利是濼言。嘩! 竟然有$100!

她很關心濼言，由知道我有baby開始，就不時關心我的情況。
到知道我有產前抑鬱，又主動分享經歷，以及提醒我要注意的地方。

今日黑雨，紅雨，我竟然挑了這樣的天氣復工，真搞笑。

生B後的工作安排

近日多咗家長問: "你快生啦，咁補習方面係點安排？"

老老實實，我真係冇乜嘢要安排。
我從來唔覺得自己係返工。補習係我每日都超級期待嘅事。就算得1個學生，我都會補習。
為學生預備教材、準備模擬試卷，係我好享受嘅事。
最開心見到學生成績有進步，話我知考得好咗，全班第一，全級第一，上堂領獎，攞獎學金。

英文，好多人以為好難，但我嘅學生，絕大部份都好有自信。
小二做中二嘢，冇難度。小三做小六嘢，好正常。
中一做中三、四嘢，中三做中五嘢，中六同時預備DSE, IELTS.
好似打機咁，你玩得多，自然唔甘心打嘍囉，要打大佬。

佢哋喺呢度，搵到喺學校搵唔到嘅競爭對手，有衝勁有目標。呢樣嘢好得意。
我覺得可以幫佢哋突破樽頸，明白 "天外有天，人外有人"。幾時都要謙卑，唔好以為自己乜都識。尊重對手，因為佢哋可以突然進步神速，超越你打破嘅紀錄。

你畀我揀，我根本唔會坐月。
屋企有妹妹、媽咪、陪月，一哥又話放侍產假，照顧濼言。
BB得一個，邊駛咁多人照顧?
你放過我啦。我想補習，想見人，想教學生。

以下就係我嘅安排：

9月尾預產期。

生B當日，以及之後2日
在醫院未必用得電腦
那3天會休息

視乎情況
會安排用Zoom/ 休息幾日
之後如果身體一切正常
就繼續面授課堂

濼言會唔會早出世，或者逾期居留，我唔知。
最好某天瞓醒，穿羊水，沖埋涼洗埋頭，到陣痛到頂唔，就拎走佬袋，入醫院等生B。
或者補習時穿水，咁我就可以專心補習，落堂後才回家沖涼換衫，入院。

我唔想太認真諗呢件事。愈諗會愈驚。我唔知穿水時，一哥喺唔喺身邊。
唔知生B時，係咩情況。好多嘢我未試過，太多未知，我唔敢諗。

總之，我唔想乖乖哋在家坐月。
我唔知聽到濼言喊，我會唔會想丟佢落樓。
我唔知自己會唔會產後抑鬱。
我唔知自己生完Ｂ，身體情況會係點。
我唔知夠唔夠人奶餵濼言。
我唔知每日出嚟補習幾個鐘，濼言會點樣。
我唔知點解要坐月，又話唔洗得頭，唔吹得風。
我唔知坐月係咩一回事。都唔知點解有啲人話，坐月成個月都唔出得街。
咁去母嬰健康院檢查，都要出街啦。
我唔知Muimui鍾唔鍾意小濼言，相唔相處到。
我唔知到時返大埔坐月，會瞓邊度，一哥會唔會照返工。
如果佢返工，妹妹／媽咪都冇可能、冇能力，阻止我出去補習。

早幾日有學生話迫到走唔到。
今日我早個幾鐘返嚟，搬過晒所有桌椅，執整齊咗啲地方，人都精神啲。

舊生學費，４年冇加過。新生就加咗少少。
呢個暑假，收入和前年相近。
不過，前年我仲有學校做合約學位教師的２萬幾蚊月薪，可以幫補吓。
而家就只有出租物業、投資回報，可以幫補。但租客經常遲交租，追租都花唔少心力。政府加強管制劏房，又係另一憂慮。物業２正進行大維修，分分鐘要畀１０幾２０萬維修費，聽講要整完，先知幾錢。
投資如果睇錯市，就會虧本，我還未做到穩賺不賠。

以下係呢4年補習嘅收入狀況。

17-19年，教書+兼職補習。補習收入唔多。
19年開始，辭去學校教學工作後，專注補習。社會運動、疫情，都影響咗補習收入。
舊文: 小補寶: 補習寒冬期，當時月入只有$16080.

每個月，$39011的補習收入，我真係唔滿意。
又睇吓生B後，情況會有咩轉變。暫時未知會唔會有學生流失，流失比率幾。
都唔知到時身體情況係點樣。濼言健康狀況又點樣。一哥和我的相處模式，又會點樣轉變。
妹妹肯幫手照顧濼言，但佢都好忙，唔知到時點安排。

我的目標是來年補習收入，達到 $600000. 即月入5萬。
要諗生B後，開始宣傳工作。
現時 1 星期放2日假，星期日得2堂。
9 月開學，通常係上客高峰期。但我可能早產，就會miss咗呢個期。

2月時寫的resolutions:  ＂Have 80 students (Year 2020: 54 students; Year 2019: 55 students)＂
現時有61位學生。只要動動腦筋，增加補習時段、加強宣傳，儲多 19 位學生，就可以達標。
不過，要留意點樣持續幫學生提升英文能力，仲有改善校內測考成績，以及加強與家長溝通。

補習收入	17-18	18-19	2019-2020	2020-2021
September	20460	29,802	46,500	28,000.00
October	18330	31,566	50,410	33,870.00
November	19760	42,216	57,420	36,060.00
December	25120	21,680	46,710	36,360.00
January	17910	37,240	46,010	39,800.00
February	16066	25,310	16,080	36,920.00
March	13916	48,930	29,130	32,885.00
April	19036	36,830	31,180	50,060.00
May	24154	43,160	36,470	54,885.00
June	14215	37,160	42,910	38,500.00
July	26308	56,980	30,350	69,541.00
August	12176	16,510	8,820	11,260.00
Annual	227,451	427,384	441,990	468,141.00

開源：代做功課/批改作文

補習社，這個月開始多返少少學生。收入終於上返5位數字。

不過，交完租，其實都冇剩。

稅局可能見我太可憐，退咗$200 蚊畀我。

(一哥交成萬蚊稅，超眼紅我😂)

開源:

為了增加收入，我接了好多freelance做，包括幫學生改作文、做翻譯、代做功課 (毅進、大學論文)。

批改作文：

改作文，$30/份。批改一篇作文，通常5-8分鐘完成，但是畀評語、預備範文、出follow-up exercise, 就用咗近2小時。時間花得不太cost effective,不過當練習吓改文技巧，都唔錯。查簿期或者考試月，仲會有老師，一次過畀晒全級/全班學生的作文，限2-7日內改完。唔駛寫評語。

我以前試過，間學校乜都要全級改，話咁先可以standardized marking scheme. 又話驚作文主觀，手鬆手緊多爭拗。某年，出完高中作文卷，同時出埋GE, listening paper, 之後要改全級F.4 short writing task, F.5 long writing task, 再加F.5 listening paper Part B: integrated tasks, F.2 通識卷、F.2 GE卷。每份listening paper的long tasks, 搵point 都搵死啦，仲要睇coherence, language. 真心灰。

想不到，現在反而幫人改文。😅

代做功課：

代做功課，寫1000-3000字，需要睇大量期刊、參考書籍。每篇功課，收費$500-$800,  花大概1-2星期完成。還是覺得不太cost effective, 但是，透過海量閱讀，傻貓了解多了很多以前不會接觸的範疇: 市場學、人力資源、教育法律、保安、營養學。

反正每日只是補習3小時，撇除備課、批改練習、自製試卷及練習的時間，每日就只是練琴、玩日文、玩德文、跑步。

補習社收入又慘澹。代做功課，似乎都是不錯的開源方法。

毅進呢條橋，本身就有bugs. 

唔知政府點解會認為: 會考5科合格都冇嘅人，讀幾個月嘅short  course, 就可以由 0   變成 DSE 5 科 level 2.

其實，佢哋好多連用文字表達自己，都有難度。又點會識用英文，寫成千字論文?

法律、營養學、市場學，好多概念、專有名詞，傻貓都係瘋狂睇書，先明皮毛。

點解政府會覺得:   有全職工作的人，用工餘時間去上堂，仲有時間、有能力，聽得明老師講乜，仲睇到咁多參考書?

大起大落

升中派位結果出爐。

去年9月，傻貓正式離開中學，專注補習。作為註冊教師、曾任考評局多屆閱卷員 （利申：　今年已無出任閱卷員），傻貓在0宣傳，只靠舊生及家長的口碑下，盈業額由9月開始時的46,500, 上升至10月的50,410, 截至11月57,420，遇上武肺、停課，上升軌斷纜，1月未做視像上課時，月入更低見16,080。

小六生的下學期考試取消、部分學校完全取消考試。

反正冇學生，補習社停業過2星期，傻貓利用這時間，出卷、出練習，看書、做運動、學日文、學琴。

疫情稍為紓緩，闊別多時的學生，又開始聯絡我，安排補習。

為協助同學應付升中面試，傻貓撥出時段，教口試及面試技巧，事前用心蒐羅了區內及本港的頂尖名校試題，亦預備了厚厚的練習、互動遊戲、時事題目，讓學生習慣個人短講、小組討論的技巧，同時操練思辯能力、解難能力、溝通能力，增加時事知識。

派位結果令人鼓舞。學生絕大多數，獲派心儀中學。

極樂後，隨之而來，不是極悲，但亦令人憂心忡忡。

本港疫情轉趨嚴重，確診人數突然暴增，原訂的暑期課程，報名人數極不理想。已報名的學生臨時請假、要求暫停補習。

下星期二，要去中銀簽按揭合約。律師樓亦大概下星期內，預備好樓契及相關買賣文件。

傻貓戶口只有7500看淡。2388, 66, 12, 這些傳統舊經濟股，本來這時股價低殘，應可低吸。現時可能要賤售。9999, 700, 科網股，已急升，現價售固然有可觀盈利，但長遠是升是跌，不可預知。

總之，成手貨，近乎滿倉。要認真思考定奪取捨。怕做錯決定，賣錯好股，保留劣股。

傻貓好怕補習社停業，現金流中斷，但一哥堅決反對傻貓重執教鞭。他清楚我的性格，事事全力以赴，但時間及精神，根本不可能做到完美。傻貓不會丟下補習社的學生，但學校工作繁重，查簿、出卷、開會、備課、輔導學生，絕不輕省。

他擔心我再因壓力及休息不足，導致嚴重皮膚敏感，精神衰弱。

可是，只要重返學校，傻貓其中一層收租樓，就可以加按最少50萬。而且，穩定收入，可以提供傻貓需要的安全感。

不敢再和一哥講我的想法，他不會同意，最後只會沉默抗議。

兩性相處，傻貓從來只會努力去同意自己不同意的事情。他吸煙、喝酒、玩牛熊證，貓都從不過問或制止。人都這麼大了，想法已定型。不是別人隨口幾句，就會改變。某天，他想改，就會改。不然，多講無謂，只會影響感情。

會令他不開心的，我都不會做。可是，我真的好擔心好擔心。

小補寶：好痕呀～

Chrissie甫坐下，未拎筆記出嚟，雙手已不停亂抓。
上一堂已經怪怪哋，傻貓忍唔住輕聲問：「損晒喇，仲抓？屋企有事？」 

Chrissie微微抬頭: 「我媽咪聽晚要入醫院~」
小女孩咬著唇，強忍眼淚。😢

貓😔：「大手術？」
Chrissie微微點頭， 眼淚盈眶：「切子宮~」 
貓：「妳一定好擔心喇。 」

Chrissie: 「媽咪好驚喔～佢成日偷偷哋喊~」 
貓 ：「你哋有冇信仰？」
Chrissie搖頭。

貓：「當妳好擔心、好擔心，唔知點算時，試吓祈禱🙏啦。」
「有好多嘢，我哋都控制唔到🤷‍♀️，亦都唔知，點解會發生自己身上😟。所以，我哋會好驚😖，好擔心👉👈。咁係正常㗎，個個人都會咁😅。」
Chrissie安靜聆聽。

貓 🧐：「不過，妳知道子宮有咩用嗎？ 」
Chrissie: 「生BB。 」

貓😊 ：「Chrissie好叻喎👍👍，識咁多嘢嘅？」
「如果我哋正面d諗，媽咪已經有咁可愛嘅Chrissie, 同埋細佬，個子宮仲有冇用喔？ 」
Chrissie略見遲疑🤔，頭微晃。

貓 🙂：「咁如果媽咪冇咗個子宮，但能夠成功阻止癌細胞擴散，以後可以繼續陪Chrissie同屋企人，妳覺得點呀？ 」
Chrissie😣: 「我想以後都見到媽咪。 」

看著她耳畔頸後，一道道又深又長的抓痕，仲有咬到甩晒皮嘅嘴唇，我好心痛。
但願Chrissie媽咪手術成功，小女孩可以重現笑顏。

第一次視像教學：大成功！！ＸＤ

睇咗幾個講點用Zoom做視像教學的短片，今日膽粗粗做咗第一次網上實時授課。

實在太好玩!可以睇到學生的即時反應，唔駛學生走嚟走去，仲可以檢測同學嘅專注力。可以即時share screen, 畀同學睇返英文網上字典、中文字筆劃。
上完1日堂，即時問返家長和學生的feedback, 睇吓學生明唔明上課內容，又鍾唔鍾意網上上課。

反應好好！實在太有成功感，太興奮喇！！！
實驗成功，傻貓就聯絡返之前要求視像教學的家長。反應非常熱烈！！

原來之前是給自己的想像力嚇怕了。肯踏出第一步，原來效果也不錯。









以下這些短片，傻貓覺得非常實用：

1.

零基礎應用ZOOM全面視像教室：一次過教你虛擬背景、排程開會、互動白板、分組討論、課室管理、美顏功能

2.

超實用虛擬教室管理小貼士：專注力追蹤、會議鎖定、會議報告、簡易回應

救救教育中心？憑咩先？

剛睇到李根興講教育中心嘅video.
佢分析得好好：5大原因，令我哋進入補習寒冰期。

雖然呢間補習社老闆Trevor講嘅數據，不盡不實（佢話：補習$600/4堂，我諗係指初小收費，亦只可能係大班教學。目測佢3間課室，每間可坐最少12個學生（睇02：56），1日可以上3堂（16:00-19:00, 每堂1小時)，每日收入已達$5400.就算每班得6個學生，月入都$21600。高小、中學的學費，一定更多。仲未計星期六、日，可以全日補習。）

傻貓數學差，試吓計計：
600×12×3×(3+7×2)÷2
$600/月，每班12人，3個課室。平日每日3堂，星期六日，通常每日7堂。打個5折，佢每月營業額都達到$183600


老師月薪冇乜可能$2萬樓下，咁低人工，做私補收入仲多。佢有請part-time, 好大機會係大學生/退休教師，以時薪計，冇任何福利，所以佢做老闆，賺得更多。（當然，燈油火蠟，成本嘅嘢，佢自己一定會計清楚。）

另外，平日學生放學，先嚟補習。但停課期間，學生唔駛下午6點先嚟，正常會改早上至下午嘅時間補習。所以下午6點，正常好多學生嘅時間，停課時課室空空如也，好正常。

傻貓做嘅係超小型補習社，小班教學，每堂師生比例：1對1-4.

舖租？一毫子冇減過。絕大部分家長唔敢畀小朋友出街，部分轉搵私人上門補習。

寒冰期係慘，好慘。但有危就有機，或者試教online video lessons都唔錯。改變唔到外圍環境，咪改變自己態度咯。

反正冇學生，多咗私人時間，唔駛備課、出筆記、改卷，就做吓其他嘢：
1. 整理吓教材
2. 預備IELTS
3. 學琴+練琴
4. 做運動，減肥
5. 帶狗狗行山
6. 陪姨甥玩+做功課+練琴
7. 學煮嘢食
8. 學理財（睇blog+書+videos）
9. 學整教學videos
10. 旅行（去日本行山+踩單車）

凡事向好處著眼，人會開心d. 暴風雨總會過去，幾時冇人知，不過笑又一日，喊又一日。開心好過唔開心啦。

至於搵政府打救......求人不如求己啦。以前好多工種被淘汰，d人都冇搵政府幫手。電車被巴士取代，巴士被地鐵搶生意。整花牌、紙紮公仔、雨傘，式微啦。製造業北移上大陸，再搬埋去柬埔寨、印尼、越南。佢哋有搵政府幫手嗎？政府幫到咩？

香港行資本主義，崇尚自由經濟。呢個世界，有需求，就有供應。有學生，就有老師。有考試，就有補習社。停學唔會停一輩子。以前賺錢，有分畀人咩？咁蝕錢，憑咩開口求人幫呢？

仲有，持有效教育牌照嘅補習社，有幾多？大嘅好似遵理、現代、英皇，冇理由要人幫。中小型嘛，盤數好難計，而且蚊型補習社，冇牌，點證明你係堅嘅補習社？好多補習老師，學歷有返咁上下，補習只係兼職。冇咗呢份糧，又唔駛死嘅。計吓計吓，除咗圍爐取暖，互相安慰，有幾多真係要政府幫手？

總之，大家撐住先啦！

小補寶: 補習寒冬期

量地貓

補習寒冬期😟
為避免社區爆發武漢肺炎(新型冠狀病毒)，教育局宣佈停課、取消小六呈分試、文憑試延期，亦不鼓勵中學進行升中面試。
唔駛考試，就唔駛補習。唔駛面試，就唔駛上升中面試班。

Freelance jobs
網上找傻貓批改作文、翻譯、校對的人，也減少了。
這半個月，freelance收入，只有$290. 
（最搞笑係: 
其中一個學生，自己加價畀我，由$30 加到$50 ）


補習社
一星期仍舊返6日，但每堂只有小貓一兩隻。
（為保障學生健康，減低互相感染的機會，師生比例：1:1-2）
每日工作時間拉長了，但仍然有不少學生無故缺席，沒有提早通知。
（非常時期，算了。）


量地貓已經算幸運，本月學費仍然夠交屋租、舖租。
不過，大部分旅行社及補習社停業、整層（座？）商場，水靜河（鵝）飛。

1點？2點？6點？都係冇人

既然如此，不如休息。😜
買了來回機票，訂了首兩天住宿。
還問朋友借了旅遊書作參考。
能否成行，到時再想。😅

始終中港澳，已成為不少國家的眼中釘。
只要同機有人確診😷，大家就變成帶菌者。😫
但在港食飯、搭升降機，除下口罩，都有機會受感染。
口罩的效用，亦未必如傳聞中的厲害。
風險，幾時都有。
如果真的被拒入境，就自我隔離14日，睇吓書、做吓運動。都好。
去年年終無休，一日返幾份工，現在讓身心好好放假，也不錯。

不過剛才家長又打沉我了。

原來去完旅行，要自我隔離14天。
真的嗎？
我都係想出國行吓山，呼吸吓新鮮空氣咋喎。
要逃離負能量，仍須努力。