面試陪月問題

 新手爸媽可能都想孕婦產後，可以好好休息，所以打算請陪月，幫手照顧一下寶寶，又可讓新手媽咪偷偷師。

可是，原來預產期 9 月的話，很多陪月都早已 fully booked, 冇期喇。
而且，陪月月薪也由於各種原因，這兩年水漲船高。有些熱門陪月，已被搶至$38000/月。大部份都 $26000左右起跳。

如果真的物色了陪月員，親身面試是必須的，看看證書，面對面溝通，了解陪月員的性格、言行，是否能夠和孕婦合得來。

以下是傻貓總結上次聘用陪月的經驗，提議的面試問題，讓打算聘請陪月員的準爸媽，參考一下。

1. 可以講講你的陪月經驗嗎？有沒有特別難忘的事? 有特別有挑戰性的個案，可以分享嗎?

2. 有沒有與陪月工作相關的證書？（如催乳技巧等）有過往的僱主，提供的推薦信嗎? (要留意是否有可聯絡的方式)

3. 開刀或順產，你會預備甚麼食物，給產婦食用? 如何安排膳食餐單？
(孕婦如有食物愛好、烹調方式，需要陪月配合，亦可此時提出)

4. 藥材、買餸，係你買，憑單claim錢？還是僱主需要預先買好? 
你會當日早上預先買好食材，才來工作嗎? 工時怎樣計算? 買餸，會不會計入工作時段？
超時工作，怎樣計薪？
「買餸錢」是每天「實報實銷」還是「月結」？

5. 公眾假期、打風、紅雨黑雨，如何安排？後補工作日數？還是照支薪？可否扣減？

6. 願意手洗BB衣服嗎？

7. 懂得煲炒米茶、薑皮水？材料需要產婦自備，還是由陪月代買?

8. 期望薪金是多少？當中包括哪些工作性質？（如烹調孕婦3餐、準備補品、協助手洗BB衫等，會幫忙做一些簡單家務嗎?）

9. 除了工資，需要額外費用嗎？（如「利是」或「車馬費」）

10. 如需要取消預約，需要補償嗎？

如需要幫助「煲薑醋」、「煮雞酒」等，需要多少時間前通知及額外費用嗎？

11. 可以陪帶初生嬰兒，去健康院？並預備產婦、嬰兒，外出的用品?

12. 如果有工人/長老，他們的性格特點... 你會怎樣和他們相處？可以幫忙訓練工人，照顧初生嬰兒嗎? 有信心可以和長老保持良好關係，有效溝通？

2023 Feb 股票交易記錄

2月冇乜交易。
不過，補習社收生突然激增，多咗好多referrals. 
基本法、國安法考試合格後，代課offers也一單接一單。

期權SC: 2007 碧桂園被行駛

仍然在為之前開的期權合約埋單找數。2月份，2007 碧桂園，被人用$1.7 行駛。$6.383買入，$1.7沽出，連手續費$44.44。蝕 $46874.44. 計埋 1 月份，蝕 $32993.63. 累計這隻股票，已經蝕咗 $79868.07

分段買入 700 騰訊

9 月會有4張 700 騰訊 SC 到期，行駛價 $310。現價平倉，因為已經入晒價，加埋時間值，會蝕得好甘。近日正股股價開始向下走，我set 好價位，good till cancel, $366.8 先買入一手。(昨天$334左右，又買了2手。再跌，會再分注買入。)

濼言因為甲型流感，住了三天醫院。昨天終於回家。
不過，到表哥昨天入院。也是甲型流感。
一哥昨天接我和濼言出院後，捉咗我去睇私家醫生。
其實懷孕期間，都冇乜藥可以食。我雖然未完全康復，說話氣若游絲，但其他一切正常。睇1.5分鐘醫生，承惠$300. 又冇乜藥食，我又唔駛病假紙。感覺好嘥錢。

退出9月媽媽谷

由濼言未出世，到而家，不經不覺，這班媽咪，還有她們的小朋友，都同我、同濼言，一齊互相扶持咗近2年了。

不過，濼言今日，連續第3日，斷斷續續發高燒，今早40.4度。

我也從上星期五開始，感冒、失聲、發燒。

快測陰性，但一直未癒。

於是，我在媽媽谷，問吓有冇人，有類似經歷。我想知: BB感冒，係咪真係會連續發3日燒? 斷斷續續，燒吓唔燒吓咁。還是，他出緊2隻牙仔，所以發燒? 又或者，因為我感冒，他甫好轉，又被我傳染?

她們眾口同聲，話要去醫院。但一哥話唔駛，先觀察。昨日早上，濼言發燒，抽筋。一哥用針筒餵藥後，再塞肛退燒，成功暫時退燒。今日，濼言又翻燒，一哥提早收工，帶他去醫院睇急症。

我同媽媽谷的谷友，講咗大概情況。她們知道，一哥不想濼言留院，非常激動。還說如果濼言有事，我和一哥，都要負最大的責任。

小朋友是我們的，盡心盡力，把他照顧好，養育成人，我們當然責無旁貸。

可是，她們群情洶湧，認為我應該企硬，堅持濼言入院。這我覺得太過火了。

一哥在醫院，親身陪伴濼言，知道他的身體情況，也知道醫院的安排。他做的決定，應該最合理。

其實，最近我的產前抑鬱，已經愈來愈嚴重。我也在努力調整自己的情緒，盡量正面。媽媽谷的情況，令我有很大壓力。單單知道，一哥的老闆，因業主大幅加租，打算8月後，不再續約，關門大吉，我已經很徬徨。物業2，未找到新租客，也讓我頭疼。自己代完課，就開始感冒。失聲，仍如常上課補習，我也很辛苦。我實在無法再處理更多旁人額外的指指點點了。

一哥不想濼言留院，主要是擔心我的身體情況。我自己也生病，這幾天照顧濼言，我嚴重睡眠不足。他發燒，不斷扭計、大哭，我抱他，哼nursery, 跟他說說話，甚至埋身餵奶，他才冷靜下來，重新入睡。可是，公立醫院不會提供睡床給陪伴者，也沒有任何被鋪、食物供應。作為陪伴者，我是透明的。這對生病中的我，可能病情惡化。還有，我因唐氏綜合症的抽血結果不理想，今晚12時起，要空腹，連水都不准喝，明早去威院抽血。一哥的擔心，我理解。

雖然我很珍惜這2年，大家一齊互相分享、圍爐取暖，一齊帶BB野餐的日子，也為了濼言失去同月齡的玩伴，感到可惜。可是，聚散亦是常事。對此刻的傻貓，退出這個9月媽媽谷，應該是最合適的決定。

我唔想再in 工人姐姐了 ~>_<~

我睇完1堆履歷，視interview 完，傾埋工作細節、人工、放假安排
然後一哥話，35歲以上，唔請

年紀係一開始，喺resume已知的客觀事實
佢根本浪費我時間

今日，佢突然又話，要搵另外一些agencies
想要多些candidates選擇

睇resume的人是我，interview 的人，也是我
他根本在折磨我，加重我的工作量、心理負擔

我不想再揀再interview 任何人

我揀咗2個
1個畀人哋請咗
另一個，傾好晒，一哥先話41歲年紀太大
怕體力上，照顧唔到2個小朋友

又要人哋識煮食，唔怕貓狗

有湊小朋友、初生經驗

仲要識少少廣東話，一哥唔識英文

唔可以星期日放假

又要英文好

一哥話佢可教煮食
事實係佢工作時間長，冇時間教
1星期，放唔到1日假

我唔信生咗細B, 情況會有分別

我睇咗幾十個，揀3個interview 

揀好晒，傾好晒，佢又嫌人哋41歲太老

但年紀要young

咁經驗何來？

所以我好嬲

我感冒喉嚨痛到火燒咁

當時埋身餵奶，B咬蓮姐，我痛到喊，照interview

而家佢話因為年紀，唔考慮

根本係玩我

細B唐氏又高危

 其實我有心理準備。大B，2年前，照超聲波，頸皮正常，但睇埋我42歲，就高危，要返醫院覆檢，做T21, 照多次超聲波。

我今年44, 明白這是正常安排。

但昨天醫院在我上課期間，打咗3次電話嚟，再次聽到電話錄音，那氣急敗壞的語氣，要求我留意醫院的來電號碼，一定要聽電話。今日上課，我開咗電話聲音，以免錯失醫院來電。

可是，向學生解釋我會開電話，等醫院電話時，我突然淚崩，久不能止。

最後，我出咗課室，在走廊努力控制情緒，2分鐘左右，才再折返課室，如常上課。

我覺得自己好差，好唔專業。明知這是正常安排，仍然覺得好大超大壓力。我好辛苦。

另外，前晚視像interview了一位工人，但她昨天已被另一位僱主聘用了。

我覺得好累好無奈。努力花時間，細閱履歷表，面試，但還是請不到合心水的工人。

保姆姨姨，6月頭就移民英國。現在3月，我如果仍然想如常補習，就要盡快請人。

我好怕請工人，好怕有陌生人在家，但現實又迫我要請人。想請，又請唔到。

代課，這間學校，今日是最後一天，好多作文、聆聽integrated tasks 等我改。好忙超忙。
放學後，有2堂補習。學生下星期二考試，今日要溫晒所有嘢。另一堂，學生要考DSE, 他專攻作文，要非常費神。

我好攰好灰好辛苦，隨時都可以大哭一場。

結婚2周年快樂

 今朝搭車，我直頭冇等老公，自己上小巴

佢跑上嚟，司機肯等佢

佢上車後，抖順條氣

就講: "老婆，今日結婚周年呀"

貓: ＂吓？又要記多１個日子?😢＂

一哥: ＂哦😅，唔係，媽咪頭先同我講＇結婚周年快樂＇，我先知咋"

貓: ＂（抖一口大氣）咁都好ｄ，我今日好多嘢做，放學補習，落堂仲有好多作文、試卷要改。唔好慶祝呀＂

一哥:＂哦，放心放心，唔慶祝唔慶祝"

然後，我哋互相對望，笑咗😂😂😂

細B是妹妹

這個月忙代課、補習、網課、改freelance作文，仲有去醫院產檢、照唐氏，每星期抽1-2日，帶濼言去BB gathering, playgroups, open day. 每日回家，沖涼，秒睡。有時連睡前奶，都沒有埋身餵。不過濼言好乖，佢調整咗自己的作息時間，凌晨4點幾就叫醒我，埋身餵奶。5點幾，我起身，有時做一陣yoga, 就出門口返工。

前日，請假去威院照唐氏。部自助機唔畀我登記。排咗成個鐘隊，先知道醫院下午有位加班醫生，可以調3月中的產檢，去當日下午3點。

結果，安排10點照唐氏，但我哋9點半排隊，等到10:45，知道下午可產檢。
13:10，才到我見醫生，第一次見肚內，5 cm長的BB. 
匆匆出去食lunch, 14:00回威院，又等到16:10, 才見到本來話15:00可以見的醫生。
然後，抽咗我8筒血。驗呢樣嗰樣。

下午本來有2堂補習，仲係full house. 結果要取消1堂，損失 $250 * 7 = $1750

我真係覺得細B係倒米大蟲，本來我開始pick up 返正常生活步伐，可以代課、重新幫濼言報讀各式各樣的playgroups, 去靚靚學校試堂，揀間適合的去上pn. 而家，我又要預備多一筆資金，去預備佢讀書、醫療。而且，肚子愈來愈大，學校未必會想請大肚婆做代課。一哥都開始出聲，唔想我腹大便便，仲日做夜做。但咁樣，我的收入又會減少好多。等佢出世，一切穩定，已經係2年後啦。

醫生話，妹妹係中碼BB. 
唔知佢會唔會蝦細碼哥哥。又唔知濼言鍾唔鍾意妹妹。濼言而家好乖，喊聲很溫柔，很可愛。我不知道妹妹會怎樣。

現在開始，又出現便秘問題，每日都有食水果，都係難。
濕疹也復發了。手腳總是痕癢癢的。
肚皮脹得很快，開始有人搭車讓坐。
還開始暈車浪。

代課至這星期五，就完了。
本來有3間等緊，但都是產假代課，2至3個月。一哥話唔准。
我好唔開心。點解未生，已經咁多制肘。

一哥話而家一定要請工人，所有費用，佢負責。
今晚要視像interview. 不過，這樣真的好嗎?

物業2有租客搬出，我要去拍照，放租，帶客睇樓。有排忙。