太好喇
太子物業B, 第一手租客住咗3年，期間通常因疫情，留在內地，冇點住過。
佢最近遷出，我搵咗江師傅幫手翻新，佢求其收幾百蚊，就翻新晒。
不過，我冇時間出去帶客睇樓，個經紀又只帶過3檯客上去，一直未租出。
丟空近一個月喇。
今日聯絡幫我買樓的經紀Mark,原來佢回巢了。公司和另一間合併咗，佢而家主力睇油麻地，旺角，大角咀，深水埗。
所以，佢可以幫我跟太子個租盤。
我終於唔駛帶住大B， 陀住個西瓜咁大嘅肚，頻頻撲撲，由林村出太子，開門畀客睇樓。
其實而家經常要帶濼言，由林村出九龍塘上playgroups, 有時又過海，其實好攰。
係我自已唔生性，期權勁蝕，否則已夠首期，買物業4。
咁就可以喺太子住幾日，林村幾日咁，唔駛日日搭車，搭嚟搭去。
而家要再過1年左右，才儲夠首期吧？但一哥份工，做到8月。咁之後點呢？
細B 9月出世，又係另一個問題。
而家都唔敢接太多代課，都係做開嘅學校，主動搵我。
收入增長放緩。
接咗幾次SP,失血勁多。
最近港股回勇，乘機開咗啲covered SC.
物業2放租多月，仍未租出。聯絡咗3間放咗匙地產，才知道佢哋1間冇帶過人上去，1間話冇客搵呢類細房，另1間帶咗2次客，都嫌細，冇興趣。還價都冇。
把心一橫，自己上單位錄影、影相，upload上YouTube, Facebook 和 IG放租。第1日已經幾十個查詢，第二日都十幾個。搵地產經紀幫手帶咗1個，自己帶咗1個。出post嘅第3日，已經成功出租。
租客本身喺港島有屋企，佢搞音樂，有時好夜放工，所以夠位放床，附近有地方食嘢，交通方便，就可以。佢見到間房好新淨（上手租客搬走後，我換咗鎖、翻新過），環境清靜，好鍾意。前晚睇完，昨天早上覆咗會承租，不過我要時間預備租約。今日簽約、收2按1上。佢完全冇還價，仲好雀躍咁度尺，買傢俬。很有禮貌，聽到會打釐印，都冇異議。似乎係好客。😊
有呢2按1上，每個月有返現金流，唔駛割肉還按揭。心情好多了。
夜晚staycation，外出同媽咪慶祝，食生日飯時，有舊同事打嚟搵我幫手代課。代課日薪千七左右，勤力啲，日頭返學校教書，放學去補習，再收多啲上門補習學生，收入應該有可觀增長。
唔再搞期權，或者只做covered SC, 唔好再開long side,小心謹慎，肯定可以捱過呢個寒冬嘅。
最近物業1, 2都令我很頭疼。
物業1，樓下投訴，天花滲水。
我未知情況，暫時無從判斷嚴重程度、維修金額。
物業2，消防費用未交清，欠$8000.
租客搬出，清走傢俬，才發現牆壁嚴重滲水，油漆剝落。
這是大維修的副作用。
江師傅會幫忙處理。
物業3，原本自住，現時要搬返大埔，打算清走傢俱後，簡單翻新，再安排出租。
租盤，安排簽署租約，但業主代理人好像很忙，我們始終未落實到時間簽約。
代理人好想我哋租中層1/F，所以不斷抹黑G/F.
其實很好笑。
有花園係好事，而且只比中層貴$1000, 但有寛頻、固網電話，搬傢俬都不用加錢。搬鋼琴也不用吊上去由露台入屋。
不過，樓下租樓，附送4歲放養貓1隻。
代理人不喜歡牠。我和一哥沒所謂。到時再算。
最近有個租客，激到我忍唔住，要搵師傅，cut 水、電錶。
冇錯，就係之前，唔准人喺走廊食煙，仲不斷洗我版、夜晚晚又好，晨早流流都好，都電話攻勢，要我制止人食煙嗰位。
傳送門:
我咳，所有人唔准食煙
佢亦都係，因為架𨋢嘅9字壞咗，要喺10樓，或者11樓行落嚟，所以要求我畀錢佢住酒店，嗰個租客。
佢之前拖租，長達 2 個月。我好少check 戶口，所以冇留意。到我提佢，佢話連埋下個月租金一齊交。幾千蚊，算了。於是，佢好似習慣咗，從來冇試過，準時交租。每次都遲、遲、遲。少則遲 7 日，多則遲成個月。然後，該月租金，又再遲多個月先交。
咁都算喇。我睇返記錄，搞錯呀!! 原來佢一直冇交過水、電費。我從來冇收多租客一毫子。之前，電費減免，我都有退返錢畀租客。大家早排手停口停，搵食艱難，我仲減咗佢哋嗰2個月嘅租金。但係，咩料呀?? 佢住咗半年，一毫子水、電費，都冇交過咯!!
今次，我預先提佢要準時交租，而且記得要交水、電費。佢已讀不回。
本來應該 9 號交租，11號，我再問佢。佢話自己喺大嶼山工作，要遲 2 日，才可以交租。
呢吓，我真係著著哋。有冇搞錯!! 喺離島工作咋，又唔係火星。你有部手機，㩒幾個掣，已經可以轉數快過數。離島亦有櫃員機。我諗唔通: 喺離島工作，同遲交租嘅關係。
於是，我覆佢:
"你一早知道自己的工作時間表、地點。
以後不用告訴我，因在離島工作，而遲交租。
由下個月開始，每次遲交租，即使只遲1天，我都會記錄。
1年死約後，會重新釐定租金。"
佢只係答: "已知悉"
拖欠咗 7 日後，佢答應第 2 天會交租。
結果? 夜晚 9 點，我仲未見有數入落戶口。忍唔住，就問佢駛唔駛提早完約。
其實我另外有山友，想搵租盤，而我嘅前學生租客，又畀大姑媽趕咗出嚟，佢自己又唔想同爸爸、繼母一家同住，所以都想搬過嚟。
然後，呢個租客，又話推 28 號，先交到租。佢之前話自己打 3 份工，1份正職，2 份兼職。而家就話因為freelance遲出糧，又話阿媽要做手術、畀顧問費，所以冇錢交租。
佢欠嘅租金，唔係大額數字，但對傻貓呢啲冇正職嘅小蕃薯嚟講，佢嘅租金，係供唔供得起樓嘅關鍵。我唔介意低過市價，出租單位，但係你唔好搞到我冇錢供樓。我銀行戶口，長期吊鹽水，現金流一斷，供樓就出問題。到時影響信貸評級，就大鑊。另外，我呢個月，仲要交AIA嘅年金寶年繳保金，大拿拿 USD $7222.25. 真係好手緊。(當然，因為我一早將錢，搬晒去IB. 實在未試過有租客欠租咁嚴重，而家就畀佢，搞到我咁頻撲。)
我收起晒自己嘅同理心、同情心。呢個租客，實在太麻煩，而且次次講嘢都唔算數，冇口齒。所以今次決定畀小小教訓佢: cut 佢水、電。既然佢都話喺離島工作，唔喺屋企，咁冇水冇電，應該冇所謂啦。
老實講，其實我都係博一鋪。執達吏，唔係咁易請得郁。等得法庭嘅命令，分分鐘已經係半年後。到時租約都完咗啦。但係，呢招又work 喎。佢真係肯喺最後限期當日，交返租金。
遇上感性人，絕對是不幸。他們不但擅長浪費自己人生，也喜歡謀殺別人的時間。然而，他們卻總是一臉無辜，好像所有事情，都是逼不得已，自己也是受害人的樣子。
事情是這樣的：
有谷友私訊我，問有冇房出租，佢個friend想租。租金$4000左右，有基本傢電。剛好空姐租客話想月底搬走，咁我就聯絡佢個friend.
我首先whatsapp佢: 大廈大堂、屋外走廊、大閘、間studio的多張照片，連地址都用google map 標註好，路癡都知大廈位置。亦講清楚: 租金$4500.
佢睇完，話想租。然後，站在單位外的走廊，娓娓道來佢嘅處境有幾慘: 搵唔到長工，而家做幾份兼職、帶住個女，好想有自己嘅地方，唔想同屋企人住。😢
老實講，呢招對我其實唔work. 有上過Anthony嘅買樓班，你都知用情感打動賣家，就有機會成功壓價。
作為業主，我只係想知道: 租客有冇能力交租，可唔可以準時交租。仲有，租客嘅性格，係咪容易相處。我唔係好識同人溝通，太麻煩嘅租客，我搞唔掂。
我簡單講: "呢間studio咁細，只可以單人住。你有小朋友，未必適合喎。"
佢好溫柔: "但呢間屋，我好鍾意呀。係細咗d, 但太大，租金又會貴，我驚負擔唔到。如果你肯減租，我即租。"
咁空姐話月尾搬走，我都唔想丟空嘅。反正慳返經紀佣金，直接便宜畀佢啦。
我: "原本$4500, 而家$4200, 唔會再減。你自己考慮吓先啦。呢間齊傢電，樓下同本層，都有大閘，24小時保安，你又慳返經紀佣金，應該都唔係咁易搵到呢個價錢的呢類租盤。你諗好，真係想租，先whatsapp 我啦。"
然後，我走咗唔夠半個鐘，佢就whatsapp我，要求再減價。
我當然唔想減。不過，因為係谷友嘅朋友，咁是但啦。每個月，比我的底價，低$200, 整間屋所收的租金，剛好夠供樓。錢，就冇得賺咁多啦。不過，當幫朋友啦。
你冇睇錯!
佢本來話唔駛睇樓，可以即時搬入嚟共居。
然後，喺約好睇樓，仲話ok就即晚搬入嚟嘅大前提下，突然好似小朋友玩泥沙咁，推翻所有嘢。
小姐，冇人迫你搬走，你同屋企人住，咪好地地咯。
而家係你想搵屋搬，討價還價都正常mode, 但傾好晒，又反口。
你未搵到長工，呢樣唔係一早知道咩?
你之前答我: "我而家有幾份兼職，仲會去聯合醫院做病房護理，一定可以準時交租。"
你知道自己想點嗎?
你話：“間studio太細，驚個女冇位做功課。”
我講咗間studio係畀單身租客。你有個女，唔適合。
你之前答我: "個女跟爸爸住，放假先接嚟呢度。”
你係咪人格分裂、思覺失調？
我只係畀個👌，冇再回應佢。
估唔到，佢仲話: 唔知道租樓要簽約，以為退租，可以 1 日前通知。
小姐小姐，我一早講咗: 租金，須一按一上，按金不可代替租金。
老實講，大部份租盤，都收兩按一上。我見大家呢 1 年，生活艱難，你仲係我谷友個friend, 只要求一按一上。
租約，一年死約，一年生約。一開始已經講得好清楚。
你係扮唔知，還是真正失憶?
唉~~~
遇上這類唔知自己想點，又想搬，又唔想搬；又話租，又話唔租嘅睇樓客，超無奈。
本來，我可以開開心心去行蟾蜍石，同Rebecca+Muimui🐕出身汗，解吓凍。
不過，過去了。算數。
提早發現睇樓客是感性人，都係好事，可以趨吉避凶。否則，日後住落，可能仲煩喔。😄
又係租客Anne. (上文: 我咳，所有人唔准食煙)
凌晨1點半，佢整段千字文嚟。大意係韓國妹個friend,又食煙。
大佬呀！佢都識講:人哋出咗去單位外嘅走廊，仲出去玻璃門外面，先食煙。
攞晒彩啦，仲要趕盡殺絕?
呢個世界，你話晒事?
你唔同意，冇問題。
如果你認為自己有能力，改變到全世界，你可以試吓。
我以前同Anne一樣，我覺得係咁就係咁。
做訓導時，有我講，冇人講。教書時，"我講嘢，你收聲"。
但呢個世界唔係咁運作。人與人之間，往往唔係"你贏，我輸"，而係要諗盡辦法，搵出共同利益，達致雙贏。你睇Snowflake點解咁勁，做二房東都咁多人buy?點解ROKU又升到癲?因為佢哋知道客戶嘅要求，又有足夠bargaining power, 搵唔同嘅供應商，提供一站式服務。
如果個個都聲大夾惡，乜都投訴，就可以隨心所欲，咁呢個世界都幾恐怖。
我以前信奉: 以理服人，總之道理喺我嗰邊，我一定力撐到底。
離婚前，東尼成日講: "你講嘅永遠有道理，我唔夠你講"。
係呀，我哋咁多年都冇鬧交。因為未開始傾，已經close file.
結果? 佢乜都唔講，有嘢想講，就搵Carol講。諗返轉頭，就算唔係Carol,都可以係任何人。揀Carol, 可能只因佢夠就手。
故事教訓我哋: 面對呢類自以為是嘅人，講道理，冇用。
最好做法: 陽奉陰違。然後，飛起佢，唔同佢玩。
佢可能到死，都未知點解自己會衰咗。
補習，得我講，咁學生不如自學?
有唔識，先要嚟學。肯問，代表佢肯學。乜都唔問，通常因為唔知自己有咩唔明，仲大鑊。
所以我成日講: "有錯好正常，識晒駛鬼嚟補習?返去打機、瞓覺啦～"
"唔明就要問，你畀咗錢㗎。我教咗，你唔識，係我教得唔好。
你肯畀錢、畀時間、肯問問題，即係你肯學。你肯學，一定有進步。
教學相長，你問得好，我都學到嘢㗎"
講返呢單嘢。
Anne係好硬朗嘅女人，離婚、有個女。可能佢習慣一言堂，唔接受"no"做答案。
佢嘅投訴，我轉達咗畀韓國妹。佢個friend 都好合作，行遠咗先食煙。
Anne仍然唔滿意。我睇返控煙辦網頁，中英文版本唔同。中文講明: 公眾室內範圍唔可以食煙，但英文冇寫明"室內"。
管理員話走廊應該可以食煙；打去管理公司，佢哋話唔清楚可唔可以喺走廊食煙，因為走廊係開放式空間。
打去控煙辦，每次都轉咗去1823，聽5分鐘音樂後，就自動cut線。
現階段，我呢個業主，都冇咩可以做。
如果佢要投訴，隨便啦; 如果想搬走，佢又未完約; 如果想續租，就唔好喇。我唔鍾意凌晨畀人嘈醒，都唔想再收千字文。
晨早流流，收到租客Anne一連串訊息。
上次佢話架𨋢個掣壞咗，出唔到𨋢，要行1-2層樓，先返到屋企。跟住話要去酒店暫住，叫我畀酒店錢。今次又唔知咩事~😥
佢: "喂，妳去叫韓國妹個friend,唔好再喺走廊食煙喇。我唔鍾意食二手煙。冬天咁凍，我會開窗。開窗就吸二手煙。叫佢入房食啦。唔該晒"
"如果要我閂窗，開冷氣，咁對我好唔公平咯"
"我係咪要整張告示喺走廊，提醒所有人: 唔准食煙?"
傻貓食緊早餐，簡單回應: "走廊是公眾範圍喎。可貼。"
佢:"咁唔該你提醒韓國妹。唔該。"
本來我可以畀個👌符號佢，故事謝幕。
不過我衰坦白。
"正如前述，那是公眾範圍。我冇權制止其他人，敬希諒解。"
"走廊是開放式地方，不是後樓梯、電梯大堂、密閉空間高達5成的公眾地方。並不符合政府控煙辦的禁煙範圍標準。"
"韓國妹是有教養、合理的人，妳可以有禮而直接，表達你的想法。"
"她極少用whatsapp, 我平日也不會騷擾租客。如果要等她看到我的訊息，再等她去提醒那位並非居住這裡的朋友，需要的時間可能比你想像的長，效果也不會這麼好。"
佢睇完勁嬲。
佢:"我冇時間去處理呢件事。我同佢冇講過嘢，招呼都冇打過，唔想同佢嘈。"
我有點疑惑: "街坊打招呼，係平常事。遠親不如近鄰。"
"如果你真係唔鍾意食二手煙，而對方又有權在公眾地方吸煙，唯一方法是好聲好氣求人。"
佢:"我好心提提你: 你係業主，呢個係你嘅責任。"
我:"如果事件發生在屋內，我當然會處理。我買嘅係個單位，但唔包括外面嘅走廊。"
佢超火滾: "我有健康問題。總之，佢哋唔可以喺走廊食煙。我聞到煙味，會咳。瞓緊都會咳醒。"
我:"旁邊另一個單位，據我所知，都有位租客食煙。業主知情，亦因此要求我哋晾衫時，要預留空間畀佢嘅租客食煙。"
佢:"如果係咁，我係咪要直接同那位業主講? 叫佢唔好畀租客食煙?"
我唔係好習慣同情緒咁激動，講嘢咁大聲嘅人講嘢。只好重覆立場、論點，並承諾會轉達佢嘅素求，畀韓國妹知道。
佢只係話: "我唔想聽"
同韓國妹溝通時，佢問: "Anne點樣控制外面嘅人同事?"
"如果我嘅朋友，喺屋內食煙，煙味唔係更加濃郁咩? 仲可能火警喎。"
"我哋當日決定共住一室，就應該預咗要忍受某些自己未必喜歡嘅情況。
點解個個都想控制所有人、所有事，而唔係諗辦法去接受，或者改變自己?"
"非常抱歉，可能我講嘅嘢，比較霸道"
嗯~
三個女人，一個墟。
一間屋，住咗三個女人，真係好煩。
每個都好有性格，我行我素，誰也不讓誰。
如果重頭嚟過，我結唔成婚，又辭咗職，冇錢供樓，仲會唔會劏一間畀自己住，再出租另外兩間房?
不過，如果當日唔劏，呢層樓應該已經畀銀行收返，做咗銀主盤。
今日，星期五，我每星期最期待的行山日。
Rebecca, 阿昌都遷就我，放慢腳步，影吓風景相。鳳凰山好多芒草，而且人少，好relaxing. 2星期前，行大東山，周圍都係人，我性格內向，好唔慣，連相都唔想影。
Muimui 16歲喇，上斜依舊冇難度，不時回頭搵奴隸獸，側起個頭，思考奴隸點解愈行愈慢?
回到現實世界，租客A話要報警，有收數佬上門。
聯絡欠債的租客Mary,她話忙，唔得閒。又話錢唔係佢借，係佢朋友借。
佢有交租，雖然$4000, 只交了$3500. 水電費一直拖欠。
租約2022年6月30才完結。她會搬走嗎?
會不會最後搞到其他租客搬走?
Mary話欠$2萬，我想幫佢還咗就算。一哥話唔好，今次2萬，下次唔知。而且，好多封財仔、銀行信，都係important, urgent. 問題未必係佢講得咁簡單。
Mary頭2年，係好租客。航空業今年難捱，希望Mary捱得過。
作為業主，我可以點?應該點做?
之前已經減咗佢租，減免咗佢電費。咁佢都搞唔掂，又影響到其他租客，我除咗擔心，仲可以點?
上文 收租貓: 舊樓的驗樓令、驗窗令 Part I 講到，傻貓收到屋宇署嘅驗樓令、驗窗令。
驚魂甫定，貓靜下心來，想起全幢大廈，都有這個情況。遠親不及近鄰，就WhatsApp問吓以前做工程公司的退休鄰居，點樣處理。
佢話已經處理好晒。驗窗$1500,驗樓$3000.
嘩！😃 平好多呀！
可惜，驗窗嘅係佢好朋友，唔肯搭車嚟幫手。
驗樓，卓X公司之前報價$6000. 而家便宜一半。原來，鄰居認識呢間公司嘅老細----楊先生。難怪，傻貓之前打N多電話，問咁多間公司，都攞唔到呢個荀價。呢間公司，規模仲要唔細𠻹。
呢間公司，最好嘅地方係: 收費清晰。 佢講明勘察、寫報告，共$3000. 如果要修茸及事後檢驗，加$800.
但我去邊搵人齋驗窗呢？佢聽傻貓把聲，以為係細路女。經不起苦苦央求，最後好心介紹個師傅畀我。
貓即時聯絡。但原來師傅唔係好識用WhatsApp. 最後，電話傾好，約好時間，驗完，$280, 搞掂。
P.S.
有做則師的網友，提醒：
整座大厦嘅大維修，而物業係長者名下，可以伸請資助。但物業1係傻貓全資持有，只好花$3280, 自費驗樓驗窗了。
https://brplatform.org.hk/tc/subsidy-and-assistance/integrated-building-rehabilitation-assistance-scheme/schemes-for-individual-owners/home-renovation-interest-free-loan
順帶一提，如果大厦要維修或更換電梯，可以申請：
https://brplatform.org.hk/tc/subsidy-and-assistance/limss
今日在Facebook, 見到有人問起清拆僭建物。傻貓的物業1, 和這位網友情況相近。
記得呢篇 “傻貓買樓記：210呎蝸居裝修分享”嗎？直到收到屋宇署嘅信，又聽咗裝修公司嘅解說，我才知道：整個睡房，都係僭建嘅😥，前身原來係露台。
傻貓見到好幾位熱心嘅留言者，以親身經歷、建築物條例，畀建議。都話一定要清拆，跟原本的則去還原。有個甚至講明，上訴都冇用，最後都要拆、拆、拆。
剛好，幾個月前，我也收到政府文件，大字標題: "強制驗樓計劃通知不獲遵從"。劇透一下，完全唔駛清拆。借此機會，分享一下經驗。
老實說，一收到這份文件時，傻貓完全 嚇 傻 了。😨
由始至終，我都沒有收過關於 "強制驗樓計劃"的通知，一收到，就已經是粉紅色警告信，中英對照，內文還列明罰則: "第五級罰款 ($50,000)及監禁一年"。它還寫: "近期所有有關此罪行的法庭個案已被定罪，並有個案業主曾被法庭罰款超過$31,000" 😱😱😱
傻貓以前讀書，是品學兼優的好學生 (我講小學😜)。收到這份文件，簡直是晴天霹靂。😰另外，傻貓同時收到驗窗令。所以打算一併處理。
不過，點解無端端要驗樓?
樓齡30年以上
自2012年起，屋宇署便實施「強制驗樓」及「強制驗窗」計劃。
驗樓
如果樓齡30年或以上，就需要每10年聘請合資格的專業人士驗樓一次。
驗窗
樓齡達10年或以上，便需要每5年聘請合資格的專業人士驗窗一次，以證明樓宇符合安全標準。
屋宇署每年會揀選2,000幢樓宇，同時進行強制驗樓計劃及強制驗窗計劃，另外揀選3,800幢樓宇，只進行強制驗窗計劃。
傻貓的物業1, 就是被選中的目標物。
減少意外
樓宇老舊，如果「墜窗」、石屎剝落，有機會傷及途人，甚至害死人。
不錯，政府 (除咗稅局) 做事，一向冇乜效率，屋宇署的檢控數字嚴重偏低，「不遵從比率」相當高 (截至2018年底，已逾期的強制驗樓通知書多達27,873張，但屋宇署只提出檢控139宗；而已逾期的強制驗窗通知書亦多達47,968張，只發出3,746張定額罸款通知書及提出41宗檢控。)
但了解咗前因後果，傻貓唔敢再抱僥倖心理，當下馬上嘗試找人介紹公司驗樓。
可惜，身邊擁有物業的朋友不多，而有樓在手的，都很少買這類舊樓。徬徨無助，只好上網找公司驗樓。同時，在信箱，有好幾張驗樓、驗窗的宣傳單張。估計是裝修工程公司，在屋宇署的網頁，找到資料。
驗窗
曾師傅
傻貓首先聯絡江師傅介紹的朋友----曾師傅，他只做驗窗，不能驗樓。他收到訊息，第二天就馬上上門報價。
他逐個鋁窗，仔細檢查。結論: 窗都完好無缺，只是部份鉚釘已生锈，需要更換。他報價: $2500. 隨時可上門維修。傻貓馬上填好委託書。不過，一哥出言制止: "這價錢太貴了吧? 樓下的街招，寫明驗窗包pass, 只收$2000." 曾師傅表明沒有議價空間，傻貓不敢逆一哥意，只好說要再考慮一下。
卓X工程顧問及裝修公司
宣傳單張那些公司。它們的公司地址，都在物業1附近，可能價格較合理。
大部份報價$3000 至 $4500. 有一間卻特別優惠: $600 驗窗全包, 包pass. 而且似乎有豐富經驗。
以下是我們的WhatsApp 對話:
貓: "我想安排驗窗，樓宇在XX街，XX樓，請問價錢？" (附上曾師傅拍攝的鋁窗照片)
凌晨12點幾
卓生覆: "呀，唔好意思，咁夜先覆你電話。
XX樓呢，即係XX街嗰度呢，做開架喇。
咁驗樓都做。咁驗窗呢，我唔知你意思係乜嘢啦。
係咪你隻窗，開唔到。嗯，如果開唔到隻鉸呢，咁就可能要整嘢。
但係如果你開到90度角呢，通常一般呢，你幢樓做開呢，都係$600左右，包你pass.
但係如果你隻窗個鉸有問題呢，我要搵個師傅幫你跟跟呀。
因為我只係驗窗，咁如果要整鉸呢，我要同師傅夾一夾，佢要收幾錢。
因為如果你過幾多隻呢，盡可能，如果你係90度角呢，都唔駛要咩喇，就...... $600啦, 吓。
咁你睇吓點樣啦，唔該你。"
第二天早上8點
貓:"唔係喎，隻窗冇壞喎，係屋宇署有個驗窗令丫嘛。
應該只需要換鉚釘，所有膠邊冇問題，唔駛整。"
下午6點
卓生: "嗯，我唔知你點稱呼呀小姐。
咁如果唔整由佢啦，幾百蚊。
因為我畀個師傅都千幾蚊喇。
係嘛…咁呢d好閒嘅嘢嚟架啫。我哋XX公司，響你幢樓，都唔知做幾多啦。
你問吓街坊，吓。唔講咁多嘢喇。拜拜。"
貓聽到佢發緊脾氣，但點解呢?
算了。但佢只係報咗驗窗，咁又問埋佢，有冇驗樓。
貓: "唔好意思，我剛睇返封信，原來係要驗窗+驗樓。請問收費係點計？"
佢又係凌晨回覆: "對不起，大家有誤會。
驗窗公司做全包$600元包Pass." (附大量照片: 合約、客戶簽單、檢驗報告)
卓生一輪咀咁講: "嗯，或者大家有誤會啦吓。
驗樓嗰度呢，你個單位，我最近上一次呢，上個月呢，蔡生就驗過個外牆嘅。
其實點解要驗樓呢? 因為XX 樓呢，原本的露台呢，就唔係住宅部份。
但50幾年前呢，d人就僭建呀。
咁就變咗呢，政府而家就唔拆你，但係呢，要你驗樓，證明結構安全。
咁驗樓呢，就要寫報告，仲要一定係則師、土木工程師、測計師寫，要專業人士。
咁所以做一份report 呢，要$6000.
因為點解呀，而家你罰款呢，要$30000 幾蚊喇。
咁如果做一份詳盡嘅report呢，係要則師同你簽名，做晒report, 再submit 畀屋宇署。
則師簽呢，就肯定冇問題啦。
$6000, 好小事嘅。
但如果佢拉你判監、罰錢呢?
咁你諗吓: 錢就身外物啦，但係坐監，個個都怕坐監啦。
咁所以$6000呢，係我...... 畀費用則師樓，同監管佢。
我收$1000服務費左右啦。咁則師樓收$5000左右。
有咩事呢，責任就唔關你事，係我負責。
則師大家合作好多年喇。咁我唔講邊個啦。
我都有私隱，係咪?咁人哋做開，妥當咪得咯。
佢都成10年牌咯。以前則師，大維修、起樓，乜都做啦。
咁你諗吓啦。你盡快決定啦。
驗窗就好快，1個鐘左右。但係驗樓呢，要寫report, 你預一個禮拜，先畀得到你。
但係如果佢幫你呢，基本上，政府好惡嘛，林小姐就特別惡啦。你都知啦。
你盡快決定啦。我可以後日，搵測計師行，幫你搞呢樣嘢。唔該。"
驗樓，$6000. 老實說，傻貓唔清楚市價。唔敢講貴定平。
不過，佢講咁多嘢，去justify $6000係合理收費。呢樣，我好有保留，決定搵多幾間，格吓價。幾個鐘後，卓生再留言:
"如果小姐，驗窗呢，慢慢都唔緊要。驗樓呢，你要快快脆做決定喇，要畀邊個做喇。
因為呢，罰錢都唔緊要。坐監，麻煩呀。咁如果有咩要幫手就出聲啦。係咁。拜拜。"
隔一陣，就打幾次電話嚟。我上緊堂，冇聽電話。
（又試吓寫呢d,畀人話/鬧，就唔再寫呢類嘢。要delete,都係㩒個掣就ok.）
唉!
間房得100呎，個窗對正戶外走廊，外面仲有度鐵閘。
真係好難出租!😔
已經包差餉地租管理費寬頻。
提供電器: 雪櫃、電視、微波爐、冷氣機、熱水爐、電熱水爐、電熱水壼、煮食爐。
仲有傢俱: 床、床褥、組合櫃、廚櫃、摺枱
層樓分半鐘到地鐵站，24小時保安，樓下有餐廳，轉個彎有超市，過條馬路有運動場。
放咗畀3間地產，成個星期都未有人睇。係1個客都冇。😭
現時冇晒自由行、旅客絕跡，好多賓館, 都將房間，改建成劏房。租金低至$3500, 仲包執房、洗衣乾衣服務。
屯門、青衣區的酒店，月租$3500起，視乎房間景觀、大小、層數。同樣有執房、洗衣乾衣服務。
仲有無數工廈，已改建出租，作住宅用途。同樣冇人規管，冇人巡查。
以下是隨手在28hse找的租盤，還有大量在Square foot, Facebook.
（見到工廈新裝修、景靚、價平、交通便利、連傢電、華麗大堂，我都想租住。
不過一哥唔肯，佢話犯法。佢認為，劏房係灰色地帶，政府打算規管，即係默認劏房可以存在。但係工廈，冇得傾。
我就認為：無人執法，有等於無。）
仲有，學校採用視像教學，內地生回流內地。大量空置共享單位湧現。
近年，各社福機構，亦提供大量共享空間，供年青人居住。
仲未計有好多公屋的所謂暗盤，在Facebook 及其他搵樓網站、 地產舖，明買明賣。
劏房，真係好難搵客。😣
傻貓畀完新居的乜費物費, 仲有重新駁電的額外駛費，超窮!😟
成個戶口，得HKD $29193.
過幾日, 畀埋$29000裝修費，乾塘。😢
把心一橫。💪
大前日, 花$300, 在28hse登廣告，再在Facebook各大租盤pages +Expat groups+ Marketplace, 狂登免費廣告。
登完, 即日有10幾個人聯絡我。第二日, 有20幾個人。
但係一聽到間studio的缺陷: 採光度不足, 唔可以開大個窗, 就已讀不回, 或者話要考慮吓。
昨日, 有1個客成功約睇。
今日, 有6個睇樓。我怕煩，搵咗經紀Mark幫我跟。
有一個把聲好斯文，單親媽咪，英文幾好。人好爽朗。
上上手租客係外藉英國教師，上手係內地生，個個都住半年，就返屋企。
今次這位, 都有兼職教英文。
希望她和我的空姐、韓國妹租客，相處融洽。
我減咗少少租,只收一按一上, 租咗畀佢喇。😊
免咗租客佣，我只須畀佣Mark, 就搞掂晒。
一天都光晒喇。
------------------------------------------------------------------------------------------------------------------
P.S.先旨聲明:
傻貓絕對唔係鼓勵人整劏房，不過，大家亦唔需要一聽到劏房，就話一定犯法。
其實，有好多劏房，係合法嘅。如果想了解點樣合法整劏房，可參考這篇文章：
