我咳，所有人唔准食煙

晨早流流，收到租客Anne一連串訊息。

上次佢話架𨋢個掣壞咗，出唔到𨋢，要行1-2層樓，先返到屋企。跟住話要去酒店暫住，叫我畀酒店錢。今次又唔知咩事~😥

佢: "喂，妳去叫韓國妹個friend,唔好再喺走廊食煙喇。我唔鍾意食二手煙。冬天咁凍，我會開窗。開窗就吸二手煙。叫佢入房食啦。唔該晒"

"如果要我閂窗，開冷氣，咁對我好唔公平咯"

"我係咪要整張告示喺走廊，提醒所有人: 唔准食煙?"

傻貓食緊早餐，簡單回應: "走廊是公眾範圍喎。可貼。"

佢:"咁唔該你提醒韓國妹。唔該。"

本來我可以畀個👌符號佢，故事謝幕。

不過我衰坦白。

"正如前述，那是公眾範圍。我冇權制止其他人，敬希諒解。"

"走廊是開放式地方，不是後樓梯、電梯大堂、密閉空間高達5成的公眾地方。並不符合政府控煙辦的禁煙範圍標準。"

"韓國妹是有教養、合理的人，妳可以有禮而直接，表達你的想法。"

"她極少用whatsapp, 我平日也不會騷擾租客。如果要等她看到我的訊息，再等她去提醒那位並非居住這裡的朋友，需要的時間可能比你想像的長，效果也不會這麼好。"

佢睇完勁嬲。

佢:"我冇時間去處理呢件事。我同佢冇講過嘢，招呼都冇打過，唔想同佢嘈。"

我有點疑惑: "街坊打招呼，係平常事。遠親不如近鄰。"

"如果你真係唔鍾意食二手煙，而對方又有權在公眾地方吸煙，唯一方法是好聲好氣求人。"

佢:"我好心提提你: 你係業主，呢個係你嘅責任。"

我:"如果事件發生在屋內，我當然會處理。我買嘅係個單位，但唔包括外面嘅走廊。"

佢超火滾: "我有健康問題。總之，佢哋唔可以喺走廊食煙。我聞到煙味，會咳。瞓緊都會咳醒。"

我:"旁邊另一個單位，據我所知，都有位租客食煙。業主知情，亦因此要求我哋晾衫時，要預留空間畀佢嘅租客食煙。"

佢:"如果係咁，我係咪要直接同那位業主講? 叫佢唔好畀租客食煙?"

我唔係好習慣同情緒咁激動，講嘢咁大聲嘅人講嘢。只好重覆立場、論點，並承諾會轉達佢嘅素求，畀韓國妹知道。

佢只係話: "我唔想聽"

同韓國妹溝通時，佢問: "Anne點樣控制外面嘅人同事?"

"如果我嘅朋友，喺屋內食煙，煙味唔係更加濃郁咩? 仲可能火警喎。"

"我哋當日決定共住一室，就應該預咗要忍受某些自己未必喜歡嘅情況。

點解個個都想控制所有人、所有事，而唔係諗辦法去接受，或者改變自己?"

"非常抱歉，可能我講嘅嘢，比較霸道"

嗯~

三個女人，一個墟。

一間屋，住咗三個女人，真係好煩。

每個都好有性格，我行我素，誰也不讓誰。

如果重頭嚟過，我結唔成婚，又辭咗職，冇錢供樓，仲會唔會劏一間畀自己住，再出租另外兩間房?

不過，如果當日唔劏，呢層樓應該已經畀銀行收返，做咗銀主盤。