Wednesday, December 23, 2020

傻貓看通識


港大通識

記得讀U時,我哋最鍾意笑中大人: 點解通識要必修? 因為佢哋通通唔識。

我哋港大人,通識係唔計分嘅,鍾意聽talk,及早留位。手快有,手慢冇。好多時,上堂嘅時間都係晚上7點左右,不過,往往坐無虛席。講者粒粒皆星,我呢d 住hall 嘅,落堂補完習,就返campus聽talk, 聽完就落水街或者均益食宵。好充實。

具體聽咗乜、學咗乜?唔記得。不過,通識,真係好有趣,畀到好多insight, 令我發現呢個世界好大,叻人好多,有好多有趣嘅想法、做法。


高中通識

傻貓本身讀修女學校,成日都要我哋做淑女。後來轉咗去另一間女校,學校好liberal, 我哋好自由,拎住張地蓆,行到邊坐到邊。老師都係,著短褲、牛仔褲、涼鞋。我哋尊唔尊重個老師,唔係睇佢讀幾多書,或者著咩衫,而係佢哋有冇料到,備課夠唔夠,講嘢我哋明唔明,有冇用心去教我哋。

我校係少數在高中有得選修通識嘅。知道呢科冇教科書,上堂模式係傾吓偈,做吓projects, 我馬上揀咗。

記得當時,我哋有兩位老師教通識: 一個教環境教育,另一個教香港研究。

每一堂,我哋都要分組,睇好多份報紙,了解唔同報章,用咩方式去報導,嘗試還原事實真相,明白報社各有立場、目的。如果我哋齋睇一份報紙,或者抗拒睇某些報紙,最後只會令自己損失知道真相的機會。

好多時,政策未推出,文匯報已經做晒專題報導。而蘋果、東方,同樣著眼民生,但政治立場近乎相反。還有成報、新報、商報、經濟日報、信報,它們的社論,見解獨到。明報、星島日報,做功課的最佳材料,但是時事新聞描述得相當刻板,很多時候,就像讀政府新聞稿。

我嘅通識科老師,非常用心教導。記得當時住宅物業炒風旺盛,兩位老師特地帶我哋去元朗,實地考察嘉湖山莊、錦鏽花園、加州花園。傻貓住公屋,當時第一次親眼見到,香港原來有咁大嘅獨立屋!!! 非常震憾。那次的功課,題目很簡單,也很不簡單: "考察後有感"。我一字一句,記下了那刻的震憾感覺,還有對香港的貧富懸殊問題的疑惑、土地運用的迷思、高地價政策的利弊。那份功課,拿了A. 

後來,我哋去灣仔實地考察。可是,我們長大了,不再有老師專人serve, 還要train 學妹。為了讓學妹了解保育香港的傳統建築物,以及土地發展,兩者不可避免的衝突,我們不時開會,預備了大量教材、工作紙,帶著學妹在石水渠街、太原街、文武廟、灣仔街市,到處穿梳。每一條街道,由它的名字由來,到香港的發展,我們在帶學妹orienteering時,了解得更深刻。

最深刻嘅,係F.7時,老師為了讓我們了解垃圾的處理方法,帶我們實地考察澳門的焚化爐,還整晚跟著垃圾車,逐街逐巷收垃圾。我哋去培正中學參觀時,仲對澳門學生嘅愛國心,對中國完全信賴,驚訝不已。


必修通識

後來,教育局想將通識科,納入學校做必修科目。聽說,我的中學老師,出了很多力。老師非常希望香港的年青人,都有批判思考的能力,而不是人云亦云。他認為如果每個人,都只像一枚小螺絲,各就各位,但不肯think out of the box, 這個社會,只會是一池死水,沒有創意,沒有將來。而且,通識科強調終身學習、解難能力、合作精神。這些,全部都是立足社會,必須的生存技巧。

最後,通識真的成為了必修科。可是,老師不高興了。

他只是單純希望通識成為必修科,但沒想過要評分。他認為通識只有合格、不合格之分。而合不合格,只視乎學生的努力程度。

現實是: 坊間湧現很多天書,學生補習通識。通識科無論如何改動,最後還是淪為另一科背誦科。


傻貓教通識

傻貓曾經想轉型,喺中大讀咗個通識教育教學碩士學位。可惜,學校太多老師被殺科。通識教席,優先請返畀被殺科嘅老師。副校經不起我再三請求,畀咗1班初中通識我兼教。初中的通識堂,說穿了,就是賽馬會資助的“共創成長路”課程。同學上堂,玩吓遊戲、小組討論、匯報、角色扮演,輕輕鬆鬆,學吓人際關係、身份認同、情緒控制。馬會好有錢,每堂派1個教學助理,預早印好筆記,買定一大堆禮物,獎勵積極參與嘅同學。

傻貓離開該校後,只教英文,與通識無緣。


通識變質

然後,出現了國民教育,社會齊聲反對。

再然後,出現雨傘運動、反修例運動。政府開始擔憂學生的批判思考,影響社會穩定。

通識科成為政府的眼中釘。

通識科的教科書,要送審;通識科的課程檢視專責委員會,被突然強行解散。學校的通識科老師,害怕以言入罪,只可以依書直說。教育局公開表示,老師不應該擅自選用報章,以及未經證實的材料,作為教材。

可是,當初成立通識科,不就是為了讓學生明白,批判性思考的重要性? 甚麼時候,教科書裡的都成了真理? 

然後,開始出現殺科的聲音。

再然後,聽說政府想將國民教育,結合到通識科。

通識科的本質、課程目的,已經和當初成立時,有天壤之別。


昔日畢業後,不少同學都投身記者、教師、政府部門。現在,都嫁作人婦、提早退休。

早兩天,久未聯絡的中學同學 Tammy,傳來信息: 她過兩星期,移民英國了。她想約吃飯。這是近月來,聽到第N個朋友,要離開了。香港,不只通識科面目全非,改變的,還有很多。

既然這刻決定留下,只能泰然處之、勇敢面對。可以的話,也為自己、為家人、為下一代,留條後路。

5 comments:

  1. 也好朋友走一轉,便知香港有甚麽好與不好,自行判斷,自由的定義,各有各想法!

    ReplyDelete
    Replies
    1. 無論去到邊,都希望朋友生活幸福、快樂

      Delete
  2. This comment has been removed by the author.

    ReplyDelete
  3. 我朋友係第一批教通識嘅老師,佢話教通識好大壓力,學生啲問題好細致,又無教學範本,佢早几年話頂唔住校政同教學壓力,辭埋份工。老師份工真喺唔易做,現時更甚。

    ReplyDelete
    Replies
    1. 係呀
      最慘係跟佢哋份IES,學生有時連topic都諗唔到,諗到又唔識訂題目,唔識set問卷,冇network做訪問
      通識課時有限,範圍無限,好難搞

      Delete