再讀“價值投資者的投資日記”

之前寫咗篇: 

"價值投資者的投資日記" 讀後感1

傻貓初接觸美股時，就是透過作者威廉人的Facebook專頁，認識FUTU, IQ, ZM，亦錄得盈利。

這本書的目標讀者是股票新手，作者在“投資前要知道的事”，分享建立股票觀察名單的方法、資產配置的技巧。對已經在股海浮沉20年的傻貓來說，這些都耳熟能詳。誠如<<論勢>>中，曹仁超所說: "致富之道，不在儲蓄，而在理財"。工作多年，有了第一、第二桶金後，儲蓄已經成為習慣。可是，每次大浪出現，傻貓仍然撲出去，空手接白刃，落得焦頭爛額。可見理財還是未夠功力。

由此可見，空有投資經驗，其實沒用。錯的路，走一百次，永遠都走不到目的地。既然自己沒有時間，也不想花這個心力，去研究、分析股票，擇時買賣的時機又差，不如先改善心理質素。

經歷過這2年的投資逆境，再讀此書，想法有點不一樣。之前，看書是為了改善投資回報。現在，看書是為了調整心態，至於回報，怎可能看完一兩本書，就點石成金?

為改善投資績效，近日重新開始，每天花1-2小時，閱讀投資書籍，了解市場資訊。
另外，不斷提醒自己: "不要妄圖預測未來"、"嚴守止蝕"。
現時，只餘月供股票，並在市場氣氛極差時，逐少增持。

投資，其實並非必須。每天工作繁重，放學後，還要趕去補習社上課，回家都晚上9點了。然後，和大B伴讀，認字卡、玩遊戲、沖涼、如廁練習，餵細B埋身飲奶，沖涼、換片。他們睡著後，輪到我做運動瘦身、沖涼、看書。每天都充實得很。所以，現時資產配置，只是簡單的股票+現金。沒有時間留意股市，就乾脆做自己擅長的事，好好過日子。以後，還是會不斷買入各類ETF, e.g. VT, VIX, VOO, 2800. 

最後，如果有讀者對此書有興趣，又不介意接收二手書，歡迎留言，寫低電郵地址，在荃灣或尖沙咀交收。時間互就。

參加bloggers飯局，反思投資方式

浠妤滿月了! 之前坐月乜都要戒口，今次難得有人吹雞，約得成，丟低2B，去飯局吹吹水。

餐廳靜靜哋，坐得幾舒服，食物質素唔錯，傾得放心，話題天南地北，隨心又真心，大家都有用心分享、回應，臨尾仲有魔術睇+玩。超正!😁😁😁

席間有blog友提起父子與驢嘅故事。傻貓好有共鳴。
買賣股票20幾年，雖然經歷幾次金融大浪，又金融風暴，又金融海嘯，但一直符碌過關。直至涉足牛熊證、窩輪、期權，貪騰不知輸，注碼愈落愈大，搞到 IB 槓桿咗成倍，儲蓄用晒去接貨，加上幾次踩地雷，中資股泡沫爆破、內地科網股被打壓，傻貓才再收心養性，每日用碎片化的時間，看看投資書籍，瞄瞄市場新聞，遠離報價apps.

不過，睇得投資書籍多，有時會覺得無所適從。
就好似嗰兩父子，路人甲乙丙丁講嘅嘢都啱㗎，但係邊樣最適合自己當下的處境和需要?


投資無常法。沒有一條公式，適合所有人。大家擁有的資本唔同，心理質素唔同，選股的模式、喜好唔同、投資年期和目標亦唔同，冇可能人哋話隻股好，自己就瞓身去買。
價值投資，好多人認為係王道。不過，都有人因為咁輸身家。
趨勢投資，睇圖表，好多人成功，賺大錢。不過你係咪真係識睇? 又係咪所有股票適合用圖表去睇、去設定買入賣出價?
就算平均成本法，如果你一直月供的是2800 盈富基金，呢幾年佢不斷高買低賣，超高價搶入碧桂園、小米之類，然後股價低殘時，就沽出並踢出基金。月供佢，喊都無謂。

對呢類耳仔軟嘅投資者，blog友有幾個相當有用嘅提議。

C:
"對你嚟講，個個都啱，全世界都啱，只有自己錯。希望有日你會搵到全世界都錯，自己先啱嘅感覺。投資贏家都係 profit from others' mistakes."
D:
"1. 控制注碼
2. 逆向思維操作，提升自己的分析能力。唔好高追。"

 P:
"最大嘅concern 係心態。
避免驕兵: 賺錢就心雄，亂買貨。
唔好自卑: 有時係時勢做英雄/狗雄，未必係自己能力問題。
勿扮天真: 呢個世界唔係贏就係啱，輸就係錯。(有幾多人一買就升，一賣就跌? 就算買中，賺咗，但係咪真係自己投資選擇正確?還是只是幸運?  同時，有時輸都未必完全關自己事。)
嚴守止蝕: 明知冇可能time/bet the market, 又未能beat the market, 唔想認輸，就係固執。"

對傻貓嚟講，而家湊兩個B, 全天候埋身餵奶、同大B講故事、認字卡、玩遊戲，已經好忙。
加上自己怕同社會脫節，兼且要搵吓真銀，出返嚟代課。放學再去補習社上堂。夜晚又繼續湊B, 忙到癡線。
投資，只能做最簡單、瞓得著嘅選項:
1. 月供股票，
2. 見低位，就撈少少指數股票、少量個股。原則: 分段、小注。

暫時呢個方式，自己覺得好舒服。
股票倉大上大落的日子，冇再出現一段時間了。
取而代之，係資產值慢慢上升，最近回升返去 2 百萬樓上。
如果市況慢慢好轉，股值回升，資產自然繼續成長；市況持續慘澹，就繼續慢慢吸納優質股票、指數基金，靜待牛一、牛二的降臨。

最後，承蒙讀者錯愛，要求交學費，學期權。
傻貓技不如人，對期權所知不多，之前只是記錄自己的買賣操作，大家充其量可視傻貓的blog做反面教材，切勿盲目投入資金。
傻貓之前亦因期權損手，沒有能力指導別人。
盼諒。