如何篩選好股票

這幾天，希望篩選出一些好股，進行月供。

(對，龔成老師教的月供成本法，已經幫我賺到3層樓嘅敲門磚，我決定重新開始月供股票的漫長之旅，直至遇到下一個更好的投資標的為止)

傻貓從不同途徑，得到好多谷友無私，而且超有用的經驗分享。這些選股心得，老實說，單靠我的傻貓腦，以及愈來愈慢的讀書速度，真係唔知幾時先領悟到。

先寫下，定一個方向給自己，以後投資路，應該易走很多。

雲地選股法

這兩天邊讀雲地推介的書，邊了解他的投資思維。

他非常好心腸，無私、直接了當地分享選股方法:

他對某公司有興趣時，就去了解公司業務，發掘該公司的服務或產品，本身有甚麼優點，同行有沒有強勁對手。

Pass 了這一關後，根據以上資料，開始估計公司的長遠發展能力，現時的競爭優勢，能否維持。

Google大量這方面的資料，最後會看年報。

邊看邊思索，有疑問就再google或者在YouTube找答案。

仔細想想，這和價值投資派一直強調的選股、估值，如出一轍。雖然他已經由全倉收息股，變成今日的全倉科技股，但他仔細選股後，集中持股的方式沒有改變，因此才能賺取高於一般水平的回報。

Calvin 選股法

Calvin 拍了一個video, 仔細教授點樣揀回報高、毛利率高、價值被低估的細價股。

小薯選股法

你要好了解隻股票，知道間公司係做咩，點樣幫人解決問題，解決咗咩問題，有冇人可以取代佢，去幫人解決問題。呢個問題係咪長遠問題，還是有機會消失嘅問題。

換句話說，我哋要做嘅，係睇佢嘅護城河有幾深、競爭對手有幾強、未來嘅盈利有幾多。

當搞清楚晒，先去睇佢盤數。

(備註: 傻貓覺得: 雲地、小薯的選股方式，其實如出一轍。)

留意: 年報反映的，只是該公司過往的股值、盈利。我哋嘅著眼點，應該係公司未來嘅估值。

之後，先至睇佢係咩行業，用適合該行業的估值方法。

只有知道合理估值，我哋就可以無懼世事變改，還是愈來愈愛了。因為，好多價值投資者，都係超孤獨嘅。我問你: 當滙豐跌到 HKD $29時，你有冇入貨?  當騰訊嘅手遊被打壓時，你有冇儲貨 / 加注?

如果你識估值，明知股票價值明顯被低估，你就可以無視一切，勇敢加注。這樣，才能體現真正的價值投資精神。

有興趣詳細了解的朋友，請睇小薯用心寫的文章:

1. 再談價值投資（一）

2. 再談價值投資（二）

3. 淺談投資框架

傻貓迷思: Time the market

呢樣谷友個個都唔buy. 但我又真係好想講: 我哋計安全邊際，其實咪又係預咗股票會跌，先至入貨?

就算揀到好股，又知道估值，都要知幾時開車嘛。

大部份價值投資者，都好有米，可以坐定定，坐住貨，等個市升返，大家重新估算股票價值，再低買高賣。

好似鍾Sir咁，資產配置做得咁好，3月低位，仲有一大筆資金，可以掃貨，而且預先篩選咗幾隻優質股，回報當然超可觀。

但傻貓喺 3 月，股市低迷時，補習寒冬期，交完租、雜費，已經冇乜錢淨喇。😔記得當時食餐飯，都就住就住，餐餐都係食茶記。當時，租客仲要求減租，我又減咗畀佢哋。我自己要求減租，業主一毫子都唔肯減。😭

針對呢個time the market 嘅問題，高手谷友用咗：8083 有贊、 305 五菱汽車、371 北控資源、697 首程，TSM 台積電，做咗幾個示範。

原來，點篩選股票，點計估值，點睇佢幾時爆發點，預計PE，全部都係學問。

(現在有些還是短線操作中，有些長線投資，有些已經落車了。)

而且，管理層嘅背景、性格、處事方式、誠信，都要仔細分析。

好的領袖，才能帶公司，創造更大盈利。

即係咁: 如果Tesla嘅CEO, 唔再係Elon Musk, 香港電視嘅 CEO, 唔再係王維基，你仲會唔投資?

領袖好重要，估值係估唔到呢樣野嘅。

買賣股票，我哋要留意埋資金流的情況。

你知道資金去緊邊度走，你就知道邊度有機會賺錢，同時可預先上車、落車。

千萬不要貪心，妄想賺埋最後1蚊。一定要畀機會人哋賺。

大前提係: 你要早過其他人，發現架車，識幾時上車，仲要識得幾時落車。

咖啡罐投資法

不過，如果你好似傻貓咁，係典型存股族，升又唔想賣，跌又唔捨得止蝕，咁就最好揀ETF / 基金，畀人哋幫你投資。或者，認真揀一些成長股+增長股，上咗車，用咖啡罐投資法，封存佢，過幾年再睇，可能入面有十倍股呢? 這方法，可以有效幫你隔絕雜音，唔駛畀市場上無日無之的政策、專家估值去影響你。

如果你揀嘅股票，真係好股，你嘅回報，就會非常可觀。

(想像吓: 你持有剛上市的騰訊，早幾年嘅TSLA, NIO，係咪即時熱血沸騰?)

總結

我認同谷友講:

每個人的性格、投資理念、知識、技巧、財商、風險承受能力，都不同。

所以，我揀的好股票，同你心目中的優質股，一定唔同。

投資，一定要自己負責。建立自己的投資風格，就自己的情況，設定預期投資回報率，都是我未來要做的功課。

預期投資回報率

預期投資回報率，對我還是太深。谷友用好多方法，講極我都唔明。我冇乜大志，更加冇必勝的心理負擔，唔進取，亦唔係一定要好多錢，先開心。

每日，傻貓只係落茶記，同一哥食個$35蚊嘅早餐，通常食剩半份，留做lunch. 晚上，補完習、練完琴，一哥就會買埋外賣 ($25 燒味飯，或者$30 肥牛米線)，同傻貓一齊食。（其實，出街食嘢又好，買餸都好，都係一哥畀錢。🤫）我行路返補習社，連車錢都唔駛。朋友唔多，通常都係出嚟行吓山，食吓tea. 2層物業，全部租出。租金夠供樓，剩返嘅，幫媽咪月供股票、畀零用錢媽咪，我已經好心足。
補習，每個月收的學費，夠交租，餘錢，夠我買股票，就ok.

換句話說: 我平日真係好少用錢嘅。而且，補習提供到現金流，我冇必要開源。

如果有錢，我想做人工授孕；想畀一哥創業。但呢兩樣，又唔一定要做。佢都話: 佢唔一定要開茶記，繼續打工，都冇壞呀。人工授孕呢? 我仲心大心細緊。聽講打好多針嘅，會好痛。😰 而且，會好貴。😓 做咗，又唔係一定會成功有BB.

所以，預期投資回報率，我仲係唔識計。當你唔知自己每個月想有幾多被動收入，又點會計到投資回報率呢?