營商有道：由教師變身補習老師，問題天天都多

 

傻貓今個月好灰。

１０月收支結算：

收入		支出
補習社收入（至Oct 15）	$23,160	補習社租金	$5,000
物業1租金收入（扣除供樓）	$6,100	AIA 易達安心保（Oct 23)	$14,853
物業2租金收入（扣除供樓）	$1,000	投資課程（學估值、期權）	$3,260
批改作文	$60	(學鋼琴）	$2,090
代寫論文	$0	物業1管理費	$700
		物業2管理費	$400
		物業1驗樓尾數	$1,500
		物業2消防費用	$18,000
		商業寬頻	$394
	$30,320		$46,197
			-$15,877.00

當然，仲有好多日常駛費，冇計。但收入，就係得咁多。論文，我習慣做晒，先問人收錢。所以未有數。

我發現愈嚟愈多家長、學生，會遲交學費。少就遲1星期，多就遲3個月至半年。

之前疫情，停課。現時好多學生，仲用緊去年12月嘅學費上堂。

又有唔少家長，學生升咗班，但冇跟收費表，交新學費。每堂差$20,一個月就差$80.

仲有好多家長，畀緊暑期班嘅優惠價，唔係跟常規班嘅學費。

3年幾前兼職，已經係呢個學費。一直都冇加過。

我面皮太薄，唔知點追學費。又怕家長知道加咗價、冇優惠，會停補。

自從由南豐商廈舖，搬嚟呢個小商場，仲要位處邊陲，已經流失好多學生。

加上好多名校生移民，之前幫佢哋應付完IELTS、外國的入學試，佢哋就bye bye. 男拔現時只餘一個學生，拔萃小學得3個，女拔、協恩，走晒。

我的小腦袋，諗到嘅開源方法：代做功課、批改作文，導致壓力大增，右手的皮膚開始起水泡、脫皮，皮層變厚; 手肘開始起粒粒，背部、大腿都好痕; 經常肚瀉; 下腹、腿部水腫加劇；經期遲１０日都未到，驗咗又唔係bingo.

代做功課，可以博覽群書，仲有教授評分，其實我係好鍾意嘅。但始終上堂嘅唔係自己，唔知教授有冇既定立場，我本身又唔係嗰個行業嘅人，好多嘢只靠睇書，冇實戰經驗，畀唔到實例去支持論點。最重要係: 份功課係人哋嘅，我唔想累人哋攞低分。自己又完美主義，好多時改完又改，真係限期前1-2日，先畀到客人。被人催促，我會好緊張。

一哥非常反對我接freelance jobs. 

佢: "你改1份作文，收幾錢?"

貓: "$30喔，良心價嚟。可以幫到人呀。"

佢: "你做1份論文，用幾多時間?"

貓: "個幾禮拜啦。要睇好多書，做好多資料蒐集，先寫得好呀。"

佢: "你1堂幾多個學生?"

貓: "2至5啦。今日有一堂，唔知點解搞咗10個出嚟。現場6個，視像4個。仲有好多筆記未打好，好多作文、試卷未改好。"

佢: "補習先係你嘅主要收入，點解唔花多d時間，做好佢?你收多1個學生，1堂最少都已經$180啦。你畀心機教好佢哋，佢哋推薦你畀其他家長，收到更多學生。係咪仲好?"

貓: "搬咗舖，冇新生呀。"

佢: "你可以繼續做兼職，但係好好分配吓時間啦。如果冇錢，我有。"

貓: "知道了。"

回想當日，決定放棄教席，轉行補習。內心掙扎咗好耐。(見: 漂亮的鹿角)

疫情期間，補習社寒冬期(見: 補習寒冰期)，但教書嘅舊同事，人工照收，1星期zoom 1-2堂，仲可以幾位同級嘅老師，輪流教2班咁zoom. 

復課後，我寄咗幾封emails, 搵代課。可能本身教中學，但請人嘅都係小學，加上傻貓好老實咁，喺resume寫自己做補習社，所有申請，石沉大海。

眼見幾位同事，好恨有B，都因為工作壓力大，流產了。

Wing 為了陀B, 不惜辭去小學教席，去中大校外進修學院，學中醫課程，用食療、艾炙調理身體。雖然第一次bingo都流產，但現時BB已7個月，就嚟生得。

任同學，之前在港島頂級名校教，極速上位至科主任。為了生B,她辭職做家庭主婦。現在孩子都3歲喇。

我就嚟42喇。之前5年有愛冇性，錯過了生育的黃金時期。如果返學校教書，成孕機會更低。已經唔係怕唔怕做高齡產婦嘅問題，而係想，都冇得做。

好想有個B, 所以唔會返中學做全職。代課老師，時間亦撞晒2點幾開始嘅補習。暫時只能專心，搞好補習社。

如果要做好補習社，我應該點做? 教書，我識。但吸客、留客、與家長、學生，討價還價，我唔識。

既然乜都唔識，我決定膽粗粗，搵成功嘅前輩教吓路。(待續)