小改變，大改善 （淺談原子習慣）

話說傻貓上次瘦身失敗，閉門思過，查找不足後，終於成功減咗5 kg. 最鼓舞嘅，係冇咗個肚腩，仲由包包面，變返V面。😎

今次成功嘅方法，超簡單：目標、恆心。 

既然咁簡單，上次又衰咗？😑

最近睇<<原子習慣>>，作者James Clear拍咗呢段短片。本書我仲睇緊，先分享一下個人經驗、感想。

詹姆斯·克利爾演講(原子習慣作者)中英文雙字幕

（Blog友細胞寫咗篇讀後感 原子習慣，寫得好好，好用心。傻貓睇完佢嘅推介，就去搵書睇。)

好多人都想自己變得更好。😃

肥人想變瘦；醜女想變靚；窮人想財自，都係咁。最好轉變係突如其來，唔駛付出 / 付出少少，而且即時 / 迅速見效。

偏偏呢個世界唔係咁運作。💩

No pain, no gain. 你要有效果?唔該付出吓。😏

點解要付出? 因為只要你每日進步 1 %，全年就進步咗37倍。反過來說，如果你每日退步1 %，全年就打回原形，變做0。我唔想變做零。

付出唔駛多，一曝十寒冇意思。只要每天進步多一些，持之以恆，自然見效。

你想快?減肥食藥都快，但係停藥後，體重就會反彈。

買股票，睇財演講吓股，好彩嘅買中咗隻倍升股，賺得多又快。但係你唔識估值，唔學好投資心法，好快都會見財化水，仲分分鐘輸突。

你睇隻6123圓通速遞，就知咩事。更加唔好講，勁多微信女，賺夠畀人賺吓，畀個number益吓你，你唔識睇年報、唔查吓公司管理層咩料、唔睇公司損益表，甚至連間公司做乜嘢業務都唔知，狗衝入去，結果? 自己諗。😝

點樣付出，先有效果? 係咪訂咗目標，就sure win? 唔係喎。

每一日，我哋都被各種小習慣、決定，改變緊自己。

養成習慣的4個階段

1. 發現 (noticing)

2. 渴望 (wanting)

3. 行動 (doing)

4. 喜愛 (liking)

發現

發現到問題，才會有動機去作出改變。好多人以為自己減肥失敗，係因為冇足夠意志力、推動力。其實，佢哋只係唔夠清楚自己真正想點。如果你想減肥，每日就諗: 我有動力，去做運動嗎? 想學識投資，每日齋諗: 我有意志力，去學投資嗎? 咁你諗到頭髮白，都唔會有成果。

試吓直接落決定啦!

想減肥? 幾時、邊度、點樣做運動?

想做投資達人? 

幾時報讀投資課程/ 睇投資書籍? 📚

喺邊度搵 / 讀課程? 睇邊個 blog 改進財投資心態睇咩書學投資知識? 

點樣上堂? 你會聽完就算? 還是邊聽邊做筆記，適當時提問? 

點樣睇blog? 齋做cd-rom, 抄功課，畀個number人哋，問人點睇佢前景，買唔買得過，止唔止蝕好? 還是真正嘗試理解 blogger嘅投資理念，學習佢分析該行業、股票嘅方法，了解選擇該個股的原因，最後先做投資決定?

點樣睇書? 買好容易，有冇細讀並寫低筆記? 水過鴨背，睇完就算? 還是認真檢視自己的理財、投資情況，再做筆記，做資料蒐料，甚至將自己的投資組合，斬掉重練?🔪🔨

渴望

寫to do list好容易。開頭可能仲一鼓作氣，堅持到好幾日。之後呢?

不如試吓 "事前驗屍"。💣

預計吓，有乜嘢會拉住自己後腿。計劃失敗，你會點有咩感覺? 要面對乜嘢後果? 搵到死因嗎?

減肥失敗，你最多覺得自己冇瘦到，冇變靚到。但對生活，真係冇乜影響。但如果係醫生話畀你知: 你有脂肪肝、膽固醇高、心臟病、高血壓，你可能會死! 👻

你就會直接決定: 我會每日做運動。

投資失敗，如果你唔貪唔蠢，冇事。蠢但唔貪，冇事。貪但唔蠢，可能蝕，亦有機會賺。但你既貪又笨仲要懶，聽錯微信女，估錯市，咁你可能連本金都蝕埋。

【投資騙局】誤信「股票谷」買入推介股突暴跌九成　學會教訓：「做好功課穩健投資才是正道」

發現自己唔跟plan, 可以死得好慘。咁你就將目標拆細，每日做少少啦。

傻貓想瘦身，就set咗每日做15-30分鐘運動。

跟住，你要製造個環境、氛圍。

當初可能只係一時衝動，想作出改變。改變，只係一個選項，唔係必需嘅。但係，如果呢樣嘢，不斷在你面前出現，你就會好自然咁使用佢。

為咗瘦身，傻貓將部健身單車，放喺餐枱和鋼琴中間。返屋企，第一眼就見到架單車。

為咗學投資，傻貓將投資類的書籍，放在睡房床頭櫃、書房茶几、餐桌上。手機、平板，都有電子版的投資書籍。當然，少不了將其他理財blogger的網誌，加進閱讀清單。只要他們有新文章，我會即時閱讀。有時，明知自己問得白痴，但唔識，唯有請教人。睇到雲地投資TSLA嘅操作，同自己唔同，都會自我檢討，避免重複犯錯。

行動

開始時，少說話，多做事。羅馬並非一日建成的。每日一小步，慢慢就可以邁開腳步，加快步伐。最後，慢跑，快跑，都沒問題了。

我們要做的是: 著眼過程，不是結果。

因為不斷重複好習慣，掌掘到訣竅，必然能夠達成目標。

喜愛

點解我哋會重複這些習慣? 因為我哋鍾意喔!做咗，開心，咪繼續做咯。做得唔開心，你做埋佢啦。

所以，獎勵，要及時，仲要即時。

唔好同我講: 瘦咗可以著衫好睇d. 呢個係唔知幾時，又唔知會唔會發生嘅事。

唔好講: 識投資，你可以財自。呢個世界，得一個巴菲特咋。財自，太遙遠。

要吸引自己去為長期目標努力，就要即時獎賞自己。

做運動係攰，但我鍾意睇止凡嘅短片、聽伊面嘅聲音導航，學投資；又鍾意睇室內設計嘅短片，睇人哋點整靚間屋；耐唔耐睇吓演唱會、黃子華嘅楝篤笑、煲吓劇，放鬆吓。橫掂都係坐定定睇，不如坐喺單車上面，邊踩邊睇啦。唔經唔覺，就踩咗一個鐘。有得hea吓，學吓嘢，又出到一身汗，爽!😁

傻貓仲列印埋個表(呢樣好重要)，喺張紙度填窿窿，記錄低自己嘅努力。

當然唔係日日都跟到計劃。不過，當連續做咗好幾日運動，睇咗幾日書，就唔想break the chain, 搞到個表開天窗。你可能就會選擇: 持續呢個好習慣。

(之前就係想環保，用Google Sheet 整咗個表，妄想自己會好乖咁，開i-Pad, load 個表出嚟，輸入。結果? 根本唔會諗起佢。)

身份認同

每日踩吓單車，睇吓投資書籍，令傻貓愈來愈相信自己係一個重視健康、瘦咗又靚咗、擁有投資觸角的人。當然，瘦身、資產增值，係終身事業。但你唔信自己會做到，唔肯踏出第一步，你就永遠做唔到。

每日一小步，我哋嘅人生，就會改變一大步。