貪錢貓嘅家庭教育

 

一哥想開茶記，但傻貓突然閂水喉，佢失晒預算，暫時擱置。

呢日佢無端端問低能問題。

佢: "你鍾意錢多d, 定鍾意我多d?"

貓斜睨佢，擰歪面。😒

佢: "咁如果你要用好多錢，先換到我返嚟，你肯唔肯?"

貓沉吟咗半分鐘: "點解要用好多錢? 你唔好用錢啦~ 我冇錢會死架~"

佢: "哦, 咁好啦" 講完，走咗去沖涼。

貓諗諗吓，拉開浴屏，攬實佢: "你唔好死呀~ 如果你有病，我攞錢醫你啦。不過，如果你賭錢輸咗，咁你去死啦~"

一哥哭笑不得😅: "哦，好好好。唔死唔死~ 不如你沖先啦。件衫濕晒喇。凍死貓喇。"

傻貓讀書時，對錢完全冇感覺。

媽咪試過小學二年級時，每日畀$2，話畀我買嘢食。我唔鍾意食零食，通常都唔用錢嘅。儲到$50時，有同學話想買零食，冇錢。我畀咗佢。佢話見到其他嘢又想食想飲，所以用晒 d 錢。 我冇乜感覺。冇，咪冇咯。

點知，媽咪搞大件事，去學校投訴畀老師聽。仲要同學分期還錢。所有同學都唔鍾意我。

一直到中學，我都冇零用錢。爸爸鏁銖必計，我一毫子都冇得落袋。

當時搭小巴返學，一程小巴係$2.7. 爸爸每個月頭第一日，就會望住我嘅校曆表，數吓我要返幾多日學。然後，1次過畀晒嗰個月，每日嘅車錢， 1 日 1 幢硬幣:  2 個 2蚊, 2 個 5毫, 2 個 2 毫。我試過攞錢搭車時，個5毫子唔鍾意我，碌咗落坑渠。問人借都冇用，因為第二日都會冇錢搭車。結果? 我由藍田行返順利邨。

飯錢，佢開學前，已經親自嚟學校，睇咗小食部餐牌，揀最便宜嘅飯餐。每日嘅飯錢，就係咁計出嚟。

不過，學校附近，有好多小攤檔: $2 有茄汁意粉，加1蚊，有多條腸仔; 加2 蚊，有塊漢堡扒。仲有 $2 魚肉翅。落雨天，我留喺學校canteen, 食米粉, $6 一餐。

我鍾意睇書，lunch成日蹓蹥圖書館，F.1已經睇晒所有金庸、亦舒、瓊瑤、嚴沁嘅著作。學校圖書館，lunch首半小時未開門。我去藍田圖書館睇書。 求其食咗嘢，就返學校圖書館，繼續睇書。

媽咪見我放學有錢買薄罉、葱油餅、豆漿、雞蛋仔，返嚟同妹妹分享，報寸話畀爸爸聽。爸爸知道後，每日飯錢削減到 $6. 你食就食，唔食就唔好食。

上有政策，下有對策。

傻貓開始每日好早出門口，行路返學、行路放學。有時就喺秀茂坪落車，穿過順天、順安，行返順利邨。經過順安時，仲可以喺茶餐廳，買個 3 蚊嘅奶醬多。邊食邊行去自修室。做晒功課，先返屋企食晚飯。

讀中四時，發現同學嘅書，有答案，仲有好完整嘅筆記。於是，我升中五時，孭住超重嘅舊書，去九龍城賣。原來，間間收書的價錢都唔同。仲有，一次過賣好多書，價錢賣得唔高。反而，分幾次去，每次賣幾本書，價錢仲高。

屋企成日為錢，家無寧日。有日媽咪又話冇錢買我想食嘅嘢。我順手攞咗$100畀佢，佢問我d 錢邊度嚟，我講咗。當晚，我被爸爸用皮帶，鞭到趴喺度。佢話，佢辛辛苦苦賺錢，畀我買書，想我讀好d, 全家嘅希望，都喺我身上。點知我不思進取，寧願用舊書。當然，佢要我嘔返晒賣書賺嘅錢返嚟。仲斷埋我嗰個月嘅零用錢。

過年? 親戚畀嘅利是，一拎上手，媽咪就攞走。佢話要知道: 人哋畀幾多錢，佢先可以回返幾多，畀人哋嘅小朋友，唔係會好蝕底。所以，我一向唔鍾意拜年。讀高中後，過年只會探外婆。其他時間，留喺屋企睇書。

媽咪有錢，會點做? 佢會借晒畀二舅父、二姨、四姨。

我由細到大，都好憎二舅父。爛賭，賭馬、賭波、過大海，然後，永遠有媽咪幫佢善後。四姨，性格豪爽，成日請人食飯、唱K, 幫朋友還錢。冇錢，就問媽咪攞。二姨，佢老公爛賭，打麻雀、賭馬，都有佢份。二姨連表哥嘅奶粉錢，都係問我阿媽借嘅。

我嘅返學鞋，爛咗，穿晒洞，落雨時，無論點小心行路，總係由腳底濕到上成隻襪。全屋得爸爸一個賺錢，我冇出過聲要換鞋。最後係爸爸自己發現，死慳死抵，過年前，買對新嘅返學鞋畀我。

爸爸鍾意去旅行，就算借錢，都要每年聖誕、暑假、復活節假，帶我哋去旅行。好幾次，媽咪唔肯借錢畀爸爸，帶我哋去旅行，鬧交，甚至打交。佢嘅錢，咪又係喺爸爸畀嘅家用，剋扣返嚟。佢有為醫院摺紙袋，賺 1 毫子 1 個。不過，佢日摺夜摺，咪又係送晒畀二舅父。

媽咪話: 我有記低佢哋借幾多錢，佢哋會畀利息我。幫到人，又有利息收，幾好呀。

有次我打開佢本簿仔睇。😵 原來全部都還息唔還本。仲要舊數未清，再借新數。二舅父試過，跪喺大舅父門口，求佢借錢。我當時已經發誓: 我一定會自力更生，唔會求人，亦唔會為享樂，先駛未來錢。所以，我個人嘅第一層自住樓，係用儲蓄買嘅。連按揭都冇做。

大學year 3 考試時，爸爸已經退休。我好多時考完試，就趕去見工。當時，既要預備考試，又要搵工，非常充實。好彩，仲有上門補習，幫補吓車錢、見工戰衣錢。結果? 出嚟工作大半年後，我仍然除咗正職，仲有好多上門補習。男朋友嫌我冇時間陪佢，飛咗我。

直至我入咗學校教書。原來人工可以咁高，原來銀行可以因為我教書，批出9成按揭買樓。

穩定工作、穩定婚姻，人生勝利組係我!😇

點解又會變返零??

點解我要出錢畀老公，喺佢家族塊地，拆屋重建?

點解會搞到連學校份工都冇埋?

我好辛苦，先調整返而家嘅心態，適應咗做補習嘅工作。

如果全力資助一哥，開茶餐廳，我會唔會又變返零????😢

做生意，有機會賺，但都好大機會蝕呀。

佢做過總廚，管5 間茶餐廳。佢嘅烹飪、管理技巧，我好有信心。但係，佢冇做過生意。

我在網上搵到少少資料，預計吓創業資金。但睇唔明，最下面嘅回本期，那些percentage.