先旨聲明:
課堂期間，鍾Sir只係提出理論。
所有例子，都係傻貓自己根據市場資訊、笨貓腦，聯想出嚟。我都唔知：自己理解得啱唔啱。😅
大家唔好一廂情願，以為係鍾Sir畀number.
所有投資決定，自己負責。唔該晒。🙏
1.選行業
根據波特模型:
(i) 買方的議價能力 (Bargaining power of buyers)
APPL (蘋果) 財雄勢大，高產量、高科技，佢嘅產品，主要倚靠代工生產。蘋果訂單，可以養活好多間公司，例如以前的富士康(現在的富智康)，主要為蘋果手機做代工。另外，蘋果還委託多間組裝公司。由於APPL訂單多，議價能力強，代工的工廠，只能配合APPL的低成本政策，薄利多銷。因此，才造就出APPL的巨大毛利。
(ii) 供應商的議價能力 (Bargaining power of suppliers)
TSM (台積電) 製造芯片的良率，以及先進的技術，無人能及。三星、中芯，技術仍然大落後。台積電近年雖然面對中芯高薪挖角，而且產能已滿。可是，它正積極買地建廠，每日製造芯片，就好像印鈔票一樣，盈利非常可觀，日賺4億港元。
現時，它正受邀往美國鳳凰城設廠，以創造幾千個高科技職位。是否落實設廠，視乎美國政府有冇、有幾多補貼。由於2NM芯片，涉及國家安全，成事機會都幾大。
英Sir 嘅愛股OTIS (Otis Worldwide Corp)，應該都係呢一類。電梯製造商，整好架升降機，日後保養維修，無論零件幾貴，你都要向佢買。 你根本搵唔到，亦唔敢搵替代品。人命關天嘛。傻貓住過愉景新城，好多業主想換電梯承建商，可惜，第一次只係收到3間公司入標。第二次，更加只得本身服務嗰間肯入標。有冇圍標就冇人知，但可以見到呢個行業有幾窄，買家嘅選擇少得幾可憐。
(iii) 潛在新競爭者的威脅 (Threat of new entrants)
市場冇其他選擇，消費者就一定要揀你。
GOOG在美國本土、在歐洲都要面對反壟斷嘅訴訟。但係700 (騰訊) ，有國策支持。內地用通訊軟件，首選微信。畀錢，微信支付。打機，騰訊嘅皇者榮耀、有冇玩過? 佢出嘅手遊，種類繁多，而且用戶好易沉迷，亦好樂意付鈔買道具、武器去升級。暫時仲未見到有新競爭者，可以瓜分騰訊的業務。
另外，騰訊和阿里巴巴的運作模式，本質唔同。阿里見你生意做得好，會買起你。騰訊就鍾意扶持小公司，肯同你分享數據、技術，條件係: 你要畀佢入股。呢個方式，可以避免新競爭者搶走佢塊餅，同時，仲可以喺新競爭者未成氣候前，洞悉對手嘅套路、業務、盈利模式。
(iv) 替代品的威脅 (Threat of substitute products)
谷友米兄提起，有間公司細細間，現時全球只有522名員工，但吸金能力好強，高達 USD $408.5 百萬。
佢講嘅係 WDFC (WD-40 Company) ，一直專注製造及銷售 WD-40. 你屋企有冇支看門口? 電器、單車生锈，一用WD-40就搞掂。你有冇搵過替代品? 搵唔搵到?
這類產品，能夠滿足用戶日常生活所需，價錢合理，而且深入人心，用戶唔會特意尋找替代品。所以，佢連廣告費都慳返，係穩定成長股。
仲有SHW (Sherwin-Williams Company), 佢係美國最大嘅建築塗料公司，生產嘅塗料產品，用於建築裝飾、工業維護、道路橋樑、車輛船舶、航空設備。面對各國的環保法規，塗料市場的入門門欖頗高。而且，需求穩定，用戶往往會重覆購買。
SHW股價己經由Mar 23的 USD $390.77, 靜靜升咗一倍: Nov 6 的 USD $736.1. 如果再睇遠d, 你可能都會嚇一嚇: SHW 1979年上市時，股價只有 USD $0.727, 即係USD $1 都冇。
(v) 現有競爭者的威脅 (Rivalry among existing competitors)
PDD (拼多多) 悄悄崛起，之前好多嘢，好似口罩、手套，淘寶買唔到，又唔畀集運嚟香港。於是，Facebook好多專頁，都有人教路，用拼多多，乜都買到、運到落嚟。雖然質素普遍不及淘寶好，但勝在好多嘢都買得到。
另外，京東購物，亦好方便。好多時，電子科技產品，可以在京東搶先訂購，而且它自設車隊，送貨快過其他集運公司好多。
它們現時規模不及阿里，但股價已開始反映大家嘅睇法。
-------------------------------------------------------------------------------------------------------------
後記:
今堂鍾Sir仲講咗好多嘢。傻貓吸收能力弱，未理解到。
例如老師說: 澳門賭業有行業寡頭專利。
但是，中國為打擊資金外流，正修改"刑法", 擬把境外賭場人員組織、招攬中國公民出境博彩的活動正式入刑，追究刑責。
如果從上而下分析，濠賭股面對國策風險，這行業不是應該迴避嗎?
老師答:
"不妨用上堂教的波特五力模型去綜合分析整個博彩行業的吸引力，而不是單單看一點。"
我仲係諗唔明。
如果有網友睇得明，請指點迷津。謝謝大家。
上一篇:
No comments:
Post a Comment