港股期權實驗一: Short call + short put 騰訊

背景：

以前我冇動力學股票期權，覺得期權係專業炒家嘅專利。最近，見到谷友經常在我摸頂入市後，才熱切期待心儀股票，跌入他們的射程範圍，高高興興接貨，輕輕鬆鬆賺到可觀回報。

而且，伊面老闆在沒有減持的情況下，憑期權就成功收復失地。

我雖然乜都唔識，都逐步試吓。為咗確保損失係可控範圍，我只會做short call, short put. 而且在我未完全了解期權運作前，唔會做槓桿。

蝦碌操作：

話說我前日白白痴痴，想short put 騰訊，結果搞錯buy, sell, 做咗 long put. 我的理解：long call, long put,就像買牛熊證。輸有限，贏無限。問題係：你眼光獨到，正股升了，你賺的只有權金，沒有實物在手。而且，估錯市時，你會輸掉所有本金。所以，注碼通常不大，風險、回報，同樣受限。

當時騰訊升到傻。我只好快快手止蝕平倉，蝕咗百幾蚊。

（不過，之後中共反壟斷法出台，一眾科網股一齊跌到一仆一碌。這是long put的好處。股票急跌，就賺大錢了。）

對股票期權，我暫時的認知係伊面老闆講嘅: 有貨short call, 有錢short put.

伊面的期權心法：

SP個價，盡量揀冇可能到價的。(咁就長玩長有，即使接貨，因為入貨價偏低，感覺較安心。）

當正股跌近自己的預計買入價，權金又可觀時，才做short put.

期權操作：

跟住，我買入咗1手騰訊正股 ($626)。自知經常高追，買入後，我想隨即做short call. 不過夠鐘出門口，我冇做到。

然後，因為美國話輝瑞出咗疫苗，9成機會可以預防covid-19, 科技股跌到癲。

今日，我short call 咗騰訊 @ $640. 有得賺權金，已經還得神落。同時，short put 咗騰訊 @ $520. 我實在太心急。今日騰訊、阿里爸爸，都跌近1成，可能明天，已經要接貨了。

1. Short Put 700

SOLD 1 700 Nov27'20 520 PUT (TCH) @SEHK @ 4.1

2. Short Call 700

SOLD 1 700 Nov27'20 640 CALL (TCH) @SEHK @ 2.76 

3. Short Call 0012

SOLD 2 12 Nov27'20 34 CALL (HLD) @SEHK @ 0.09

傻貓仍然未學懂時間值，以及怎樣計算值博率。本來之前還在瞻前顧後，不敢妄動。

不過，Boss建議直接落場玩一次，學得最快。就看看這次實驗，結果如何了。當然，所有投資決定，我會自己負責。

今晚沒有鍾記的價值投資課程，我會先看看一些輕鬆的投資書籍。往後一段日子，會繼續認真了解股票期權操作。活道靚太李慧群的期權課程即將開學，我有簡單實戰經驗，到時再上課，學習效果應該會較佳。

股票期權的優點:

1. 透過運用槓桿，增加回報率

用少少期權金，可以刀仔鋸大樹，賺取股票資產價格變動的收益。

2. 用更抵價，買入股票

我經常受市場氣氛影響，高追股票。唔想咁樣，可以利用short put, 股票跌到價，我可以用低價買入，日後坐貨會坐得更舒服。如果跌唔到行駛價，就收期權金。

3. 即使股票呆呆滯滯，唔上唔落，都有錢賺

過去一年，我的舊經濟股，一直尋底。我是典型存股族，又唔捨得止蝕。買入後，坐貨時，只好望天打卦，等股票唔知幾時升，好無奈。有時，甚至低位沽掉優質股票。

如果做short call, 只要股票升唔到價，我就可以一直持貨，同時賺權金。

股票期權的缺點:

很多人說: 無論short call, short put, 贏有限，輸無限。

經過了解，原來大家指的是naked short call, naked short put. 即係篤手指，付出權金，透過槓桿，倍大回報及風險。

如果股票升穿short call行駛價，而你冇貨交畀買家，咁你到時就要用市價，在市場買返正股，還畀證券商。

Short put呢? 如果你戶口唔夠錢，接貨時就會動用槓桿。如果爆咗槓桿，就會被證券行斬倉，賣走你嘅股票。

總結：

我知道short put 到價接貨後，正股持續疲弱，我一樣要捱價。就像我之前高價買入的建行，今日才返家鄉。而我明天有機會接貨的騰訊，也可能像之前一樣，等超長時間，才能夠升回買入價。

而short call一樣有壞處。如果騰訊極速反彈，升穿阻力位$633, 因為樓上冇蟹貨，就有機會持續破頂。我到時卻要將$626買入的正股，以$640的股價, 拱手相讓。

最後，我知道naked short call, 後果可以非常嚴重，甚至輸到傾家蕩產。我還有我愛的家人、男朋友、狗狗，我也不想他們為我擔心。所以，我必須緊記伊面老闆的期權第三式: 唔好貪心。