營商之道：茶記一哥想創業

一哥唔多忿氣：「今個月嘅生意，好過上個月，但佣金仲少咗。」

傻貓條件反射問：「老闆請多咗人？」

一哥點頭：「樓面、水吧，都請多1個人。」

貓：「老闆返工時間少咗？」

佢：「老闆每日淨係返早市。午市未到，就放工。」

貓：「咁好合理呀~佢係老闆，當然想請人，幫輕自己。」

一哥開始抱怨：「水吧只忙早市，下午茶得好少單。但11點幾，水吧3個已經齊齊玩手機。

我不停備貨。個午餐，係全日餐。我下午邊備貨，邊煮，一直忙到晚市完。廚房忙到甩轆，都係得3個人。但係盤數，大部份收入，嚟自廚房。

午市旺，樓面係唔夠人，但其他時間，樓面得閒玩手機。」

貓：「除非你做老闆，咁你就有得話事。呢步，遲早都要行。」

一哥：「好多舊拍檔，都叫過我夾份開舖。我諗吓先。」

🙄

佢之前話：「唔想煩，怕太上心，唔做老闆。」

傻貓妹妹之前都係：「唔想影響同事關係，唔想有太大壓力，唔想升職。」

結果？升咗妹妹嘅同事。

佢工作能力冇妹妹咁好，管理技巧直頭差。分工唔勻，敦起上司款。

妹妹唔甘心，努力做好成績。幾個月後，直接跳升，管返個舊同事。

呢分鐘，一哥講嘢似吹水。但行動型嘅佢，創業嘅念頭，似乎已經萌芽。

等佢對現狀，更不滿；老闆做事，更不公平；薪酬佣金，更不合理，佢就會積極諗出路。

再講，佢都40頭喇，仲有幾多年，可以揸刀搵食？

貓唔清楚一哥盤數。不過，一哥太鍾意玩牛熊證，唔會有資金開舖。

貓：「其實開茶記，你預要夾幾多錢？搵有飲食牌、消防牌嘅現貨頂手，接收上手嘅傢俬、裝修？還是由0開始？你儲咗幾多錢？」

佢避重就輕：「頂手啦，冇咁多嘢煩。我嗰份，預50萬左右。新屋裝修、買電器，我用咗$3萬幾蚊，冇錢呀！」

用咗3萬，就畀唔到50萬？😑

反而，50萬，真係唔夠。

妹夫之前同朋友，夾份開外賣pizza店，頂手費、更換爐具、買勞保、請車手，都花咗唔少錢。茶記有堂食，舖面更大，舖租更貴，人手更多，前期投入資金，一定要預鬆。

貓：「都知你最近負擔大咗。慢慢諗啦。」

貓可以隨時賣股換50萬，資助一哥創業。但佢想創業，先要學習理財、儲錢。

佢要自己做功課，搵吓政府嘅創業基金資料，向佢超多已成功做強做大嘅舊同事，取吓經。

翠華一早上咗市。佢自己都賣咗認股權，折現咗。紅茶近年都極速擴展版圖，想上市。一哥都係時候，好好諗吓自己嘅事業方向。

我都係。一直倚靠葉Sir介紹學生、租舖、租影印機，遲早我都要獨立。

好多嘢要諗、要計劃。一步一步嚟，先搞好補習社、提升財商、調理好身體，再諗下一步。