傻貓百萬倉：買入首程、有贊、TSM

Stock Value:		$1,122,153.78
Gain/ Lose:		$5,564.42

 

通常月頭先更新，睇返上個月嘅倉位，買入賣出價，做檢討、部署。

最近做法有些不同，寫低先。

因為入咗一個勁人谷，好多猛料 bloggers, 好勤力咁睇好多書、財務報表、上好多投資班。

佢哋嘅選股、估值、對股票的分析、對行業前景的了解，都令傻貓好似劉姥姥入大觀園咁，目瞪口呆、歎為觀止。

好後悔冇加倉建行，真係谷底大反彈。仲有好幾隻佢哋提過嘅股票，我資金不足，只有拍手掌嘅份兒。

抄咗，賺，當然開心。好似有贊，我唔似佢哋咁叻，可以$1.5左右入貨，高追咗，但升幅都唔錯。

首程

原來首程喺內地做停車場生意。本來係國企，但成功轉型。好似領展咁，不斷翻新舊物業，再加增值服務。機場等停車場，車主冇得揀，一定要畀錢用。

有贊

升幅已相當明顯，但電商為商家度身訂造嘅平台，黏性好高。已有實際盈利。我冇本事估高位，會逢低吸納。

TSM

芯片技術，佢第一。每日正現金流。會繼續逢低吸納，慢慢儲貨。

另外，仲有幾隻佢哋提嘅股票，我都留意緊。好股無限，資金有限。慢慢嚟啦。

不過，我都唔想淨抄功課。下星期開始，會上鍾記嘅投資課程。我好想知道，上完堂，自己對選股、估值、價值投資，會有咩得著。會唔會有機會，好似谷內嘅猛人咁勁。昨天從圖書館，借了5本投資書睇，有鍾記嘅書，仲有止凡、洪龍荃、林本利。想搵林森池嘅證券分析睇，不過圖書館冇。慢慢嚟啦。

下星期開學，我會認真做筆記，好好學習。未開學前，會乖乖睇書，寫讀後感，加深記憶。預習咗，有基本概念，到時上堂，應該會較易上手。