傻貓百萬倉: 改掉壞習慣，增加投資回報

傻貓以前只知自己投資唔掂，但唔知錯喺邊。辭咗學校份教席，冇穩定收入後，識投資變得更加重要。

開始寫理財blog後，每次買入前、賣出後，無論賺/蝕，都仔細檢視，了解做決定嘅原因。入咗谷後，留意到自己嘅做法，同其他人唔同。佢哋成功，因為有好多投資好習慣：

1. 做足功課

單聽number, 人買我買，係錯嘅。每個行業、每間公司、每個管理層，都獨一無二。投資必須做足功課。

不過，做功課唔係狂啃財經新聞。市場太多雜音、媒體太多財演。由於市場資訊不對等，消息曝光，散戶跟入時，春江鴨已經趁好消息出貨。

做功課：

要睇投資書籍，學習心法。

要讀財務報表，了解管理層思維、行業前景、公司嘅盈利增長引擎、市場競爭力、競爭對手嘅經營模式、能力、部署。

要上投資課程，學習價值投資、了解不同行業、股票嘅最新資訊、買賣嘅背後原因。

2.小心估價

無論投資邊隻股票，都需要了解市場運作，不能只看資產、負債表、PE (市盈率)、公司數據。

要分析公司的市場佔有率、價格領導權。

電商股要睇PS (市銷率）、虛擬銀行、tech股、芯片股、醫藥股，計法又唔同。

3.小注試水溫

以前，一有錢就 all in 熱炒股。現在，即使股票係高人審視過，同大家分享。自己都要識得小注試水溫。第一注最細額，再跌，再入，慢慢增持。

買入後，股價下跌，係正常嘅。唔駛唔開心。如果股票係價值被低估，有機會溝淡，係好事。每次跌某個百分比，就增持多d,跌得愈低，增持力度愈強。

4.分散投資

投資要分散風險，尤其美股swing好勁。FSLY, TSLA, GOOG, FB, ROKU都上落好大。投資，計好安全邊際，捕捉到市場錯價嘅機會，可以增加回報。

5.保留現金

佢哋好似有無限資金，個市跌到被call margin, 個個散戶被迫蝕住沽時，佢哋仲有錢買貨。

原來，佢哋市場觸覺好強。勢色唔對時，已經壯士斷臂，減持嘅仲有公用股。跌市時，資金以為公用股安全，泊碼頭。所以公用股通常最遲跌。

其實，堅跌時，乜都跌。止賺咗，之後市弱時，人人冇錢買貨。但係佢哋就算撈唔到底，都一定有可觀回報。

聽聞鍾 Sir嘅學生，會保留25%現金，分段撈底用。唔知真唔真？

6.資產配置

股票只係其中一項投資工具，可用期權鎖定利潤，之後用short put 低位買回。

亦可用債券、ETD, 優先股、CEF （封閉型基金），獲取高息，保障現金流。不過，要小心選擇，以免大跌市時，券商減槓桿，被迫低位斬倉。仲要留意：唔好賺息蝕價。

最後，可以分散投資在不同地方，不必局限港股、美股、港樓。