考慮封筆

心情糟糕。糟透了。

這幾天本來好多嘢想寫。

1.“有錢人想的和你不一樣”讀後感+送書

2.港股大跌市，逆市賺14萬的操作記錄分享

3.營商之道：選舖技巧

4.還有其他BB嘢

a) 近日幾間了解咗保險公司的嬰幼兒保險，做了詳細的比較、分析

b) 如何以極低廉價錢，甚至免費獲得大量嬰兒用品

我講咗好多次，寫blog唔係我嘅主要收入來源。我寫到而家，$0.0001都冇收過。1張支票都冇收過。我寫，因為我平日全英文補習，寫blog係練吓倉頡，用吓廣東話。

仲有，呢度係我嘅樹洞。現實生活，我對住陌生人，係完全唔會講嘢。我最好嘅朋友，係我個妹。會見面嘅朋友，得幾個。冇錯，我係自閉嘅。

另外，我想認真學習投資，檢視自己嘅投資操作，改善投資回報。呢樣，我已經有進步。就算唔再公開分享，我相信自己方向正確，絕對唔會走回頭路。

點解乜都唔想寫？寫咗都唔擺上嚟？

因為上一篇 日記，有幾個人投訴：色情。

喂，大肚相你都覺得色情，仲要投訴，你個腦咩構造呀？

我擺相上我嘅日記，唔放Facebook和IG,因為唔想畀識我嘅學生、親戚、朋友、山友，指指點點，更加唔想佢哋添煩添亂，畀一堆無謂意見。甚至乜都唔知，話我哋奉子成婚。我唔想逐個解釋，我同一哥睇咗足足成年嘅中醫，又針灸，又食藥，又用艾炙，又戒口，幾難得先由子宮寒，調理到有小濼言。

你而家投訴我發放色情物品？？？

好丫，我唔寫喇。你哋滿意啦！

自己反省吓，你個污糟腦，點解見到大肚婆，都諗住上床啦！🤬🤬🤬🤬🤬🤬

我諗皮老闆當日closed blog, YouTube時,心情大概差唔多。

我又冇收你錢，純無私分享。你唔鍾意睇，咪唔好睇咯。你嚟嘈我？你有病就睇醫生啦！