退休: 買港股收息 VS 保險融資

今日同舊同事煲電話粥。佢提早退休，在家舒舒服服做太后，得閒湊吓孫，又有工人做家務、煮飯，不知幾happy. 

佢呢類人，正正係銀行嘅目標客戶:  戶口有一大舊錢，冇乜地方用錢，睇住戶口嘅錢搣吓搣吓，怕坐食山崩。想資產增值，又唔想煩，亦唔知點投資。於是，年年做超低利率，0.幾厘嘅定期，收吓息。

佢話銀行sell佢保險融資，好似好吸引。預期回報7厘，保證回報4厘左右。
傻貓聽完，已覺得伏味濃。
佢只睇回報，冇睇風險。
一輪咀講咗堆風險，總之銀行唔會做蝕本生意。有咩風險，閣下自理，最緊要準時還利息畀銀行。
佢聽唔聽，又聽唔聽得明，我都叫做盡咗力了。

講開，佢話要求唔高，只想安安全全，收吓4厘息。

(傻貓即時回應: 吓??咁卑微? 咁駛鬼畀銀行賺你錢? 自己買收息股啦。

自製退休基金，唔駛問銀行借錢。好過買保險融資，要自己承擔加息風險，息差收窄，到時自己又賺少咗，仲要綁死筆錢5年冇得用。提早攞返筆錢，又會蝕本。

預期回報係7厘、保證回報得4厘，你最後收幾多回報，銀行只係中介sell你，有咩保險公司決定。你唔係咁天真，諗住預期回報，等於保證回報啩？

你呢5年，只係還息畀銀行，冇得扣本金，即係呢5年，冇現金流入，只有負債。)

佢只有投資港股經驗，仲只有銀行戶口，冇證券戶口。
於是，傻貓又隨手搵吓，提議咗幾隻比較穩陣嘅港股，畀佢考慮。
最緊要，唔好賺息蝕價。

順便都幫自己嘅退休基金，睇吓可以加入咩新成員。

1. 領展 (823)

呢隻物管股，好多谷友、bloggers 都寫咗超級詳細嘅分析。
傻貓就唔班門弄斧了。
大家有興趣，可以自己爬文。
以下係80後小薯、Kano 老師、價值投資者: 鍾記，用心寫的貼堂佳作。

(i) 淘寶價買正版LV，領展都食「人血饅頭」？（2021年6月5日）
(ii) 長線看好的吸血鬼 - 823 ： 領展
(iii) 領展符合防禦型投資者的選股準則（二）

我只可以講，領展嘅管理層、風險管理、投資眼光，都好好，只要價位啱，我會繼續分段入貨，並繼續 short put 等接貨。

如果唔夠喉，想睇多d領展嘅資料，可以去Link仔的領展大集匯，慢慢研究。

另外，止凡之前已提過，領展最高速的增長期，可能已經過去。未來要側重投資，為股東創造收益。但領展仍然是優質股，就看大家的買賣時機、價格、操作方法。
領展有機會「思」變？

2. 中國移動 (941)

Blogger阿K 之前拍咗一條片，講中移動。大家可以睇睇:

傻貓本身唔太鍾意中移動，佢係藍燈籠，通常佢升，個大市就會跌。
而且，佢點睇都似價值陷阱。
股息率係高，但5G投資金額唔細，大陸又唔會畀佢賺暴利，睇唔到佢嘅上升動力喺邊度。

呢一點，止凡早於2018年已經提醒過大家: 
何解中移動是一支陰乾股？

3. 中信國際電訊 (1883)

呢隻澳門電訊股，股息率8.33%, 現價入手係抵嘅。
適合食息一族，穩穩陣陣。長遠就唔駛諗股價有大升幅。

4. 粵海投資 (270)

主要從事水資源；物業投資及發展；百貨營運、酒店持有、營運及管理；能源項目投資；以及道路及橋樑之業務。
簡單講，就係供應東江水畀香港，穩定賺港人的錢。

股息率有 5.54%, 近日股價回落，可以小注入手。
當然，你千祈唔好預佢會爆升啦。

呢類收息股，最啱舊同事呢類，唔想用腦，不求大升，只求穩定收息嘅人啦。
又睇吓佢係咪會take action, 開返個證券戶口，儲吓收息股啦。
話晒IB 呢幾日，突然宣佈豁免月費 USD $10, 對交易唔頻繁嘅人，絕對係德政。
不過佢有錢，唔願意改變，鍾意繼續畀銀行賺，係佢嘅自由。