營商之道：你適合創業嗎？

近日愈來愈多朋友，問：“你仲有冇返工？幾時放產假？”

傻貓莞爾：“我冇返工近2年喇，自己開舖，手停口停喔😂

不過做嘢時間長短，幾時休息，可以自己控制😁”

朋友嘅問題，出於關心，但也突顯自僱創業，與受僱打工嘅分別。

安全感

創業，只適合不安於現狀，敢創新、冒險，肯豁出去，又願意承擔風險的人。

當你放棄穩定工作，代表未來收入不穩定，甚至愈做愈蝕。你要識節流、計成本、開源、宣傳。

最重要：你要有輸晒嘅準備。計錯數，又唔肯認輸，仲有機會欠債。如果你同朋友夾份，可能friend都冇得做。家人借錢畀你做生意，你冇錢還，以後可能就要睇人面色、聽人單單打打，有排抬唔起頭。

親力親為

呢個世界，冇免費午餐。

想用最少嘅時間、精力、勞力，換取成功？如果你有好橋，歡迎分享。

即使你好識知人善任，請到好多得力助手，你每日仲係要親力親為，解決問題，才能有機會成功。

如果你連決策權都下放埋，你就會變得可有可無。

休假

打工仔渴望放假，好正常。但創業者，最好日日有生意。休假愈多，收入愈少。開網店都係，你覆遲咗，個客可能就幫襯咗第二間。

家人支持

屋企人嘅取態，都好緊要。

以前打工，你每月準時出糧、畀家用。創業呢？

好多生意，開始時都要捱，儲客、建立商譽，甚至低價搶客。你要預備“付出得不到回報”。

如果你本身係經濟支柱，咁你嘅壓力就會超級大。或者你早已儲咗筆錢，但做生意總有好多時候，“計劃追不上現實”，好多突發嘅額外開支。

當家人又突然急需用錢，你會點做？

資金鏈斷裂，係好多生意失敗嘅主要原因。

家人願意在緊急關頭，出手相助嗎？

佢哋有冇咁嘅能力？

大時大節，你間舖會休息蝕租？還是繼續營業？

重要場合，你缺席家族聚會，家人理解嗎？

市場定位

傻貓屬於專業創業，用返教學校嘅教學、訓輔、溝通技巧，製訂教材、出卷嘅經驗，仲有英文教育文憑、訓導專業文憑、教育碩士、註冊教師等資格，開補習社。

我習慣即場出筆記，冇存貨壓力。所以，守業成本好低。

附近商舖嘅葉Sir、星星，亦不時介紹學生給我。葉Sir唔收介紹費。星星、舊生、家長介紹學生，有$100介紹費，推廣成本好低。

分享咗我嘅創業經驗，你呢？你嘅市場定位係咩？你提供嘅係專業服務，還是用低價殺出血路？市場需求穩定嗎？

盤生意或產品，未必要好創新，但屬於一次性嘅消費，還是生活必須品？你本身有冇人脈？在紅海血拼，分分鐘粉身碎骨喔。

明確時限

創業前，會訂立時限嗎？例如：1個月內要回到本，3個月內收支平衡，7個月後有20%純利，3年後開分店。

訂立時間表，定時檢討進度，可以及時發現問題、提高成功機會。

員工相處

如果你盤生意，唔可以one man band, 請人都係好大學問。叻人，又有經驗，人工自然高，甚至唔係齋睇錢，而係要權力、自由度、彈性工作時間。但係點樣留得住好員工，就考驗你嘅觀察力、溝通技巧、同理心。

點先係好老闆、好上司？傻貓唔識。

不過，之前喺茶記做樓面，見一哥同唔同嘅下屬，用完全唔同嘅相處方式，比喺學校校長、科主任對老師嘅溝通方式，大為不同。

學校唔係做生意嘅地方，大家最多玩吓辦公室政治。但出糧嘅係教育局，教師冇乜大錯，校長要炒常額教師，都唔容易。

茶記唔同，周街都係食肆，有技術又肯做嘅廚房師傅，好搶手。少啲智慧、同理心，佢哋隨時劈炮，即日辭職。

（有興趣嘅，可以睇返舊文：

茶記小妹：廚房一哥）

法規

每個行業，都有既定法規。

開茶記，你要有商業登記、普通食肆牌照、符合消防條例。

補習社呢？

根據《教育條例》第3(1)條，任何組織於任何一天向20人或以上，或同時向8人或以上，提供幼兒、幼稚園、小學、中學或專上教育，或以任何方式提供任何其他教育課程，包括以專人或郵遞服務交付的函授方式，均屬「學校」，必須向教育局註冊（即俗稱「領牌」）。

點解傻貓要離開超吸客、交通方便南豐中心？咪就係其中一次查牌時，補習社同一時間，多過8個學生咯。

收到警告信時，我真係嚇到唔知點好。😱

好彩葉Sir當機立斷，1 星期內搵到地方搬。唔係再斷正，我就有機會被吊銷教師專業資格，罰款$5萬幾，仲有刑事責任。

申請補習社牌照，要經教育局､地政署､土地註冊處､城市規劃署､消防處､屋宇署及衛生署7個政府部門，葉Sir請咗公司協助申請，審批超過一年，都係失敗。因為每幢樓都有既定數量嘅“學校”牌照，南豐20幾層樓，超多大大小小的補習社。就算我哋符合晒要求，但根本冇牌可以增發。

無奈敗走。

記住：唔同行業，有自己嘅法規。唔想誤墮法網，面對法律責任，就要做足功課。