Monday, July 12, 2021

營商之道:你適合創業嗎?

近日愈來愈多朋友,問:“你仲有冇返工?幾時放產假?”

傻貓莞爾:“我冇返工近2年喇,自己開舖,手停口停喔😂

不過做嘢時間長短,幾時休息,可以自己控制😁”


朋友嘅問題,出於關心,但也突顯自僱創業,與受僱打工嘅分別。


安全感

創業,只適合不安於現狀,敢創新、冒險,肯豁出去,又願意承擔風險的人。

當你放棄穩定工作,代表未來收入不穩定,甚至愈做愈蝕。你要識節流、計成本、開源、宣傳。

最重要:你要有輸晒嘅準備。計錯數,又唔肯認輸,仲有機會欠債。如果你同朋友夾份,可能friend都冇得做。家人借錢畀你做生意,你冇錢還,以後可能就要睇人面色、聽人單單打打,有排抬唔起頭。


親力親為

呢個世界,冇免費午餐。

想用最少嘅時間、精力、勞力,換取成功?如果你有好橋,歡迎分享。

即使你好識知人善任,請到好多得力助手,你每日仲係要親力親為,解決問題,才能有機會成功。

如果你連決策權都下放埋,你就會變得可有可無。


休假

打工仔渴望放假,好正常。但創業者,最好日日有生意。休假愈多,收入愈少。開網店都係,你覆遲咗,個客可能就幫襯咗第二間。


家人支持

屋企人嘅取態,都好緊要。

以前打工,你每月準時出糧、畀家用。創業呢?

好多生意,開始時都要捱,儲客、建立商譽,甚至低價搶客。你要預備“付出得不到回報”。

如果你本身係經濟支柱,咁你嘅壓力就會超級大。或者你早已儲咗筆錢,但做生意總有好多時候,“計劃追不上現實”,好多突發嘅額外開支。

當家人又突然急需用錢,你會點做?


資金鏈斷裂,係好多生意失敗嘅主要原因。

家人願意在緊急關頭,出手相助嗎?

佢哋有冇咁嘅能力?


大時大節,你間舖會休息蝕租?還是繼續營業?

重要場合,你缺席家族聚會,家人理解嗎


市場定位

傻貓屬於專業創業,用返教學校嘅教學、訓輔、溝通技巧,製訂教材、出卷嘅經驗,仲有英文教育文憑、訓導專業文憑、教育碩士、註冊教師等資格,開補習社。

我習慣即場出筆記,冇存貨壓力。所以,守業成本好低。

附近商舖嘅葉Sir、星星,亦不時介紹學生給我。葉Sir唔收介紹費。星星、舊生、家長介紹學生,有$100介紹費,推廣成本好低。


分享咗我嘅創業經驗,你呢?你嘅市場定位係咩?你提供嘅係專業服務,還是用低價殺出血路?市場需求穩定嗎?

盤生意或產品,未必要好創新,但屬於一次性嘅消費,還是生活必須品?你本身有冇人脈?在紅海血拼,分分鐘粉身碎骨喔。


明確時限

創業前,會訂立時限嗎?例如:1個月內要回到本,3個月內收支平衡,7個月後有20%純利,3年後開分店。

訂立時間表,定時檢討進度,可以及時發現問題、提高成功機會


員工相處

如果你盤生意,唔可以one man band, 請人都係好大學問。叻人,又有經驗,人工自然高,甚至唔係齋睇錢,而係要權力、自由度、彈性工作時間。但係點樣留得住好員工,就考驗你嘅觀察力、溝通技巧、同理心

點先係好老闆、好上司?傻貓唔識。

不過,之前喺茶記做樓面,見一哥同唔同嘅下屬,用完全唔同嘅相處方式,比喺學校校長、科主任對老師嘅溝通方式,大為不同。

學校唔係做生意嘅地方,大家最多玩吓辦公室政治。但出糧嘅係教育局,教師冇乜大錯,校長要炒常額教師,都唔容易。

茶記唔同,周街都係食肆,有技術又肯做嘅廚房師傅,好搶手。少啲智慧、同理心,佢哋隨時劈炮,即日辭職。

(有興趣嘅,可以睇返舊文:

茶記小妹:廚房一哥


法規

每個行業,都有既定法規。

開茶記,你要有商業登記、普通食肆牌照、符合消防條例。


補習社呢?

根據《教育條例》第3(1)條,任何組織於任何一天向20人或以上,或同時向8人或以上,提供幼兒、幼稚園、小學、中學或專上教育,或以任何方式提供任何其他教育課程,包括以專人或郵遞服務交付的函授方式,均屬「學校」,必須向教育局註冊(即俗稱「領牌」)。


點解傻貓要離開超吸客、交通方便南豐中心?咪就係其中一次查牌時,補習社同一時間,多過8個學生咯。

收到警告信時,我真係嚇到唔知點好。😱

好彩葉Sir當機立斷,1 星期內搵到地方搬。唔係再斷正,我就有機會被吊銷教師專業資格,罰款$5萬幾,仲有刑事責任。


申請補習社牌照,要經教育局、地政署、土地註冊處、城市規劃署、消防處、屋宇署及衛生署7個政府部門,葉Sir請咗公司協助申請,審批超過一年,都係失敗。因為每幢樓都有既定數量嘅“學校”牌照,南豐20幾層樓,超多大大小小的補習社。就算我哋符合晒要求,但根本冇牌可以增發。

無奈敗走。

記住:唔同行業,有自己嘅法規。唔想誤墮法網,面對法律責任,就要做足功課。


12 comments:

  1. 長知識了,多謝師姐詳盡講解!原來拿補習社牌是這麼困難的!

    ReplyDelete
    Replies
    1. 開蚊型補習社,每堂少於8人
      就唔駛攞牌😉
      化整為零,租幾間相連細舖
      就化解咗呢個問題
      但又會有其他問題😆

      Delete
  2. 現時小本創業的合規成本比成十幾年前增加不少,正苦似乎樣樣都要管。
    近幾年的例子有公司秘書同最近的非上市會計師。
    搵食甚艱難 

    ReplyDelete
    Replies
    1. 冇錯
      小政府變極大政府
      乜都管,乜都規範
      但政府自己又冇咁嘅專業去管
      外行人管內行人,衍生好多問題

      你睇教育局,由會計師做局長
      對香港教育,仲可以有咩期望?

      Delete
    2. 這是最有趣的,那麼多年,教育局局長都係行外人管行內人。所以好多問題佢都唔知點樣解決,夠鐘就鬆人。

      Delete
    3. 係喔
      記得當年羅范椒芬調任成為教育署署長,突然大力推行多種改革,教師疲於奔命
      兩位女教師自殺,羅范回應:「如果是,為甚麼祇有兩位老師(自殺)呢?」

      也許有一天,當政府不再單純將教育,視為一盤生意、一個為職場培訓新血的工具
      而是確實為學生謀福祉,提供多元教育,發掘並培養學生潛能
      香港的未來才真正看見𥌓光

      始終,現有的教育,只是假定有部份學生必然脫穎而出,成為winners
      而部份學生,註定失敗,為社會提供低技術勞動力

      但其實社會不斷變遷,學校提供的職業生涯規劃,根本未能追上時代
      畢業生辛苦讀到大學畢業,但香港工種少,他們往往未能找到合適的工作
      令他們甚至懷疑自己的能力
      這實在令我很無奈

      Delete
  3. 人家大型補習社,如遵理又点解會撈到風山水起,真奇怪!

    ReplyDelete
    Replies
    1. Richard Eng本身係中學教師,讀咗MBA, 同老婆個家姐June Leung,出嚟開補習社
      開始時,只係喺元朗雞地、細細間做起
      佢家姐伍詠薇,不時帶佢出嚟曝光
      除咗教書,佢有行吓Catwalk, 溝通技巧一流,管理技巧又叻,轉數又快
      好記得Richard參行窮富翁大作戰,親身體驗貧困生活,仲教個女要有同理心,幫其他有需要嘅人
      https://youtu.be/IjvxfXopvYc

      但上市,第一次都唔成功,要撤回
      後來第二次,才成功上市,但股價一直冇乜起色

      之前主要係補會考班intensive course, AL intensive course
      轉DSE後,已經賺少好多

      Delete
  4. 真係長知識!
    小弟幸好有能力人脈好強既partner carry 住,宜家仲處於半工半創業狀態,希望一上軌道就投身商業中
    請人真係會好有保留,雖然可以減輕workload 同進行業務擴張,但同時又加大開支同可以帶走d客(如果係sale post)
    更甚偷了技術另起爐灶!

    ReplyDelete
    Replies
    1. 邊打工,邊創業,辛苦吧?
      如果兩者技能、專業有關聯,勝算就更大了。
      擁有咁強嘅partner,你好好學習,一定有得著。😊
      祝創業順利。
      請人,遲啲再諗啦。
      企穩陣腳先。🤗

      Delete
    2. 請人遲D諗,其實平時都可以諗下四周圍接觸同行,又或者補習家長,有潛力及熱誠人材,做個紀錄備用,也是一個好諗頭處理方法。:)

      Delete
    3. 呢幾日多咗同家長傾偈
      又真係多咗referral
      一星期多7個學生

      Delete