大肚婆講讓座

今日其中一個媽咪谷，講起讓座。

有個媽咪問: ＂坐巴士有冇人讓座?＂

大家反應好一致: ＂冇人讓座係基本＂
不過都有人回應: "次次都有人讓"

傻貓最近個肚好大個，行路左搖右擺，加上對腳水腫，所以對呢個話題，都有少少興趣。

通常讓座畀我嘅，都係中年男士，仲係著得勁hea, 求求其其嗰啲。

未試過有西裝友、著晒套裝斯斯文文嘅女人讓位。佢哋會好專注睇手機、(扮)瞓覺。
女人？我只試過幾次，都係白髮蒼蒼，拎住一袋二袋餸菜嘅老婆婆，喺地鐵起身讓位。我通常都先微笑道謝，再請佢哋自己坐返。老人家，跌倒可以好大件事。我自己小心啲，扶實，就唔會跌倒。

有時其他人見到我哋互相讓座，都會起身讓埋畀我。
多數時間，我就繼續企到落車。

傻貓好多時，都會選擇行路。
以前經常由葵涌，帶住狗狗，行山路返大埔。

而家經常腰背痛，好多時只能由葵涌，搭巴士或者小巴，返補習社。
但只要當日條腰冇咁痛，腳水腫冇咁勁，就會慢慢行返屋企。
係㗎，以前行20分鐘，而家要行1小時。但隻腳生嚟，就係要行。唔郁齋坐，水腫咪仲厲害?!

遇上要去遠少少，返大埔探狗狗，或者約咗朋友出去食飯，就預咗喺地鐵、巴士罰企。不過，大把人一齊企啦，唔緊要啦。😄

關愛座，通常冇位。好多時都係婆婆、伯伯坐。其他人都會坐。
咁咪企吓咯。冇辦法。😝
不過，好多時，見到10 幾20歲嘅後生仔，一個箭步在你面前搶位，然後打機，傻貓真係想笑出聲。😆

唔讓座，唔緊要。
但搶位，真係駛唔駛呀？😒
打機大過天，講同理心？＂從來沒有，從來都沒有～＂🎵🎶🎤
咁好啦，我唔追究喇。😂 

試過遇上熱心人，會離遠叫我過去，讓座畀我。
老實講，我覺得勁尷尬咯。😳
全個車廂嘅人，都望住我。然後又望我個肚。🙈

我明白佢想讓座嘅好意，又怕其他人坐咗佢個位，讓座變得冇意義。
但無端端，成為萬眾矚目嘅焦點，我覺得好古怪。😖

講真，大家都畀咗車錢，點解人哋要讓大肚婆?
讓座，牽涉公平、資源分配問題。
怎樣衡量: 誰比誰更有需要座位?
後生仔、後生女，返咗成日學，都會辛苦、會攰；西裝友、套裝女，返咗成日工，都想休息吓，用吓手機，放鬆吓。
佢哋冇錯喎。仲有，佢哋唔舒服，係咪要用大聲公，話畀全世界知，等人哋唔好話佢哋霸住關愛座？
點解大肚婆，就一定要人哋讓座？講唔通喔！

既然改變唔到事實，就接受，並改變自己的心態、行為。
有人讓座就開心，冇就唔開心。自己嘅情緒，就畀其他人控制咗。我唔鍾意咁樣。

我覺得最重要嘅，係同理心，係察覺人哋嘅需要，並適時伸出援手嘅善行。
讓座，只係其中一樣，顯示同理心嘅表現。

所以，作為大肚婆，我衷心感謝願意讓座嘅好心人，亦好多謝佢哋嘅同理心。

不過，有冇人讓座都好，只要我有需要出街，都會出去。
企得耐，我寧願喺月台搵位坐一陣，等下一、兩架地鐵，再入去企過。只要去到目的地，就可以了。
至於巴士，挨埋一邊，靠牆企，都可以嘅。睇吓電子書、其他 bloggers 嘅用心分享，時間其實都過得好快。

我希望濼言將來係一個開心嘅小朋友，所以，我選擇唔去介意： 有冇位坐、有冇人肯讓座。有開心嘅媽咪，就會有開心嘅baby.😊 

日後，我又可以教返濼言：“以前你喺肚入面，細細個嗰時，有人讓過位畀你。你都要幫返有需要嘅人喔”