茶記小妹：激死我喇

「小姐，妳做咗成日嘢，仲咁好笑容嘅？」

靚太鼓埋泡腮，好似雞泡魚，好可愛。

貓笑笑口:「我傻㗎，唔駛用腦，咪成日笑咯~」
其實剛教完3堂，趕嚟茶記，啱啱開工咋。

佢老公指住佢：「啱喇，妳畀d開心佢啦～佢發咗成日脾氣喇～」

貓瞪大眼睛：「有咁嘅事？太太妳笑得好靚，皮膚又好，唔似唔開心喎。D人成日發脾氣呢，好醜樣㗎~」

靚太開始訴苦：「激死我喇~搵咗成條金魚街，都搵唔到玻璃水樽。我隻龍貓，又咬爛咗個膠樽，而家冇樽用喇~」

貓：「嘩，行咗成日，咪好攰咯~

一陣食返d好味嘅嘢，補充返d energy.」
靚太：「食完嘢，我要笑返，好似妳咁開心。」
傻貓：「一定會啦！有個好老公，陪妳逐間舖睇，一齊搵玻璃樽，超幸福喔～我都戥妳開心喔～」

靚太望吓老公仔，咭一聲笑返。
佢開心，佢老公笑得更開心。