茶記小妹：你睇我唔到

識期疾衝過來 ：「貓貓，救我呀！ 」

張目四望，冇咸蟲、冇鬼佬。貓一臉問號。

識期 ：「我老師嚟咗喔～唔可以畀佢知我兼職㗎！我死梗㗎！ 」
高妹瑟縮在矮佢成個頭嘅傻貓身後，場面超搞笑。

貓：「佢坐邊張枱？」
識期偷偷示意 ：「嗰張。 」
貓：「我哋對調，妳睇呢邊。 」

巡查後，貓狐疑：「佢真係教師？衣著、舉止、語氣、用字，唔似。」
識期超緊張 ：「佢係TA （教學助理），好八卦㗎，同我班主任好熟。班主任話唔准人兼職，要畀心機考DSE~」

曾幾何時，我都咁講過。做老師，薪高糧準、年年跳point加人工，總是以為學生兼職，係賺錢拍拖、買靚衫和波鞋。

識期哭喪著臉 ：「補習費好貴㗎，我唔想屋企人咁辛苦。我1星期返4日茶記，3日補習。 」

年紀輕輕，就有經濟壓力，好恐怖。

識期扁晒咀 ：「之前有個兼職，屋企人咁啱嚟食嘢。佢匿咗喺厠所，整整1個鐘，唔敢出嚟。 」

究竟係唔想畀人知做兼職，還是唔想畀人知喺茶記兼職？做樓面，又唔係打刧，時薪$40, 賺嘅都係辛苦錢。而家咁多食肆結業，有工開已經好唔錯。

TA食飽打完機，抹抹咀站起，準備離開。
康師傅慌忙報信：「期期，2位，埋單。」
識期9秒9，躲進平日閒人免進的辦事處。

TA和女友手拖手離開，茶記回復平靜。