茶記小妹：係咪你玩嘢？

茶記有兩個經理，風格迴異。簡單來說，一個做訓導，另一個係輔導。兩人好少同場。

今日返工，火藥味濃。不問而知，訓導揸fit.

訓導大鬧：「係咪玩嘢呀？個牛脷飯邊個賣㗎 ？賣咗去邊？阿仔，係咪你 ？」

盛少搖頭。

訓導怒睥：「小玉，係咪你玩嘢？」

玉姐低聲囁嚅幾句。

訓導玉手一指：「貓貓，係咪你 ？」

貓：「我啱啱打卡咋。」

訓導鍥而不捨，逐個追問，並不斷重覆 ：「你哋唔識賣嘢，唔好賣。唔錯得㗎~等我嚟~」

康師傅火了：「 賣錯咪叫廚房再做咯。你信唔過人，自己做晒佢。」

訓導 ：「我都係想知邊個做錯，教返佢，以後唔好再錯。我有錯咩？」

作為經理，訓導冇做錯，動機亦良好。但出嚟嘅結果，理想嗎？

睇返結果：

今晚所有外賣單，無人敢碰。試過同時4張單，10幾盒外賣連飲品，堆喺吧台。訓導自己又忙，客人不斷催促。

賣錯單，不時都有。大家都唔想出錯，更加冇人想全世界知自己笨咗。要鬧要話，暗角唔該。

做管理，得人心，得天下。