茶記小妹: 網名嚟啫

今日補完習，衝去茶記面試做兼職侍應。

經理：「我哋茶記好急好趕㗎喎，講嘢大大聲好粗鄙。妳咁斯文，會好辛苦㗎喎。」
我 ：「辛苦冇問題，最緊要時間啱。我而家每日只係補習個幾至5個鐘，剩咗好多時間。」
我真係好等錢駛。辛苦得嚟有錢收，ok喎。

經理：「妳係富哥介紹嘅，實冇問題嘅。妳冇經驗，唔緊要㗎。 」
而我不知誰是富哥，亦唔知佢叫富哥。網上傾幾句，我話搵兼職，佢叫我嚟見工。係咁多。

我 ：「多謝妳喔。我可以邊學邊做嘅。 」

經理：「都係寫吓單，遞吓菜咁，好簡單嘅。妳記得要著長褲，黑色藍色牛仔褲都得，唔好著裙，要買防滑平底鞋。 係呢，妳d同事點叫妳㗎？」
我 ：「Miss Lee. 都可以叫我Susanna.」
經理有半秒呆咗，O咀。

我 ：「其實點叫都一樣啫。 」
做嘢啫，叫阿喂，或者阿邊個，我都會9秒9應你。

經理：「咁聽日妳補完習過嚟啦。可以早嘅，就5點。晏嘅，就6點。唔駛打嚟報到。現金出糧，返工有錢，射波冇錢。」
我 ：「明白，唔該妳，聽日見。 」

第一次，見工唔睇學歷，唔駛改文，寫成千字教學理念，小組面試玩搶答，答完處境題，寫埋 lesson plan, 試教(對象係扮學生的老師)，然後問你最低可以收幾錢。