茶記小妹: 收碟

今日day 1, 乜都唔識，做下欄先。
即係收碗碟🍽，抹枱，搬餐具去廚房，傳菜。

頭15分鐘，經典對話:
我：「仲要唔要㗎 ？」
客：「要㗎 。」
另一句係:
客：「唔該，畀份餐具丫 。」
我：「好喔。請等等。」
我知道自己一向唔識睇眉頭眼額。只好靜靜觀察其他同事的工作方式。
以前成日出街食，都冇留意侍應做緊乜。
角色互換，好緊張。

15分鐘後，我開始記得枱號，偷偷地傳菜。
經理見到，冇出聲。
另外，我事先留意邊度有吉枱，客人甫入門，我即時用手勢指示坐邊度，隨手拎餐巾匙羹叉。
客人坐好，餐具已安放面前。

客人食飽飽，通常會將碗碟推開少少，拎餐巾抹咀，有些人會用牙籤，甚至搵銀包。
這時才上前問 ：「可以幫你收咗佢嗎 ？」
咁就撞少咗板。

平時行山，行好耐都ok.
今日行行企企5小時，冇得坐，對腳好攰。
可能多鐵板燒，鐵盤比較重，來回清碗碟盤，搬10幾轉，好費力。

不過，估唔到有免費晚飯食，仲有免費麵包做早餐。😋😋😋

臨落場，經理問我，嚟緊1星期，可否日日返工。
我過關喇😁😁😁 。