茶記小妹：你同我食咗佢

有位國字面嘅先生招手。

瞥見桌上食物已到齊，傻貓上前探聽軍情。

客：「小姐，妳試吓我塊扒啦。 」
😱我同你三唔識七，我唔想染愛滋喔。
學生同我講 ：錫錫都會有BB. 我食咗，實死梗㗎。

客對住呆貓：「你食咗先講啦。 」
貓繼續天然呆。

客忍唔住講真心話：「塊扒酸㗎。 」
咦～好衰㗎你！酸嘅仲叫人食。
你細個一定冇聽書。萬世師表孔子曾經講過 ：「己所不欲，勿施於人。 」
同學，你明唔明呀？

我：「麻煩你稍等，我搵經理嚟幫你丫。 」
望住雞扒意粉嘅茄醬，真係唔知係乜酸。😅

經理收咗入廚房，同廚房嘅一哥切咗少少試食，一致裁定：投訴不成立。
不過，為表誠意，廚房大哥再煎返熱塊扒，原碟回歸。

經理 ： 「先生，塊扒可能有少少雪味，不過唔係變壞。
我哋已經幫你翻熱咗，請慢用。 」

國字面聽完，真係乖乖哋食到粒米不留。
放心啦，你未來老婆一定靚爆鏡，冇豆皮。