和事佬：古靈精怪的妹妹

妹妹真係好叻。之前工作固然成功，現在做full-time mother也游刃有餘，聽到我好多嘢唔知點好，佢就出招喇。

佢首先分享咗自己嘅故事，叫我試吓講別人故事，暗示畀一哥知道，我如果遇上某些特定情況，會點處理。同時，亦可打聽佢嘅諗法。

跟住，妹妹就喺Facebook tag咗一哥同佢自己老公，提醒佢哋要識欣賞、包容、疼錫另一半。

一哥睇完，即時有正面回應。

然後，佢返嚟同我講起，問點解妹妹會tag佢。我就順勢講妹妹嘅故事。

咁一哥都唔笨嘛，即時問點解妹妹會事隔多年，突然舊事重提。

然後問我係咪懷疑佢。

晚飯後，我再試佢口風。不過，明顯佢同東尼，好唔同。佢做慣管理層，擅長管理員工、捉人心理，說話語氣和方式，就像我妹妹。

佢先清楚表明，自己冇做任何對唔住我嘅事，只係搲水吹。佢話：“一齊咗2年，如果擔心我出軌，唔應該買樓。如果你決定唔要BB,就講我知。你鍾意就得。到時層樓轉返名畀你，或者賣咗佢，畀返錢你。”

咁一齊時間長短，真係唔代表咩喎。出軌，只係一念之差。

為表清白，佢喺我面前，開WhatsApp,畀對話畀我睇，然後即時delete晒。佢講：“如果我有嘢要瞞你，就會set密碼，亦會delete晒d 訊息。我冇咁做，因為佢哋真係冇乜特別，我覺得冇問題。”

咁我再睇落去，都發現係微信女之類，講投資、股票多，佢哋唔係做銀行，就係畀number.

佢話自己好忙，份工又冇落場時間。放假，一定24小時陪我，唔係返我媽咪屋企，就係陪我行山，或者同佢爸爸、阿姨食飯，再唔係就係同佢班死黨食飯。佢根本冇時間出去識女仔。結論係：我諗多咗🤷🏻‍♀️。

跟住，佢話我講畀成村人知，妹妹都知，係佢唔知，覺得好唔開心。

今朝，佢叫我開聯名戶口，佢同我每個月，每人入幾千蚊，做BB嘅醫療、教育基金。仲提議在June姐提嘅虛擬銀行，開戶口，利息多d.

嗯。事件暫時告一段落。如果以後要講數，我要認清楚對手，搵足證據，再諗埋對家會出咩招，佢重視嘅係咩、痛點係咩。當然，仲要搵妹妹，練習吓點傾，先會令自己冇畀人食住嘅感覺。

明明以前，東尼話我，有我講，冇人講。我講咩都啱。佢從不還口，只會不斷say sorry.而家我冇做訓導，連要求一哥，唔好網上識人，都唔係好成功。因為佢斬釘截鐵話冇，我就冇嘢可以講。

話說回頭，其實兩夫妻相處，輸贏又唔係咁重要。適量嘅坦誠、信任，加上你哄吓我，我就吓你。呃呃氹氹，都可以自我感覺幸福，白頭到老。

希望我哋真係可以行到最後。因為一哥煮嘅嘢食，真係好好食。如果可以，我想食一世㗎。

同時，我要努力為自己增值，搞好補習社、學好投資，盡量唔好畀麻煩佢。唔好將家庭、愛情，變成生命的唯一。仲有，試試融入佢嘅家人、朋友圈子。千祈唔好令我對佢嘅關心，變成負擔。

呢個就係一哥昨晚煮嘅金菇牛肉卷，原來好易整，我好鍾意食。希望搵日識得自己整，唔會整散晒，又唔熟。