Friday, April 16, 2021

和事佬:古靈精怪的妹妹

妹妹真係好叻。之前工作固然成功,現在做full-time mother也游刃有餘,聽到我好多嘢唔知點好,佢就出招喇。

佢首先分享咗自己嘅故事,叫我試吓講別人故事,暗示畀一哥知道,我如果遇上某些特定情況,會點處理。同時,亦可打聽佢嘅諗法。

跟住,妹妹就喺Facebook tag咗一哥同佢自己老公,提醒佢哋要識欣賞、包容、疼錫另一半。

一哥睇完,即時有正面回應。




然後,佢返嚟同我講起,問點解妹妹會tag佢。我就順勢講妹妹嘅故事。

咁一哥都唔笨嘛,即時問點解妹妹會事隔多年,突然舊事重提。

然後問我係咪懷疑佢。

晚飯後,我再試佢口風。不過,明顯佢同東尼,好唔同。佢做慣管理層,擅長管理員工、捉人心理,說話語氣和方式,就像我妹妹。

佢先清楚表明,自己冇做任何對唔住我嘅事,只係搲水吹。佢話:“一齊咗2年,如果擔心我出軌,唔應該買樓。如果你決定唔要BB,就講我知。你鍾意就得。到時層樓轉返名畀你,或者賣咗佢,畀返錢你。”

咁一齊時間長短,真係唔代表咩喎。出軌,只係一念之差。

為表清白,佢喺我面前,開WhatsApp,畀對話畀我睇,然後即時delete晒。佢講:“如果我有嘢要瞞你,就會set密碼,亦會delete晒d 訊息。我冇咁做,因為佢哋真係冇乜特別,我覺得冇問題。”

咁我再睇落去,都發現係微信女之類,講投資、股票多,佢哋唔係做銀行,就係畀number.

佢話自己好忙,份工又冇落場時間。放假,一定24小時陪我,唔係返我媽咪屋企,就係陪我行山,或者同佢爸爸、阿姨食飯,再唔係就係同佢班死黨食飯。佢根本冇時間出去識女仔。結論係:我諗多咗🤷🏻‍♀️。

跟住,佢話我講畀成村人知,妹妹都知,係佢唔知,覺得好唔開心。

今朝,佢叫我開聯名戶口,佢同我每個月,每人入幾千蚊,做BB嘅醫療、教育基金。仲提議在June姐提嘅虛擬銀行,開戶口,利息多d.

嗯。事件暫時告一段落。如果以後要講數,我要認清楚對手,搵足證據,再諗埋對家會出咩招,佢重視嘅係咩、痛點係咩。當然,仲要搵妹妹,練習吓點傾,先會令自己冇畀人食住嘅感覺。

明明以前,東尼話我,有我講,冇人講。我講咩都啱。佢從不還口,只會不斷say sorry.而家我冇做訓導,連要求一哥,唔好網上識人,都唔係好成功。因為佢斬釘截鐵話冇,我就冇嘢可以講。

話說回頭,其實兩夫妻相處,輸贏又唔係咁重要。適量嘅坦誠、信任,加上你哄吓我,我就吓你。呃呃氹氹,都可以自我感覺幸福,白頭到老。

希望我哋真係可以行到最後。因為一哥煮嘅嘢食,真係好好食。如果可以,我想食一世㗎。

同時,我要努力為自己增值,搞好補習社、學好投資,盡量唔好畀麻煩佢。唔好將家庭、愛情,變成生命的唯一。仲有,試試融入佢嘅家人、朋友圈子。千祈唔好令我對佢嘅關心,變成負擔。

呢個就係一哥昨晚煮嘅金菇牛肉卷,原來好易整,我好鍾意食。希望搵日識得自己整,唔會整散晒,又唔熟。



18 comments:

  1. 雨過天晴👏🏼👏🏼

    ReplyDelete
  2. 師姐你自己保重啦,搲水吹搲到咁嘅對話?有得食佢食唔食?
    仲要惡人先告狀,威脅番你轉頭。
    希望你哋搵到真誠溝通之道。

    ReplyDelete
    Replies
    1. D對話真係好令人懷疑🤷
      而家的確係佢惡d
      只好聽其言,觀其行啦

      Delete
  3. Replies
    1. 謝謝你分享的書本、文章
      你寫的文章,我經常分享給妹妹、朋友
      實在很好、很有養份
      對夫妻、親子關係,都有幫助

      Delete
  4. 我專唱反調,分手總是在雨天!

    ReplyDelete
  5. 天生多情,難搞。師姐都係先顧好自己身子同BB健康,前途+資產+BB都在自己手,其他從容再議。

    ReplyDelete
    Replies
    1. 結到3次婚,一哥除咗多情,仲好charming.
      同意你講嘅,我搞掂自己先啦,其他嘢唔好亂嚟。

      Delete
  6. 要留住個男人, 都要諗下自己既吸引力有無下跌, 個男人之前愛你既地方有無唔同佐

    學埋D搜證嘈交技巧, 只會贏佐場交輸佐個家 -- D明星就有用, 捉偷食男捉得叻會吸一波FANS, 提升個人價值。對普通人只有"姨媽姑爹都話我O岩", 無意義架

    --Dogdogchi

    ReplyDelete
    Replies
    1. 知道
      我會繼續時刻三省吾身,努力做好自己,不為他帶來麻煩

      Delete
  7. 我又唔係咁睇,唔係話幫女人,男人確是犯賤之首。

    ReplyDelete
    Replies
    1. 咁就要揀個"你食得住, 佢又走唔甩"既男人
      或者揀唔要

      --Dogdogchi

      Delete