Sunday, April 4, 2021

經過這段經歷,我終於明白自以為是的後果。



今日個F.6學生畀我bilibala 話咗好耐。
題目如上,佢篇文章係咁嘅:




喂喂,人哋題目關鍵詞: "自以為是"、"後果"、"這段經歷"、"終於" "明白"。
佢嘅自以為是,就係亂拋垃圾。
後果: 自己踢到果汁盒,跌倒。
這段經歷,係自己丟垃圾後,朋友仔唔啋佢,然後自己跌倒,朋友仔原諒佢。
佢終於明白: 自作聰明,係會整跌自己嘅。

有冇搞錯!

大家一齊睇吓呢篇連登分享,就會明白咩叫"這段經歷",乜嘢係"自以為是",重有"後果"可以幾嚴重。


首先,你要自以為是,都要有嘢係令你覺得自己真係啱嘅。
呢個主人翁,應該係自己好相信自己的投資能力,贏過幾次,覺得本金少,所謂買得大,嬴得大,索性問家人借錢,去炒股票。
然後,佢成功賺到錢。所以,佢更加確信: 自己係啱嘅,係掂嘅。

就喺佢"自以為是"的情況下,一次投資失誤,佢開始承擔"後果": 蝕咗10幾萬。
不過,講明"這段經歷",事件當然唔會咁易就close file. 
佢決定再豪賭一場,希望贏返輸咗嘅錢。

本來一切向好嘅方向發展。但係,賭仔總係貪勝不知輸。
結果,佢又輸多10幾萬。
總數虧損: 36萬。

輸錢,只係即時的後果。
更嚴重的後果係: 佢本來諗住同女朋友結婚、搬出去住。而家美夢成空,都唔知點樣面對女朋友。
重有: 錢係借屋企人嘅。有借,就要有還。
佢人工應該唔高,要兩年,先還到蝕晒嘅36萬。
如果期間,屋企人臨時有事,急需用錢,佢冇可能嘔得返舊錢出嚟。
到時,佢只能夠和盤托出,面對屋企人嘅指責。
未爆煲前,佢肯定會不斷受住良心嘅責備,冇面目去面對屋企人。

故事嚟到呢度,主人翁係咪真係"終於明白"自以為是的後果?
我哋睇吓佢嘅結尾: 我決定唔玩期權,轉陣投資正股。

咁佢係咪打算認真學習選股、估值、了解股票的基本面、學習技術分析,調整投資技巧、提升財商,再投資?
唔係喎。
佢只係"求過來人指點",嘗試繼續估市,睇吓個市牛定熊,再博多鋪。

主人翁嘅這段經歷,似乎更加能夠豐富文章的內容,而且層次分明,能夠一步一步,描繪自己點樣自以為是,仲有佢面對緊咩後果。
可惜,結尾收得唔太好,有少少爛尾。

文章分享完畢,傻貓自己都在學習運用期權,亦有投資正股。
前車可鍳,定當引以為戒。

5 comments:

  1. 師姐我沒看錯,那篇:自以為是文章,出自F.6,真的嚇了一跳,分分鐘P6學生好過佢,不過回心想想,補習社才有得撈的空間,再說另一篇連登分亨,很多大學生未畢業,都是這樣,靠借卡投資炒股,結果都是由屋企人填數,渡過險境,見得多就有點麻木,我有親戚的子女亦炒股輸幾拾萬以上,屢見不鮮,唯有當高昂學費,套用股壇術語,股海專收叻仔。:)

    ReplyDelete
    Replies
    1. 唉~
      呢個仔,聰明但懶散,成日都唔肯認真審題,又唔鍾意畫腦圖。
      作文經常離題,或者捉到鹿唔識脫角。終日文過飾非、咬文嚼字,勁多沙石。
      激死我喇😣

      槓桿投資,我唔係完全反對。
      不過,先要提升自己的財商,擴闊能力圈。
      過份自信,最後反艇要人救,就無鬼謂啦。

      Delete