歸隱田園的日子

妹妹真係好amazing. 😂佢好似有無限精力、無窮鬼主意。因為暈車浪，傻貓好耐冇返娘家。前日返去，喜見家門外，種咗一盆又一盆嘅生菜。行去屋後草地，又見到一行排晒隊嘅生菜。

問心，佢種得好核突。💩雨後冇鬆土、平日冇除雜草，而且冇喺適當時候，落花生麩，搞到d菜營養不良咁。冇疏苗，菜菜子都迫在有限空間，爭奪陽光、水份，所以好多都細細棵。😢

但係作為新手菜農，我覺得絕對值得畀個like佢。👍

種菜，唔算難，但要睇天做人。呢樣，有d似投資股票。買賣唔難，但要睇市況。

咁多款菜，傻貓最鍾意種生菜。泰國出嘅羅馬生菜，粗生、易種、少蟲害。而且出苗成功率高，葉形大，要嚟打邊爐、整沙律、生菜包，都得。喺香港買菜種，我鍾意去聯和墟街市，伯伯檔口好細，但菜種發到嘅成功率高。

股票，我最鍾意買香港藍籌股，不過近來都喜歡睇美股。你睇騰訊，跌完，又再升返。雖然被反壟斷法等等政策困擾，又被殺估值，但係每次跌到咁上下，又會拗腰彈返上嚟。仲有隻Tesla,你話佢估值高，擔心佢畀大陸封殺，驚佢唔夠芯片，要停產。但係又係火速收拾失地。唔好忘記FUTU,佢細細隻，但升幅每次都好驚人。

之前喺上水，要幫忙打理農莊。我本身係城市人，乜都唔識。請教東尼嘅爸媽前，通常自己會做咗功課先。所以睇好多耕種嘅書。

而家學投資，都係睇書、睇blogs,唔明睇到明，太複雜嘅，先請教谷友。

那時，日日返工前，5點幾就要淋菜，6點前要出門口，趕喺8點前，返到學校。放工，又要9秒9趕回家，在天黑前，淋菜、除雜草、鬆土、施肥。下雨天，要在落大雨前，搶先收割。否則，辛苦種好的菜，都被雨淋壞了。

而家投資都係，用技術投資法後，要預先睇好多圖，嘗試畫趨勢線，計好入市、止賺、止蝕位。在大市未反映佢嘅價值前，搶先買入，然後速食，鬆人。如果時間掌握唔好，大市逆轉，咁辛苦做嘅功課，投資嘅資金，就泡湯了。

離開上水，辭職，回娘家避世那段時間，傻貓瘋狂炒賣牛熊證，虧損非常嚴重。最後，只輸剩層一筆過買入的住宅物業。不過，當時無心打理，任由單位空置，所以並無現金流。幸好，我無聊想到在屋後種菜。家人，特別是妹夫，非常支持。佢身體力行，車我去聯和墟買菜種，又去上水五金舖，買農具。佢仲陪我周圍喺村內，執拾人哋起屋時，丟棄嘅爛磚頭。放假，佢陪我一齊落田，開墾、除草、翻土、開拓水源。連3歲大嘅柏霖，都幫手淋菜。(雖然佢最鍾意，係拎磚頭，壓死晒d 菜。佢話唔鍾意曬，唔鍾意畀蚊咬，唔鍾意我哋落田，唔喺屋企陪佢玩，又冇得出街踩單車。)

喺家人嘅支持下，傻貓一年後，終於唔再抑鬱，亦重新由上門補習、代課開始，重新投入教學工作。

睇到菜菜子，日復日健康成長，就算好天曬、落雨淋，畀蚊咬到成手成面成腳都紅紅腫腫，傻貓都冇怨言。如果日後，有機會再買樓，屋企附近又有地方種吓嘢，咁就好喇。

估唔到妹妹卸下女強人嘅外衣，可以咁貼地去為家人健康，出心出力咁付出，連菜都種埋。
我呢世人，最崇拜嘅，就係我妹妹。😘