繼續努力斷捨離

之前寫過幾篇文章，講斷捨離。

在"你幸福嗎?"，我已經講過: 物慾，我曾經有，而且乜都要求最好。因為，我覺得: 我值得最好。但係，一切已經唔同晒。而家，我只重視我的家人、少有的幾位好友。

所以，你會見到我在"傻貓買樓記: 出售二手傢俬電器"，灑脫咁低價出售所有傢俱。因為，佢哋只係身外物。同時，新居一些不合用的傢電，無論幾新、幾貴、幾靚，我都免費送出，或者低價出售。

免費送出嘅電視櫃

低價賣出咗妹妹送嘅，全新冇用過嘅光波爐

後來，在"生活中的斷捨離"，我亦描述咗現時家徒四壁的情況。我想要嘅，同一哥一樣，係空間。香港寸金尺土，每格地磚都係錢。唔啱用，阻住晒，不如放棄。

開始時斷捨離嘅，係物件，後來就係思維。你慢慢會發覺自己真正喜歡的、重視的是甚麼。而且，可以慳返好多收拾嘅時間。衣櫃密密麻麻，要搵衫襯衫都唔方便啦。我冇一哥咁叻，做到極簡嘅斷捨離。但係，基本嘅斷捨離，可以更加了解自己嘅需要、控制自己嘅慾望。消費前，分清楚需要、應該要、想要，通常都能成功減廢，並且慳荷包。

自從開咗自己嘅補習社，我同妹妹，不時在舖頭外面，擺放不合用的物品，免費送出。
冇錯，傻貓視財如命。但係，free二手物品，其實唔會賺到幾多錢。要賺錢，我會繼續改善投資技巧、畀心機教好班學生，做大個餅。我認為: 為物件尋獲真正賞識它們的人，給它們第二生命，更加重要。

Free出嘅物品，最受歡迎係以前買落嘅名牌手袋、衣服、頸巾，型號過時但操作正常嘅手機。通常擺一陣就冇咗。妹妹放嘅Dr. Marten 皮鞋，放咗2日。最凍嗰幾日，款式過時嘅禦寒衣物，例如Columbia外套等等，就擺咗2個幾禮拜，先陸續有人攞晒。

其次，就係姨甥仔、姨甥女嘅一大堆Disney正版玩具、冇電嘅Disney手錶，擺一兩日左右。麥當勞嘅公仔，擺成個幾禮拜，總算有人帶佢哋返屋企。

仲有好多人哋送嘅，妹妹同我，冇用過又未過期嘅化妝品、護膚品、指甲油，都有唔少捧場客。

至於我放嘅英文書、琴書、DVD, 手機殼, 就擺成個月，先有人攞。

總之，有人啱用，就好啦。

不過，呢兩日我斷捨離保健產品，卻被人懷疑賣假貨，令我好唔開心。

大家有睇開我嘅blog, 都知道我已經係高齡產婦，之前睇過好多唔同嘅中醫，都冇BB. 後來，我食咗天喜堂嘅天喜丸，慢慢改善體質，加上廣華醫院嘅中醫非常細心、專業，我睇咗幾個月，亦食咗天喜丸近4個月，先終於有咗BB. 

有咗就唔可以食天喜丸，生完先可以食返。不過，我買嘅天喜丸，6月6日就到期喇。如果就咁放出舖頭外面，我又擔心人哋唔清楚食法，或者有咩副作用。所以，我放上Marketplace, Carousel 賣。原價$550/ 1 盒，有12 樽。在屈臣氏買嘅，我諗住傳好孕，$80賣晒7樽。點知，有人留言話"小心假貨"。我真係嬲咗!!!

我只係唔想浪費咗 d 天喜丸，話晒我身體咁差，食咗都可以有BB, 咁我都想其他遇到同樣問題嘅婦女，有多一個選擇。佢冇向我求證，就留句咁嘅嘢，想點??

平時，我免費送出物品，因為我放補習社門口，冇成本，唔駛搭車，唔駛擔心買家會遲到、失約。但係交收，我要預時間，搭車出嚟。咁我收返少少錢，唔過份呀。對我嚟講，時間就係金錢。我有時間，會練琴、會睇書、行山、見吓屋企人和朋友。仲有，有咗BB後，我成日暈車浪，要我搭車出嚟交收，堅辛苦。我買返嚟，都要錢㗎!我收你錢，你唔高興，咪唔好買咯!!你畀得出，我收得起!!!

我唔介意人哋攞我free出嘅嘢，轉手去賣。佢有咁嘅時間、銷售渠道，係佢本事。但係，當我連成本價都冇計，只係想傳好孕，想物件有第二生命，想幫吓人，點解要用小人之心，去忖度我??

另外，每次free嘢，或者賣嘢，都總係有好多齋問唔買，同埋約好晒，又臨時取消，甚至no show嘅飛機友。亦試過買家遲到成大半個鐘。有時真係搞到成肚氣，都擔心會生個成日扭計嘅忟憎BB.

好嬲，好唔開心。
不過，牽涉到金錢，我明白好多人都會有戒心。
算了，呻完喇。冇咩事，我繼續執屋，努力斷捨離。

（後記：剛剛成功交收了。）

講返開心嘢: 最近，我開始突肚喇。

新居太細，BB出世應該會用好多空間，擺衫仔、BB床、BB車，諸如此類。
我已經收到谷友送嘅二手BB車、BB衫、紗巾。剛生完嘅朋友阿Wing，都話會畀和尚袍、衫仔、幾張BB床我 (佢竟然有4張)。另外，媽咪買咗好多好多保健嘢畀我食: 鈣片、probiotics, 葉酸。我已經送咗部份畀谷友。佢好好，竟然送返一盒好精緻嘅BB衫、鞋仔畀我。我完全覺得靚到可以做裝飾品。

唔知仲要預備乜嘢，不過，到時再徵啦。用完，再free畀下一個。
BB出生，空手而來，唔應該為呢個世界，製造太多垃圾。