Tuesday, September 8, 2020

傻貓買樓記: 出售二手傢俬電器


搬屋時,你會點樣處理舊傢俬

早幾日喺Facebook, 有人問棄置大型傢俬要幾錢:

傻貓從來冇諗過,丟棄傢俱要畀錢。因為,傢俬要錢買,我唔用,佢都有剩餘價值,冇理由要貼錢丟掉。

出售二手傢俱的好處:

1.省回清拆及搬運費用

2.延續傢俱生命

3.幫助需要及喜愛它們的人

傻貓現時租住的地方,實用面積: 495 呎; 即將搬入的新居: 370呎。好多傢俬,都放不下。傻貓呢幾個禮拜,都在積極出售傢電。

出售二手傢俱的壞處:

1.超花時間心力

貓不擅社交,與眾多買家溝通、約睇,疲於奔命。不時遇到左問右問,連幾成新都話要證明的人。梳化要知牌子、用咩皮,(免費放售嘅)衣櫃,要出示收據、拍片證明所有櫃桶開到。

明白大家真金白銀買嘢,都要make sure血汗錢係用得其所。但單字“排”、一開口就叫減價嘅人,貓會直接無視。

2.遇到機師/冇品衰人

以前,貓遇過不少毫無責任感嘅機師。約好時間,冇出現,你追問佢哋去咗邊?佢已讀不回,仲block埋你。仲有d人,猛咁叫我留起給他,結果影都冇。

最慘烈係第一次賣傢俬

層樓喺沙頭角。以為好近粉嶺,方便返工。點知條單程路,一早一晚都塞車。4個月後,決定搬返媽咪屋企。清屋,全部傢俱以$500放售。賣傢俱時,有人話全取,我留到最後一天,佢先話改期。

第二日,我要返工。就安排工人,特意入沙頭角等佢,大埔入去,等唯一一架巴士。搭一程車,都個半鐘。佢最後冇嚟,仲block咗我。

3.冇得用到last moment

擔心買家時間控制未必咁好,而搬屋當日又兵荒馬亂,加上成幢樓得1部貨𨋢,貓安排不同的買家,分幾日攞傢俬。

冇餐枱,用鋼琴食飯。

冇梳化,坐懶人梳化睇書。

冇床,直接瞓床褥。



出售二手傢俱小貼士:

出售傢俱,最好列明尺寸、瑕疵,多角度拍照,甚至拍片。

今次傻貓放售傢俱,選擇了以下平台:

傻貓已賣出的傢俬:

電視組合櫃 (免費)

梳化床+全新梳化套 ($50)



餐桌連餐椅 ($300)

單人床+床褥 ($100)

單人衣櫃 (免費)


Queen-sized 雙人油壓床 ($300)



大衣櫃 ($400)



茶几 ($30)


電競椅 ($100)


傻貓已賣出的電器:

麵包機 ($380)



風扇 ($50)




總結:

今次賣傢俬,都幾順利。只係部份買家,冇拆傢俬經驗,提醒咗都唔帶螺絲批、電鑽、板車、膠膜、密實袋(放螺絲)。有1個遲到成個鐘,得佢自己拆+搬衣櫃,又用個幾鐘。

不過,下次都係安排搬遷前,兩日內清屋算了。





No comments:

Post a Comment