為食貓：嘉寶漢堡

間屋，仲未裝修好。😔 

但一哥話D Park日租$500, 想盡快入住新居。咁好啦。😅  

好彩😁，原來葵涌呢度，好多正嘢食。😊

今日，傻貓就試食咗“嘉寶漢堡”。 

平日搭車經過，無論中午、晚市，都好長人龍。限聚令期間，都好多人喺門口等外賣。

 今日試食，嘩！真係好好味呀！  😋

傻貓堅覺得值得真心推介，就試試寫吓食評。😅

去到門口，先喺部food gulu攞籌。 

同平時一樣，好多人等緊外賣。不過，我哋只係等咗幾分鐘，就有位坐喇。 😃

入到去，舖頭細細，枱同枱距離係近咗d,不過裝修簡潔舒服。

原來間舖之前叫“嘉寶小食”。後來，漢堡包超受歡迎，甚至衝出葵涌，在尖沙咀都有分店。而光輝圍呢間旗艦店，剛剛於7月8日，完成裝修，重新營業。 

雖然食物受歡迎，但餐廳訂價唔算進取。

之前食慣喺昌寧商場，嗰間Kitchen Corner, 1個 burger 都$50幾60蚊, 加埋嘢飲、薯條，$100/位左右啦。

可能嘉寶呢度，要客人在門口點餐、畀錢，坐定定後，見到手上飛碟閃紅燈，就要自己出去攞餐。所以價錢實惠d?

我哋2個，食到好飽、好滿足，都只係$117.

傻貓食嘅係“香辣煙肉磨菇芝士牛堡”（$42），加$18, upgrade做套餐，有樽椰青水、薯塊。

 一哥就食“香辣煙肉蛋羊堡”（$50），佢仲加咗$5芝士、$7 罐裝汽水。 

個牛堡，真心推。😍😍😍

個包係輕輕焗過，脆脆哋，好香。芝士味濃郁，但冇蓋過生菜嘅爽甜、牛肉嘅鮮嫩味道。個蛋黃醬，好正。磨菇好好食，食到最後，仲feel到煙肉嘅香脆味道，超讚！

至於薯塊，應該係新鮮即炸，熱辣辣，好香脆。味道冇乜特別，不過都好食。

一哥嘅羊堡，唔好意思😅。因為佢話太好食，完全唔肯分畀我。我唔知係咪真係好食。

不過，佢話：羊肉好嫩滑，冇羶味。個包面脆，好食。可以再嚟。😊

店名：嘉寶漢堡

地址：青山公路499號嘉寶大廈地下A-B鋪

Facebook: 

食飽飽😋。

傻貓返屋企，開門見到個廚房，仲有滿目瘡痍嘅天花蝙蝠洞、打完仗嘅牆身，雖然仲有少少沮喪，但係心情已經好好多喇。😄