山系狗：此路不通？通！（葵涌至大圍）

今日好好玩！大滿足！😊😊😊

之前被一哥下禁足令，唔准穿林、唔准食生冷嘢、唔准太熱行山。😣

今日一哥趁工傷假最後一天，親自陪住行，孭晒所有嘢，Rebecca又肯陪我周圍探路，發掘咗幾條新嘅穿林路。行完，仲有得食壽司，正呀！！😁😁😁

本來一哥話，唔准喺安蔭巴士總站，行維修路段上山，因為段路要穿林，有浮沙碎石。佢陪我行過，覺得危險。

行到上石蔭，我在球場旁，抬頭見有另一樓梯、村屋。直覺那條路，比行石級直上城門水塘好玩，就游說Rebecca行。咁Rebecca行，一哥當然要跟。

行呀行，經過幾間村屋後，去到2間村屋，門口都插咗牌：此路不通。

行得咁辛苦，上咗嚟，我唔想落返去。開Google Map,明明前路可行。Rebecca上前探路後，提議選擇左邊路線。我哋開始穿林上山。

沿途不時聽到上方有人聲，但久未見人。不斷行泥路、上梯級，終於聽到有人問：“狗狗主人喺邊呀？”我上氣唔接下氣，差不多熱到暈。上到去只識喘氣。

幸好面前係冷氣隧道。那戰壕冰冰涼涼的，喝了一哥的椰青水、吃了Rebecca的鹽糖，我哋又繼續探險。

Muimui唔鍾意行地道，不斷走佬。大家努力哄她捐山窿。

裡面指示非常清晰，唔怕迷路。

隧道兩邊牆壁滲水，好涼爽。地上有蟾蜍跳呀跳，好得意。

行咗一陣，就返回地面。

保存得咁好，又咁乾淨嘅戰壕，買少見少喇。

出到去，原來就係平日成日經過嘅砲兵觀察所。

向上行，可以去孖指山。但我哋今次向下行，經城門主壩，去下城門。

久旱，水少。

麥徑6段，齋落斜，行得好舒服。落到底，有公厠，可添飲用水，所有energy返晒嚟。

主壩冇嘢玩，餵吓龜咁。

緩緩落梯級，玩爬坡、爬貓梯、影引水道。

行完鐵索迷城，行水管路出大圍。Muimui以前唔敢行嘅鐵橋，而家已經冇乜難度。高高望落下面嘅流水，Muimui選擇行中間石屎路。穩陣d?😂

有2條水管路，黑色那邊太曬，我哋行右邊綠色嘅。沿途有樹蔭、微風，幾舒服。過完橋，上完無限梯級，就係我哋鍾意行嘅泥路，行得好開心。

行到主壩，我唔識行左邊路經村屋去香粉寮、恒峰花園。行返我識嘅右邊馬路，幾步後，行樓梯落寶福山。

經過一堆村屋，安全抵達大圍市中心，食下午茶。

我恨咗好耐，終於有得食壽司😋

Rebecca嘅魚生飯

雖然我係唔食魚嘅貓，但其實我好鍾意食壽司。一哥之前唔畀我食，幾個月冇食喇。😣今日我話Rebecca想食，一哥冇反對，我哋成功食到日本嘢。大豐嘅下午茶，堅抵食。😊😊😊

今日行咗5個幾鐘，好開心，好滿足。😁😁😁

如果一開始，見“此路不通”，就調頭走；或者驚畀一哥鬧，唔敢提出食日本嘢；又或者見到好多間居酒屋下午休息，求其入紅茶，或者其他米線舖食嘢，今日就冇咁圓滿喇。😄😄😄

P.S.原來開始放復活節假喇，麥徑人山人海。幾日長假，最啱玩麥徑全走，或者衛徑長征。不過要行通頂，一哥又會話我，唔駛問都知肯定唔准。

仲有，天氣熱又曬，去玩澗簡直係人生樂事。不過一哥實唔准。睇吓幾時游說到Rebecca陪我行。就算只係行返新手澗，好似橫涌石澗、猴塘溪、大城石澗，我都好滿足㗎喇。

PPS.

今日跌爆咗個mon. 不過爛得幾靚，好似開咗幾朵花咁。唔影響使用，好好彩。😄

今日路線：葵興站 > 安蔭 > 麥徑第六段 > 城門水塘主壩 > 下城門 > 大圍