期權長倉蝕到喊

這幾天，補習朝9晚7，超級累。但好滿足。

整個腦袋都在構思如何推廣9月的常規課程，例如IG, FB的內容，店外的宣傳單張、海報。
當然，仲有認真想想拍甚麼短片，放上YouTube,吸吓新客仔。

最近總是提早個幾鐘，返補習社，批改積壓多時的學生練習，打卷、備課、出筆記。下課後，聯絡家長，講吓學生嘅學習情況，了解吓學生嚟緊嘅時間安排、家長的期望、學生的學習目標。

家長近日又介紹咗一批新學生。由於每位學生，我都會整一個學習檔案，詳細列出佢嘅強、弱項，嚟緊嘅教學方向，然後我會跟住設計教材、筆記，所以好忙好忙。

今日，心血來潮，下課後，開IB看看。
OMG! 原來我之前買咗隻騰訊long call, 行駛價$520. 由高位跌落嚟，唔見咗75%.

早幾日，多手買咗Tesla long put, 點知攰得滯瞓著咗，第二晚睇，Tesla由低位升咗唔少，有機會衝返上$700.
帳面已經唔見咗$2萬蚊港銀。

補習賺到嘅收入，都唔夠我賭性起，手多多亂買嘢，所蝕嘅數。

濼言出世後的生活方式，對我係一個好大嘅未知。
一哥似乎企得好硬，要一齊照顧初生B, 唔肯將侍產假延後。
我可能真係冇得生完第4日，就返補習社，如常補習。

但我唔想無所事事，日日對住唔識講嘢嘅BB.
出去補習，對我可能係一扇減壓嘅窗口。
我唔知點解釋畀一哥聽。其實我好驚，唔知自己做唔做到好媽媽，唔知自己湊唔湊得掂濼言。

補習，畀到我確定性、成功感、滿足感。
可唔可以，唔好困住我喺屋企?
每日出去補習幾個鐘，唔係好過份呀。

但如果佢堅決要求我坐月，我冇主動收入，咁我嘅賭性，就要管制一下，以免造成更大虧損。

佢知道我蝕大錢後，只係講:　＂你幫我買嘅股票，需要嘅話，就賣咗佢啦。＂
＂如果唔夠，我有＂
我真係O咗咀。佢嘅股票倉，係要嚟儲蓄嘅，唔係要嚟幫我減槓桿。
總之，我會自己處理。
唔同嘅股票倉，有各自嘅投資目標，唔可以亂過界。

佢知道我long put Tesla，先講我知，佢有long call Tesla．
我即時反應: ＂咁咪好咯，有錢賺喔＂
佢："我寧願老婆賺多d. 因為我買得好細，贏輸都係千幾至幾千蚊。但你買親都好大手。"
嗯，我會控制一下注碼，唔好再亂嚟。

今次唔post個倉出嚟喇。反正就係long call 騰訊、long put Tesla, 造成嘅嚴重虧損。

簡單講，我雖然係孖展戶口，但從來槓桿都少於1.
呢一刻，槓桿原來不知不覺，上升到1.4

我未整理到問題所在，只知道槓桿好高，而家我抬咗錢入去，暫時遠離一下個市，整理一下思路、投資方式，睇吓書，冷靜吓先。

本來每月補習收入的正現金流，可以減槓桿。
但BB就出世，好多家長驚我突然生得，都話要停9月，10月才繼續。
我諗要幾個月，慢慢恢復元氣。